قلوب بينها برزخ

الثاني عشر

كالمجنون اترجل من تعقلي ....
الا سلطه القلب جمعت كل انفعالاتي ....
راودتني الشياطين
واطلقت لنيران وجعي العنان ....
جننت حتى باتت تحت جناحي محبوبتي
وسكن كل شي حولي .... فندمت لفعلتي
اتخبط بأفكاري كيف سابقيها ... مدلله ويقسو القلب
لما فعلته بي امنيتي

دخلنا  لكراج لبيت عمي باسل ... تلگى ثمين بعصبيه ونتر  .... من شفت ملامح عمي  وعصبيته ارتاحيت
راح يكدر يعقله لان هو علاقته قويه بعمي باسل وكلش يحترمه وعمي
يحبه كأنه ابنه
_ لك انت مخبل تأخذها من المدرسه لديالى وتسوي هالمصيبه .... عمك
ومرته يفترون بالشوارع يدورون عليها
لو ما عمتك تتصل وتفهمني ... جان هسه كاعدين ندور عليها بالمستشفيات
كلنا الا احد ضربها بسياره لو ماتت لو بمستشفى
_ لو ميته احسنلي ....مجان شفتني مخبل يعني عمي صار عنده علم هي ويايه وفهمته الي فهمته لعمتي
خلص تبقى يمكم واني رايحله هسه .... لو متفق ويا لو ميشوف بنته بعد
اني گتلك من البدايه متصير لغيري على جنازتي ....
_ صياحهم والصوت العالي بصيغه عركه
تعبني ... بقيت بس الدموع تجري بدون حول ولا قوه
متأمله عمي راح يكدرله ... بس بداخلي اعرفه مخبل الي براسه هو الي يمشي
حتى لو يعرف يعادي الكل ... واعرف ابويه فقير ميكدرلهم ... راح يعنترون عليه
_ لك بابا انت مخبل هاي الامور متمشي بهالصوره والعنتريات
هي لعب البنيه مخطوبه شنو تعقد عليها ثانيا العقد باطل الا بموافقه ابوها
لان قاصر حتى لو اني وكيلها لازم بموافقه عمك
_ خلص انت اقنعه واني امشي بلي تريدوا غيره امشي بلي براسي
_ كافي لك ترى دا اتحملك واتحمل خبالك ... احترم نفسك واسمع الحجي
هسه نروح لعمك ونحجي ويا لا تكعد تتخبل عليه ... ما ناقصنا مشاكل
قبل من ورا النسوان هسه من ورا المزعطه
_ للحظه لمحت ابتسامته لان ترزل من عمي كدامي وميكدر يجاوبه
مسح لحيته بكف ايده و رمقني بنظره تحلف
_ يله لعد خلي نروح هسه .... وميامي تبقى يمكم مناخذها
_ خلي البنيه تجي ويانا .... كافي تعاند
_ همست بأذن عمي ... لا خليها حتى عمي من يشوفها يمنا يلين
بس اوديها وتصير عنده يركب راسه
_ ابقي عمو خلي نفض السالفه واني المغرب ارجعج لبيتكم ادخلي يم عمتج والبنات
ويا ما خطيت اجى بصفي همس بصوت ناصي
_ مثل ما فهمتج مو تقلبين ... اليوم اريد السالفه تفض لا تفقديني اعصابي
وتخليني اسوي شي اني وانت نندم عليه اي احد يسألج انت رايدته توافقين
لا تخلينا نذابح من ورا عنادج
اخلص من ابوج ...ورايه طلابه ويا اهلي ....
— همستله ليش متعوفني بحالي اذا تعرف اهلك مرايديني
_ طلعت كلمه اني وردت اكمل رايدج بدلت وگتلها دا اسوي هالشي لخاطر لهيب ومي اختج وفيه  وعدها قلب مو مثلج .... فوتي غسلي وجهج
وتصرفي طبيعي لا تحجين شاي شي من طلعنا من المدرسه لحد هاي اللحظه لاي أحد حتى لو يسألوج لا تجاوبين
خلي اشوف شراح يصير ويايه للمغرب ....
