البطل المغمور (الجزء الثاني) زهور القمر

تابع

#البطل_المغمور2  "زهور القمر"
#جمان_فريد
#الجزء_الرابع_والأربعين "تفسير"
رمضانكم مبارك
عَنْ أَبِي سَلَمَةَ أَنَّ أَبَا قَتَادَةَ الْأَنْصَارِيَّ قَالَ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ : ( الرُّؤْيَا مِنْ اللَّهِ وَالْحُلْمُ مِنْ الشَّيْطَانِ فَإِذَا حَلَمَ أَحَدُكُمْ الْحُلُمَ يَكْرَهُهُ فَلْيَبْصُقْ عَنْ يَسَارِهِ وَلْيَسْتَعِذْ بِاللَّهِ مِنْهُ فَلَنْ يَضُرَّهُ ) رواه البخاري ومسلم
💐💐💐💐💐💐💐💐💐💐💐💐💐💐💐💐
في الطريق..
يسوق في السيارة بصمت وملامح الغضب تقطر من وجهه..
وهما معاه يرتعشوا خوفا...
الصمت متاعه في مواقف زي هادي قاتل..
كل اللي قاله بعد ماعرفوا بوجوده ..
"تحركوا قدامي للسيارة"
قالها بصوت غاضب مخيف..
قالها ومعاش قال شي بعدها..
ولاسمحلهم هما يقولوا كلمه...
وبعد طول مسافه...
درس قدام الحوش وقال..
هيثم بنبرة حاده:انزلوا...
الزوز نزلوا ويكادوا يفقدوا الوعي من الخوف والتوتر..
هو نزل...
ومشي للباب فتحه وقال:خشوا..
هما الزوز خشوا..
شافوا سيارات زياد وسارة في الجنان..
زادوا خوف ع خوفهم.
وبوهم مشي طول للباب الدخلاني وهما لحقوه...
فتح الباب وشبحلهم بحده..
وهما طول خشوا وقلوبهم ترجف من الخوف...
سكر الباب ونادى؛سارة...زياد...
شويه وجت سارة...بعدين لحق زياد..
سارة؛خيرك بابا!؟
زياد شبح لحال خواته وقال؛شن في؟!
هيثم؛تعالوا تفرجوا تعالوا...تعالوا تفرجوا ع نتيجة تعبي وتربيتي...طلعت مانعرفش نربي واب فاشل..
انصدموا زياد وسارة في كلامه..
والتوأم بدوا يبكوا وهما يقولوا:لالا بابا ماتقولش هكي..
هيثم بصوت غاضب؛ولاكلمه...مانبيش نسمع حسكم..
زياد؛بوي شن في شن دارو!؟
وسارة تشبحلهم بصدمه وخوف..
هيثم بإنفعال؛قول شن ماداروش شد ع يدك...هما مايرفعوش في تليفونات معاهم للمدرسه لكن اتصلوا من المدرسه بلجين وربي بش يفضحهم قدامي خلا الاتصال يصير قدامي في المكتب طلبوا يقابلوها وعطوها مكان محدد برا المدرسه بعد الدوام والباص وصلهم...
زياد وسارة يسمعوا وهما مصدومين ع الاخر..
هيثم؛لاوفوق هكي جايبين المراة يكلموا فيها بأسلوب اقل مانقول عنه انه وقح..ويقولولها انتي حاطه عينك ع بابا قليلات الادب عديمات التربيه..
سارة تفكرت موقفها مع نوال من سنين وانحرجت حست ان الكلام موجه ليها حتى هي..
هيثم بإنفعال شديد؛اني ماعلمتكمش هكي ماربيتكمش هكي..اللي درتوه اليوم مايديروش بناتي..لامش بناتي انتم..
وهما الزوز يبكوا بشده..
خدي نفس بعدين قاا؛من اليوم...معاش نبي نشوفكم بكل..ولانبي نسمع منكم كلمه بابا..
جنان ببكي؛لابابا حرام عليك..
هيثم بعصبيه شديده؛اسكتي...
سارة؛خلاص اسكتوا معاش تتكلموا..
نزلت جنان راسها وقعدت تبكي..
هيثم مرر نظره عليهم وقال؛ياويلها اللي تجرب تجي تكلمني ياويلها..ولف ومشي طلع من الحوش وخبط وراه الباب بقوة..
زياد وهو يشوفلهم وحواجبه معقودات بغضب:صار طلعتوا هكي انتم!! تطلعوا من المدرسه وتدهوروا من ورانا..
جنان ببكي؛لالا اقسم بالله لا..
ريحان ببكي؛مانديروش هكي يازياد والله العظيم..حني بس خفنا بابا يتزوج مراة تانيه غير بابا مانبوش بابا ياخد مراة وينسانا..
زياد بغضب:ضمي فمك انتي وياها...
نزلوا روسهم وهما يبكوا بالعبرة..
زياد؛انتي..تنسي النادي هدا معاش في خلاص...ومن غدوة اني نرفعكم للمدرسه ونروح بيكم...طلوع برا الحوش معاش في الا للمدرسه حتى للجيران لا لابنمشي لعمتي لاخالتي...سمعتي سارة..
هزت سارة راسها وقالت؛حاضر..
زياد؛تحركي انتي وياها للدار...
وهما الزوز مشوا لدارهم واصوات بكائهم توجع في قلب سارة اللي ماقدرتش تاخد منهم موقف لأنها حاسه بيهم..
زياد؛شكلي بنغير رايي في موضوع السكنه..
شبحتله وهي مستغربه..
وهو مازال يشبح للجهه اللي مشوا منها خواته..بعدين هز راسه ومشي ولى لداره..
هي لحقاته بعيونها لين ادرق..
بعدين غمضتهم وخدت نفس..وزفرت...
فتحت عيونها ومشت بإتجاه دارها...
🍁🍁🍁🍁🍁
"وينه لتوا مفروض من بكري مروح"
رتاج وهي تحاول طمن نفسها:مرات زحمه يام..
سدينه؛زحمة شني اللي تخليه للساعه اتنين في الطريق وهو مفروض طالع من 12..لالا اني قلبي مش مرتاح حتى ع تليفونه مايرد..
رتاج بخوف؛ماترعشنيش يام بالله عليك حاسة روحي بنموت..
سدينه جتها وقعمزتها وهي تقول:قعمزي بنتي قعمزي ان شاء الله مافي الا الخير تعرفيني اني نخاف عليه بزايد..
فجأة رن تليفونه..
قاماته وقالت:اهو اتصل...وفتحت الخط وردت طول...تي وينك بالولد لتوا..
"خالتي سدينه عطاالله خطفوه ياخالتي"
سدينه بصدمه وفجعه؛نهاري احرش..!
رتاج بخوف شديد؛شن في يام!..
"طلعوا عليا ياخالتي وقفوني وشدوا عليا السلاح...عطوني طريحه وخوده هو ياخالتي"
سدينه بصدمه؛شن تقول انت شن تقول كيف ياخدوه منك كيف يانهاري الاسود..وسكرت عليه وهي ترعش..
