قلوب بينها برزخ

اول بارت بعد الانقطاع

لا اراديا من الخوف التفتت شفت نفس الشخص بس هالمره واگف
بالسطح الاول
دخلت بسرعة خطواتي قريبه للركض
صار بوجهي لهيب
_خيرج شنو خايفه ليش ما صحتيني اني اطلعها للزباله
_ رد فعلي جان تأييد لكلامه
مر هر خوفني دخلت اركض هوبي عفيه بس قفل الباب البره
ثمين بعد لليل يله يروح
غسلت ايدي على السنك بين ما دخل لهيب وقفل باب المطبخ
بس بقى بداخلي تخوف من هالشخص
نظراته وقحه مو نظرات عابره
بقيت طول فتره كعدتي يم عمي والولد بالهول افكر
احجي لثمين لو اخاف يسوي مشكله وياهم ويطلعون ناس شرانيين وصلفين
يروحون يأذوا
حسيت بايد ثمين تنبهني  وهو يهمسلي
_ وين صافنه مرتين صحت ميامي  ، انت تعبتي ونعستي امشي
نصعد
_اخاف تنام ويروح عليك الوقت
_ لا تخافين هسه من نصعد اوقت الساعه واوصي لهيب هم يوقت ساعته يصحيني
صعدنا واني مرتبكه وخايفه ما عرفت حتى اجاري ثمين بمزاحه وغزله
ابتسامتي باهته
حتى من صرت بحضنه صح حسيت بالامان بس بقيت كل كم دقيقه احاول احجيله
واتردد اخر شي قررت اسد الموضوع وانسى لكن ما غمضت عيني
الى
قبل صلاة الفجر بعده ما طالع النهار وضوه الشمس
مخيم الظلام طلع ثمين ديلتحق بالكليه وطلع عمي وصله وقفل الباب وراه
اني جنت واگفه يم باب المطبخ من دخل عمي
_ ارجعي بابا نامي
_ عمو متريد مني شي
_ لا يابه اخذي راحتج
_ صعدت لگيت لهيب دينتظرني
_ ميامي اكعدج على الدوام لو على هالسهر مابيج حيل
_ والله لهيب مراح اداوم
_ يله لعد اني انزل انام وانت نامي يم هذال
_ لا عيني اخذ راحتك هو الفجر طلع انام بغرفتي بس كعدني حتى اسويلكم ريوك
_بعد ما دخلت للغرفه اول ما خليت راسي على المخده
نمت
الى ان حسيت بصوت طكطكه جاي من شباك غرفتي
صحصحت واني مو داريه بشي بعدني بحاله السكون
عقلي مديستوعب الوقت واي شي حولي
بقيت دقايق بفراشي الى ان رفعت راسي اشوف الساعة
ب١٢ الظهر
يعني بس وحدي بالبيت الكل بالدوام وهوبي ما صحاني معنى هو
ريگهم لعمي وهذال
انتبهت اني كعدت على صوت الطكطكه
تحركت من فراشي قريب على حابط الشباك اتنصت
ماكو صوت
ارتاحيت طلعت للحمام صحصحت بديت بالتنظيف والطبخ
ورا ساعة كملت للبيت قررت اطلع اغسل الكراج لكن ترددت بسبب هالجار المزعج
بقيت متملله وحدي دخلت للمطبخ صبيتلي كوب شاي وكعدت على
الميز
فكرت اروح اجيب كتبي وادرس هي دقايق ورجعت كعدت على ميز المطبخ ادرس
اخذني الوقت الى ان سمعت صوت باب الصاله ديندار بي مفتاح
فزيت تسحبت شفت خيال عمتي
صحت منو جاوبتني
ميامي افتحي
فتحت الباب بسرعة
دخلت غير عن عادتها
_ ها هلو شلونج عفيه عليج مامداومه ومنظفه البيت
جنت شايله هم الطريق كله
عزمت بيت اختي يتغدون يمنا على الساعة ٤
_ هلو عمه زين شنو تريدين  مني اسوي
_ بسرعة طلعي من المجمده الي حگلج عليه
_ مر الوقت واني وياها بالمطبخ نحضر الاكل
