قلوب بينها برزخ

حوار مع الألم

_شايله حجاب بي كلام الله  ( نظرته فزعتني وربكتني الخوف خلاني
استرجع ذاكرتي واتحجج بيها )
_ ليش
_ شنو ليش ( مدرسه الاسلاميه مره كالت البنيه من تكون بفتره العذر الشرعي لازم تتحصن بايات من الجن ومن ندخل  الحمام نقرا دعاء يحجب بينا وبين الجن مينكشفون على اجسادنا )
_اممممم اكلج ميامي مو بعدج صغيره على سوالف العجايز
هو الله الحافظ يعني الي ميشيل حجاب الله ما يحفظه منين تطلعيلي بهالسوالف انت
_ابتسمت هاي سوالف نسوان انت ما الك علاقه بيها
ثانيا انت مو مواعدني بشي شكلك نسيت
_بشنو
_ مو المفروض قبل منوصل لبيت عمي نروح للشيخ عبد القادر وناكل فلافل
_ تدرين والله نسيت زين ليش ما ذكرتيني ، يله على المره الجايه
بس ذكريني
وهسه فرشيلنا
_ بعد ان اطفئ الضوه وتمدد بصفي همسلي
_ شنو اكثر ذكرى او موقف بيني وبينج بهالمكان قبل الزواج لسى تذكري
_ هواي امور ترى مصار كم شهر من كضيتها بيت عمي اصلا
صرت احن لبيتهم
_ ميخالف انطيني موقف واحد
_ موقف احبه لو اكرهه
_ اي شي
_ اكره الايام الي جنت تأذيني بيها مره صحتني انزعك الجواريب والحذاء تذكر
بيومها كرهتك عبالي دتذلني بهالتصرفات
_ اذلج شنو هالتفكير الحقير اكو واحد عنده غيره وشرف يذل مرته
ثانيا انت مو بس مرتي بت عمي هم
بس انت تفسيرج للامور مرات لئيم لج اني جنت كل يوم اتحلف بيج
على سوايتج ويايه ومن جنت انزل اجازه الطريق كله اتوعد هيج راح
اعاملج وهيج راح اتجاهلج بالتصرفات واعلم واحجي ويا روحي
وبس ادخل لبيت عمي وتصيرين كدامي قلبي يحن ويبدي يقشمرني
وعقلي يزن ابقى بحاله تخليني افقد اعصابي فمن صحتج بيومها ردتج تبقين قريبه مني
جنت ادلل عليج ومشتاقلج بس بايع ثگل من حسيتج مستنكفه انغثيت غثيتج لان قهرتيني كلت هاي متحبني واني احبها ومدا اكدر اخليها تصير لغيري راح تبقى مجبوره عليه وتسممني بكلامها وتصرفاتها لحد ليلة زواجنا هالفكره بقت براسي
_وهسه
- هسه شنو
- رأيك بيه
-بشنو
_ اوي راح يرجع للمداهر مال قبل
_ هههههههه اوي ي ي ردت اسمعها
_ يله احجي
_شنو
_ اوي ثمين لاتصير مكروه
_ ههههههه هم طلعت الاوووي
لج هاي  اكثر كلمه احبها منج قبل احسج من تحجيها تتعيقلين بعدين
تغير الاحساس
_ شنو صار
_ راح تكضيها عليه شنو وليش
_ احسن الك لهيني بالسوالف لان حاليا حقدت عليك من تذكرت ذيج الايام
بدا يقبلني وهو يبتسم
_ يا سوالف ابويه انت
هو اكو واحد بهالدنيا يحبج بكدي حتى هشام ميحبج بكدي 
هالاسبوع اني تعاقبت من وراج لان دماغي وياج اسرح بيج
بس مشولياها لان عريس وسابقا ملتزم ماعندي مخالفه او انذار
_ بشنو اجيت على بالك
_ ميامي بداعتي اسألي النسوان الاكبر منج شلون تعامل الرجال
شنو تلبس وتصرف بالغرفه
_ استحي
_ لعد شلون تبقين خام و تستحين مني ومن مرت عمي تستحين
الحل
_ ههههههه شبيه ليش ما عاجبتك
_ بهالوضع لا اني كلت حروح اسبوع ارجع الكاج مشتاقتلي بس شو
الحال نفسه
_ والله اشتاقيتلك ومن دخلت ردت بيه الروح بس اذا انت محسيت بهالشي شسويلك 
_ حسسيني
_ شلون
همس باذاني
رفع وجهه ينتظر الجاوب
غمضت عيني حسيت بي تحرك من مكانه سمعت صوت قفل باب الصاله
بدا قلبي يدك سريع
...................
