قلوب بينها برزخ

بارت جديد

_ بعد اول حصه رن الجرس
طلعت متلهفه بأتجاه صف مي ... اول ما لمحتها وهي دنخلي كتابها بالجنطه
ناديت عليها
مي التفتت وبنظره شوق تركت الي بأيدها واجتي عليه بسرعه احتضنتني
_ لج ميامي شكد مشتاقتلج الصبح مربت على صفج ما لگيتج عبالي مراح اداومين
_ تعالي خلي ننزل للساحه ونسولف مسكت كف ايدها ومشينا سوى
احس الروح ردت لي هي مو بس اختي هي صديقتي واكثر شخص ارتاح افضفضله
جلسنا بنهايه الساحه على صبه
انت شكلج مريتي قبل لا اوصل لان اليوم ثمين وصلنا اني ولهيب وشويه تأخرت وهو هم خطيه تأخر على الكليه
_ شلونج وياهم مرتاحه
_ الحمد لله لحد الان الوضع تمام وثمين مداريني
_ الحمد لله
_ اليوم يعني نرجع سوى
_ ثمين اتفق ويا لهيب اروح وارجع ويا
اليوم من يمر عليه اتفق ويا نوصلج بطريقنا يله نرجع للبيت
(لمحت نظره خجل وتوتر بعينها نزلت راسها مدعيه تلتهي تنفض تنورتها )
مي انت متواصله ويا لهيب
رفعت راسها خجلانه
_ ميامي اني ما تعودت اضم عليج شي انا ولهيب يوميا نتواصل بالتلفون
حتى لو خمس دقايق ومرات بس على كد الالو شلونج
وهو البارحه گلي راح يوصلج بس والله نسيت ومن سألتج وجاوبتي اتذكرت
حتى من سولفلي فرحت فكرت بشغله اذا توافقين عليها
_ شنو هي
_ انت تعرفين ابويه تقريبا لل٢،٣٠ او ال٣ يله يرجع واحنه دوامنا ينتهي ١٢،٣٠ بين منوصل صارت بالوحده
كلت اكلج تسألين ثمين اذا يقبل ترجعين ويايه للبيت هم تقضين ويانا
وقت قبل جيه ابويه وعلى الاقل انطي خبر لامي بيومها حتى ترجع من وكت لان كلنا مشتاقيلج وامي تعبانه بسبب عناد ابويه وحتى الوضع بينهم احسه متوتر مو مثل قبل لان منعها تزورج لبيت عمي
اذا رتبنا هالسالفه امي تخفف عصبيتها وتوترها ويا ابويه وهم انت
تبقين قريبه علينا ونكدر نتواصل وياج ونشوفج
_ ياريت يا مي ابويه برغم طيب بس عنودي عنده استعداد يخسر كلشي ولا يتنازل ابد ما جنت متصوره راح يجرب هالشي ويايه
بس خلص ماطول هو اختار يكسرني ويقسى عليه اني بعد ما احاول ويا خليها للزمن
بس ثمين ما ينزل الا للاسبوع الجاي ولو هو گلي اذا لهيب تأخر ارجعي ويا مي لبيتكم وهو يمر عليج لهناك ويرجعج لبيتنا
_ معنا هو ميمانع لعد خلي لهيب اليوم يوصلج يمنا حبابه وانتظري لل٢ بلكت تلحگين على امي وقبل لا يجي ابويه بنص ساعة او ساعة يرجعج لبيت عمي
_ اخاف مرت عمي تضوج وتسويلي سالفه
_ معليج اني راح اتفق ويا لهيب يجي ويانا نبقى بالمطبخ لبين ما امي تجي واذا تأخرت ارجعوا لبيت عمي وخلي لهيب يتحجج تأخر عنده درس اضافي وتأخر عليج وانت رجعتي ويايه وهو من كمل مر عليج
نفس وصيه ثمين
_ رن الجرس
يله خلي نروح لصفوفنا بالفرصه الثانيه نكمل ونشوف اذا ما ترتبت اليوم نخليها باجر
_ يله لعد اشوفج على الفرصه الجايه
_ بعد ان انتهى دوام المدرسه طلعت اني ومي بقينا نتلفت باب المدرسه
ماكو للهيب اثر
انتظرته عشر دقايق تأخر
