رواية
" مُلاذ أمن "
الحلقة الثالثة عشر " 13 " ✨
قعد محمد يقرا ف الاسم وهوا متردد بين يرد وبين لا
فالاخير فتح الخط ورد
- رشا ( بنت جيرانهم ) : تحساب روحك بتهرب مني كان مرديتش عليا ؟
- محمد ( شاف ليوسف وف خاطره يدعي علاها ) : سألتك بالله معاش تكلمييني
- يوسف ( يضحك ع تعابير وجه محمد ) : مشي مشي 😂
- محمد ( تعصب ) : اسمعيي اليوم المرا العاشرة تكلميني وكله مسجل ، كلمتك بالاسلوب والهدوء ممشاش معاك يا بنت الناس ، استري ع روحك وشوفي حياتك واعتقيني خير والله يوصل الموضوع لعيلتك والكبار ، تحشمي ع وجهك وديري ل روحك كرامة
مخلهاش محمد تتكلم وبس كمل كلامه سكر الخط ف وجهها وحط التلفون ع الطاولة بقوة
- محمد ( يشوف ل يوسف ومتعصب ) : خير فيتك تضحك شن يضحك فيك الززح
- يوسف ( يستفز فيه ) : مثال ل يلي يقولو عليهم مزيتات ولا شنو 😂، فرخة تدحنس ع الذكورة شكاللت شوارع
- محمد : يا راجل اسكت باه مش ناقص
- يوسف : شايفها انت ؟ بلكي طرف يا راجل تشدلك ف وحدة سكرت ال26 سنة قاعد مش مفكر ف الزواج يا راجل شن وضعك
- محمد : غر فكر فيه انت وتعالا تكلم
- يوسف : اني نجيب المرا بس الحوش وكامل شوف وضعك واشقى بروحك
- محمد ( يفكر كيف حتكون ردة فعله لما يجي يطلب منه اخته ) : اهو بنبدا نكمله الحوش بنزوقه وندير المواد الصحية وبنخدم المطبخ ، وبندور خدمة تالتة نحط راسي فيها بلكي نجمع
- يوسف : هلبا عليك خدمتين وبتزيد تالتة ت شن تحساب روحك مكينا ؟
- محمد : الجمعة والسبت كان نلقا نشوف اي خدمة نربح فيها حتى شوي خير من جاي وراقد فيهم
- يوسف : توا نشوفلك بلكي حد يبي يخدم نشوفك لكن متلقاش جمعة وسبت بس
- محمد : دورت محصلتش بكل اني ، يصير خير توا
- يوسف : قولي
- محمد : شني ؟
- يوسف : شن ناوي ادير ، نشكو ف حسام وعزيز ولا نزيدو ندورو ادلة ؟
- محمد : مش حندير شي لين يوريني الولد التسجيلات شن فيهم وندوور كل شي قوي ونشوف اكبر قووة ف طرابلس ونشكي
- يوسف : بالضبط كمل ع هكي ، لكن جو للتهديد ب اختي ياراجل مافهمتاش
- محمد ( كل مينفتح الموضوع يتوتر محمد ويخاف يوضح قدام يوسف ) : زييك محيرني هي تنوض ؟
- يوسف : خلينا وين بنمشو ؟ نسهرو هني ونرقدو ف السيارة مرة وحدة
________________
- سبين : وعليكم السلام ، كيف حالك نهال ؟
- نهال ( متعرفش مني ) : تمام بخير مني معاي ؟
- سبين : اني سبين ، امس تلاقينا يلي نكون قريب نخطفت ^ وضحكت ضحكة خفيفة ^
- نهال ( تفكرت يوسف طول وفجأ ارتبكت ف الكلام ) : اااه عرفتك ، كيف حالك توا ؟ شني صحتك واعصابك ؟
- سبين : الحمد لله ف نعمة من لما طلعت من العيادة ، مافيش شي خاطي الحمد لله
- نهال : كوييس الحمد لله ع سلامتك ربي حماك سبين
- سبين : الحمد لله حصلتها رعشة ؛
سكتت لحظة وكملت تحكي : اكيد اليوم شفتي سُفيان خوي ؟ وحكي معاك وله ؟
- نهال ( ارتبكت ومعرفتش تتكلم ) : ايه شفته صح