رتاج ودموعها ينزلوا؛يام شن صار لكنعان يام بالله عليك قولي...
وسدينه تحاول تتصل برشيد وهي تقول بدون وعي:خطفوه! كيف يخطفوه كيف..
رتاج خبطت بإيديها ع وجهها وقالت؛حي عليا ولدي
ناضت سدينه وهي تكلم في رشيد بخوف؛هاه ولدي هاه..اسمع..اسمع...يارب...ولد اختك ياولدي خطفوه...
🍁ورشيد سمع اللي سمعه سيب كل شي وروح طول للحوش..
لما وصل لقي السواق مقعمز فم الباب بروحه وباينه فيه اثار الضرب..
نزله يجري وسأله ع اللي صار.
؛مش عارف منين طلعوا قصوا عليا الطريق ونزلوني ضربوني  وخدوه سيارة وكنعان فيها وهربوا...
رشيد؛معناها هما مايبوش كنعان!
؛لايبوه سمعت واحد فيهم يقول الولد في وسطها والتاني يرد عليه ويقوله ايه فيها...
رشيد؛مش متفكر ملامحهم!؟
؛ملتمين يااستاذ والله ماشفت منهم حاجه بس سيارتهم ريتها ازيرا سودا قديمه بس..
رشيد مرر نظره حواليه وهو يقول:لاإله الا الله..بعدين شبحله وقال...بلغت فيهم!؟
:لالا الحق خفت ع كنعان مرات يديروله حاجه كان سمعوا بالشرطه دور فيهم...
رشيد هز راسه وهو يشوفله وقال؛احسن مادرت..خش داخل خش..
خش السواق للحوش..ورشيد خش بعد وهو يحاول يفكر شن يدير فهالمصيبه اللي حلت ع روسهم..
وين خش لقي امه واخته في حالة يرثى لها...
بالذات رتاج اللي تبكي وتخبط وتقول ولدي..
وهو مش عارف شن يدير يهدي اخته ولاامه ولايفكر كيف يتصرف في اللي صار لولد اخته المفجوع عليه...!
🍁🍁🍁🍁
في دارهم..
مقعمزات جنب بعض ع سرير واحد..
جنان حاطه راسها ع كتف ريحان..وريحان حاطه راسها ع راس اختها..
ريحان؛ياريتني ماسمعت كلامك.
جنان؛باهي خلاص ريحان مش ناقصه اني..
ريحان؛شن بنديروا توا..
جنان:مش عارفه..لكن خايفه من بابا بش يعاقبنا عقاب قوي يتزوجها..
ريحان؛لالا اني اليوم حسيت ان بابا مش حاطها في بالها..
جنان؛خايفه نكونوا حني حطينهاله في باله.
ريحان بتذمر:اووف..استغفر الله..
وسكتوا الزوز وهما يفكروا..
شويه..دق الباب..
الزوز شبحوله..
"بنات نخش"
عدلوا جلستهم والزوز مع بعض قالوا:خشي..
انفتح الباب وخشت سارة وسكراته..
بعدين شبحتلهم لقتهم منزلات عيونهم خجلا..
تنهدت ومشتلهم..وقعمزت قدامهم...
سارة؛علاش ماجيتوش وقلتولي ع اللي تحسوا بيه.
شبحولها..
سارة؛مريت بيها حالتهم وفاهمه احساسكم توا..بس نبي نقوللكم ان حني بتفكيرنا هدا نولوا انانيين نفكروا في ارواحنا بس ومانفكروش في بابا.
جنان ودموعها ينزلوا:اني ديما نفكر في بابا اكثر حد في الدنيا نفكر فيه بابا..بابا هدا وماما وصديقي نحبه هلبه ياسارة ومستعده نديرله كله شي..نطيبله نعطيه دواه نغسل حوايجه ونكويهم..نهتم بحاجاته كلها مش حنقصر معاه بكل..
ريحان:واني معاها حني زوز نديروله كل شي مش حيحتاج لشي..
سارة قعدت تشبحلهم وتسمع شن يقولوا وقلبها موجوع عليهم
وفي نفس الوقت مش عارفه كيف تشرحلهم مقصدها..
مازالوا صغيرات..وتفكيرهم بريء..مش كل شي يفهموه..
جنان؛بالله عليك سارة سكري عليه الموضوع بكل بالله..
ريحان؛ارجوك سارة انسيه..
تنهدت سارة وقربتلهم وضمتهم الزوز بحنان وحب...
وهما يحضنوا فيها ويبكوا...
دموعها غلبوها وهي تسمع في صوت بكاهم..
بس طبعا..مافي شي يبررلهم اللي داروه بالنسبه ليها..
وخرت عنهم وهي تمسح في دموعها وهي تقول:مع هدا اللي درتوه اكبر غلط ومايعديش بالساهل..هاتوا تليفوناتكم..
قعدوا يشبحولها بنظرات الم..
سارة؛هيا ماتشبحوليش هكي..هيا جيبوا اللي قلت عليه..
الزوز مدوا تليفوناتهم وهما يبكوا..
خدتهم وقالت:جنان جيبي ادوات الطريزة كلهم..
شبحتلها بصدمه..
سارة؛جيبي جنان..
جنان شدت ع قبضة يدها بقوة..وناضت مجبورة ومشت لدولابها فتحاته وطلعت منه اداوات التطريز والقماش اللي عندها..
وريحان تشوفلها بألم..
وهي جايه اللي سارة تعطيها فيهم وكأنها تعطي فيها جزء منها...
خدت سارة الحاجات وناضت وهي تقول:اللي يدير لازم يتعاقب عليه بش يتعلم مايعاوداش مرة تانيه..
ومشت لباب الدار فتحاته وطلعت وسكرت الباب...
جنان طول انهارت بالبكي وهي تقول؛شن درنا حني شن درنا بس..
قربت منها وحضنها..وقعدت جنان تبكي في حضنها..
وبين عيونها ملامح الغضب ع وجه بوها وكلامه القاسي قاعد يرن في وذانها...
《 من اليوم...معاش نبي نشوفكم بكل..ولانبي نسمع منكم كلمه بابا..》
🍁🍁🍁🍁🍁
"ماتمنيتش يصير هكي بكل تمنيت لو جتني المكالمه وانت مش موجود"
هيثم:وانتي ناويه درقي عليا حاجه زي هادي!
لجين؛دكتور اني فاهمه عليهم وعارفه باللي يحسوا بيه هما توا في سن تخليهم يتصرفوا بتهور لأن مشاعرهم متحكمه فيهم...اي صح اللي داروه غلط وهما فاهمين كل شي غلط ..لكن مع هذا معذورات..
هيثم:في حاجات مالهاش عذر عندي..وع العموم نرجع نعتذر منك مرة تانيه نيابه عنهم..
لجين:قتلك دكتور مش واخده منهم موقف بش تعتذر..
هز راسه وقال:بارك الله فيك لجين..تقدري تتفضلي..
هي هزت راسها ولفت ومشت طلعت من حداه..
