قلوب بينها برزخ

الباب السادس

اقبلت على عتبات جديده وطرقت ابواب لم ادخلها
حايلني فامتنعت بحياء يلفلفني وعقلي لم يرتضي
ان يدنس بشر جسدي من دون شرعا وقسمي ظننته
اقبل يروضني لنيل مبتغاه وما يعلم ان عقلي يفوق سني
مازحني مؤنبا ناصحا ... بأيا كان لا تأمني
الباب السادس
ميامي : بهالليله بقيت سهرانه ما اعرف شنو الشعور الغريب الي بداخلي خليط بين فرح وقلق وحذر على مستقبلي وذكريات الايام الفاتت
اسلوب ثمين وغطرسته ... حاله عدم الارتياح شلون انقلبت ووافقت عليه
يمكن دا احبه ... ما اعرف يمكن مواقفه ويايه خلتني أأمن اله ولان ابن عمي راح يداريني ...
وانت ليش دتفكرين ... عيشي ايامج الجايه ويا وتعرفي عليه اكثر يله تحكمين ... يجوز انت ظالمته
مي- رفعت البطانيه عن راسي ورفعته  الفي نظره
لكيت ميامي متمدده وسانده راسها على كف ايدها سرحانه )
هاي بعدج كاعده متنامين
_يا ثوله فززتيني ...
-ههههه يا طلعتج من حاله الرومانسيه ... يا عيني يا عيني
_ نامي ولج ترى ما الي خلگ مداهر
_ اوي مااطيقه ... كلكم فرحانين بيهم بعدنا ما عرفنا خيرهم من شرهم
( قلدت عليها من انتقدت ثمين قبل ايام بالمطبخ )
ابتسمت ...
-ما ادري اليوم موقفه ويايه الصبح خلاني اغير فكرتي عنه
تدرين صار ساعة افكر شلون وافقت وكدر يقنعني بكلامه
_ تنهدت اخاف حبيتي يا اوختي
_ واني شلحگت اعرفه حتى احبه ... لا مجرد اعجاب حاليا ماعندي مشاعر تجاهه ... بس كلامه اليوم صدمني ... حسيت اكو شي بداخله ميظهر على
طبعه من برا ... ما ادري مي شخصيته غريبه
لج سطرني بكلامه احسه رأسا بدون مقدمات ربطني بي .... جرئ وشخصيته قويه ... واثق من نفسه ومن كلامه ... كأنه شخص متعلم يحصل الي يريده وبنفس الوقت كلمته مسموعه ما فهمت لخد هاللحظه شلون كدر يقنع ابويه وامي ... فاجئني بموافقتهم ... لج اصلا من گلي انت خطيبتي
خلاني احس اني صدك اله وخاطبني من زمان ...
يعني حسيت الموضوع واقع حال ...
_ يعني شنو ما مقتنعه ... من وافقتي
_ لا مو هيج قصدي ... بس مدا اعرف شنو الشي الي سيطر بي عليه
_ خبالاته يا اختي ... الكسيحه ههههه يابه من اتذكر
شلون مبتسم ونظراته مو بريئه يگلج اوديج تسلمين على ابويه وعمي
والله هذا راح يركصج
_ يعني شنو شو خوفتيني
_ اقصد متقلب وشخصيته غامضه كل مره اشوفه بحال وشخصيه
فانت راح تتكيفين على وضعه ... وتصيرين مخبله مثله
_ نامي  بدل ما  اطمن قلبي عود عندي اخت واحجيلها ... خوفتني منه
_ عليش دتخافين شين الي تعرفه احسن من زين الي متعرفه
شميكون هو ابن عمنا ... يعني قلبه يحن عليج بكل الاحوال
_ اوي شنو هاي الريحه ... شكد مكروهين هم حرگوا التايرات. وجع
تحركت مي من فراشها بأتجاه الشباك
_زحت البرده ... شكل النار بالقطعه الي بصفنا يخوف ...  حرت اروح اكعد ابويه لو ارجع لفراشي
راح اروح اكعد ابويه
فتحت باب غرفتنا .... رحت بأتجاه غرفه امي وابويه بنيتي اصحي ...
ويا ما رفعت ايدي دا اطرق على الباب ... ميامي  مدت راسها منتجيه على حافه الباب مال غرفتنا واگفه على تك رجل  ... شكو دتكعدين ابويه .. الدنيا بارده خطيه يكعد يطفي النار ... احنه كاعدات اذا شفنا شي خطر عود نگعده ...