_ الو
_ هلو لهيب
_ خلصتي دراسه  لو بعدج
_ لا والله اليوم مافتحت كتاب وانت درست
_ من دخلت من المدرسه نمت ساعة كعدت لكيت ثمين وميامي رايحين يباتون بيت عمي وابويه وامي اخذوا هذال وراحوا لبيت خالتي يتعشون يمهم
واني بقيت وحدي بالبيت استغليت الهدوء وكعدت ادرس  هسه اخذت استراحه لان اهلي بعدهم ما رجعوا
_ اني اليوم كضيتها بالمدرسه ويا البنات افتقدت ميامي واشتاقيتلها
رجعت كضيتها نايمه العصر رحنا لبيت بيبيتي وابويه طلع ويا جماعته
قبل ساعه رجعنا خالي وابويه بعده ما راجع
_ اليوم اشتاقيتلج
_ انتظرتك تمر
_ طلعت من المدرسه متأخر وعندي استنساخ  رحت استنسخ وراها بوجهي  للدرس  الخصوصي منا لحد ما اخذت تكسي للمنصور راح الوقت عاد  كملت الدرس و
رجعت للبيت ب٤ هلكان من التعب 
يمكن تفهمين افضل دراستي ومستقبلي على ان امر اشوفج بس بالحقيقه اذا كان عندي طموح اوصل لهدف هسه صار عندي طموحين
اوصل لهدفي الي راح يوصلني للهدف الثاني وهو انت تكونين الي
فيعني اذا قصرت بالاهتمام لا تعتبين ولا تزعلين مني
_ لا ما ازعل منك ولا اريدك تهتم بيه على حساب مستقبلك  لان
انت ماعندك غير هالايام وراها راح تكعد بالبيت الاربعين يوم وتبدي الامتحانات فاريدك تركز واذا تحبني صدك اطلع المعدل الي يدخلك المجموعات الطبيه
— ان شاء الله
_ لهيب اريد اسألك سؤال بس لاتفهمه غلط الله يخليك
_ كولي
_ انت تشوف ميامي مرتاحه يعني تعلمت عليكم
_ تريدين الصدك ما اعرف لان اغلب الوقت لو بغرفتي ادرس لو بالمدرسه لو بالخصوصي
فقط بالوقت الي اكون وياها احسها تعلمت علينا بالخصوص اني وياها علاقاتنا اقوى من البقيه
يمكن تمون عليه حتى اكثر من ثمين لان كم مره تطلب مني شغله وتگلي انت گله لثمين من يتصل
_ انت ورده هوبي منو يكدر ما يحبك
_ اني المهم عندي بهالدنيا وحده تحبني واحس قلبها ويايه
_هوبي اليوم انت غير الاشتياق مأثر عليك
_ هههههه سبحان الي خلقنا اني وثمين اخوه هو بلسانه يلف العالم لف
واني بهالسالفه صفر هو جرئ اني خجول
بس ويا الناس الي احبهم شخصيتي غير وامون عليهم بسرعة 
_ هوبي تصبح على خير لازم اروح الجرس اندك هذا ابويه
_ يله عيني تصبحون على خير انت والاهل في امان الله ...................