بعد ماطلعت وسكرت الباب..
هو غمض عيونه بأسف...
قلبه كان موجوع ومش مريحه بكل من لما طلع من عندهم ..
قسي هلبه في كلامه عليهم اللي كل مايراجعه يستغرب كيف طلع منه ليهم..
كيف قسي عليهم هكي!؟..
بس في نفس الوقت...
وين يتفكر حجم الاخطاء اللي داروها يشوف انه هدا انسب تعامل معاهم...
فتح عيونه وقال بحزن:مايعرفش الراجل يربي
زي ماتربي المراة...تربية زياد وسارة مازال خير من تربيتي لخواتهم..
••••••••••••••
احسان؛اكثر انسان ظالم لنفسه عرفته في حياتي انت..راك درت فوق واجبك درت فوق مايتحمل اي راجل في الدنيا..
تعال نجيبلك الرجاله اللي قعدوا ع ذكري نساوينهم وعندهم صغار معاشش فيهم واحد ربع اللي عشته..مع هذا قدرت تنتشل ولدك من الضياع وشوف كيف راح اليوم..وبنتك اتخدت ع خاطر افضل قرار وجبرتها عليه  وشوف توا كيف تحسن حالها وتغيرت للأفضل...بالنسبه لبناتك الصغار ايه صح غلطوا وغلط كبير بس انت شوف الدافع ورا هالغلط لولا هالدافع ماداورشي..انت عرفت تربي صغارك احسن من مية ام في الدنيا هادي نقولها واني مسؤول عن كلامي..معاش تنزل من قيمة نفسك..امثالك وبدون ادنى مبالغه..أبطال...
هيثم بضيق؛مش عارف...تنهد وقال...ربي يقدرني ونكمل معاهم هالمشوار الطويل ونطمن عليهم كلهم..بالذات جنان وريحان..
احسان؛ياريتك درتها من زمان وتزوجت..
هيثم ابتسم وقال:الحمد لله اللي مادرتهاش بكل..
ضحك احسان وحرك راسه يمين ويسار ورفع فنجان قهوته وشرب منه...وهيثم كذلك...
🍁🍁🍁🍁🍁
"ياحليلي ولدي وين ولدي وين المغرب مغرب يانهاري الاسود الولد وين"
هادي رتاج تعيط وتندب ع ولدها اللي مش معروف عنه شي لهاللحظه..
ورشيد خوها انجبر يدخل الشرطه في الموضوع ..
مالقاش قدامه غير هالحل...
والشرطه بدت عمليات البحث ع سيارة بنفس المواصفات طلعت في الطريق اللي ترفع لمدرسة كنعان الابتدائيه..
لقوا السيارة...لكن وهما يتبعوا فيها عن الطريق الكاميرات اللي في الطريق راح اثرها بعد ماخشوا للطريق الفاضيه اللي صارت فيها عمليه..
وتعممت مواصفاتها ع كل الدوريات والمراكز وبدوا يدوروا فيها..
••رشيد؛بإذن الله حيلقوه ويجيبوه بإذن الله يارتاج انتي اذكري ربك وادعي العياط هدا مايجيبش نتيجه..
رتاج وهي تبكي؛ولدي هدا ولدي كبدي يارشيد كيف تبيني نسكت قولي واني مش عارفه هو وين وعند مني..
سدينه ببكي؛مستودعاته ربي يابنتي مستودعاته الله مايضيعش عند ربي..بعدين ماتنسيش عيلك التاني يابنتي مش باهي ليك اللي ديري فيه..
رتاج ببكي شديد؛نبي ولدي يام نبي ولدي دبرولي فيه ياناس ولدي راني بنهبل..
فجأة رن تليفون رشيد..
شبحوله بلهفه.
وهو شاف المتصل قال؛خوه هدا..
رتاج؛من وين عرفوا!؟؟حي عليا كان لقوه بياخدوه مني تو يقولوا ماعرفتيش تحافظي عليه حي عليا حي..
امها قعدت تحاول تهديها....
طلع رشيد من حداهم ومشي يرد..
رشيد؛السلام عليكم..
"وعليكم السلام...رشيد ماكملك عن كنعان"
رشيد؛علاش بيكلموني عليه!؟
"كيف علاش قصدك مش عارف ان الولد مخطوف ولا كيف"
رشيد؛كيف عرفتوا!؟
"توا الكلاب اللي خطفوه كلمونا"
رشيد بصدمه؛ايه وشن يبوا بالزبط...
بعد ماسمع رشيد طلب الخاطفين من خو كنعان..
سمع عياط امه....مشالهم يجري..
وين خش عليهم لقي تحت رتاج بقعة دم كبيره وهي تعيط...
وامه تقول بهلع؛تبي المستشفى هادي المستشفى..
وهو اللي زاد انفجع ع اخته اتصل بالإسعاف...
ومافي الا بضع دقائق وجو رفعوا رتاج للمستشفى...
🍁🍁🍁🍁
"باهي 75في5بكم"
خليل:ترا قول انت بكم...
ضحك جهاد وقال؛اسكت انت ياراجل..
بدر؛شويه عمو خل نحسبها...
وهما يشبحوله وخالد يشوف فيه..
بدر:375...
خليل بصدمه؛والله صح..
جهاد؛حي ع عمك حي ياولد طلعت اينشتاين..
وجبده وضمه..
خالد؛حتى اني نعرف مش هو بس..
ضحك خليل..
جبد جهاد خالد وقاله؛انت بروحك انت مازيك حد يازعيم..
ع خشة عفاف وهي تشوفلهم بإبتسامه:خيرهم!؟
خليل؛بدر ياحاجه بيطلع عبقري زمانه..
خالد:حتى اني حناي..
عفاف بضحكه؛نجيهوملي ياربي هما الزوز  نشوفهم احسن ناس ..
جهاد؛آمين..
عفاف؛ونشوف وليد عمهم الصغير معاهم..
غمض جهاد عيونه بملل..
وخليل يشبحله..
عفاف؛مادريش هكي..اني ناويه قريب يتم العام نخطبلك وعرسك نبيه مع عرس اختك مادخليش بيك.
بعد عنه خالد وبدر وناض وقف وهو يقول؛ماتبنيش نقعد في الحوش انتي هي هادي..
ومشي وهو مضايق.
عفاف؛اشي!! تو اني شن قلت بش يدير هكي!
خليل؛قتلك قبل معاش تلحي عليه في الموضوع هدا بتكرهيه فيه هكي انتي..
عفاف:قاعده في راسه مانسهاش..مانيش عارفه لامتى بيقعد هالحاله..هونا هي متزوجه احسن زواج وعايشه حياته بطول والعرض وتبرطع..وهو قاعد عايش ع ذكرياتها..
خليل؛القلب يام مالناش عليه سلطان..
عفاف؛ياولدي بالعقل هي بالعقل شن ماكانت ظروفها هما الزوز مايصلحوش لبعض بكل..
تنهد خليل وقعد ساكت..بعدين غير عيونه لبدر وقال في سره"الله يسامح بوك ويرحمه".. ابتسمله وحط يده ع شعره ومسح عليه...