يله مي خلي نرجع سويه لو نلاگي بطريقنا لو من يشوفني ماموجوده يجي ورانا لبيت اهلي
مشينا مسافه على كد كملنا ركن المدرسه التفتنا دندخل بالفرع لمحته مي من بعيد وهو يتلفت بين الطالبات الي يمرن بجانبه
لحد ما وصلنا قريب منه ابتسم
وطبعا الابتسامه ما كانت الي اصلا يمكن حتى ما انتبه عليه
_ ها هلو
_ هلو هوبي
_ هلو ميامي
_ يله خلي نوصل مي ونروح للبيت
_ التفتت لمي ابتسمت
وهمستلها
ميو ميحتاج نوصي هوبي هو مخطط من قبل ما يجي ومرتب الوضع
_ ههههه لعد راح اگله تبقون يمنا نتغده سويه فد ساعة وروحوا
_ لا اني اگله
هوبي عندك شي اذا تأخرنا ساعة نتغده يم اهلي قبل لا يرجع ابويه بلكت الحگ اشوف امي واخوتي
بس لازم من هسه اذا توافق ترتبلي حجه ان انت تأخرت عليه ومن كملت مريت عليه يم اهلي ورجعتني كدام عمتي اخاف تزعل
_ ماكو غير اگلهم رحت استنسخ ملازم وتأخرت عليج
_ او تتحجج عندك درس اضافي
_ ابتسم
والله خوش عصابه احنه زين امي سالفتها هينه
انت ثمين مضبطه الوضع ويا
_ اي والله هو گلي للطوارئ اذا هوبي تأخر رجعي ويا مي وهو يمر عليج
_ ادري بهالاتفاق ووصاني عليج بس اقصد ان تتأخرين يم بيت عمي
_ الله عليك مشيها هالاسبوع واني من ينزل احجي ويا اذا عنده مانع
بعد ما اسويها واذا وافق عاد انت كل كم يوم سويلك حجه
بعد ان وافق لهيب
اول ما فتحت الباب مي ودخلنا حسيت اكو شي تغير من ناحيتي
تجاه هالمكان صح حنيت اله وللناس الي بي وتلهفت حتى ادوس عتبة بابه بس حسيت هالامكان صرت بي مثل الضيف مكاني هناك بغرفتي ويا ثمين يمكن لان صار فتره طويله تركت بيتنا ورجعتله فقط يومين وطلعت منه مكسوره الخاطر وما شفت بهاليومين راحه صار عندي
هالاحساس بالغربه
دخلنا المطبخ ذبينا الجنط بالكاع وجلسنا على الكراسي ركضت مي على الثلاجه طلعت جدرين خلتهن على النار وتوجهت
على السنك صاحت منو يريد مي
كمت من مكاني ورحت اخذتلي كلاص ترسته وهي قدمت كلاص للهيب
واني اخذني الفضول والجوع حتى ارفع الغطاء عن الجدر
لكيت امي طابخه مرگة بتيته وبزاليا وتمن
_ التفتت للهيب
_ هوبي امي طابخه مركه بتيته وبزاليا انت تاكلها
_ اي ليش لا الحمد لله نعمه اني كلشي اكل ماعدا الكشمش والعلوجه
ذني اثنينهن بمركه ما تخش بعقلي
_ اني هم ما احبهم
_ بس رجلج يخرب عليهن ان شاء الله هسه تشوفي بشهر رمضان يكضيها يشرب شربت زبيب وشربت قمر الدين
_ والله هوبي رايد اكضي وياك يوميه ساعة تسولفلي على ثمين حتى احفظ شنو يحب وشنو يكره حتى لا يتنحس
_ خطيه ابن عمي بالكليه ومرته واخو استلموا
اندك الجرس
تقدمت لشباك المطبخ زحت البرده انفتحت الباب دخلت منى
فتحتلها الباب من وصلت شافت ميامي ركضت عليها متفاجئه
اكلج منوش من هسه ممنوع ابويه يعرف ميامي يمنا
التفتت
_ ليش مراح تبقين
_ لا والله حبيبتي قبل لا يرجع ابويه ارجع ويا لهيب
_ يعني متشوفين امي مو خطيه مشتاقتلج