صباح يوم الجمعه
_ فزيت حسيت بسبسه قريب مني التفتت لگيت ثمين
يعد وهو يتمرن على الارض ( تمرين البلانك )
صباح الخير
ماجاوبني بقى يعد وبقيت اتفرج عليه واني متمدده وايدي جوه خدي
عرفت ديعد وقت يكمل بي
ورا دقايق تحرك وكعد على رجله ابتسملي
_ صباح الخير شو صحيتي بعد وقت الساعه ٧
_ بعدني نعسانه بس الفضول خلاني اصحصح وابقى اراقبك
انت شعندك صاحي لعد
_ اني متعلم افز الصبح بالخصوص اذا نايم مرتاح ومتعلم افوت اسبح
الصبح بمي بارد ومتعلم اشرب يوميه كلاص حليب اطك ويا بيضه
بعد اي سؤال ؟يا فضوليه هاي انطيتج نبذه شويه شويه تتعلمين عليه
_ ابتسمت
اكو واحد يشرب حليب وبيض
تقرب رفع الشرشف
_ ادني خلي اتمدد ورانا نتريگ باقيلا بدهن هسه خلتها مرت عمي على النار
من جنت اشرب الحليب ورجعت نامت تعلمي منها تصيرين مره معدله
_ ليش اني مو معدله ثوموني ابتسمت بتدلل وعيني بعينه
_ همسلي بصوت خافت عيون ثموني معدله ونص
تعالي خلي راسج على ايدي ونامي
_ شوكت نرجع للبيت
_ قبل الغده
_ مراح توديني للشيخ عبد القادر
_ غير مره ان شاء الله لان ورايه العصر اطلع اشتغل بالسياره
بلكت احصلي كم كروه لليل
_ ان شاء الله
غمضت عيني وهو بدا يحرك شفايفه
سألته واني مغمضه
شنو دتحجي
_ دا اسبح منا لحد ما اغفى
_بقيت اتگلب احاول اغفى الى ان التفت وسألني
_ شو لايبه بيج شي
_ لا بس مدا اكدر ارجع انام
_ دغمضي عينج
_ بدا يطبطب على كتفي  مثل الطفل من يريدون ينيمو
هو مغمض ومبتسم
ابتسمت وفهمت ( ديذكرني بالحادثه الي سولفتها اله من صغار ونامت بيبيتي وهو طبطب عليه حتى انام )
بالفعل استرخيت وغمضت عيني بعدها ما حسينا
الا باب الخطار اندكت
وايد ثمين تهزني حتى اصحى
_ ميامي كومي صاحونا على الريوگ
_بعد عشر دقايق التمينا على السفره
وشكل صينيه الباقيلا بالدهن والثريد مزين بالبطنج وفوگاه بيض العيون
صبلي ثمين  بصحن والتفت عليه
_ اعصرلج عليه ليمون
_جاوبته بايجاب بعد ما اخذت الماعون بقى يسألني اخليلج بعد
برغم هو كان مستلذ بهالاكله وما اكتفى منها الا هو وعمي قضوا على كل الي بالصينيه
همسته
الف عافيه
التفت ابتسم محرج
_الله يعافيچ هسه گلتي هذا رجلي مفجوع
_ لا والله بالعكس عرفت هاي وحده من الاكلات الي تحبها ولازم اتعلمها
_ دگومي ابويه انت وصبيلنا چاي من ايدج الحلوه
_ بعد اكثر من ساعتين
ترخصنا حتى نرجع للبيت
بالرغم عمي ومرته لحوا نبقى للعصر لكن ثمين عنده شغل
اول ما وصلنا للبيت
دخلنا لكينا عمتي بالمطبخ دتطبخ
شلونج يمه .... شلونج عمه
_ هلا هلا
زين من رجعت تتغده ويانا عاد نشوفك
_ شوكت الغده حتى وراها اطلع اشتغل
_ ب٢
_ ياه اصعدي غيري ملابسج وتعالي ساعديني
_ صار هسه صاعده
صعدت ويا ثمين غيرنا ملابسنا وانتظرته ينزل حتى اخفي الاشياء الي جابتهن مرت عمي
التفت عليه
_يله متنزلين
_ انزل هسه اجي وراك