🍁وجهاد مقعمز في السيارة متاعه..
وفي يده تليفونه...فاتح ع صورة في الانستقرام ناشرتها صفحه مشهور لرتاج مع عبدالحميد في حفله من حفلات السفارة الليبيه في النمسا..
قديمه الصورة من بعد عرس دانيه...بس هو كل مايبي يتناسى رتاج ويكره التفكير فيها يرجع يشوفها..
وللأسف..الصورة كانت تزيد فيه هم ع همه..
▪▪▪▪▪▪
◇ديما نشوف في قصتهم غريبه يعني حتى اللي كبر بيناتهم كبر بطريقه مجهوله ومش معروفه اسبابه..
بس نقول..ممكن هما الزوز
مالقوش من يفهم عليهم زي ماهما فهموا بعض وانسجموا مع بعض..ماهو هي هكي كيمياء..معادلات ومركبات واوزان
في اللي زي مايقولوا عنهم ربك خالقهم لبعض..
والباين هكي فعلا هما الزوز مخلوقين لبعض..وحيكونوا لبعض رغم كل الظروف..كيف هادي ماكان يعرفها حد غير الله اللي مادام قدر لشي يكون حيكون مهما انقال عنه مستحيل..
والله غالب على أمره..
▪▪▪▪▪▪▪
#البطل_المغمور2  "زهور القمر"
#جمان_فريد
#الجزء_التاسع_والثلاثين "بيني وبينك2"
رمضانكم مبارك
( الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ) الرعد-28
💐💐💐💐💐💐💐💐💐💐💐💐💐💐💐💐
سارة وعيونها مليانات دموع قالت:كيف حالك خالتي سدينه..
وسدينه تشبحلها بملامح وجه غاضبه والدموع غرقوا عيونها وفاضوا..
وهي تتفكر في اليوم اللي ودعت فيه مجاهد وهو ماشي للجامع لعقد القران..
🔺️قبل سنوات...
سدينه بإبتسامه فرح وعيون دامعه؛الله يبارك على وليدي الله يبارك...الحمد لله ياربي اللي نولتني مانبي وشفت وليدي عريس..
مجاهد بإبتسامه؛مازال شويه ع العريس يام..قولي نص عريس..
سدينه:لاعريس عريس ومايطلع كان عليك...
ضحك مجاهد..
مررت نظرها عليه وهي تقول:الله يبارك..ربي يحفظك ياضي عيوني..وضماته...
وهو حضنها وقال؛ويطول في عمرك يام...
بعدوا عن بعض وهي قعدت شداته وقالت؛ربي يسعدك ويهنيك وليدي ويتتم ع خير..
مجاهد؛آمين..كثري من الدعاء ياقلبي وارضي عليا..وخدي يدها باسها..
وهي تقول:راضيه عليك دنيا وآخرة..
مجاهد:هي عطيني الاذن توا...
طلقاته وقالت؛في امان الله...
هو ابتسم وبعدين مشي طلع...وهي تنهدت بإبتسامه ومشت خشت داخل..
🔺️الوقت الحاضر..
سدينه؛شن ديري هني انتي امشي اطلعي برا..
دانيه بحزن ورجاء:يام بالله عليك..
سدينه؛سكري فمك انتي حسابك بعدين..
سارة ودموعها ينزلوا؛خالتي سدينه بالله عليك ماديريش هكي...اني والله ماليا ذنب اني لو كنت نعرف ماكنتش وافقت عليه..اني من قبل رديته من خوفي عليه بعدته عني واني نتعذب بش هو مايصير فيه شي...تمنيت لو قعد عايش وتزوج غيري وعاش سعيد ولا صار فيه اللي صار..بس هدا قضاء ربي وقدره ياخالتي اني والله ماليا دخل بحاجه اني لو نقدر نرد الموت كنت رديته عن امي ياخالتي سدينه...وقعدت تبكي بقوة..
ودانيه تشبحلها وهي تبكي بصمت..
سدينه ودموعها ينزلوا؛ياريتنا ماعرفناكم يابنتي ياريتنا..
سارة ببكي؛واني قلت نفس شي..بس كلمة ياريت مادير شي...هكي ربي يبي ياخالتي...هدا قضائه وقدره...قدر الله وماشاء فعل...وليه اللي عطاه وليه اللي خداه ياخالتي مافي حد يقدر يعترض على حكمه...مرات مجاهد توا في مكان خير من اللي انتم فيه وربي كافئه ع صبره وبره وع كل شي باهي داره في حياته...ربي يحبه ياخالتي سدينه ويبيله اهل خير منكم ويبيله مراة خير مني ويبيه يكون في مكان خير من هالدنيا...اللي زي مجاهد وزي ماما ياخالتي مش هدا مكانهم مش ليهم الدنيا هادي...تكرهي لولدك انه يكون في احسن حال ياخالتي..
حطت سدينه ايديها ع وجهها وقعدت تبكي بالعبره...
سارة قدمتلها وين وصلت فيها ضمتها وقعدت تبكي في بكي مش طبيعي....
ودانيه تشبحلهم وتبكي..
وكنعان متأثر ع صغر سنه باللي يشوف فيه ومش فاهم منه شي..
سارة ببكي؛بالله عليك معاد تحملي في قلبك عليا اني والله ماليا ذنب..ومانبيكش تزعلي مني لما تعرفي اني انخطبت لغيره ياخالتي...
لو بيدي مانبدل ظفر مجاهد برجال الدنيا كلها..بس هي هكي الحياة ياخالتي...
دانيه ببكي؛حتى اني مش بالساهل عليا نسيت راجح واللي صار معاي بس يام الدنيا ماتوقف عند حد الحي لازم يعيش يام مافي حد يموت ع حد..
سدينه حولت ايديها عن وجهها وحاوطت بيهم سارة وقالت بنبرة باكيه؛ربي يهنيك يابنيتي ربي يهنيك ويجعله العوض الباهي..
سارة غمضت عيونها براحه وقالت؛ربي يريح قلبك كيف ماريحتي قلبي ياخالتي..
ودانيه وهي مبتسمه قعدت تمسح في دموعها..بعدين شبحت لكنعان لقاته يشبحلها..مشتله..وضماته...
وهو شد فيها بقوة...
🍁وردت سارة صورة مجاهد والكتب متاعه والدبله اللي خدتهم كلهم سدينه ودستهم في الدار اللي دايرتها لحاجات مجاهد الدار اللي قاعده زي ماهي وريحته فيها وكأن قاعد حي في وسطهم....🍁
🍀🍀🍀🍀
وجي يوم عقد قران سارة وفاتح..
في هداكا اليوم سارة كانت تحاول تشغل نفسها بأي شي بش ماتذكرش الفاجعه اللي صارت معاها في نفس المناسبه من قبل كم سنه..
الانسان اللي يعاني من الخوف الزائد من تكرار شي معين صار معاه قبل يعيش في جحيم وين يحس انه ممكن يتكرر الحدث مرة ثانيه..