- سبين : اكيد تقولي كيف وهكي ، عندك الحق راهو اني بروحي انصدمت لما خوي جي وقالي ان بيتزوج وبيستقر مع بنت الحلال يلي تصونه وعارف انها بتصونه ، طول عمري واخدة ع سفيان فكرة ان ميركزش ع المواضيع هادي زواج ومسؤولية عيلة ؛ بس المرة هادي جدّي وناوي الحلال نهولة
- نهال : منعرفش شن نرد عليك الحق ، مواضيع هادي نتوتر لما تنفتح فهمتي ^ كانت مرتبكة ومتوترة ومش عارفة تتصرف ^
- سببن ( ضحكت بهدوء ) : عارفةة روحي احرجتتك حاسة بيك ماهو اني بروحي زيك ، تبي نقرمو خوي مع بعض مش مشكلة راهو ^ ضحكت ضحكة خفيفة ^ ، خليك مرتاحة ف الكلام اعتبريني زي وخيتك
- نهال ( حست براحة من كلامها ) : مش قصة هكي 😅 عارفة مواضيع زي هادي مسألة عمر وتبي تفكير كويس
- سبين : عارفة كويس ، اني وحدة جوني هلباا بس ولا واحد حسيت انه ممكن تكون عقليته متماشية مع عقليتي ، ف كل مرة يتقدملي حد نتعب لان عارفة الشي يلي منبيشي حنلقاه فيهم ، ف الاخير كله نصيب ،
- نهال : بالضبط كله نصيب وكل واحد حياخد نصيبه
- سبين : وبجديات زي اني زي خوي زي صاحباتي نتمنوك ل سفيان نهال ، الله يبارك عليك اخلاق واحترام ومُحتشمة ، واني خوي سفيان مش زي ماشفتيه انه نسونجي وجوه يبان كإنه خفيف وهكي ، خوي فرهودي بشككل ميخادش المواضيع بجدية من برا كل شي واخده ببصارة وضحكه ، وكل مرة يصير شي قوي نشوفه انسان تاني ، حكيم وكلامه مضبووط وحساس هلبا ، مش حنزيد نشكر خوي اني 😂 خلاص بنسكت
- نهال ( كانت نسمع ومنتبهة ل كلام سبين ولما قالت ان خوها فجأ يكون بشخصية قوية وكلامه جدّي اتفكرت لما كان يحكي ل لجين لما كانت تبكي ف العيادة ، ردت بتوتر لدرجة خبطت وجها من عبطها ف الرد ) : خودي راحتك عادي ، ف النهاية كله نصيب
- سبين ( حست ان في اقبال من نهال انها تسمع اكتر فرحت ) : شوفي يا نهولة مش حنكتر عليك بس اني بنت عايشة تحت ظل خوتها ، خوي سفيان وخوي التاني هما يلي مخلييني نعرف الصح من الغلط ونعرف كيف نتصرف وكيف ندير ، فكري كويس ف الموضوع وكان انتِ تبي تشوفيه وتكلميه قبل كل شي يصير رسمي مش مشكلة يكلمك وتشوفي وضعه وتسمعيله وبعدين قرري
- نهال ( كانت مضطربة ومتعرفش تاخد قرار ومتوترة ومكانتش تعرف كيف ترد ) : سبين اني موضوع جديد عليا ولازم نفكر فيه الاول ونقول ل ماما ع الاقل ،
- سبين ( حست ان نهال شبه موافقة وفرحت هلبا ) : عندك حق انتِ فكري كويس وبلغي عيلتك وامتى يناسبكم يوم نجوكم ، ولو تبي تتعرفي عليه قبل كل شي قوليلي نكلم سُفيان يكلمك
- نهال : ع خير توا وخليك عارفة ف النهاية كله نصيب
- سبين ( كانت متشتتة مش عارفة ردات فعل نهال بين اي وبين لا ) : ان شاء الله خير وربي يكتبلك يلي فيه الخير ، نقوولك نهال مش تتحشمي ولا حاجة ، بالله عليك مطوليش ع خاطر ان متحشمة وجو ولا نكلمك اني هاا
- نهال ( ضحكت ) : حبيبتي والله ، لالا ان شاء الله نرد عليك
- سبين : كويس فكري كويس وصلي استخارة
واعطي فرصة ليكم ،
- نهال : يصير خير حبيبتي