بعد ما حضروا اهل البيت والخطار
وكلهم ملتمين بالهول
تسحبت للمطبخ بعد ان سلمت وبديت احضر الصحون
استغربت منها نست موضوع الحمل
وطول فتره تواجدي وياها بالمطبخ ما ذكرت هالشي
للمغرب حسيت روحي مخنوگه
اريد اطلع
كعدت بالحديقه على المرجوحه متربعه ولازمه كتابي ادرس
والكل داخل البيت
صار المغرب والخطار بعدهم عرفت سالفتهم مطوله
سمعت صوت بنيه
رفعت راسي
_ هلو عفيه ماعندكم ماسحه استخدمها وارجعها
لان اريد اكمل السطح قبل الليل وانكسرت الماسحه
_ استغربت الطلب وبنفس الوقت معرفت اجاوب
طلبت منها تمهلني دقيقه
دخلت همست لعمتي بالموضوع وافقت بس طلبت ااكد عليها
ترجعها
طلعت لكيت البنيه بعدها تنتظرني
اشرتلها تجي تاخذها
_هسه اجي اخذها من السياج
وكفت انتظرها يم السياج
الى ان سمعت صوت نحنحه
نفس الشاب مد ايده سلمته العصا بسرعة وارتباك
تعبناج عيوني
عفيه بس رجعوها لان نحتاجها
_ صار من رخصتج
_ ارتاحيت من اسلوبه وطريقته بالتعامل
استغفر الله صاير عندي سوء ظن بالناس طلع حباب
دخلت للمطبخ
اكمل دروسي
بعد ساعات سمعت صوت اهل مرت عمي اترخصوا
مروا من يمي
وهم يودعوني
انتهى اليوم بعد ما سمعنا صوت الجرس طلع
لهيب للكراج بينما الكل كان متوجه كل واحد لغرفته
واني دا اصعد الدرج
سمعته وهو يبلغ عمتي الجيران رجعوا الماسحه
بعد هاليوم صرت اشوف هالشخص يوميا بوقت رجعتنا اني ولهيب
من المدرسه  واگف باب بيتهم
كانت اخر ايام دوام للهيب قبل ما تبدي عطله الاربعين يوم بعدها
خلال هالفتره ما انتبهت ان ورا وگفته غايه
الى ان بديت اداوم وحدي الصبح يوصلني نوار ونهايه الدوام صرت ارجع
للبيت
هي ايام وما انتبهت ان هالشخص كان يراقبني وعارف  صار فتره ارجع وحدي
الا ان بديت انتبه له يوگف يم المدرسه كنت متوقعه عنده احد او يعرف احد بالمدرسه
لكن الي لفت انتباهي مره مرتين لمن اوصل لباب البيت واحاول افتحه يكون هو هم واصل لباب بيتهم يبقى ينتظرني ادخل يله يدخل لبيتهم
هنا بديت اشك هو يمشي ورايه صار عندي تخوف بقيت طول اليوم قلقانه وبنفس الوقت اگول اخاف اني ظالمته
ثاني يوم قررت اول ما اطلع اغير طريقي وارجع ويا مي واشوف اذا هو متقصدني او لا
وبالفعل انتظرت مي وطلعنا وبيدي قلم لنص الطريق ردت أتأكد وكعت القلم  نزلت حتى التقطه بطريقه اكدر التفت
والصدمه من شفته بعد مسافه مو قريب ولا بعيد عنا  قلقت  اخذت القلم وكملت
طريقي  بقيت محتاره اسولف لمي لو اسكت واتجاهل الموضوع
اخذتني الافكار اخاف اروح وياها لبيت اهلي وابقى عندهم يندل البيت  ويروح يراقب البيت ويعرف مي وحدها 
الافضل من الباب اخليها تدخل واني اروح حتى ما يعرف عندي صله باهل هالبيت
وصلنا لبيت اهلي على كد ما دخلت مي دخلت وياها بحجه اشرب مي
وانتظرتها تلتهي اخذت سكين صغيره  خليتها بجيب الجنطه
سلمت وطلعت  انتبهت عليه