وحده الله يعلم باللي يدور في داخل...
والخوف بلاء عظيم...
يابال لو الخوف هذا تحول لفوبيا...
تفزع وين تسمع تليفون يرن...خوف من اللي تخبر بيه هالمكالمه...
واخر تليفون رن..كان لنسيبه...
••نسيبة:ايوه زيرو........باهي باهي......الفال ليك ياربي.....هي سلام..سكرت وقالت..قروها..
وماجده قعدت تزغرد...
وهي واقفه ورا رخامه البار متاع الكوجينه تشبحلهم ودموعها في عيونها..
وماحستش الا وخواتها التوأم هاجمين عليها وهما يحضنوا ويبوسوا..وهي منفجعه..
وبعدين جوها عمتها وخالتها يباركوا وهي يدوب ترد عليهم.
الخوف ياكل فيها ماكله..
تبي هاليوم يتم ع خير ومايصير فيه شي..
ومن داخل تقول وتردد"يارب...يارب"
ومرت ساعه تانيه...
وهما مقعمزين في الصاله يشربوا في القهوة وياكلوا في الحلويات ويهدرزوا..
وهي سرحانه تذكر في تفاصيل هداكا اليوم المشؤوم...
فجأة سمعت باب الحوش الخارجي انفتح...
شبحت للروشن لقت ريحان واقفه واقفه فيه وتقول من خش..
ريحان؛بابا وعمو احسان وعمو خليل وجهاد وزياد وفاتح وحتى المثنى جي...
ماجده؛معناها نوضي معاي بسرعه..
وناضت ونسيبه ناضت وراها وهي تقول؛هيا..هي..
ومشوا الزوز للكوجينه.
اما سارة ناضت ومشت لدارها وخواتها يشبحولها..
بعدين شبحوا لبعضهم بحزن...
🍁في المربوعه..
احسان؛عمك هيثم بعد يشد الكرسي معاش يعرفنا بكل..
المثنى؛زعما!
هيثم:قسما بالله بوك بيخليني نندم ان قبلتها...
قعدوا يضحكوا.
احسان؛ماهو اني ماعرفتكش وانت وزير قلنا بالك يتغير علينا خل نوقضه كل شويه بش ماينساش..
هيثم؛مالاكان هكي اول حاجه بنديرها نقطع علاقتي بيك.
ضحكوا..
خليل بإبتسامه؛شهاده لله حتى لما شدها المرة الاولى قعد زي ماهو نفس الكبرياء نفسه والآنفه هي هي..
احسان قعد يضحك بصوت عالي..
وهيثم يشبح لخليل وهو ساكت..
وخليل داير روحه ماقال حاجه..
وزياد والمثنى يضحكوا..
فاتح؛هييه معليشي الا عمي مانرضاش فيه الكبير كبير من يومه مش ليه جو تطنيش والجكترة البروف ربي يحفظه..
ابتسم هيثم..
احسان؛درت نسيب توا حيدافع عليك خير من ولدك.
خليل؛قول لقاق...
هيثم؛كلمة تانيه نخلي اختي عندي ..
قعدوا يضحكوا..
وخليل قال بضحكه؛سامحنا يابروف...اها...ودار بحركه بيده ع فمه وكأنه سرته..
هيثم؛احسن شي..
شويه رن جرس في المربوعه من داخل الحوش..
زياد ناض ومشي طلع.
احسان؛ايه قولي امتى بناكلوا عبمبر ونشربوا روزاطه مرة تانيه..
هيثم؛في فرح المثنى ان شاء الله..
ضحك المثنى..
احسان؛امتى فاتحه اختك ياخليل..
هيثم؛مانيش عازمك سادك اللي كليته اليوم..
احسان؛زيدها ع روحك...خليل بيعزمني ع فاتحه اختك..
خليل؛تفضل اكيد يشرفني..
هيثم؛بارد يعزم في روحه بروحه..
وهما يضحكوا....
🍁🍁🍁🍁
وبعد ساعه من الهدرزة والبصارة والجو الحلو...
روحوا احسان وولده وخليل..
وقعد فاتح اللي كان ليه طلب عند هيثم...
اللي وقف قدام دار بنته وقعد يدق ع الباب وينادي..
هيثم؛سارة بابا..
شويه وفتحت الباب وقالت؛نعم بابا..
هيثم بإبتسامه؛مبارك بنتي..
سارة؛الله يبارك فيك..
هيثم؛بنتي جهزي نفسك بش تطلعي مع زوجك يبي يعشيك برا..
ع جية زياد...
سارة؛شنو!؟ من امتى هدا!؟
زياد عقد حواجبه وهو يشوفلها..
هيثم؛شنو هو اللي من امتى.!!؟ الراجل قال ناخد مرتي ونتعشى اني وياها في مطعم قنين يبي يفرح بيك ومعاك وين الغلط!؟
سارة؛بابا خيرك! من امتى في الشي هدا اللي تنقرا فاتحتها ماتطلعش معاه بكل..
هيثم بعصبيه؛شن تقولي انتي بالله عليك شن تقولي...ردي بالك من كلامك واعرفي من تكلمي اني بوك...
سارة خافت ونزلت عيونها وهي مضايقه..
زياد؛بوي صل ع النبي..
نسيبه وماجده في الكوجينه يسمعوا والتوأم في دارهم وهما خايفات..
هيثم؛اللهم صل عليه...امشي خشي وتي روحك وبتطلعي تبي ولاماتبيش هدا زوجك واني نعرفه كويس راجل محترم لاديري في غلط ولاحرام..ولااني بنرضهالولك...خشي...
لفت وخشت وسكرت الباب وهي مضايقه ومعصبه..
هيثم؛تسمع فيها شن تقول اني بنرضالها دير الغلط..
زياد؛مش هدا قصدها هي ثقيله شويه بس..
هيثم؛لو سمحت ولدي الموضوع هدا ماتدخلش فيه اني نعرف كيف نتصرف...
زياد هز راسه وقال؛حاضر...
ولف ومشي طلع لصاحبه...
وهيثم خدي نفس وزفر...بعدين مشي خش لداره...
🍁شويه وطلعت سارة وهي لابسه اسود في اسود..
مش هني الغريب ابدا...الغريب هو البروش اللي لابساته واللي شافوه خواتها وهي طالعه..
وخشوا يجروا للكوجينه..
ريحان؛ريتوا البروش اللي حطاته...!!؟
ماجده ونسيبه؛خيره!؟...
🍁برا..
طلعت سارة لقت خوها واقف ع فاتح اللي كان لابس عربي وطالع فيه وسيم جدا...
شافها خوها بعدين هو شافلها شويه وغير عيونه..
شويه ومشالها زياد...
زياد؛مش مطولين حدها ساعه ويروح بيك..بري..
هي تنهدت ومشت..
وهي ماشيه زياد عيونه جو ع البروش انصدم وقال؛شن لابسه هادي!!؟
وصلت سارة فيه وقالت بملامح بارده؛السلام عليكم..
هو ابتسم وقال؛وعليكم السلام..تفضلي..