_ فضها شدتحجي وياها .... خلي البنيه تفوت ترتاح
_ يله روحي ...
طلعت ويا عمي باسل لبيت عمي هشام ..... اول ما فتح باب المطبخ ولمحني
تهدد عليه وشتمني .... ومن فتح باب الكراج ... جرني من چتفي بشتيمه
_ ميامي وين  والله اذا بيها شي اندمك يا جبان
_ عمي باسم جره ...گله خلي ندخل بلا فضايح ... وصوت عالي
_ هذا ميدخل بيتي ... ولا اريد اشوف وجهه
_عمو شنو الي يرضيك اني اسوي ... بس ميامي مياخذها احد غيري
_ ابقى انت هنا لا تدخل ... اني وعمك نتفاهم
_ ماعندي تفاهم
— اذا منتفاهم ما ارجعها .....صوت عمي باسل سكتني
_ اسكت انت ...
صلي على النبي يا هشام وتعال نحجي جوه ....
_ بقيت انتظر يم السياره ....الى ان لمحت مي طلعت بالكراج
_ صوفرتلها واني منتجي على الباب ... التفتت مفزوعه
شنو الاخبار صديقتي
_ ثمين ميامي وين ... ليش هيج سويت بينا ابويه جان صار بي شي من الهبطه
_ موجوده بعيني بس طمنيني شنو الاخبار جوه ...
_ والله صوتهم عالي شكلهم مديتفاهمون وابويه قافل عليك
ويگول هي مخطوبه لابن خالتها شنو اطلع صغير ويا العالم وماعندي كلمه
بكيفكم تقررون
_ اريد افوت ... سويلي طريق
دخلت لكيت مرت عمي واگفه تتنصت يم الباب من شافتني خجلت وابتعدت بدون لا اسلم عليها ولا تسلم عليه
فتحت الباب ودخلت ... عمي گام يريد يهد وعمي باسل لزمه
سديت الباب ورايه ...
ودخلت كعدت كدامه ... اني لا اريد اتحداك ولا اخليك بموقف
الي سويته غلط اعترف بس انتوا وصلتوني لهالشي تفسخ الخطبه
بدون حتى ما تكعد ويايه لو دز عليه ... تفتهم الي صار ... مجرد
ميامي گلبت خلص مشيت بأمر النسوان ... يعني انت لا احترمتني ولا احترمت ابويه فوگاها تنطيها لابن خالتها بعنادي وهو قبلي خاطبها ما انطيتها اله
شلون تريدني اتصرف صح ...
اني كلمه ما اثنيها حتى لو تخلي طلقه براسي ... ميامي مياخذها غيري
مثل ما فسخت خطبتنا تفسخ خطبتها ويا ابن خالتها ...
وكلشي يرجع لمكانه واخاف عبالك الحجي هذا من عندي ميامي هم رايده الي اني رايده
واذا تريد اسألها وتأكد هسه اخذك لبيت عمي واسمع بأذنك
عمي باسل ادخل
_ يعني كل الي صار من جوه راس بنتك والموقف الي خلتنا بي ... لان انت منطيها عين وتسمع حجي زعطوطه ... اختلفت ويا خطيبها وتالي من تصالحت رجعت تريده
وتخاربت ويا اخوك وابنه من وراها ...
_ خابرلياها
_ اتصلت على بيت عمي باسل طلبت ميامي ...