_ بلكت الحگ عليها اليوم واذا ما لحكت مره ثانيه اتفقنا اني ومي ننطيها خبر تطلع قبل وقت حتى لو تاخذ اجازه زمنيه
_ دخلي اصعد اغير ملابسي وانزل يمكم
_ التمينا تغدينا سويه اخذتنا السوالف واني اترقب عين على الساعة وعين على الباب انتظر جيه امي
لكن مر الوقت وبعد صار لازم نرجع
التفتت للهيب
هم يله نرجع
_ يله
_ ودعت خواتي وطلعنا لبيت عمي  دخلنا للمطبخ بعد ما فتح النا هذال
سمعنا صوت عمتي
_ وين صرتوا متگلولي صارلكم بالساعتين من طلعتوا من المدرسه
_ دخلنا للهول
سلمنا ونطق لهيب
_ شلونج يوم شسوي باجر عندي امتحان واكو ماده لكيتها نقص بقيت
انقلها تأخرت على ميامي لكيتها راجعه ويا مي وهسه هاي رحت عليها جبتها واجيت
_ وميامي شعدها ما رجعت بوجهها للبيت
_ والله عمه ثمين منبه عليه ما ارجع وحدي وهو گلي اذا لهيب تأخر عليج روحي ويا مي وهو مفهمه يجي عليه يرجعني
_ شلون ترجع وحدها وهو موصيني عليها ومنبهني ما اخليها ترجع الظهر وحدها
_ اي مو متنا من الجوع
_ ادري قابل اذا رجعت راح تصبين واني بعدني ما راجع يعني بكل الاحوال التأخير راح يصير مني هي بطريقي
_ ديله يله كل واحد لسانه اطول منه روحوا غيروا ملابسكم وتعالو بسرعه دنتغده ابوك دگه الجوع
_ صعدنا نتهامس والابتسامه على وجهنا واحنه مترزلين
وصلنا لاخر بايه التفت اكلج احسن الج والي نضرب الغده مره ثانيه ترى امي نبهه  تروح تنتبه علينا مدناكل وتستغرب السالفه مو شخص واحد مدياكل
_ لالا حباب اكل اذا تشك تزعل مني
بيومها حاولت اخلي عمتي راضيه عني ومتتحجج عليه
اول ما كملنا الغده جنت تعبانه لكن قررت انظف حتى من تكعد العصر تلگاني مكمله  البيت حتى اكدر ادرس وراها اصعد انام من وقت
اخذني الشغل الى ان جنت واگفه اغسل الكراج
سمعت صوتها ورايه
_ هاي ليش منظفه البيت ليش شبي اني منظفته الصبح
_ فزيت والتفتت الها مرتبكه لكن تعلمت اجاريها بالاسلوب الي هي ترغبه
والله عمه البيت ينگط ورد حتى من نظفت مطلع وسخ بس كلت حتى متتعبين بعد اني انظف العصر حتى يبقى يلمع
_ ديله كملي حتى نسوي صينيه العصرونيه
_ ارتاحيت من حسيت ملامحها هدأت جاوبتها
افوت اخلي الشاي بين ما يتهدر اني مكمله الكراج
_ لالا اني راح اخلي انت نشفي الكراج زين هذا هذال فد شويه يكضيها طاب طالع بالكراج وبالحديقه لا يروح يطينها
_ انتهى اليوم واني منهكه صعدت لغرفتي استوحشتها من دون ثمين
تمددت بفراشي بقبت مامرتاحه ولا اكدر انام بين قلق وخوف بقيت الضوه مشتغل ما غمضت عيني ولا اكدر اطفي الضوه
اختنگت فتحت باب الغرفه ومشيت للممر متوجهه لغرفه لهيب
وصلت يم الباب استحيت ادك الباب
حاجيت نفسي
ميامي هاي شبيج شكو جايه للولد بهالليل
( ياربي لو مو عيب جان دكيت الباب علي هو وهذال وفرشت يمهم بالكاع ونمت )
رجعت باتجاه غرفتي تالي التفتت كعدت على الدرجايه الاخيره
