ثمين وميامي كالمياه المالحه والمياه الحلوه يفصل بينهما برزخ
جمعهم دم وفرقهم. الاباء
من سيسقط في حب من ومن سيروض نفسه من اجل من
طباع مختلفه .... وشخصيات عنيده وطيبه
فراق وتعلق .... كبرياء بين طريق واحد
او طريق لكل عاشق
عاندت قلبي فيها متبسما ... وغلب السهر نعاسي الا حين واعدتها ... خذلني جفن العين عن غير عادةً هرولت لها في الصباح متلهف ... بدفئ المشاعر الهبها قابلتني كجبل الجليد ببرودها ... وردتني نادما لتخيلاتي الباب السابع وصلت لركن السوگ شفت الولد جماعتي ملتمين يم عربانه ابو تحسين الله بالخير شلونك عمي ... _ يا هلا وليدي ... هسه سألت الولد عليك ... گالوا خطبت بالخير _ خير الي يصبك ... ناوشني عمي كاسه لبلبي .... نوار _ اليوم عليها _ما ادري خلي اشوف الوضع واردلك خبر بالتلفون .. كملت الكاسه وهمست بصوت ناصي لابو تحسين ... عمي خليلي لبلبي اخذه ويايه للبيت ... لاطفني مبتسم _ ها عبالي للعروسه ... عاد من منطقتنا لو من غير مكان _ ابتسمت بت عمي هشام _ والله والنعم منك ومن عمك ... _ رحم الله والديك حجي ... اترخصت من الولد ... بعد ما تعرضت لشقى وتهم ( ها صار وراك حساب وكتاب / ها من اولها انجر بوشك ) تملصت منهم مبتسم .... وتوجهت لبيت عمي ... لكيت الباب مفتوحه وعمي ... كاعد يرش بالحديقه سلمت ... التفت رد السلام وغلق الحنفيه ... دخلني ويا للبيت ... _ يا بنات وحده تجي تاخذ الجيس من ابن عمها .... منى_ هلو مديت ايدي اخذه من ثمين _ هلو ... انتبهي ترى حار ... لا تحتركين _ بابا خلي اني افرغه بكاسات اتركي _ عمي التهى ويا منى واني كملت طريقي للهول ... مديت راسي ... بس هي وصافنه على التلفزيون كدامها ... _ اوي اشتاقيتلج _ التفتت بفزع ... اوي ثمين فززتني ... _ شو وحدج _ مي عدها درس وامي راحت وياها تنتظرها الى ان تكمل وابويه اكيد شفته بالكراج ومنى ما ادري وين يمكن دتدرس بالمطبخ لو بالصاله ... همزين اجيت ... طكت روحي من الكعده _ كعدت بركن القنفه بجانبها ... شو الهول بارد ... اني گتلهم يطلعون الصوبه متت حر _ طبعا اذا متلفلقه بالبطانيه .... وين خلوها خلي اجيبها _ما ادري اسال منى _ طلعت لكيتهم مخليها بالهول الداخلي .... شلتها دخلتها للهول كعدت بالكاع كبالها وجوه ميامي بالضبط _ هاي انت مثل ابويه تكعد بحضن الصوبه ... _ اكو احلى من هالكعده ... الحب من خلفي والصوبه من امامي ... دفوا مشاعر وجسد ... _ هاكم ... _ اني ما اريد هسه اكلت _ منين جبتوا _ التفتت همست بصوت ناصي اني اتنغصته الج ... _ اخذت الكاسه من منى ... عاشت ايدك منوش انطيني ليمون خلت الصينيه بالگاع بصف ثمين ... وكعدت تاكل ابويه خلى بي حامض ... _ انتبهت عليه يباوعلها ... _ منوشه راح تگابليني ... _ رفعت راسها بخجل ... احرجها بكلامه ... كرصته بظهره ضحك _ اني وياها ميانه متزعل مني ... لا تدخلين ... تعالي بعنادها اكعدي بصفي كملي اكلج تقربت خليت ايدي على كتفها _ ثمين نزل ايدك ابويه اذا يشوفك مخلي ايدك على كتف منى يضوج _ شكو بيها اختي الصغيره ... اخاف انت تغارين _ اغار من اختي ... شنو هالعقليه ... بس اعرف ابويه ميحب هالميانه _ رفعت ايدي ... التفتت عليها ... اجازه الي تجي نلبس الحلقات اتفقت وياهم نسوي حفله