طلعتلي ... عمي يريد يسمع موافقتج تريدين نرجع نرتبط
_ ثمين ما اكدر استحي من ابويه
_ ليش دتستحين قابل مسوين شي غلط لو حرام ... نعقد على سنه الله ورسوله
اتقصد احجي بصوت عالي حتى اسمع عمي ...لا تحجين شي بس كولي اي او لا
انطيت السماعه لعمي وخليت اذني وياه
_ اجتني ال بلي موافقه مثل المي البارد ... بس حسيتها مثل الصاعقه على مسامع عمي لان
خلينا بموقف صار بي الغلطان ومشى بكلام النسوان
بداخلي انقهرت عليه لان كل الي بي صار بسببي واني الي خليته بهالموقف
واعرفه مو صاحب مشاكل وصلف ... مشت عليه الفره الي فريناها عليه
صارت ميامي كدامه مثل الي اتفقت ويايه عليه
وصرت اني صاحب الحق كدامه
انطاني السماعه نهيت الحديث ويا ميامي وسديته
التفت على عمي باسل ... وگله
_ ماطول موافقه اعقدلهم بس لا هي بنتي ولا تعتب هالبيت
تنسى عدها اهل ماطول اختارته
_ من سمعت كلامه بلحظتها مهتميت كلت خلي اعقد وراها اصلح الوضع
واصالحهم
_ ورا نص ساعة رجعنا لبيت عمي باسل ... بالطريق اتفقت ويا ميذكر لميامي الكلام الي گاله عمي هشام
لتروح تقلب عليه ... ووعدته اني اصلح الوضع بينهم بعد ما افض موضوع العقد وتصير على ذمتي ....
من دخلت بقيت نص ساعة اقنع عمي نروح نعقد عد رجل دين لان عمرها
ما يستوفي شرط العقد بالمحكمه
مقبل الا عمي هشام يرجعله خبر نهى موضوع خطبتها من بشار وينطي علم
_ بعد اكثر من ساعة حديث واتفاق بيني وبينه ... صاح على ميامي ...
اجتي سألها
_ عمو انت موافقه ... ابوج انطاني تخويل اعقدلكم اذا انت موافقه
_ عمو ابويه قبل ... وتفاهم ويا ثمين
_ كال اذا هي موافقه هو موافق ....
_ ما ادري القسمه والنصيب خلوني انطق موافقه مدري الخوف من المشاكل ما ادري عندي مشاعر حب لهالشيطان الي كدامي الي كارهته حاليا واحسه سجاني الي انحكم عليه بي مؤبد
حسيت وافقت او لا راح اكون اله رضيت او ما رضيت ... بس بداخلي
حقد وتحلف اطلع عينه واندمه على اليوم الي رادني بي ... مو طايقه اباوع بوجهه
اخر لمحه لمحته بيها من كلت بكيفكم موافقه .... استرخى وخلي ايده ورا راسه منتصر .... حتى ملامح وجهه تغيرت وبانت ابتسامه خفيفه على شفايفه
طلعت رحت يم بنات عمي ... حتى نسيت اسأل شوكت ارجع لاهلي وليش مو بحضور ابويه راح يتم العقد ...
احسه كابوس واريد اخلص منه بأي مصير ... بس يزول هالخوف والقلق
من داخلي
ثاني يوم للظهر رحت ويا عمي وثمين عقدنا
كل هالوقت واني ممخليه عيني بوجهه هو حس ... حاول يحجي ويايه كتعليمات ... وشنو اگول
من رجعنا لبيت عمي ... سألته شوكت ارجع لبيتنا ...
گالب وجهه يحجي ويايه من ورا خشمه
_ بعد خلي ابويه وعمي يتصالحون وارجعج
_ شنو علاقتي اني بهالموضوع
_ لان كل الي صار من جوه راسج وعمي متحلفلج لان خليتي يتخارب ويا ابويه ... خلي يهدئ وارجعج وسدي الموضوع مابيه حيل احجي بي
_ ليش ابويه زعلان مني ...