سندت راسي على المحجر لحد ما بديت اغفى تعبت وگفت رحت جبتلي شرشف ونزلت نمت على القنفه بالهول وبالي مشغول لا يكعدون ويشوفوني نايمه هنا شنو ابرر
يله اگول اخاف انام وحدي ماكو غيرها
ثاني يوم الصبح
_ ميامي يله اصحي
دكيت الباب اكثر من مره ماكو جواب منها
صحت على هذال
تعال فوت كعد ميامي بس لا تدخل يمها بس افتح الباب وصيح عليها فاهم
ميصير تفوت
بقيت واگف على بدايه الدرج
شفت هذال فتح الباب والغرفه منوره
التفت الي قبل لا ينطق باي كلمه
_ ميامي ماموجوده بالغرفه
_ لعد خاف بالمطبخ
نزلت مثل كل يوم اغسل وجهي انصدمت بيها نايمه على القنفه
تقربت يمها
ميامي ميامي
فتحت عينها مفزوعه
على كيفج على كيفج صباح الخير
_ صباح النور
_ ليش نايمه هنا
_ والله يا لهيب خفت انام وحدي
_ ليش ما دكيتي الباب جان اني نزلت نمت هنا وانت تنامين على فراش ثمين الي دينام بي هذال وهذال ينام بفراشي
_ والله اجيت وردت ادك الباب واستحيت عاد نزلت
خلي اگوم اغسل وجهي واغير ملابسي وانزل اسوي ريوك
_ يله على راحتج
_______
مر هالاسبوع من غير احداث جديده
بين مدرسه ومرتين كررت زيارتي لبيت اهلي لكن من دون ان التقي بامي او ابويه
وبين البيت هنا احاول قدر الامكان ارضي عمتي
وادرس وانام بغرفه الولد ولهيب ينام بالهول
بقيت انتظر نهايه الاسبوع دقيقه دقيقه حسيت اليوم ماينتهي
والاسبوع طويل اشتاقيت لثمين والمشاعر جانت مختلفه عن كل مره
شي جديد ديمر عليه ابقى افكر بي قبل لا انام ومرات يجيني حتى بالحلم
لحد ليل يوم الاربعاء غلب على حالتي الاشتياق ماكدرت اروح للدوام وانتظر لحد ما ارجع والگى جاي قبلي
ثاني يوم تحججت مريضه ما اكدر اداوم نزلت ورا ما طلعوا هذال ولهيب
بقيت الهي نفسي انظف حتى من يجي ماكو شي التهي بي عنه
وعمتي ما تصيرلها فرصه تحجي
للعشره طلعت اغسل الكراج وارش الحديقه واني واگفه
ارش بالزرع التفتت على صوت تحريك سرگي الباب
لمحت ايده ترفع السرگي تحركت بسرعة ولهفه وفتحت الباب
صار بوجهي
التفت عني وانطاني ظهره رفع ايده سلم سمعت صوت سياره تحركت
صرت ورا الباب انطيته مجال يدخل
دخل واخذ الباب بايده وجرني عليه احتضني بالايد الثانيه وهو يغلق الباب
صباح الخير حبيبتي
تعلكت برگبته واني استنشق الهوا وازفره براحه
بس بالحقيقه استنشقت عطره وريحه نظافه تغلغلت بيه لدرجه حسيت عطره التصق بيه ودا اشتمه بملابسي وعلى بشرتي
_ صباح النور حبيبي اشتاقيتلك بكد الدنيا
نزل ايدي وهو يتلفت لا احد يشوفنا من الجوارين
واخذ ايدي ودخلني للبيت وهو يحجي ويايه
_ اني هم والله بحيث بقيت نوار ينتظرني عبالي اغير ملابسي واخلي يوصلني
اخذلج اجازه ارجعج للبيت
لكيتج كدامي
_ مكدرت اداوم والله وابقى انتظر من ارجع يله اشوفك اصعد غير ملابسك وتعال حتى اسويلك ريوك
_ لا اصعدي ويايه
_ مو اخاف عمتي تكعد وعبالها بعدني نايمه
_ لا تعرف جنتي كاعده من نظافه البيت وراح تعرف اني اجيت وانت ويايه