الخطوبه ... _ ان شاء الله _ من طلعت منى تودي الصينيه للمطبخ ميامي كومي اركصيلي _ تفاجئت بطلبه ... شركص مدشوف. ما اكدر اتحرك _ ها يعني لو رجلج ما بيها شي تركصيلي _ لا طبعا ... شگلولك عليه راقصه _ تدرين ورايه طلعه بيها دك وركص وكيف بس الكعده وياج عندي احلى _ معزوم بعرس _ لا حفله خاصه ولد مسويها يجيبون كيوليات ويشربون _ استغربت مصدومه ... وانت ليش تروح لهيج مكانات _ لا تخافين لا اشرب ولا عندي سوالف ... هيج اروح ويا الولد اضحك على سوالفهم وارجع _وهسه تريد تروح ... _ اذا تريديني ابقى وياج .....ما اروح ... بس بشرط _ لا والله فوگاها يشرط .... _ ترى اني ماعندي وجهين ولا اعرف اكذب ... هاي المفروض تعتبريها من المحاسن يعني حلو لو اكذب عليج واكلج رايح للبيت ... واروح لغير مكان _ لا لاتكذب ويايه اتخبل من الكذب والحيله ... _ عدكم طاولي دومنه ورق _ اي عدنا .... _ منى منى _ نعم _ منى جيبي الورق _هسه _ اول ما خليت الورق بأيدي ابتسمت لان راح احتال عليه مثل اغلب المرات الي افوز بيها على مي بس بالاول گلت خلي اشوف مستوى لعبه احتمال ما يحتاج اغلبه بالغش اول ما التفت يجيب الطبله غشيت لعبنا اول مرتين غلبني ... كانت تعابير الفرح مرسومه على شفايفه ونظراته اول مره غلبته بقى يضحك ... تصورت متفاجئ كدرت افوز عليه المره الثانيه مشاها المره الثالثه رفع وجهه بوجهي مبتسم .... ضربني على خدي بكف ايده _كافي اللعبي بلا غش انطيتج مجال ترى .... جيبي الورقه _ ضحكت ضحك من كل قلبي لان تصورت عبرت عليه ثاري كان يضحك عليه ويدري بيه اغش _ يا ورقه لان دا افوز عليك اتضايقت _ ذبي الورقه ميامي ترى اكوم اني اطلعها _ صدك دتحجي لو تشاقى ... يا ورقه مو دا اللعب كدام عينك وقف وصار كدامي نزل جسمه قريب عليه وبدا يدور على الورقه ورايه وبجانبي ... الى ان رفع المخده لگاها سحبها ولف ايده على رگبتي حبس وجهي بذراعه وقبل خدي .... _غشاشه عبالج تستغفليني .... _دوخر عاد _ما او خر ... اشبع من هالخد يله اعوفج _ الله عليك وخر ... هذا صوت امي اجتي ... _وينها خلي تجي صار يطك اصبعتين ويدندن مبتسم هذا الحلو كاتلني يا عمه ... اسكت لحد يسمعك وگف يتمايل كدامي ويدندنها بصوت ناصي فاتح ايده ورافعها ويطگ بأصابعه يطلع صوت ابتسمت لان شفت وجه جديد بشخصيته ما كنت متوقعته طلعت اريحي وتحب الكيف _ شتريدين بعد حتى ركص ركصتلج وغنيت ... وطگيتلج اصبعتين هم گولي بعدج ضايجه _ ههههههههه لا طبعا وين بقت ضوجه بعد هالعرض ... متأثر بالكاوليات الي تروحلهم _ اصلا تلعب نفسي منهن ما احب اشكال البنات الي تكون ملامحها جريئه ومابيها حياء احب الاشكال الراقيه الي تحسيها مثل الاميره نزاكه وطهاره وعفه بكل تصرفاتها ولبسها _ يعني اني اميره لان هالمواصفات تنطبق عليه _ انت اميرتي وحدي ... _انطيني ايدك _ ليش _دا اشوف الخطوط الي بيها _ما اؤمن بهيج سوالف ..... اني اؤمن بقلبي كال ميامي متصيرله غير ميامي _ اخاف منتوالم _ليش احسج متخوفه مني وحذره _ يمكن لان بعدني بالجديد دا اتعرف عليك مو خوف ولا حذر بس عندي خجل منك وحدود ما اكدر اتخطاها _ دتخطيها رحمه لاهلج .... حتى اني هم اتخطى حدودي _ غمزته كانت تخبي خلفها معاني غير بريئه ضحكت ... ترى انت الي متخليني ارتاحلك ... _ ههههههه يله اني اروح ... اشوفج على الاسبوع الجاي _ دبقى على العشا الله عليك _ لا والله لازم اكعد ويا امي وابويه حتى يرتبون امور النيشان من اني ما موجود وهذا اللقاء لا يتم في بيتنا الا وكت الاكل ننجمع _ يله براحتك .... _ اكو تلفون من تشتاقيلي دكي .... تلگيني سهران _ استحي ادك .... وانت ليش تسهر مو عندك دوام _ ليش بله ....