قلوب بينها برزخ

ج٥

اغلق القلب بابه موصداً وانعدمت امامه الاحاسيس 
قسوه اللسان اصبحت  معركتي اكون معه او لا اكون
كبرياء انثى تأبى الانصياع لغطرسه رجل يحمل رمح في عينه
كلما غرس الرمح هبت رياح الغضب  وانكبتت بغروره مشاعري
الباب الخامس
ميامي : بعد وصلوا  اهلي ... صابتهم حاله قلق من مظهر الورم برجلي
والدي بقى يسأل عن حالتي بالحاح ... لان للعصر اشتد عليه الالم
وصرت امشي بصعوبه ...
واني متمدده على القنفه بالهول ... واهلي بالمطبخ ... رن الهاتف
شلته
الو
الو فروحه
_ لا عيني الرقم غلط ...
_ اهو هاي هم انتِ ... لاتگليلي الرقم غلط سألت وتأكدت هذا بيت فرح وهذا رقم بيتهم صيحيها
_  يا الله بابا انت ماعندك شغل وعمل بس تتصل على العالم ... والله مو بيت فرح ترى ذبحتني ... بعد لا ادك
_ والله اني متأكد من الرقم الي طالبه بيت البنيه الي رايدها
_ واني دا اكلك هاي البنيه دتضحك عليك مدتنطيك الرقم صح
شكلك لزگه ورادت تخلص منك
_ انت متأكده انثى ... شو اسلوبج مابي حس انوثه
_ ولا اسلوبك مال رياجيل ... شويه خلي عندك احساس وبعد لا ادك
_واني بكيفج ادك لو ما ادك ... دمشي صيحيلي فرح هي تنتظرني
سدت الخط بوجهي ...
صابتني حاله ضحك هستيري .... على كلمه الوجع الي گالتها قبل ما تغلق السماعه
رجعت دكيت اكثر من مره يله رجعت شالته
ردت بعصبيه الو
_ رجعت صوتي الحقيقي الو ...
_ منو
_ اني ثمين مي
_ ها هلو ثمين اني ميامي مو مي
_ وشبيج هيج متنگه
_ لا هيج واحد جان يتصل غلطان بالرقم
_ وانت شكو اتجاوبي من تعرفي يتصل بالغلط
_ لان كاعده بصف التلفون رديت عليه مره وگتله غلط بقى يدك
وامي گالت شيلي اخاف احد عرف
وطلع صدك انت
_ شلون صرتي
_الحمد لله احسن ...
_ عمي موجود بالبيت دنمرلكم ...
_ اي موجود
_ دنطي خبر اني هسه جاي ....
_ ماشي
_ ميكولون ماشي يگولون هلا بيك تعلمي
_ يله هلا بيك ...  بابا ثمين يريد يجي
يگول هلا بيك
_ مسافه الطريق اني يمكم ... اجيبلج كرسي متحرك يا كسيحه
_ تأفأفت بداخلي يا الله شكد ثقيل دم .... يله من رخصتك دا ادرس
_ ابتسمت ... يله اخذي راحتج سديت الخط
وطلعت لابويه
يابه موجود عمي ...
(كانت فتره الظهر عباره عن معارك بيني وبين اهلي لان اول ما رجعت امي
من بيت جدي ... التمينا على الغدا
گتلهم نويت اخطب ... فرحت امي بالاول ... لكن من عرفت ميامي
استشاطت غضب لان كانت صدمه الها ولابويه
_ لو تبقى اخر وحده بالدنيا ما اقبل تزوجها
_ ليش بله بنيه مربايه وحلوه وبت عمي ... عندج مشاكل ويا امها هي شعليها
_ ما احبهم ولا اقبل احد منهم يفوت بيتي
_ يابه انت تقبل بكلام امي
_ لا طبعا البيت بيتي ... واني الي اقرر من الي يفوته ومنو الي ميفوته
مو انت
_ بت منيره ما اريدها
_ اني رايدها مو انت ... اني الي ناوي اتزوجها واقرر ويامن اكمل حياتي
وماكو احد ياخذها غيري خليها بعلمكم
_ ابني ترى هذا زواج منو يگول عمك يقبل ينطيها ثانيا البنيه بعدها بالمدرسه صغيره
_ يابه بس خطوبه من اتخرج اتزوج ...
_ اي مو وكتها هسه
_ لا وكتها قبل ما يتقدملها احد ... انطي علم لعمي اني رايدها
لهيب_ والله ميلگى احسن من عدها ... البنيه متربايه ومن دمنا ولحمنا
يابه انت متكيف تأخذ لابنك بت اخوك ...