_ صعدت ويا خجلانه منه افكر ويانفسي
يمكن اذا راح يبقى هذا الحال يجي يومين ويروح خمسه مراح اتعلم عليه راح ابقى اخجل منه
لا ميامي لازم تتعلمين عليه انت مشتاقه اله عبري عن هالاشتياق هو هم خطيه جاي تعبان وملهوف
حسيت وهو ديصعد بصفي خلى ايده على چتفي وقبل راسي سألني
_ شلونها النومه بالغرفه وحدج
_ دخلنا الغرفه غلق الباب حضنته احاول احس بالامان
هو احتضني بلهفه وقلق من هالحركه الي سويتها همستله
ما كدرت انام بيها ولا يوم نمت اول يوم بالهول وباقي الايام ويا هذال على سريرك القديم وهو على سرير لهيب
_ ولهيب وين ينام
_ بالهول على القنفه
_ تصدگين حسيت بهالشي وعرفت مراح ترتاحين وبقى بالي
_ لا يبقى بالك عدت المهم انت اليوم يمي وكدام عيني ثمين
تدري شكد احبك الله يحفظك الي بلياك حسيت نفسي تايهه
_ ابويه انت اني هم بلياج ما كدرت ارتاح بس شنسوي هذا الوضع لازم نتحمله كم شهر بين ما اتخرج والله يوفقني واتعين بس انت ادعيلي _ امين ياربي يوفقك ويحفظك
_هسه انطيني دشداشه ‏حتى اغير ملابسي  واحتمال اتصل بعمي
نروحلهم العصر نبات يمهم
_ اي والله ياريت
_ شبيج شو ما صدكتي دگليلي لا خلينا نتسامر سويه
وحدنا دكليلي لا ننام بالسطح مثل ذيج المره لازم
ما عجبتج الاجواء والسوالف جوه الگمر والنجوم
_ههههه لالا والله اصلا احلى ليله راح تبقى ذكرى النا وكلامك مراح انسى كلمه كلمه حفظته
بس حتى نغير جو وياهم واريد تاخذني نتمشى للشيخ عبد القادر وهم
ناكل فلافل
_ بعيني
_تسلم عينك 
هذا صوت عمتي دتصيحني
_ اي صوت امي روحي شوفيها شتريد وتعالي
_ تركت ثمين ونزلت
وبعد ما عرفت هو موجود بالغرفه تصورت راح تسمحلي ارجع اصعد يمه
لكن فاجئتني من طلبت مني انظف الكاونترات لان ماعندي دوام
وقبل ما يصير وقت الغده
بقيت متحيره شلون افهمها رجلي رادني ارجع ابقى يمه وشلون راح افهمه مكدرت اعتذر منها وارجع اصعد يمه
بقلبي تأفأفت
يله خلي اكمل شغلي حتى العصر اكدر اطلع ويا براحه
بعد اقل من نص ساعة واني صاعده على الكرسي انظف بالخزائن
سمعت همس
_ هاي اني دا انتظرج  وانت كاعده تنظفين الكاونتر
_ التفتت  لگيته مبتسم
اشرتله بأصبعي اش
معنى نصي صوتك
_ يعني راح يطير الكاونتر عود من اروح نظفي هن يومين باقيهن وياج تتهزمين مني هسه بليل وين تروحين
_ ابنسمت واني اتوسل بي ينصي صوته
تقدم لحد عندي  همستله
والله عمتي گلتلي نظفي واستحيت اگلها ثمين دينتظرني
لمحت نظره انزعاج لكن تلافاها
_ يله ماشي كملي الي بايدج حتى العصر نطلع، اني راح اصعد انام
وانتبهي لا توگعين
_ ديله اصعد اخذ راحتك واني اذا كملت قبل الغده اصعد
بعد ما بقيت وحدي ونظفت كل الخزاين التفتت لعمتي بعد ما دخلت وبدت تلگط بالتمن
عمه كملت ارجع كل الغراض بمكانها
_ اي رجعيهن بترتيب  حتى من يجي لهيب اخلي ينزلج الزوليه تغسليها بالطرمه
لو انت تصيرين سباعيه وتنزليها وحدج
_بقيت باهته صار اسبوع اني يمها  واسألها