تستحين قابل داگه على احد غريب .... اني هيج طبعي ما انام من وكت احب السهر ... _ انتظرج اليوم على ال١٢ ابقى بصف التلفون اني ارد .... شنو الحجه بعد _ ما ادري احاول _ ماكو احاول ... راح انتظرج اني ما ادك انت ومروتج تخليني اروح اسبوع مسامع صوتج ... _الله عليك لا تسوي هيج سوالف بيناتنا ... على الاقل من تصير الشغله رسميه اكثر _ لا بله ليش مو رسميه وخطبتج وكل اهلنا دروا .... يعني الحلقه هي الي تخلي الموضوع رسمي .... وكلمه الزلم ... والاشهار بالموضوع مو رسمي. ... ترى حتى جماعتي دروا خطبت بت عمي ... واهل امي ... _ يله ماشي اتصل بس انت ترد .... اذا احد رد غيرك اسد الخط _ اتفقنا طلعت صارت بوجهي مرت عمي ... تفاجئت بيه .... _ ها عمه هاي انت هنا ... وين رايح _ اي والله مريت اطمئن على ميامي ... وهسه لازم اروح ورايه باجر دوام لعد عمي وين ... _ عمك طالع ... لا ابقى على العشا _تسلمين غير مره ان شاء الله بس رايدج بحجايه _گول _ عمه ما اريد الخلاف بينج وبين امي يأثر على موضوعنا اني وميامي .. اريد توسعين صدرج اخاف امي تحجي شي ... يصير معاتب ... ترى متسوى بعد كل هالسنين يبقى بينكم زعل ... اعتبري رجاء من ابنج ... _ لا عمه ولا يكون بخاطرك ... هي اختي اني ما بقلبي عليها شي وداعتك حتى تتأكد باجر اني اتصل اسلم عليها ... وانهي سوء التفاهم _ رحم الله والديج والله خجلتيني .... واني ابنج اي شي تريدي تأخذي من عيني _ تسلم عينك ... بس تبقى على العشا ميصير _ لا والله ... اعذريني بس اتذكرت اريد من كرات التمر الي مسويتها اخذها ويايه للكليه _ يا عمه اخذ ه بدون متگول الف عافيه ... _ اخذت التمر ورجعت للبيت .... شفت امي بالمطبخ ... گلت هسه اذا تشوف الماعون تسوي قصه ... خلي اتجنب اثيرها ... رجعت خليته بالسياره ... ودكيت الباب ... فتحتلي _ وين جنت ابوك واخوتك دينتظروك دنتعشا _ يم الولد .... حضري بس اصعد ابدل وانزل ... رايدج بشغله _ شكو يا ستار _ من انزل .... غيرت ملابسي بسرعة ونزلت لگيتهم ملتمين على الصينيه بالهول _ شفتها دتاكل انتظرت تكمل لگمتها لا تغص اتفقت ويا ميامي ... على اجازتي نهايه الاسبوع الجاي النيشان ... فرتبي موضوع الذهب والحفله ويا عمتي منيره _ اني ما الي شغله بكل هالامور ... گتلك من البدايه .... انت ردتها انت امشي بزواجتك _ مو انت امي ... واني اول فرحتج قلبج مينطيج تكسريني كدام الكرايب _ وانت كسرتني من اخذت بت منيره .... _ ليش بله كسرتج شنو ماخذ وحده مشبوهه لو تنزل راسكم ... لو متگود الوجه ... اختاريت احسن بنيه بالعشيرتين خلقه واخلاق لان متحبين امها ... معنى كسرتج ... ترى المره ماعدها وياج شي ... وباجر تخابرج گلتلي تسلم بعد اكثر من هيج شتريدين ... _ ها هي گلتلك هيج _ اي والله هسه قبل لا اطلع منهم گلتلي باجر اتصل على