_ كم يوم ويهدئ وكلشي يصير تمام
عاد تستاهلين مقدم ومؤخر يكسر الظهر ... عمج كتبني صك
بالمبلغ يخافون اقلب عليج ... اشترطوا ماكو زواج الى ان ادخلين السن القانوني ... ونعقد بالمحكمه ...
ميدرون انت تقلبين حكم بلد ... زلم مشوربه اختلفوا من وراج
_ كمت من مكاني راسي يفتر مو فاهمه شي ... بديت اوعى وافكر ليش ابويه زعلان مني يعني موقفه مو ضد ثمين ماخذ موقف مني ...
_ وين رايحه تعالي اكعدي مخلصنا كلام
الكلام الي حجيتي لعمتي عن موقف امي صحيح
_ اي صح ما كذبت بي بكلمه ...
_ وليش هسه يله حجيتي ما حجيتي بوكتها
_ لان ادري مراح تصدك ... فأختصرت الموضوع وكلت كل واحد يروح لحال سبيله
_ ايباه كله تشتغلين من راسج ... طراطير احنه كدامج
هسه بعد اشتغلي من راسج حتى اكسره
خلي بالج  ولي امرج حاليا اني حتى عمي بعد ميحكمج ... حكمج عندي فاهمه .... الكلمه والحركه تحسبين حسابها ويايه 
هسه روحي ... مو طايقج
_ غمضت عيني اريد انفجر بي ... لو بيدي بلحظتها اقتله واخلص منه
بس تمالكت نفسي ... طلعت ورا كم ساعة عرفت بعده موجود نايم بالصاله
وراح يبقى يبات لان مجاز
بيت عمي باسل عنده ٢ بنات اصغر مني بالمتوسطه  وولد صغير
ومرته صغيره بالعمر لان متزوجه عمرها ١٤ سنه .... كعدت تسولف ويايه وتهون عليه وطمني كلشي راح يمشي تمام وتمدح كدامي ثمين  ومعتبرته من اهل البيت مثل ابنها ... مع  ذكر بعض التحفظات  عن امه حسيتها تنبهني منها ...
لنهايه المغرب سمعت صوته يصيح بأسمي ... رحت عليه لگيته ماد راسه
من باب الصاله
_ نعم
_ راح اطلع محتاجه شي
_ لا (ميهلي حتى اگله شكرا )
_ طلعت افتر بالسياره احس هموم الدنيا كلها على راسي ما اعرف الي سويه صح غلط بحق هالبنيه راح ارتاح وياها وتمشي حياتنا لو ظلمتها
من اولها
منين الگاها من قلبي المتلوع لو من
امي الي قومت الدنيا وما كعدتها البارحه من عرفت بلي صار وبسالفه العقد
لو من عمي و ابويه  لا ابويه بي مجال يلين ... اليوم من طلعت سألني محتاج فلوس
يعني واكف ويايه ممعارض  قراري .... والله يا هوبي بس انت اجتي السالفه من جانبك حاضره محضر وكعت كلها براس اخوك
تنهدت
نزلت يم كشك يبيع جاي ....
اخذت استكان ووكفت على صفحه ... اضرب صفنات 
بوضع ميامي هاي عدها مدرسه وامتحانات بعد كم يوم ... واني عندي دوام
انزل باجر بعد للاجازه يله اشوفها ... لازم ارتب وضعها  بله عمي گلي بقيها يمي بين ما عمك يهدئ  ورجعها لبيتهم
ملابسها كتبها هاي كلها نسيتها .... خلصت الجاي ورجعته للرجال
شغلت السياره وطلعت لبيتنا ....