وعمي الرجال يعزك طول عمرك تحجيلنا عنه شكد طيب وياكم انتو اخوته وتحجيلنا عن مواقفه ... ترى مشاكل امي ومرت عمي مو سبب مقنع للرفض
_ كل بنات العالم ما عجبتك الا بت منيره تريد تقهرني ... وتخلي منيره تضحك عليه وتتعزز ببنتها براسي
كون الله ويفشلوكم وما ينطوها ... والله اذبح ذبيحه واتشمت بيك
_ اخذها غصبا عن الكل ... ولعلمكم متصير هالبنيه لغيري ... واليوم
انروح اني وياك يابه لعمي
_ انت شنو عود كبرت وتريد تمشي حجايتك علينا ... اذا گتلك ما اروح اطلبها من عمك شتريد تسوي
_ بله اقنعني بشي واحد لسبب الرفض ... مو بت ناس لو عائله مشبوهه
لو غريبه ...
شو ابوها اخوك والبنيه بت اخوك ... بعد شكو
لان امي رافضه البنيه تريدها تمشي حجايتها عليك ... مكافي الخراب الي صار بينك وبين عمي من ورا مشاكل النسوان
كافي عاد البيت حجايته للزلم مو للنسوان ...
متروح ويايه اتصل على عمي باسم واخذه يخطبلياها ... والله بعد
متشوفون خلقتي بهالبيت ...
اني رجال مو زعطوط وانتو تقررون عني ... وتختارولي الي اتزوجها
خلي بعلمكم ... غير ميامي مراح اخذ هاهيه قفلت ...
يابه اذا تعزني لا تخلي حجي امي يأثر بيك ... انت نفسك قبل فتره گتلي
شوفلك بت حلال واني ازوجكياها ... هاي اني لگيتها ومنك وبيك اكو احسن من هالبت الحلال والنسب ... بعد شتريد
_ الله كريم اجل الموضوع هسه ... خلي افكر
_ لا اليوم اريد اخذ حجايه من عمي اليوم قبل ما انزل للكليه
وهسه هم راح اتصل على عمي باسم يجي ويانا
_ اففففف يله اتصل عليه بس اذا عمك رفض بعد تحلم اوصل بيته
_ الله كريم
بالفعل اتصلت بعمي باسم وحجيتله السالفه كلها فرح لان محاولاته كل هالسنوات يصلح بين ابويه وعمي فشلت
شاف بموضوع الخطبه امل جديد ... ترجع العلاقه بين الاخوه
ورا اقل من ساعتين ... اجى
صح هو اصغر من ابويه لكن اله تأثير قوي عليه ... لان يحبه
دخلنا للصاله ... نتحاور بالموضوع ... الى ان كدرنا نقنع ابويه يوافق
في حين كانت امي رافضه الموضوع قطعا وحتى بلغتنا متوصل لا بخطبه ولا بأي مراسم تخص الارتباط ... وزعلت على ابويه )
طلعنا احنه الثلاثه لبيت عمي
اول ما طلع عمي يفتح الباب وشاف ابويه وعمي باسم .... اتفاجئ
وفرح ...
احتضن ابويه ورحب بي بأشتياق ... هالشي طمني
النفوس اصافت
عمي باسم طلب نكعد بالحديقه بالاول وحدنا ....
كعدت على المرجوحه بصف عمي باسم وابويه وعمي على الكراسي واحد بصف الثاني ...
بدأ حديثه بالسؤال عن الاحوال ... ما بي اي عتب وكأنه سنين الفراق الي فاتت ما الها وجود
دقايق وطلعت مرت عمي سلمت مبتهجه
عمي باسم حب يلطف الاجواء ويخلي الامور طبيعيه
طلب منها نتعشا عدهم اليوم
_اليوم عشانا يمكم ... بروح اهلج مشتهي كبه جريش من ايدج الطيبه
_ يا كل الهلا ... بيكم بعيني ابو ثمين شنو عاجبك اسويلك
_ اريدج سالمه كلشي يطلع من ايدج ... طيب لا تعبين نفسج
_ لا ماكو تعب انتو اخوتي ...
_ الله يحفظج وين البنات لعد
_هسه اصيحهم ... يجون يسلمون
عمه فدوه لعينك تعبناك اليوم ... ميامي كالت لو ما ثمين جان تبهذلت
الله دزه
_ اي والله عمو لو تدري من حجتلي شكد كبرت بعيني ... ونعم من ابوك
ومن تربيته
طبطبت على كتف باسل ابو ثمين
_ ليش شصاير شو ما ندري ....
_ ثمين _ ترخصت مرت عمي ... وحجيت لابويه وعمي باسم الحادثه
عمي باسم ابتسم
ومن انتبه ابويه وعمي هشام ملتهين بالسوالف ... همسلي
_ انت مقدما بايع بطولات ... فمسيطر على الوضع حاليا من هاي نافش ريشك
_ ضحكت ... همستله لعد شلون غير الواحد يرتب اموره ويستغل الفرصه
رفعت راسي ويا سلام مي ومنى ... ميامي مو وياهم
ابويه سأل ميامي لعد وين شو ما اجتي اتسلم
مي_والله عمو متكدر تمشي رجلها وارمه ...