امك اسلم عليها _ مو تگول جنت يم الولد .... خوش نسيب والله مكابلها ومكابل بتها _ ليش ما اكابل بتها ... مو راح تصير مرتي اصلا لو متخرج جان رآسا عقدت كم يوم واتزوج .... بس دا انتظر اتخرج واتزوج _ هو يمه كلشي بالحظ هن حظهن كاعد خو ما مثلي ... _ يمه فدوه لعبنج مشاكلج ويا عمتي ... خليها على جنب اعتبري ميامي مو بتها لو بت عمتي مديحه ... مجان انخبصتي ... ابنج الجبير وخطب ... _ شفايتلي لوماخذ زينه ... والله جان سويتلك نيشان كل الكرايب يحجون بي _ اعتبري ميامي زينه وسوي النيشان مثل متگولين ثانيا ترى مردودها عليج كدام العالم يگولون مها تغار من منيره ومدقوقه ومقهوره لان ابنها اخذ بت منيره مبين مفرحانه ولا مسويه شي يگودالوجه انت ليش تنطين لزمه عليج كدام الگرايب يبقون سنين يحجون بهالسالفه بالعكس اريدج تبينين انت ما بقلبج عليها شي واذا اكو غلط صار فمنها وهي المره ... تريد الصلح من مبادرتها صفنتها خلتني اعرف كلامي وياها جاب نتيجه وردها اكدلي تفكيري صح _ والله اذا خابرت صدك باجر ... اسامح واسوي الي تگول عليه الاصول مو عبالك فرحانه بيهم بس حتى ما انطي مجال احد يشمت بينا _ عاشت ايدج مو اني گلت امي عقلها جبير وتفكر صح مراح تخلي فلانه وعلانه تشمت بيها وتنطي للكرايب مجال يحجون بسالفه تخصنا _ دأكل لادوخ راسي بخطيبتك ... _ يمه والله هسه من تعرفيها تحبيها ... تنزل مثل المي البارد على قلبج وتگوليلي والله عرفت تختار _ الله كريم نعيش ونشوف ... ولو العگرب خلفته عگارب مثله _ بقلبي لا هواي تصافت النفوس بقيت ويا ابويه الي دائما استغرب من ضعف شخصيته كدام امي ... ومنطيها مجال تحجي على اهله بينما هي متسمحله يجيب سيره اهلها الي على طول تمجد بيهم وهم بالحقيقه ... ما يستحقون هالتمجيد بالعكس مواقفهم ويانا كلها مصالح ونكران للجميل حتى هي ما الها قيمه عدهم دائما ولائهم لنسوانهم وبيوتهم حتى من تكون بمشكله صاحبه حق يطبگون ويا نسوانهم عليها ويخلوها تعتذر وهي لان تريد خاطرهم تلبي وتعتذر وهي صاحبه الحق ... متعلقه بيهم لدرجه عدها استعداد تخرب حياتها وبيتها علمودهم معادله طول هالسنين ما فهمتها ... ولا فهمت شخصيه امي لهيب اكثر شخص كان فرحان بهالارتباط .... لان جان يعتبره بوابه تسهل بالمستقبل ارتباطه بمي .... الي يحاول دائما يوهمني ما بقلبه الها شي لكن تصرفاته ولهفته بالسؤال عنها .... تفضحه كدامي بالاخص من گتله على دفتر المذكرات _ وين شفته _ صعدت اجيب شغله لميامي الصبح وشفته بالمجر _ فتحته _ لعد مو دا اكلك دفتر مذكرات _ يعني قريت الي بي ... _ لا هيج قلبت صفحاته .... صديقاتها كاتبيلها مديح وعن عمق صداقتهم هيج شي _ ها يعني مو توثيق لاحداث او ذكريات هي ماره بيها _ لا شو انت كلش مهتم _ لا هيج مجرد فضول _ ترى ابن خالها رايدها ... اذا مخليها بالك ... _منو گلك _ بالحجي ويا ميامي عرفت ... ويريد يخطبها بس تكمل المدرسه خلال هالكم شهر _ واني شلون اخطبها واني بعدني بالمدرسه _ ههههههه لك لاتذاكى ويايه ... جذب ماكو هيج شي بس ردت اخليك تعترف _ تحجي صدك ... _ والله ميامي الي جان ابن خالتها رايدها وعمي مامنطيها بس اذا تحبها لمحلها وشوف شنو وضعها ليش تبقى محتفظ بمشاعرك ويجي احد ياخذها منك _ ما اكدر هي بت عمي شنو اروح ارقمها لو اتحارش بيها _ لهيب انت صدك هيج خام ... ليش مو اكو مبادرات اهتمام تحسس البنيه بمشاعرك يعني انت لو طخه لو اكسر مخه لو ترقم او ساد حلگك من تروحلهم احجي وياها اتعرف على اطباعها الامور الي تحبها ... من خلال هالاشياء تكدرتوصللها اعجابك مثلا ذبلها حجايه ابويه اني احب البنيه المؤدبه ... من هيج مديح ووراها گلها ان شاء الله حظي يكعد واخذ بنيه مثلج ... هاي تفتهمها حتى لو جان عقلها حجاره وراها اسأل عليها ... اتحجج اذا تريدين مساعده بالدراسه مثلا تگلك لا شكرا ... گلها ماكو شكر بيناتنا انت امرج يهمني ... وافرح اذا اشوفج تحصلين احسن كليه او احسن الدرجات هاي افضل صوره توصل بيها مشاعرك توالم اخلاقياتك واطباعك _ يجوز ما يحرك هالكلام مشاعرها _ والله عاد وكتها تفهم البنيه ... ما معتبرتك غير اخ بقت عيني على الساعة انتظر التلفون يرن ... تمللت بقيت اقلب بقنوات التلفزيون الى ان كمت شغلت الفديو على فلم اجنبي اكشن بقيت اتفرج عليه .... غلبني النوم ... ما فزيت الا ب٢ بليل ... بالاول نسيت ميامي ... مجرد ما استذكرت موعدنا على ال ١٢ طفرت على التلفون دكيت دكه وحده وراها رجعت دكيت ماكو جواب اكيد نايمين بعد الاحساس بالنعاس متملكني .... صعدت لغرفتي ... تمددت بفراشي غمضت عيني ... _ ثمين راح يروح عليك الوقت ... مو عوايدك متحس على المنبه نوار دينتظرك بالباب _ لا بربك ... شلون ما حسيت ... بحركه سريعه اخذت ملابسي من الكنتور ودخلت لاحمام ... سبحت بدلت ملابسي .... اخذت جنطتي طلعت لكيت نوار بالسياره حلگه يفتر .... فتحت الباب شفت ماعون التمر بأيده يا غيره سز ... شكو ماكل منه دا اخذه ويايه _ شمدريني لكيته بالسياره اكلت منه وشكو مبقي هنا _ نسيته البارحه جيبه ابو نفس ... من حرك السياره وجهته خلي طريقنا على بيت عمي .... انزل دقيقه _ تتأخر _ لا ما اتأخر ...اول ما خليت ايدي على الجرس قبل ما اضغط طلعت مي .... مظهر الحقيبه على ظهرها عرفت دتروح للمدرسه اتفاجئت من لگتني واگف بالباب _ صباح الخير _ صباح النور ... لازم البقيه طلعوا .... ميامي كاعده _ اي راحوا للدوام ... واني الوحيده المتأخره .... ابتسمت لعد هاك المفتاح ... ادخل شوف ميامي ومن تطلع اقفل الباب وخلي بالمكان السري للعائله _ دنتظري دقيقه واني اوصلج بطريقي ... _ اخاف تتأخر _ لا بس افوت اسلم واجيج ... دخلت بعجله صدمني مظهر ميامي كاعده على القنفه ولافه حجاب ولابسه عبايه اسلاميه ... وشفاها تتحرك هالمنظر صورها بعيني ملاك ... وهالهاله النورانيه بوجها الي جذبتني الها سببها التزامها بقيت واگف باب الهول انتظرتها الى ان سلمت ... دخلت صباح الخير _ صباح النور ... _ تقربت منها قبلت جبينها ... مكدرت اروح من دون ما اشوفج ترى البارحه غلب عليه النعاس ونمت من وكت ما حسيت على التلفون _ ابتسمت ترى ما اتصلت _ صدك ... ليش بله _ خجلت يطلعلي احد غيرك ... والحمد لله توقعي صحيح هم زين ما اتصلت وطلعلي احد وغلقت الخط بوجهه ( حسيت ملامحه تغيرت انقهر او انغث ... هيج فسرتها ) _يله مع السلامه _ شو مستعجل _ تأخرت وخليت مي تنتظرني حتى اوصلها بطريقي .... طلعت من الهول ... ليش هلكد اتضايقت من گالت ما اتصلت شي طبيعي بعدها