_ نزل وبديت افكر وين اخليهن الى ان لكيتلهن مكان بالسطح
ورا غراض
نزلت يم عمتي الي بدت مضايقاتها الي وهي توبخني ان ما احاول ابعد ثمين عنهم وعن البيت
بقيت ساكته لا اكدر احجي ولا اكدر اطلع واتركها وحدها
انزعجت من سكوتي التفتت الي لگتني اسوي السلطه نترت بيه
_ غسلتي ايدج
_ بهتت ورفعت راسي الها عمه مو كدامج غسلتها
_ دتركيها لا تسوين شي اني تلعب نفسي اكل من ايدج
_ بهالاثناء دخل عمي استغربت تصرفه وكأنه سمعها
لان تقدم لحد عندي واخذ شريحه من الخيار الي جنت اثرم بي
اكلها وهو يسأل عمتي شوكت يصير الغده
_ جاوبته بنفور بعد فد شويه
_ التفت الي
هاي السلطه خليها الي مو تصيرين نحسه وتخليها لرجلج
_ ابتسمت حسيته طيب خاطري
واتفاجئت وهو يتحرك ديطلع قبل راسي
احساس اثلج قلبي بسعاده حسيته ابويه الي سواها للحظه لان الشبه بينهم جبير حتى حركاتهم بيها شبه
_ والله يا ميامي انت مثل امج سبحان الله هسه رجعتيني سنين ورا
من جانت امج تسوي نفسها غشيمه وفقيره لا تحل ولا تربط  وتخليني احس اني الذكيه السباعيه  واكعد اعلمها وافهمها تالي هي طلعت  افهم مني ومن جوه لجوه طلعت بيت وحدها قبلي وابوج يباوع لحلگها  وانتن بناتها على قلبها واني حظي لا كعد ويا رجال ولا ويا ولد
تعبت حتى انت تجين على الحاضر تدللين عيوني
_ عمه انت هم مثل امي اني منج دا اتعلم شغلات يم اهلي ما تعلمتها
وامي من قبل تگول عليج شاطره وام بيت وتعبانه على تربيه ولدها
ومن دخلت عدكم وشفت الولد وتعاملهم ويايه عرفت حجايه امي صح انت مربيتهم مرتبين رياجيل معدلين
ثمين يموت على التراب الي تمشين عليه اليوم الصبح مرت عمي سوتلنا باقيلا من كملنا گلي طيبه بس من ايد امي اطيب ورادونا نبقى نتغده
مقبل گلي اني انزل مشتاق لامي وطبخ ايديها اريد ارجع اشوفها واتغده وياها
_ اي اني ماكو وحده تعبت وربت مثلي ولا بطبخي ولا بندارتي
العالم حاسديج عليه وعلى ثمين
_ الحمد لله
_ ديله تعالي حضري السفره دنصب وصيحيهم
_من هاليوم بديت اطبق تعليمات مرت عمي باسل
واولها ما نويت انام بالغرفه بهاليوم طلبت من ثمين انام بالسطح مثل المره السابقه
بعدها بفتره بديت احس باعراض الحمل
وبيوم قبل لا ينزل ثمين اجازته  واني بالمدرسه
انتظر جرس الفرصه يرن
طلعت للساحه انتظر مي
اول ما لمحتها اشرتلها
_ ها شلونج ميو
_ الحمد لله
_ شكو شبيج
_لا مابيه بس مي اني يمكن حامل
_ رحتي للدكتوره
_ لا بس ناويه اليوم احجي ويا امي ارجع وياج انتظرها بلكت الحگ عليها مثل ذيج المره
_ واذا ما لحگتي عليها اني اگلها او انت خابريها من يطلع ابويه واحجي وياها
_ هو هم هيج خلي اشوف بلكت اذا باجر كدرت تاخذ اجازه اخلي لهيب يذبني يمكم الصبح وما اروح للمدرسه اخليها تاخذني للدكتوره
_ زين شعجب ما فكرتي تخلين عمتي ام ثمين توديج
_ اسكتي يا مي الله يخليج هالمره متعبتني بالحيله واسلوب المؤامره