عمه شنو اسوي وشنو تريدين
ما عرفت اطلعلي هالشغل قبل ميجي ثمين
صعدت لكيت الزوالي اخذت الي اكدر اسحبها وانزلها
طلعت للكراج وبديت  اغسلها
مر الوقت الى ان دخل لهيب 
_ هلو ليش دتغسلين الزوليه  اني وابويه ثمين نغسلهن
شكو متعبه نفسج وطالعه بالكراج وملابسج متنكعه
ادخلي  اني هسه اغير ملابسي وانزل اكملها
_  رفعت راسي اله واني مدنگه اجلف
لا راح اكملها بقى شويه
_ ميامي ادخلي ترى اذا شافج ثمين يصير عصبي
احنه داير مدايرنا بيوت اغلبهم عدهم ولد من اعمارنا واكبر
وانت ملابسج منكعه ومدنگه
_ والله لهيب عمتي كلتلي اغسليها قابل اگلها لا والصدك ما ادري بي
ميقبل
هسه شلون اخاف ادخل وعمتي ترزلني وتضوج مني لان ما كملتها
_ معليج اني من  راح ادخل ادردم عليج
واكلج فوتي بسرعه فلان واگف بالسطح
انت ادخلي
_ بالفعل دخل لهيب ونو يدردم واني دخلت من ورا
وعمتي استلمته
_ شبيك من خفت بعدك ما دخلت للبيت صوتك يلعلع
_ شكو تخليها تطلع تغسل الزوليه
مو تعرفين اكو شباب داير مدايرنا 
_ دسد حلكك منو يباوع  عليها
_ فوتي اني هسه اطلع اكملها
_ دخلت وملابسي رطبه اول ما وصلت للباب الي يدخلني على الهول بنيه اصعد لغرفتي
بعد ما لهيب صعد
همستلي عمتي
_ وين صاعده اثگلي شويه وخلي الولد نايم
_ التفتت عليها متفاجئ
_ عمه رايحه اغير ملابسي رطبه
_ روحي بسرعة وانزلي دا تغسلين ملابس
_ بقيت متحيره بامرها هاي شبيها اليوم
دخلت لغرفتي ثمين نايم اخذت دشداشه ودهلت للحمام غيرتها ونزلت بسرعة بيدي كم قطعه من ملابسنا حتى اغسلها بدربي
دخلت للحمام وتفاجئت بكميه الملابس كلها شراشرف
حسيت بتعب وحزن
حجيت بداخلي يله ميخالف الشغل ميموت خلي اتكفى الشر
واتجنب اخليلها حجه
صار وقت الغده سمعت صوت ثمين يصيح باسمي واني كاعده على التخته اشطف بالملابس والمي يجري جاوبته نعم لكن ما سمع اتمنيت اخلص
يله اطلعله بس خفت لا يزعل
دخلت للهول ما لگيته سمعت صوته بالمطبخ يحجي ويا عمي
دخلت لكيت عمتي دتصب
_ ها عيني
_ التفت ثمين سألني متفاجئ هاي ليش ملابسج رطبه
_ جاوبت عمتي بسرعة
ادري عمه شو كضينا عمرنا نشتغل ما بيوم تنگعت دشداشتي هيج
هسه هن قطعتين وانت هيج لعد باجر عكبع يصير عندج اطفال
تطلعين سابحه
ضحكت باستهزاء وختمتها
يله اني اعلمج كلشي
رايدلج تتعلمين لان باجر عكبه يصير عندج بيت
مدبريها عدت وراج الشغل كله اني احب الشغل الدقيق
_ سمعت عمي تكلم
يله عمو روحي غيري دشداشتج وانزلي حتى نتغده
_ وثمين بقى مستمع بس حسيت الكلام ما عجبه من ملامحه تقدم لعندي
لزم كف ايدي وگلي
_ تعالي
_ اول ما صعد وسد الباب
لخاطري لا تاخذين كلام امي بتحسس ترى هي صدك تنقنق بالشغل حتى ويانا
وانت سباعيه راح تتعلمين على ذبتها بالشغل
_ لا عادي
_ رفع وجهي دغيري دشداشتج وانزلي بسرعة اني نازل قبلج
_ نزلت
وبعد ما كملنا الغده التفت عليه ثمين وگلي حضري نفسج ساعتين الگاج