هي مشت قبله للباب...سبقها وفتحلها الباب وطلعت وهو طلع وراها شبح لزياد لقاه قعد واقف..حياه بحركة اليد..
رد عليه زياد بنفس الحركه..
سكر فاتح الباب...
وزياد حرك راسه يمين ويسار وخش داخل..
🍁فاتح فتح باب السيارة وقال؛تفضلي ياقلبي..
سارة قلبها فر لما سمعه شن قال...والوجه اكتسي باللون الاحمر..
ركبت طول...
وهو ابتسم وسكر الباب ومشي ركب...
سكر الباب وقال؛اربطي الحزام ترا..
سارة؛عارفه..
هو هز راسه بإبتسامه ولبس الحزام ..بعدين شغل السيارة  وتحرك...
فاتح:شارعكم قنين ومونس يعجب فيا.
هي لاتعليق...
طلعوا من الزنقه وهو قال..
فاتح:المنطقه كلها مليحه فيها كل شي عنده الحق عمي يقعد فيها..
كذلك لاتعليق..
شبحلها لقاها تشبح القدام ببرود..
تنهد بعدين فتح الراديو..
طلع قدامهم واحد يقول في شعر شعبي..
عندك حق..
زيدي في دلالك...
عندك حق زيدي في دلالك...زيدي علو ماكيفك علم
وسر الله باين في جمالك..نقش الله مو نقش القلم..
وكيفك حلم ولافنان طالك...ولارسم لو مهما رسم
وحتى البدر سلم ولحنانك...لك محال مايوطي حرم..
وحق الله ساكني خيالك...طول الدهر مافيها ندم..
فاتح؛سلمت...جت في وقتها..
وشبحلها ع جنب بإبتسامه..
سارة؛ممكن تسكره الشعر هدا مانحباش..ومانحبش الراديو بكل..
هو قال؛حاضر..اللي تبيه ياقلبي نديره..
وسكر الراديو..
سارة:ياريت تبطله الجو هدا والكلام هو متاع قلبي ومش عارفه شني الجو البيئه اللي اني نكرهه...
هو اختفت ابتسامته وحلت محلها ملامح عصبيه حاول بكل جهده يكبتها..مصمص شواربه..بعدين هز راسه وقال..حاضر..
وهي قلبت وجهها للروشن..
وقعدوا ساكتين الزوز لين وصلوا لواحد من اشهر المطاعم في العاصمه..
فاتح؛هي انزلي..
هي حولت الحزام ونزلت من السيارة..
وهو نزل معاها...
راجاها لين جت جنبه جي بيشد يدها هي جبدت يدها وحطتها في جيوب الجلابيه..
هو بلع ريقه وقعد ساكت وهو ينشي معاها لين خشوا الزوز للمطعم...
وقفوا الزوز عند موظف الاستقبال..
فاتح؛حاجز طاوله بإسم فاتح الشيباني..
الموظف؛تفضل طول استاذ فاتح..
ابتسم وشبح لساره واشرلها بيده تخش..
مشت وهو مشي معاها..
ومعاهم الموظف نفسه ووراهم مكان طاولتهم وهو يقول؛شرفتوا وآنستوا استاذي..
فاتح؛تسلم بارك الله فيك..
مشي الموظف..
وجي النادل وهو يقول؛اهلا وسهلا استاذ فاتح نورتوا..
فاتح؛بوجودك ...
؛شن تحبوا تطلبوا..
فاتح لسارة؛شن خاطرك تاكلي..
هي ببرود؛شي ماعنديش نيه...
هو بإبتسامه قال؛جيب ميه..
النادل؛حاضر...ومشي من حداهم...
فاتح:ماعجبكش المكان نغيروه في بالك مكان تاني!؟
ساره؛في الحوش..
فاتح ابتسم وهو رافع حواجبه وقال؛تبي نتعشوا في حوشكم يعني..
سارة ؛نبي نروح...اساسا اني مانبيش نطلع بابا جبرني..
الكلام هي كانت اطلع فيه من فمها كلام...
بس يوصله هو سكاكين...
ومع هدا كان مجبور يتحمل لأنه هو اللي اختار..
بوها قاله قبل حتتعب معاها وهو قال نتحمل ولازم يقعد عند كلمته..
ومش بس كلمته اللي ربطاته....حتى قلبه رابطه...
يحبها...وعارف اللي فيها..ولازم يسايرها ويدايرها لين يوصله الله لمراده...
رسم ع وجهه ابتسامه وقال؛تمام...نوضي..
هي ناضت...وهو لما ناضت عيونه جو ع البروش انصدم...
مشت...وهو مشي وراها...
وقفوهم المسؤولين ع المطعم وحاولوا فيهم يقعدوا وسارة مجبورة قبلت تقعد...
وولوا مرة تانيه لطاولتهم...
شويه وجاهم المدير وقال؛شرف لينا ومكسب كبير وجودك هني استاذ فاتح...
فاتح؛بارك الله فيك..
وسارة تشوفله بغيره...
المدير:ثواني والعشي يكون قدامكم...
فاتح؛تسلم..
ومشي المدير..
وسارة تشوف لفاتح..هو شبحلها وقال بضحكه؛خيرك..
سارة تنهدت وشبحت للمرش اللي يطل ع الشارع...
هو ابتسم وقال؛قريب تتخرجي خلاص..
هزت راسها بدون ماتشوفله...
فاتح؛في بالي شي بنديره لما تتخرجي مش قايلك عليه توا..
شبحتله وقالت؛ماتعبش روحك مانحبش المفاجآت ولانحب الحفلات..
فاتح هز راسه وقال؛تمام...
شويه وجوهم زوز بنات..
:السلام عليكم..معليشي استاذ فاتح بالله عليك صورة.
سارة حطت ايديها ع الطاوله وشدت بيهم فوطه..
فاتح انحرج  وماقدرش يردهم وقال؛تمام..
:فيديو معليشي بنزله سناب..
سارة شدت بيدها ع الفوطه بقوة..
فاتح؛مش مشكله..
وقف والبنات حداه بمسافه وبدت تصور وحده فيهم وهي تقول:سلام ياعيله شوفوا من معاي...
ابتسم فاتح..
؛مفاجأة ولا...والله هو  ماصدقتش عيوني لما شفته استاذ فاتح عندي متابعين يعزوك هلبه شن تقوللهم
فاتح:نمسيهم بالخير جميعا ونقوللهم ربي يعزكم ويعلي قدركم..
:ربي يحفظك استاذ..
فاتح؛نستأذن منك..
البنت؛اذنك معاك..ومشت كملت باقي سنابها...
وهو قعمز في مكانه..
سارة؛ماكانش لازم وجودي وجيتي معاك من اصله..
فاتح؛اسف ماكنتش نحساب بيصير هكي ..
سارة ابتسمت تهكما وقالت؛لاكنت حاسبها ودرتها بلعاني ع اساس بتستعرض قدامي شوفي اني شني وشن عندي ومن نكون..وياريته غير نافع....