دخلت امي مگلوب وجهها سلمت ما ردت السلام ... صعدت للغرفه
دخلت مستعجل ... ها شلونك
اكلك اتصل على مي خلي تحضرلي غراض ميامي ملابسها كتبها
يعني گلها احتياجاتها
_ رفعت السماعه  مرتين مرت عمي اتجاوب اسده
جر ثمين مني السماعه ... اتصل على بيت عمي
_ طلعت مرت عمي الو
الو شلونج عمه .... خلي مي تحضرلي غراض مرتي الي تحتاجها
ملابسها وكتبها وملابس المدرسه ... حتى امر فد شويه اخذها
_ ليش هيج سويت بينا وبالبنيه ...  عمك من البارحه لليوم مريض نايم بالفراش
واني قلبي نار على بنتي من سمعت صوتها لسى  قلبي محترك عليها
_  ليش اني شسويت ردتها بحلال الله هي من الاول الي
شيطان دخل بيناتنا فرقنا فتره  ورجعتها
اطمئني ما بيها شي  كم يوم وانزل اجازه اجي اصالح عمي وترجع يمج
ودوامها  هسه راح اتفق ويا محمود ابن عمي اخلي السياره يمه حتى يوصلها ويرجعها يوميه ...
_ الله عليك مداريها ما مأذيها ولا مديت ايدك عليها
_ لا تقلقين عليها صارت بذمتي هي مرتي مو اسيره عندي حتى أأذيها
اني لو ما احبها مجان سويت هالسوايه وانت تعرفين السبب مجان مني ولا عندي علم بشي ... والعلط منها ما نبهتني خلتني استغرب تصرفاتها ويايه
لو مصارحتني جان لكيت حل وعرفت اتصرف بدون منوصل لكل هالمشاكل والمغثات
ثانيا هي بيت عمي باسل مري انت شوفيها واطمئني عليها حتى هي هم ترتاح من شوفج
بس ردت اسأل على شغله انتي نقلتيلها موقف عمي منها
_ ما ادري ماعدها علم ... حجيتلها ومن البجي مكدرت حتى تحجي ويايه
كلشي ما افتهمت منها بس صوت الشهكات تالي گتلها روحي ارتاحي
وبعدين طمنيني عنج  
_  من امر اخذ الغراض اروحلها ابات هناك عود اتصل اطمنج  عنها واخليها تحجي وياج
_ على كد ما كارهته ومقهوره على ابن اختي وزعل اختي  وجنت اجاري بالكلام لان كلت الفاس وكع بالراس بس ميامي صارت اله مو مال اعادي
شكد ما اثر كلامه الاخير بيه وحسيته شكد يحبها  ويريد يرضينا لخاطرها
ماشي هسه نحضرهن
_ ما اتأخر ان شاء الله .... مع السلامه
_ شنو الاخبار
_ ماكو شي بس اخوك شايل هم الدنيا على راسه
كل الامور مخربطه وباجر عندي دوام راح تبقى كل الامور معلقه الى يوم الاجازه
والبنيه راح تتبهذل من ورايه وورا عمك الي قافل 
سحبت غراضي الي احتاج اخذها ويايه للكليه ... استذكرت العطر جريته خليته بالجنطه 
_ لا تهتم خلي عينك بعين الله وهي تصير سوالف ... المهم قلبك مطمئن
صارت الك
_ ياريت مثل ما انت متخيل ... اكو امور بس اني احس بيها
_ مثل شنو
_ لا تخلي بالك اني ارتبها بعدين وارجع كلشي لمكانه
_ بلسانك تنحل اكبر مشكله
_ اذا حتى اللسان انربط  تيه حروفه من ورا التفكير
هم يله  اروح ... محتاج شي
_ لا سلامتك بس طمني عنك ولا تبقى تفكر زايدخليها على الله هو يدبرها
_ ان شاء الله يله في امان الله
_في امان الله
_ وصلت لباب بيت عمي دكيت هورن .... طلعت مرت عمي بيدها جنطه
وكيس چبير
نزلت من السياره ...
_ هاي عمه غراضها والكيس بي الكتب والملازم كلها
_ ماشي يله تصبحين على خير
_ وانت من اهله من توصل طمني مو تنسى
_ لا ان شاء الله ما انسى
بقلبي دخلي تعدي بيناتنا على خير هسه الكاها كارهتني ومطايقه تشوف وجهي
بقت امها توصيني عليها ...