بابا تريدك تسندها حتى تجي اتسلم
_ لا عمو عوفيها ترتاح ... احنه شويه وندخل عود نشوفها ...
ثمين _ طول حديث ابويه وعمي ... تمللت وبنفس الوقت ردت ادخل الحمام
اترخصت من عمي ...
دخلت للمطبخ
_ عمه من رخصتج اريد افوت الحمام
_ اتفضل عمه قابل انت غريب وتستأذن ...
دخلت للممر الي يودي للحمام بصف الدرج وللصاله وللهول ...
ويا ما وصلت بابا الهول انتبهت ... على صوت مي وميامي يضحكون
مديت راسي ...
سلامات مو گتلج خلي اجيبلج كرسي ...
ميامي : ارتبكت من صار كدامنا لان ما منتبهين عليه ...
هلو
ثمين- ردت اثير غضبها ... نظرتلها بصوره اعرف تستفزها
اجي اشيلج اوديج تسلمين على ابويه وعمي ...
شفتها خجلت لان الكلام كدام مي واتنرفزت لان افتهمت قصدي ونظراتي مو بريئه
_هسه ابويه موجود الصبح مضطره جنت
_ تركتهن ودخلت للحمام .... برجعتي اول ما فتت للحديقه ...
وكعدت ...
عمي اني جايك بطلب وما اريد تردني ... استغرب
_ گول عمو
_ رايد ميامي ... شفت صدمه على ملامحه وارتباك من سمع الطلب
عمي باسم ادخل رأسا
لا ترد جيه باسل ... متعشم بيك ما تفشله ... والبنيه تنطيها لابن عمها تطمئن عليها متروح لغريب ... متعرف شنو وضعه
ثمين اني اكفله سبع ورجال تنطي ميامي وانت مغمض ...
_ جيتكم على العين والراس .. بس البنيه بعدها صغيره
_ اني لان صغيره وتربيتك رايدها ... ما الگى احسن منها ... تتعلم عليه
وعلى طبعي واذا على المدرسه اني ما امانع تكمل ... كلمه رجال تحاسبني عليها
_ والله يا عمو ... اني ماعندي مانع بس اخاف البنيه متقبل وتحس اني ظلمتها من انطيها صغيره
_ اني احجي وياها واقنعها انطيني رخصه اكعد وياها. وحدنا ...
وافق عمي ... وعرض علينا ندخل للبيت ...
دخل هو وعمي وابويه للصاله ... واني كملت طريقي للهول ...
دخلت ... مي ومنى اطلعوا اريد احجي ويا ميامي وحدنا
كلامي سببلهم ارتباك وحتى خوف ... بدون كلام او استفسار طلعوا
التفتت عليها
ميامي -خفت اكو شي طريقه كلامه ودخلته الجديه قلقتني منه
اكو شي
_ اي كعدت عند نهايه قدمها المغطايه ببطانيه ...
دا ارفع البطانيه ... لزمتها
_ شنو
_ شبيج دا اشوف رجلج عمي گال وارمه
_ عوفها مابيها شي ....
_ لج انت خطيبتي ... غير اطمئن عليج
رفعت عيني جانت نظره الصدمه وجماد ملامح وجهها تعبير عن عدم الفهم مثل الي تگلي انت مخبل شنو هالحجي
اي والله خطبتج من عمي ... كلش خفت عليج اليوم بقى بالي يمج ... لو ما عيب نبقى وحدنا مجان عفتج وحدج بالبيت الى ان يرجعون ...
كم مره ردت امر اطمئن عليج بس استحيت ... ميامي تدرين من خوفي عليج اريد اخليج بعيني اني اتكفلج ... حتى اطمئن ماكو شي يأذيج ...
تدرين من حجيت وبا عمي كلش فرح لان امن عليج عندي ... بس جان متخوف من شغله المدرسه واني انطيته كلمه رجال اخليج تكملين ...