فاتح:اقسم بالله مافكرت هكي..كل قصدي من الطلعه هادي ان نقربوا من بعض ونتعارفوا اكثر بس..لكن حقك عليا اني غلطت في اختياري للمكان..اسف جدا...
غيرت عيونها للمرش وهي تشوف ببرود..
ملامحها البارده تقهر فيه..مش بس كلامها الجارح...
تنهد وقعد ساكت وعيون عليها...
وهي ماحولتش عيونها عن المرش..
شويه وجابوا العشي..
مابتش تاكل منه ولاحاجه ع قد ماحاول فيها قعدت تشرب في الميه بس..
وكان في ناس يجوه بيصوروا معاه هو يعتذر منهم ع خاطرها..
وفي النهايه انجبر يروح بيها..
طول الطريق كانوا ساكتين ولاكلمه..
لين وصلوا للحوش....
فاتح؛كانت طلعة لأنك فيها...
"نحبك"
هي فتحت الباب ونزلت بدون ماتعبره..
فتحت الباب وخشت وسكرت الباب ..ومشت قعمزت ع الطاوله اللي قدامها وبدت تبكي...
ع طلعة جنان من باب الحوش الدخلاني لما سمعت الباب..
مشتلها وهي تقول بقلق:خيرك سارة!؟
هي هدت بكي وقعدت تمسح في دموعها وقالت؛مافي شي..
وناضت ومشت خشت داخل..
تنهدت جنان بحزن ومشت خشت وراها وسكرت الباب...
🍁هديكا الليله سارة مارقدت الابعد وين...
ليلها كله تخميم وصلاة ودعاء...وبش قدرت ترقد قعدت تقرا في آيات السكينه اللي تعلمتهم من بوها ورقدت...
اماهو..
ياااه عليه هو..وقلبه...وحبه...
سهر وهو يجهزلها في حاجه حلوة هي تحبها ...
وبعد ماكمل اختلي بربه...
صلى وبعدين قعد يدعي بلهجه بسيطه من القلب وبكل رجاء..
فاتح؛ياربي قلبها انت مولاه وصاحبه ومافي حد غيرك يقدر يوصلني ليه..يارب خليها تحبني وتأمن فيا وكبرني في عيونها...اكثر شي طالبه منك ياربي توا حب زوجتي يارب وانت ارحم الراحمين..
🍁طبعا من بيطلب العبد غير ربه...الله في يده كل شي كل شي تحت امره...في كل صغيره وكبيره مفروض نطلبوه هو وبس...
مع الأسف هلبه غافلين عن عبادة الدعاء..
غافلين عن قوة الدعاء..
وفي من هازي عليه..
وين يقولك اني عندي هم او طايح في مشكله ودرت وحاولت وتعبت بش نحلها مافيش فايده وين ينصحوه بالدعاء...يتهكم بملامح وجهه لو مش بلسانه....
مسكين ...مش عارف ان الدعاء مع بذل السبب يحقق فوق مايتوقع الانسان بمراحل...
حتى وان تأخرت الاجابه...وان صار العكس..
فهدا بعني ان دعائك مستجاب لكن اما بالتأخير للوقت المناسب او بدفع شر..
ويكفي الاجر العظيم اللي يكسبه العبد من عبادة الدعاء العظيمه...
¤ادعوه خوفا وطمعا إن رحمت الله قريب من المحسنين¤
🍁🍁🍁🍁
الدعاء
اللي قعدت متمسكه بيه مريم لين ربي استجاب ولو بعد حين...
وبرغم ان حقها خداته ثالث ومثلت...بس قلبها قعد واجعها ع روح بريئة مالهاش أي ذنب في كل صار....
••مريم؛ياروحي ياسر ديما قلبه رهيف مع الصغار مايتحملش..
امها:حتى مرته زيه والله ماتقول الا واحد من صغارها..لكن الوليد يوجع يامينتي كل شي يسأل ع امه وين يسمع الصغويره ينادوا ماما ...
مريم وعيونها مليانات دموع:ياعمري قلبي تقطع..
امها؛ربي يديرله طريق..العشيه بنمشيلهم بتمشي معاي ولاتبي ترتاحي..
مريم:لالا نمشي معاك خل نخش لداري نرقد شويه لين يآذن العصر..
:باهي بري تريحي بنتي تريحي...
تنهدت مريم وناضت ومشت لدارها..
خشتلها وسكرت الباب وهي تفكر في الكلام اللي سمعاته من امها عن ولد دنيا..
رفعت عيونها وقالت في نفسها"ياأرحم الراحمين"
🍁🍁🍁🍁🍁
في مستشفى الرازي...
واقفات الثلاته يهدرزوا في مستراح بين الممرات..
دانيه؛امس بس رتاج وصلت واليوم قلنا العشيه نطلعوا مع بعض...
سارة؛بنطلع معاكم..خاطري في السوق...
دانيه بضحكه؛تمام تعالي..
تهاني؛لولا خوك المعقد طلعت معاكم..
ضحكت سارة 
دانيه بضحكه؛ايه وانتي خودي اذن راجلك..
سارة خفت ضحك بس حافظت ع ابتسامه مسايرة وهي تقول؛ايه حقه في بالي مخطط نديروه لحفلة التخرج مش عادي..
دانيه؛اني لاخططت ولافكرت العرس اللي طلعلي فجأة خلاني مانفكر في شي تاني..قولي قولي...
وقعدت تحكيلهم ع اللي في بالها لحفلة التخرج وهما يتناقشوا معاها..
وانسجمت في الهدرزة عن الحفله ونست كل شي وكانت كلها حماس وجوها حلو...
فجأة سمعت نداء يقول..
"الطالبه سارة الكاتب ياريت تجي للإستعلامات"
هما استغربوا..
وسارة قالت؛إن شاء الله خير..ماشيه بنات..
دانيه:كلمينا هاه..
هزت راسها وهي ماشيه..
وكملت طريقها لين وصلت الاستعلامات وقفت ع الموظفه وقالت؛شن في..
؛في واحد يبيك قال بيستناك برا..
شدت ع قبضة يدها بقوة وهزت راسها ومشت طلعتله...
لقاته واقف وفيده بوكس حلو...
نزلت من الدروج ووقفت قدامه وهي تقول:كيف تجي هني هدا مكان قرايه مش لعب..
فاتح؛اول شي مساء الخير...تاني شي وسعي بالك معاي شويه وتحميلني معليشي..اني جيتك نشوفك ونطمن عليك وماشي طول..
زادت شدت ع قبضة يدها بقوة وقالت؛ياريت معاش تعاودها مش فاضيتلك...
بلع ريقه وابتسم بعدين قال؛تمام اسف وهادي اخر مرة بس قبلها نبيك تقبلي مني هادي...
هي شبحت للباكو في يده خداته...
وفتحاته...
لقت فيه كب كيك منظره يشهي ومغري لأبعد حد وفعلا مصنوع بحب...
وهي كانت تقاوم فهالحب بكل قوتها ومقاومتها هادي تخلي فيها عنيفه وقاسيه في ردود افعالها..