ماماخذه عليك .... وليش انت اخذت عليها بهالسرعة وقلبت حياتك وطول الوقت مشغول بيها ... تأثيرها عليك اقوى من تأثيرك عليها .... ميامي ما تملك الك نفس المشاعر الي انت تحس بيها تجاهها يله عيني ... غلقت الباب وانطيت المفتاح لمي تخلي جوه السندانه فتحتلها باب السياره ... صعدت بالمقعد الي ورايه ... تحركنا بأتجاه المدرسه ... من نزلت التفتت عليه سلمت ... هالحركه خلتني انتبه ... نوار مركز وياها .... لا اراديا رفعت ايدي الها اسلم عليها والتفتت لنوار ... يله تأخرت شويه اسرع خلال الطريق حاولت الگى طريقه اوصله مي للهيب .. قلبي لعب منه خفت يتعرضلها لو يحاول يصادقها ... اعرفه دماغه يتخيل ماكو بنيه شريفه لو بت اوادم ومو مال هيج سوالف الافضل اخصمها ويا هالاسبوع اريدك تمر على اهلي اخاف يحتاجوك بشي لان نيشاني وخطوبه لهيب على نهايه الاسبوع _ هوبي خطب _ اي خطب بت عمي اخت خطيبتي الي وصلناها هسه _ حتى هوبي خطب واني بعدني ادور بت ناس عمي ما اريد مواصفات وجمال ... بس اريدها شريفه _ هههههه لك والله ضحكتني ... لو عندي اخت جان كسرت بختها وانطيتكياها ... بس الحمد لله ماعندي _ ماعندك بت عم _ التفتت رمقته بنظره جانبيه محذره ... _ شبيك اريد اتزوجها ... _ لا ماعندي... ميامي- من طلع حسيت بتأنيب الضمير استذكرت ليله امس اكلج مي ابويه وامي راحوا نامو _ اي ليش _ مو ثمين گلي ينتظرني اتصل ... والله استحي بس هو كلش ديهتم بيه وما اريد ه يحس اني ما مقدره او حاسه بهالاهتمام .... بس اخاف يطلع احد من بيت عمي ولو هو گلي راح يبقى ينتظر يم التلفون _ لعد اتصلي _ رفعت السماعه ... رن بدون جواب ... سديته طلبت الرقم مره ثانيه ورا عشر دقايق ... اجاني صوت لهيب غلقته مر الوقت واني كاعده انتظر مكالمته ... بداخلي اتضايقت ... تمددت وجريت البطانيه غطيت وجهي واني احجي ويا نفسي (لعد ليش گلي اتصلي اذا هو اصلا ما مهتم ومدينتظر يم التلفون مثل ما وعدني ) حسيت بديت اتعلق بي ... وهالشي غلط بعدني بأولها ويا لازم افهمه واعرفه اكثر ... حتى اذا ما توالمنا وافترقنا ما اتأذى بقيت سهرانه الى ان مر الوقت رفعت نظري للساعة ... بعد شويه يأذن حتى اصلي وانام هذا كان اخر شي اتذكره من كعدتني مي جايبتلي صينيه الريوك حتى اخذ العلاج يا فاتتني صلاة الفجر الله يلعن الشيطان خلاني اغفى _ يله ربج غفور رحيم هسه صليها .... _ اول ما لمحته واني اصلي ارتبكت وخجلت حاولت اركز بصلاتي غمضت عيني الى ان كملت وسلمت ... اكو لهفه بداخلي اله ...اول ما دخل وصار قريب مني دكات قلبي صارت سريعه ...احساس بالفرح غلبني وبنفس الوقت عجرفه كبريائي ... نبهتني على ذكرى الليله السابقه ... خفيت مشاعري وجاوبته بكذبه كرد اعتبار ... حتى بعد ما عرفت السبب كان نايم ... شي بداخلي منعني ابوح بالحقيقه وابلغه اتصلت
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
هذا البارت مكتوب وكامل بهالتاريخ لكن سبب التأخير من الواتباد لا اكدر انشر ولا اعلق واگف والصدك ما اكدر احذفه وارجع انزله ... لان كلمه السر ناسيتها خفت يطلبها مني وما اكدر اوصل للصفحه لذلك بقيت انشر الى ان البارحه نزل ... عرفت نحلت المشكله فيعني شويه تعلموا الصبر كلشي يخلص بهالدنيا مو عاد قصه