من تصيرين خطيبتي اكدر بسهوله شوكت ما اشتاق اشوفج امر ومن تريدين شي اطلبي مني ... اني دا احجي وياج بصفتي خطيبج لان ما اقبل
احد غيري ياخذج ... اني ابن عمج وابن العم ياخذ بت عمه محد ينطيها لغيره ... ثانيا اني احن عليج واخليج بعيني لان من دمي ولحمي واخاف عليج لان عرضي ... مو صح يعني عمي من وافق يعرف هالامور
بس اني گتلهم اريد احجي وياها واسمع منها الموافقه اريدها تعرف وتقرر بنفسها
_كلامه سلبني العقل والتفكير ... خجل وارتباك ... حاوطني بنظراته وكلامه الهادئ الحلو ... الصوره الي صورها الي من اكون اله
جنت اشوفها بالافلام والمسلسلات عجبتني المشاعر بعمري كانت متأثره
عندي اعجاب بشكله ... فكره ان انخطب وكدام صديقاتي يكون ابن عمي خطيبي واعيش ويا تجربه الحب الي اتجنبها لان خارج اطار اخلاقي والمبادئ الي تربيت عليها خلتني ... اجاوب
بكيف ابويه
_ بقلبي ولج يا ابوج غير اذابح وياهم اذا مينطوج ....
مو گتلج عمي موافق بي ردت اسمع منج الموافقه ... يله سمعيني موافقه حتى اكدر اصيحلج حبيبتي موبأسمج
_ نزلت راسي بخجل ... هو بكيف ابويه
_ زين هزي راسج ... اذا موافقه ... بقت خجلانه ولسانها معكود ولا نطقت بكلمه ولا حركه
اخذت كف ايدها قبلته ورفعت بأيدي الثانيه وجهها
حبي باوعي عليه ... انت موافقه صح من راح يسألوج ... موافقه جاوبي
مو تخجلين
اريد السالفه اليوم تكمل ونقرا الفاتحه حتى امرلج الصبح اطمئن عليج واروح اخذلج اجازه من المدرسه ... وراها نروح لدكتور
هزت راسها ونطقت ان شاء الله
شهقت وزفرت براحه .... أبتسمت
راح اروح ابلغ عمي مو من تشوفي تغيرين رأيج لان تستحين ...
بقت ساكته ... حبي ترى قلقتيني ... ماموافقه عندج اعتراض لا تستحين مني اني هم ما اقبل اضغط عليج واغصبج على شي ...
نظرتلي نظره بريئه بخجل
لا ما رافضه
خفت اكوم واتركها وتبدل .... بعد ميزول تأثير كلامي عليها
صحت ... يابه عمي ميامي موافقه ... ومتقبل اشيلها واجيبها يمكم تسمعون موافقتها
عصبت مني ...
_ ثمين عيب شنو هالحجي ... ترى اضوج من هالاسلوب اني ابويه استحي منه
شلون تحجي هيج ويا ميقبل ترى
بهالاثناء دخلوا ابويه وعمامي ... بالاول ما انتبهت على كعده ثمين قريب مني الا من سلمت على عمي بخجل نزلت راسي انتبهت على ايد ثمين منتجي عليها بصف رجلي لا اراديا من المستحى والخوف حاولت انزل رجلي على الارض لكن تألمت وعطت
_ عمو ابقي مرتاحه ... لا تتحركين ... هاي اني اجي لعندج وابوسج
_ قبل عمي راسي اتصور اريد اكوم اسلم عليه وتأذيت ... استغليت
ابويه يكلهم لعمامي يگعدون ويأشرلهم على القنفه الي بصفي ...
همست لثمين گوم اكعد بعيد
ابتسم بمكر ... وتجاهل طلبي
_ها عمو نقرا الفاتحه ... هاي ميامي كدامك موافقه
نظرتلها انصبغت خدودها بحمره الخجل والحياء ... فهموا هي موافقه
قرينا الفاتحه ... امها كانت فرحانه من دخلت تبلغهم العشا جاهز ...
الكل طلعوا
اشرتلي بإيدها وبهمس
_ يله متروح تتعشى
_وانتِ
_هسه يجيبولي اكل ...
_ اكل وياج واوكلج بأيدي
_ لا روح اتعشى استحي تبقى ويايه وحدك ... حباب اطلع من الهول ترى ما اكدر امشي واطلع اني
_ اشيلج ونروح نتعشا وياهم
_ لا عيب ... مي مي مي ...
_جيبيلي اكل هنا واخذي ثمين وياج حتى يتعشا
_ لا نتعشا اني وياها سويه ... مي ووياج كلاص مي
_مي_بعيني
ميامي _تترى انت دتحرج ابويه لان انت ابن اخو وهسه خطبتني ... ميكدر يفشلك لو احد ثاني جان گلك يله عمو گوم ويانا حتى ميبقيك ويايه
_ ادري بي وخطيه القى عليه نظره يريدني احس ... اني عدمت الاحساس سويت نفسي ما افتهم
حتى ..اول ما لمحت مي طلعت ... تقربت بحركه سريعه قبلتها على خدها رفعت ايدها غطت وجهها من الفزه والتصرف الغير متوقع ....
ودردمت بعصبيه
_ ثمين ترى والله ابطل واگلهم ماموافقه اذا سويت هالتصرف مره لخ

_