جاهزه دنطلع
_ ادخلت عمتي
_ وين طالع ب٥ متكعد ويانا نشوفك
_ رايح لبيت عمي وابات هناك اليوم وباجر ارجع ان شاء الله
_ وحدك
_ رفع راسه لعمتي مستغرب هالسؤال
لا مرتي ويايه ومتفق ويا عمي من ذاك الاسبوع مو كدامج صار الحجي
_ عاد لو تخليها لميامي وانت تروح وحدك تعلمت عليها ونس ويايه
نكعد نسولف
_ استغربت منها لان رجعت تتبع نفس الاسلوب القديم ايام الخطوبه
بقيت استمع وهم بينهم يتصافون
_ اخر شي من وگف ثمين ديبعد الكرسي گلي
_ ميامي كملي واصعدي ورايه
_ بس اكمل المطبخ والملابس واجي
_ كملت المطبخ ورجعت اكمل الملابس باقيه وجبه اتفاجئت
بمناشف شكلهم نظيف
تأكدت عمتي دتتقصد هالامور لشي براسها
اخذني الوقت لحد ما سمعت صوت ثمين من فوك
_ ميامي وينج
- وصلت عند الدرج رفعت راسي هو واگف على المحجر بالاعلى
بعدلي شويه واصعد
_ ميامي مو كتلج ساعتين الكاج جاهزه
_ صعدت بسرعة
واني اهمسله
والله لكيت عمه مخليتي مناشف غسلتها هي هاي اخر وجبه واصعد
_ دروحي كملي اني راح اضرب ملابسي اوتي كملي واصعدي بسرعه دنروح للشيخ عبد القادر ووراها يله نروح لبيت عمي
_ ان شاء الله
_ اول ما نزلت
لمحت عمتي طلعت من الغرفه
صارت كدامي اشرتلي اجي يمها
_ نعم
_ اكلج هذا اذا كلج تعالي ويايه كوليله ما اريد اروح روح وحدك
_ عمه والله اخاف منه هسه عاط بيه
_ انت تخافين منه ليش انت بت منو شو ابوج يباوع لحلگ امج وكله بكيفها وهو الممنون
_ بداخلي استغفر الله هاي المره دا احسها تريد تسويلي مشكله من وصل ثمين لحد هسه
هسه من اصعد اكله
_ دروحي كملي هسه
_ بعد ما كملت صعدت
حجيت لثمين الي صار بالتفصيل وطلبت منه يعيط بيه ان
ابدل بسرعه حتى يسمعها رفضه وتفهم ان اني حجيتله الي امرتني بي
جنت متلهفه اروح ويا لبيت عمي
_ بسرعة غيري ملابسج وين ما اروح تروحين ويايه فهمتي مو على مزاجج اروح وما اروح العالم ينتظرونا
ابتسمت وهو هم ابتسم على ابتسامتي ضربني على خدي
_ هاي تاليتنا راح نگضيها افلام
_ لعد خلص روح وحدك واني ابقى
_ اني شعندي رايح غير علمودج دغيري ملابسج بسرعه راح نتأخر
_ بعد ما كملنا ونزلنا
تلگتني عمتي بيدها
منشفه لونها ازرق مطگع
_ هاي الي يعتمد عليج ميامي مخليه بنطرون جينز ويا المناشف البيض يعني معقوله متعرفين
_ والله عمه ما خليت جينز
بس المناشف البيض ويا الشراشف
_ لعد منو خلى شنو قصدج هو اني اغسل الملابس واليوم عود ردت اعلمج
وتالي مسكطتلي الملابس
_ يمه هسه فدوه يعني خلته بالغلط قابل متقصده
اني اجيبلج جدد ذني سويهن وصل مسح
_ اي يمه لا صار براسك خير اذا بقيت انت هيج
ما ادري شيشيلون ويلصمون حلوگ
_ تقدم ثمين فاجئها اخذ راسها وقبله
وهو يگلها
باجر اجيبلج احسن منهن فدوه الج واذا يعجبج نطلع اني وياج نشتريهن
_ قبل ما تتكلم
التفت عليه وگلي يله تأخرت على عمي رايدني بشغله دينتظرني