لهدف واحد بس....انه تنفر الطرف التاني منها وماتبيش تتعلق بيه...
حولت عيونها عن الكب كيك...وقعدت دور بعيونها لين طاحوا ع اللي تبيه...مكب..
مشتله طول..
وهو معاها بعيونه يشوفلها بإستغراب..
وصلت فيه وفتحت البوكس ولوحت كل شي فيه..
وهو يشوفلها بصدمه!...
بعدين مشتله ومدتله البوكس وهي تقول برفعة حاجب:تفضل..
هو قعد يشبح للبوكس بصدمه...بعدين مد ايديه وخداه وهو مش مستوعب اللي داراته..
سارة؛ياريت بعد هكي تفكر الف مرة قبل لديرلي مفاجأة...قتلك امس..نكره المفاجآت....ورمقاته بنظرة قاسيه وكأن كلامها ماسدش...
ولفت ومشت خشت داخل بسرعه..
وهو قعد معاها بعيونه لين اختفت بعدين رجع شاف للمكب هلبه وهو يفكر...
بعدها مشي طلع من المستشفى والموقف قاعد بين عيونه...
🍁هالموقف وجع سارة هلبه آذاها هي اكثر من آذى فاتح بمراحل...بس شن بدير مع عقلها اللي قاعد يقنع فيها ان اللي دير فيه صح ....!
صوت بكاها وعبراتها في الليل بوها يسمع فيه..
وقلبه كله ألم عليها ومع هذا شايف ان اللي قاعد يصير هو الصح ولازم يكمل فيه..
▪▪▪▪▪
◇فوبيا الفقد..اوالخوف الشديد المبالغ فيه من الفقد ..
هو نوع من انواع الفوبيا..واشدها..وهالنوع عانت منه سارة وعذبها هلبه...
وعلاجه الوحيد هو مواجهة المريض بمخاوفه بش يتغلب عليها...لهالسبب كنت نبيها تكمل في ارتباطها بفاتح ونواجهها بمخاوفها بش تعرف ان كلها مجرد اوهام..
نعرف بنتي ومش غابي فيها..زي ماحسيت زمان انها مايله لمجاهد..حسيت بعدين ان في نفسها شي لفاتح بس قاعده تقاوم فيه...
ماقدرتش نقول لفاتح حقيقة وضعها وهذا مايعنيش اني غشيته لإني نبهته قبل انه حيتعب معاها وان اللي صار معاها اثر عليها..لمحت بس ماصرحتش لاني مازال مانعرفش فاتح من كل الجوانب..ممكن لو سارة وصلتها عنده حدها يعايرها او يقول كلام يأذيها وهني حتنكسر اكثر واكثر..
تنهد وقال.. المشكله ان  وقتها كنت خلاص يعني ماقعد شي وتبدا الحكومه اللي اني فيها بتنفيذ مهامها...يعني حنكون مشغول لهذا كنت نبي نطمن عليهم ونتفرغ لخدمتي في الوزارة اللي مش حتكون ساهله حتى هي...
▪▪▪▪▪▪
🍀🍀🍀🍀
وتمر الايام..
ومن هداكا اليوم..
معاش تلاقوا سارة  وفاتح ومعاش صار بينهم كلام..
وهالشي كان مخلي جو سارة حلو..
بالذات وهي بعيده عن مصدر خوفها وحزنها..
ومنشغله بفرح صاحبتها دانيه..
كانت رجلها ع رجل دانيه ورتاج وين مايمشوا وقعدت تطلع معاها لين كملت بتاتها..
وفي اخر يوم طلعة رفعت معاها جنان لأن ريحان كان عنده تدريب في النادي..
••رتاج:ارفعينا لمطعم راجلك..
دانيه:ايه صح سرو خل نمشوا ناكلوا حاجه من غادي جعانه..
جنان قعدت ساكته وهي تشوف لأختها..
وسارة بعد تفكير قالت:تمام...
🍁🍁🍁🍁
في مطعم الفاتح..
اللي كان زاحم بالناس كالعاده..
هو كان في المطبخ يشرف ع الشباب اللي يخدموا عنده..
فاتح؛ايوه مليح معاش تكثر احفظ المقدار هدا في راسك لاتنقص ولاتزيد..
:تم يامعلم..
ع خشة زهير وهو يقول؛ترا اطلع شوف الطاوله اللي درتها لصاحبك..
فاتح مشي طلع وزهير معاه وين وصلوا في التجهيزات للإحتفال بصديق ما...
شاف الطاوله وقال؛مليح بكل زي مانبي واحسن..
زهير بإبتسامه؛حلو...
"استاذ فاتح"
شبحوا الزوز لصاحبة الصوت ..
وفاتح قال؛تفضلي اختي..
:نبيك في موضوع ضروري لو سمحت ع انفراد..
زهير:تمام بالإذن...ومشي..
فاتح:اذنك معاك...بعدين اشر بيده ع الطاوله اللي موتيها لصاحبه وقال..تفضلي قعمزي...
مشت البنت وقعمزت وفاتح قعمز مقابلها...
فاتح؛تفضلي اختي بشن نقدر نخدمك..
:عندي ليك اقتراح ونتمنى ان تقبله وتساعدني..
فاتح:إن شاء الله..تفضلي نسمع فيك...
🍁🍁🍁🍁
في مكان تاني ..
احد المؤسسات التابعه لدار الافتاء..
كان ياسر اخ مريم موجود مع واحد من المشايخ يحكيله عن قصة ولد دنيا..
الشيخ:إنا لله وإنا إليه راجعون..والله الواحد في الحاجات اللي زي هكي الواحد مايعرفش حتى كيف يعبر...اجارنا الله وعافانا .
ياسر:باهي توا ياشيخ شن الحل..
الشيخ؛لو السر قعد مكتوم كنت قتلك كمل جميلك معاه..لكن الامر مفضوح والعيله كلها تعرفه..يعني الولد هدا حيعيش منبوذ وسط العيله وحيعيش نتيجه اللي صار وحيضرر هلبه...لهدا في مثل هالحالات دار الأيتام هي افضل مكان ليه..
ياسر قلبه وجعه هلبه..
الشيخ:صدقني هدا فيه خير ليه هو يكبر ويعرف انه يتيم ولايعرف انه والعياذ بالله ابن حرام ومش اي حرام ...لاتدري لعل الله يحدث بعد ذلك أمرا..
ياسر غمض عيونه بألم  وهز راسه بعدين فتحهم وقال:ان شاء الله ياشيخ...ان شاء الله...

#بيني_وبينك
#البطل_المغمور2

...يتبع.....

هدا جزء تعويضي...يعني يتعبر وكأنه بقية الجزء اللي فات وارجوكم اعذروني الله قاعده نبذل في جهدي💓
#تفسير
#البطل_المغمور2

هدا جزء اضافي باهي...قصير صح لأنه اضافي...
ياريت ماتستفزونيش في التعليقات وتكتبوا قصير لأني ع سبله وايدي والحظر اليومين هما...☻