والله مدا اعرف شلون ارضيها لو اجاريها تختلقلي المشاكل من جوه الكاع وصلت مرحله سلمتها لرب العالمين لا ما اكدر لكيدها 
_ اوه والله هالمره من الفضاوه العدها هيج تسوي
_والله هو طبع وغيره هسه فهمت اكو غيره تحرگ صاحبها وتخلي
يكره حتى بدون ما يكون المقابل مأذي مجرد هو يثير غيرته او يحس بالنقص يمه يكرهه
هاي اني علتي وياها ان اني بت منيره اكثر شخص تغار منه وتحس بالنقص تجاهه
خبلتني لج كل ما صارلها فرصه تذم امي واني احاول احجي وياها بصيغه دبلوماسيه اهديها ان امي تحبها وتمدحها وميفيد
يعني والله مرات يدخل بعقلي الشيطان واريد ادافع عن امي وارزلها من تجيب سيرتها بس افكر وين اروح اذا سوتلي مشكله وگالت متبقين بالبيت واكيد رجلي مراح يسمعلهم بس هم راح تبقيني على عمى عيونها اذا كارهتني هسه مره راح تكرهني الف مره
والله تعبت من ابويه الي ما يرحم ومنها وله البقيه ستر الله عليهم
طيبين ومداريني وهم هم سبب مخليني اسكت واتحمل لحاطرهم
_ اتحملي لخاطرهم لعد بلكت الله يديها وتبطل هالسوالف من تعرف بيج حامل
_ ان شاء الله
_ بهاليوم رجعت ويا مي بعد ما اتفقت ويا لهيب يبقى ويايه
لان عندي موضوع ويا امي
ومن حسن حظي قبل لا اطلع ب٥ ارجع للبيت دخلت امي
_ ها ماما شلونج
_ الحمد لله حبيبتي
_ ليش مگلتي جايه اليوم جان رجعت من وقت
_ والله ماما هسه گتله اللهيب خلي نروح لو متأخره ٥ دقايق متلگيني
_ ابن عمج وين لعد
_بالهول ديتفرج تلفزيون
_وخواتج
هسه جانو يمي بالمطبخ بس صعدن للسطح يشرن الملابس
_ دخلي نحمي الاكل حتى نتغده
_ لا ماما منلحگ واخاف ناكل وتالي عمتي تحس علينا ماكلين
عندي شغله وياج
_ خير
_ ماما اني يمكن حامل اريد اروح للدكتوره اذا تكدرين باجر
تاخذين زمنيه حتى اخلي لهيب يجيبني هنا وما اداوم انتظرج ترجعين وتاخذيني للدكتوره
_ لعد باجر الصبح داومي واني اجي للمدرسه اخذلج اجازه اوديج ونرجع للبيت اتفقي ويا لهيب يجي ياخذج منا
_ ماشي
اني هم راح اتصل العصر عليج حتى تأكديلي
_ لا هاهيه رتبي امورج على هالاتفاق
_ ان شاء الله يله احنه هم يله نروح تأخرنا
خلي اصيح لهيب
_ بعد ان سلمنا وطلعنا وبطريق الرجعه فهمت لهيب على الاتفاق من دون ما اذكرله سالفه الدكتوره والحمل مجرد انطيته علم امي رايدتني ابقى وياها ماطول هي مجازه وابويه بالدوام
بهاليوم بقيت افكر ابلغ ثمين او لا
اخاف ابلغه ويگلي خلي امي تاخذج
واخاف ما ابلغه ومن يدري بروحتي من ورا يزعل
قررت ابلغه بحجه استحي اروح للدكتوره ويا عمتي واستحي الدكتوره تكشف عليه بحضورها
للعصر صار اتصال بيناتنا  وما كدرت ابلغه قررت اروح من ورا
_ ثاني يوم
دخلت للدكتوره بعد ما طلبت مني اسوي التحليل
اتضح اكو حمل مؤكد
رجعت ويا امي للبيت جانت كلش فرحانه اول ما دخلنا بدت تحضرلي ريوك