ردت اكلها وصي بنتج عليه  من وراها عاديت كل الدنيا والكل كارهني اولهم (امي الي متحجي ويايه  وحجايتها الي دكت بقلبي ....
لو بيك خير مجان كتلت روحك على وحده  .... عافتك لان  تحب واحد ثاني وانخطبتله بسرعة لان جانت متفقه ويا تخلص منك بحجج ومشاكل )
تنهدت اخ يا گلبي انت شتگول  هالحجي تصدگه لو ميامي متسويها
والله انت  يا قلبي طايح حظك ركضتني هالركضه وما خليت عقل براسي ...
ولا خليتني افكر ورا ما راح اسوي هالسوايه شلون ارتب وضعي  عميت عيني خليتني ما اشوف شي غير ميامي لاتصير لغيري  وتحترك انت ( قلبه )
من التفكير ما حسيت بالطريق الا واني واگف كبال باب بيت عمي ... رنيت الجرس
نزلت الغراض ودخلت  فتحولي ... لگيتهم ملتمين  بالهول وهي مو يمهم
سلمت ردوا السلام لعد ميامي وين
_ بالغرفه كالت  راسها يوجعها ...
_ رقيه بله روحي شوفيها كاعده ... صيحيلياها  ترخصت ودخلت للصاله
انفتح الباب  ورايه واني دا اخلي غراضها على القنفه ...
التفتت .... ها كاعده  هاي غراضج مريت اخذتها 
شو هاي انفجرت بالبجي
_ ليش هيج سويت بيني وبين ابويه والله اذا صار عليه شي انت السبب
لو تموت ما اصيرلك مره ...
_ حالها لخبطني بين مقهور عليها وبين الكلام الي گالته يسمم بين الي اني بي كله من جوه راسها
العصبيه اخذت دورها ... لزمت ايدها جريتها  تعالي  المن دتهددين
وتتوعدين بقت ساكته ودموعها تجري بتمسكن ....
اتعوذت من الشيطان  كلشي ما بي هسه مريت عليهم وحجيت ويا عمتي وكتلها  من اوصل اطمنج عليهاوتحجين وياها ... واجازه الي تجي اروح اصالحه وارجعج يمهم
سحبتها من كف ايدها هسه تعالي طلعيلي دشداشتي ...ونزعيني الحذاء والجواريب حتى تغسليها اخذها ويايه 
دا اشوف شلون متصيريلي مره ....
تحول التمسكن الى تكشيره هر وطلع اظافره
_شنو ... ترى ما احب هالاسلوب ولا هالتصرفات
_ ليش تستنكفين تنزعين رجلج حذاءه
_ لا طبعا بس الاسلوب محلو ... انت تعرف طبعي وتعرف شنو الي يغثني
_ بس انت  كلشي متعرفين عني  ... دنگت خلعت الحذاء والجواريب  وطلعت من الصاله  دقايق ورجعت لگيتها مطلعه الدشداشه
هاج غسلتها شريها جان انطيتها لوحده من البنات بس عيب كدام بيت عمي انت موجوده واصخر وحده من البنات
_ اخذتها منه ... شو هذا بلا خجل نزع قميصه شافني تحركت بسرعة
دا اطلع
_ تعاي اخذي القميص اغسلي ... مستحيه لو تستنكفين
_ رجعت لعنده سحبت القميص من ايده ... جيبه
_ من تكملين ارجعي حتى نتصل بأمج ...وراها تروحين تنامين لان مو طايقج
_ عاد اني الي طايقتك
_ ها شدردمتي
_ محجيت شي ... طلعت بسرعة للحمام فتحت حنفيه المغسله ويا ما فتحت القميص دا اخلي جوه المي ... استنشقت ريحه عطره ... قربته اشتم بي وبقلبي اگول الحمد لله نظيف وريحته طيبه
انفتح باب الحمام صار گبالي ... نظرته ثولتني مستغرب على مصدوم
واني من الخجل معرفت ابرر لو احجي شي
_ خلصتي دا افرچ اسناني ...