_ طلعنا بسرعه خلاني امشي كدامه لحد ما طلعت من باب البيت ردت بيه الروح
احس خف التوتر الي جان عندي صعدت السياره ما حاولت افتخ ويا اي موضوع او كلام عن الي صار قبل شويه
ما ردت اكدر الطلعه واوتر الجو بيناتنا
لكن المشاعرالسلبيه الي جانت بداخلي انعكست على تصرفي
بقيت طول الطريق احجي ويا نفسي والتزمت السكوت ويا
لحد ما وصلنا لبيت عمي
وگف بصفي وهو يدگ بابهم التفت عليه گلي
_ شويه خليج نبهه بشغل البيت
_ التفتت أأأ ردت اجاوبه وتراجعت درت وجهي باتجاه الباب بلحظتها فتح عمي الباب
سلمنا ودخلنا
التهى ثمين ويا عمي واني لحگت مرت عمي للمطبخ اساعدها بين السوالف حست بيه مامرتاحه
_ خيرج حبيبتي اخاف بعدها السالفه القديمه
_ والله عمه محتصره من دخلت لبيتهم واني ابد ما مرتاحه
_ خلي يلتهون عمج وثمين حتى اطلعلج الغراض الي دزتهن اختي واعلمج شلون تستخدميهن لان خفيتهن خفت لا عمج يشوفهن
_ لعد اني شلون حاخذهن اخاف ثمين هم يشوفهن شنو ابرر
_ لعد شلون تبقون بهالوضع
_ والله ما اعرف
_ لا تخافين هو وين يشوفه هاليومين الي يجيهن صيري شاطره
واخفيهن
_ يمكن اخليهن بالسطح
_ وجبتلج مسجل صغير وكاسيت سوره البقره يوميه تفتحيها ل٤٠ يوم
- ان شاء الله  بله هالسالفه لكيتيلي حل
الا عمتي عمه عدها طبع محلو مال تتبلى على الواحد
_ ليش شسوت
_ اليوم غسلت الملابس ومتأكده والله ما كان اكو بنطرون كابوي
بينهم
ولا اصلا لزمت بايدي هيج قطعه ملابس
سمعت صياحها تالي اجيت لكيت بيدها بنطرون منكع تهمتني مخليته ويا البيضات وذاب عليهن لون ومخربهم
مكدرت احجي ولا اكذبها وفوكاها كدام ثمين ويم بابكم لامني
شسوي عمه علميني
_ والله عمه الي مثلي ومثلج ميكدرون لوحده مثل مها
شما تحجين وتبررين تطلعلج بسالفه ثانيه تطلعج كدامه مدانه
سلمي امرج لالله ولا تحجين شي ترى هو مو ما يعزف امه بس يجاريها قابل شيريد يسويلها
_ والله يا عمه انقهرت متت بدمي حتى هو مو طايقته بسببها
_ يمعوده عمه بعدج باول الطريق شايفه وشراح تتحملين الله يعينج
مو بس على بيت عمج وعلى الرجال شوفي هذا عمج سكد تشوفي زين
بس شيب راسي لان صعب وعصبي هم ذبيتهم هيج المره لازم تصير ذكيه وياهم والا تتعب
_ دتعالي خلي نصعد شكله عمج وثمين ملتهين
_ صعدت ويا مرت عمي وبغرفه المحزن الفوگ دخلنا طلعتلي كيس بي شغلات حرز ورق سدر وقنينه مي
وبدت تعلمني عليهن شلون استخدمهن بعد ما سمعت كلامها وحفظته اخذت الحرز مثل ما علمتني وشكلته بدنبوس بملابسي من الداخل حتى مينشاف
ونزلنا دنحضر العشا
اخذنا الوقت والسوالف الى ان صار الليل ورحت افرش بالصاله النا
بدخلتي دخل ثمين ورايه
راد يحضني لان حس عليه طول الوقت نافرته
_ شبي الحلو اليوم مثگل وجهه عليه
_ ماكو شي سلامتك
_ لا اكو واريد اعرف
_ اول ما تقدم مني وحضني نسيت نفسي بين ايديه وهو يصالحني بالكلام ويتغزل لحد ما سألني
وهو يتلمس الحجاب من ورا الدشداشه هذا شنو

_