وتملي عليه تعليمات شلون اداري نفسي واغذي الطفل وانتبه على حركتي وما احاول اتعب وووو
بقينا اغلب الوقت بالهول اني وياها نسولف وتستذكر ذكرياتها من حامل بيه كأول طفل وبشنو توحمت وبمعانتها وبعدها بدت تذكر امور واخداث بالماضي وعلاقتها بعمتي ام ثمين وشلون جانت مخدوعه بيها وحاسبتها مثل اختها ومأمنه بيها وشلون جانت تحوكلها المشاكل وتطلع
من السالفه وتدين امي
وبنفس الوقت تلتف على امي تقنعها هي وياها مو عليها وان الي سوته لمصلحتها وووو اخذنا الوقت
_ هلو
_ هلو اليوم تقبلين نرجع سوه لو هم مثل كل مره
تخافين احد يشوفج تمشين ويايه
_ هم ارجع اعيدلك مثل كل مره من ميامي ويانا عادي بس وحدنا لا
محد يعرفك ابن عمي وانت هم متقبل تجيبلي الحجابه 
مو صح هوبي
_ اممممم صح يا عيون هوبي
بس عندي حجي وياج ضروري
_ عود نحجي بالتلفون
_ وين بالتلفون اذا احنه كل شهر مره امدر احجي وياج
_ هاي بعد تتحمل
_ جديات مي دا احسج مبتعده عني ومشاعرج بارده ويايه
_ هوبي انت صاير تتحسس ونفسيه يمكن كل مدتقرب الامتحانات
تأثر عليك
_ يمكن صح ويمكن الي حاس بي هم صح
_ لا مو صح بس عقلي ويا دراستي وقلبي وياك ولان حاليا وضعنا
يحدده المستقبل
الافضل الك يا عيون مي تركز بدراستك لان اني هم اريد شخص اتباهه بي كدام الناس
_ يعني اذا ما اطلع طب متتباهين بيه
_ اممممم انعدل الصيغه
لخاطري طلع مجموعه طبيه
_ يعني انت ما حابتني حابه فكره الطبيب
_ اي صح ههههههه
_ ماشي يله مع السلامه
_ الله وياك ابن عمي
بعد ان كان يمشي ورايه بسافه قريبه ويسولف انتبهت عليه صار كدامي ويمشي بخطوات سريعه
صارت المسافه بيني وبينها بعيده
حسيت بي زعل
الى ان وصلت راس فرعنا لگيته واگف يم باب بيتنا
والباب مفتوح
وصلت لحد عنده قبل لا ادخل للبيت
التفتت عليه
زعلان يا دكتور
تجاهلني
دخلت ناديت لميامي  لكيتها هي وامي بالهول
هلو
اكلج لهيب ينتظرج بره
_ ليش شوكت اجى شو ما سمعنا الجرس ولا الباب
_ ما ادري هسه رجعت لگيته واگف بالباب  بين ما ميامي راحت
تاخذ جنطتها وتلبس الحذاء
رجعت طلعتله للكراج
_ اي دكتورنا لعد من وصلت قبلي ليش ما دكيت الباب
اكيد انتظرت تطمئن عليه افوت للبيت يله تروح
قلبك مهان عليك تعوفني ارجع وحدي ههههههه
_ صيحيلي ميامي
_ هوبي لا تصير غثيث
_ هو اني غثيث
_ اهو شنو انت ادور حجه حتى تزعل
خلص ازعل
دخلت وتركته 
_ هلو ليش ما دخلت
_ لا والله عندي دراسه هم يله نروح حتى اتغده واروح للدرس
_ يله
وصلنا للبيت ورا ما تغدينا  بدت عندي حاله اللعيان
والغثيان
طلبت من عمتي اترخص اروح لغرفتي حسيت بيها انزعجت
فكرت ابلغها بموضوع الحمل بلكت يلين قلبها عليه ويفرحها هالخبر
قبل لا اطلع من المطبخ التفتت عليها
_ عمه اني هالايام دا احس بأعراض
يمكن حمل 
طريقه استقبالها للخبر صدمتني
_ يا حمل انتو وينكم وين الطفل شعندج مستعجله  عبالج