_ لا هسه ... دخلت القميص جوه المي وبديت اغسله وهو ورايه
يراقبني ... كملت التفتت عليه خلصت ...
بس سؤال قبل لا اطلع شلون تفتح باب الحمام بدون ما ادگ الباب ... بلكت
احد فات يسبح وخالع ملابسه
_ لا ن شفتج من دخلتي ومأمن حتى لو افتح الباب عليج ... لا عيب ولا حرام
لازم نسيتي عطري وكاعده تتعرفين عليه من جديد ...
_ اوي ابتليت سألتك ... اروح اشر القميص احسن ...
_ خلي بالج اخاف احد يشوفج ويفز ... رمقتني بنظره عصبيه
_ شوفي وجهج (خشمج وعيونج )مورمه ...
_ عادي الي ماعنده قلب ميحس بالمقابل
_ هو اني قلبي ميت الا شعره واجتي وحده كملت عليه
_ طلعت وسديت الباب ورايه ... غريبه هالمشاعر جنت كارهته ومو طايقته
بس صار قريب مني وبدا يداهر نسيت السوايه الي سواها بيه
_اخ من هال اوي وهالاعصاب شلون تحرك وتلين هالقلب عليها طلعت من الحمام للصاله اسولف بداخلي
باجر انت رايح وروحك بيها ... من ساعة الي شفتها قلبك متلوع عليها
ودماغك بايع ثگل ... اليوم عوف عقلك وامشي ورا قلبك
بقيت انتظرها الى ان دخلت ... بعد ماعندج شي
حتى تتصلين طمنيهم
_ لا خلي اتصل حتى اخذ غراضي واروح انام
_ ذكرتني بغراضها .... ويا ما رفعت السماعه بدت تحجي ويا امها
رحت اطلع العطر انطيهيا ما لگيته بقيت ادور عليه بين الغراض
التفتت على صوتها ...
مخبيه السماعه بأيدها ... همست
_ اذا ددور على العطر اخذته من طلعت ملابسك ... كملت الاتصال
وخطيت بأتجاه غراضي
_باجر محمود يوصلني ويرجع يوصلج للمدرسه وتتفقين ويا على وقت ثابت يرجعج هالايام بين ما ارتب الامور من انزل اجازتي
واي شي تحتاجي تتصلين بلهيب ....
_ ان شاء الله ... دا اطلع من الصاله صاح بأسمي
_ ميامي
_ نعم ...(حسيت قلبي بدا يدك لان صوته وهو يصيح اسمي بهدوء تصير بي وبحه ثگل اني اعرفها من يريد يتغزل )
_ العالم تگول تصبح على خير من تروح تنام
وطفي الضوه وراج وانت طالعه
_ ثمين
_ شكو
_ تعرف الله يبتلي المؤمن واني ابتلاني بيك
_ ادري مثل ما بتلاني بيج بس كل واحد ابتلاءه شكل
يله طفي الضوه لان مطايقج
_ شعور .... مت
نتر بيه
_ (كلامها يهيج قلبي احسها كرهتني )
نترت بيها بعصبيه  قاطعتها قبل لا تكمل جملتها
ميامي ترى شيطاني بعده براسي عليج ... تكفي الشر
خليني انام عساني ما كعدت
_اسم الله شكو تدعي على نفسك
_ هالجمله نزلت مثل البلسم خفضت صوتي وعصبيتي
اتركيني خليني انام تعبان  غمضت عيني
_اوي
_ سمعت بس الاوي بدون باقي الكلام من طلعت
ابتسمت
هي هاي الاوي الي قلبتني على البطانه ....