الرجال ينربط بطفل ثانيا اني مفهمته لثمين متسوون طفل لحد ما انت هو تكملون  شكوت صار  اليوم اخذج العصر للدكتوره حتى اذا صدك اكو حمل تنزله قبل لا يتورط الولد بطفل ادري هو شنو شاف من حياته حتى يحير بطفل هو انت برگبته ودا احس بي مهموم ويفكر اربعه وعشرين ساعة ومن ينزل الاجازه ميشوف دربه بوجهه رأسا للسياره يبقى يدك بالشوارع يشتغل تكسي حتى يلم كم فلس يعيشج بيهن المفروض انت متقبلين يصير عندج طفل هسه مو وراج دراسه ودوام منو يربيلجياه اخاف عبالج اني الي خلك اربي 
استغفر الله شلون غثتني
_ طلعت من يمي وتركتني وحدي بعد ان رمقتني بنظره غضب
صعدت لغرفتي مصدومه ومقهوره لدرجه مكدرت اجاوبها بحرف
اول ما تمددت على فراشي حسيت كتمه بصدري مكدرت اخلص منها الا لما نزلت دموعي وبقيت على هالحاله تقريبا ساعة محتاجه احد يمي
يواسيني ويخفف عني الي سمعته منها
خفت لا صدك تجبرني اروح وياها للدكتوره وتتفق وياها تنطيني
شي ينزل الطفل
الخوف والقلق خلاني ادك الباب على غرفه لهيب
_ لهيب ( فتح الباب )
_ ها ميامي
_ اسفه اخاف جنت نايم
_ لالا عادي قبل شويه غفيت محتاجه شي
_ شلون اكدر اتصل بثمين هو گلي من تحتاجيني بشغله ضروري خلي لهيب يوصلج بيه
_ هسه اتصلج عليه  انت محتاجه شي ضروري گليلي اني موجود
_ لا سلامتك عندي شغله بيني وبينه
بعد اقل من ربع ساعة  اشرلي لهيب وهو يقدملي السماعه الي
بالصاله
اخذتها منه شويه واجاني صوت ثمين
_ الو
_ الو شلونك ثموني
_ الحمد لله خيرج خو ماكوشي
_ لا ماكو شي  بس راح اگلك شغله مو تزعل مني
_ شكو قلقتبني
_ اني اليوم ما داومت رحت ويا امي للدكتوره الصبح
_ شنو الي بيج ورايحه للدكتوره ؟وليش ما انطيتيني خبر !!
_ جنت تعبانه واختاجيت اروح للدكتوره وحجيت لامي
گلتلي هي تاخذني ونسيت اگلك
_ اي ورحتي
_ اي رحت
_ شنو كلتلج
_ حامل
_ بالسلامه اهلي صار عدهم علم
_ اي بلغت خاله بس ما حجيتلها على روحتي بس گتلها شاكه
اكو حمل
وگلتلي العصر توديني على الدكتوره
_ اي عادي روحي تأكدي
_ ثمين شو حسيتك مفرحت
_ لالا عادي ان شاء الله  خير
انت روحي وياها واني راح اتصل بعدين
افتهم منج الي صار
همسلي ( يمي شخص )
_ افتهمت ميكدر ياخذ راحته بالكلام
انهيت المكالمه
وللحظه فكرت اتصل على مرت عمي باسل
بديت اضغط على الارقام اجاني صوت بت عمي
_ غلقت السماعه  وطلعت من الصاله صعدت لغرفتي بنيتي
ارتاح وما افكر باي شي
حسيت بنفسي منهكه نفسيا وجسديا 
خليت راسي على المخده حاسه بوحده ونفور من اليوم الي التقيت بي ثمين وصارلي كل هذا
بقيت افكر لو ما كان ثمين بطريقي
شلون حتكون حياتي ومكاني بين اهلي والراحه الي انسلبت مني
بهالعمر ولا جان سكنت هالبيت ولا انجبرت اعاشرهم او اتحمل
اذية امه
شي بداخلي بقى يحتج ويغلي  الى ان لكيت نفسي
واگفه باب بيت اهلي ادك الجرس و الباب بقوه