_ اخاف النار تمشي بالقطعه بيها ورق ونايلون ...
_ لا هسه شفتها مو عاليه  بس الله لا ينطيهم الغرفه بعد مينام  بيها من الريحه
_امشي لعد ننزل نتمدد بالهول على القنفات ... وكل شويه نصعد نشوف النار
سندتها ونزلنا   نهمس بشقى ووالابتسامه على شفاهنا ... من حال رجلها
سمعنا صوت رن التلفون  جاي من الهول ...
_ منو يدك هيج وقت ...
_ ما ادري ... اخاف اكو شي  ساعدتها تتمدد على القنفه وتحركت بسرعة باتجاه التلفون
ويا ما اقتربت منه  سكت
_ رجعت تمددت مقابيلها ... بقينا نسولف ... رجع التلفون  يرن  ... رفعته
الو
_ يا مسهرني ... اجيت على بالك لا
_ منو
_ ترى العصر حجيت وياج المفروض عرفتي صوتي ... ومصارلي كم ساعة من رجعت منكم ... وما ميزتي الصوت  هاي عليها زعل 
_ انت هم ما ميزت صوتها اني مي ... مو ميامي هههههه
_ لا بربج يا فشله ... ولا كأنه سمعتي شي ... خليها بيني وبينج
_المشكله هياتها بصفي ... وسمعتني
_ خربتيها من اولها ... انطينياها
_ اخذت السماعة مبتسمه ... الو
_ ترى كذب اعرف صوتج بس ردت اشاقيها
_ اولا ليش داك بهالوقت عمك اذا نزل وشافني لازمه التلفون يذبحني
وثانيا  لا ماميزت الصوت ... لان امي وابويه ميكدرون يميزون بين صوتي وصوتها بالتلفون ... يغلطون بيناتنا فلا تذاكى عليه
_ اولا اني رجال خطيبتي من اشتاقلها ماعندي غير التلفون وسيله
ادك شوكت ما يعجبني بيت عمي ... ومحسب حساب لو عمي طالعلي
اتحجج على سالفه الدكتور والوقت  وبمرور الوقت راح اميز صوت الكروان
ثانيا الساعة ب ١٢ وين الفايت وقت ... اخاف انتو تنامون مثل الدجاج
اتعلمي ايام اجازتي تسهرين ويايه  عود باقي الاسبوع نامي ب٨
ثالثا _ من الوقت فايت ليش ترفعون السماعه وتجاوبون
_ لان حارگين تايرات بالقطعه الي بصفنا ... جاوبنا اخاف احد من الجيران
دينبهنا او احد من الكرايب صاير عليه شي ...
يعني مو صعبه اذا احد يتحارش نسد السماعه بوجهه ...
صدك شوكت ترجع للكليه ...
_ عگبه ... باجر اگضي  وياج لان وراها ما اشوفج للاجازه الجايه
- التفتت على مي ... صدگ  اصعدي شوفي النار
-شو صرفتبها لازم ناويه تتغزلين بيه هههههه
_ شو انت بعت ميانه فد مره ترى بعدني ما متعلمه عليك
_ لا بله ترى اني منيشنج من سنين .... ارفعي ردنج وشوفي
_رفعت ردني ... وشفت الاثر القديم ... حرامات لو متذكرته جان مقبلت
_ متقبلين بشنو
_بيك
_ لا والله متفضله مو زين بيه استخطيتج وخطبتج كلت راح تنام على قلب عمي
ترى انت محلوه شدعوه هيج شايفه روحج .... وهاي مال اوي  اريد ابطلج منها هواي تتنكرزين ... وعلواه لو راهمتلج
_ انت هم محلو ... وشايف نفسك وتحتاج نظارات حتى تشوف زين
_قصدج اني اعمى ... يله المهم قلبي نظره ٦/٦
_ اذا محلوه ليش خطبتني ...
_ انقهرت على عمي ... تنامين على قلبه
_ لا انت غلطان ... ترى خالتي رادتني لابنها وابويه مقبل
ولحد هاللحظه مستغربه شلون وافق عليك من طلبتني انت
_ هاي شوكت
ابن خالتج خطبج
_ ما ادري بس سمعت امي مره تسولف بهالموضوع ويا بيبيتي
_ اي غير مابي خير ... وعمي منطاج
قابل تجيبي عليه ... انت لازم يوميه تصلين ركعتين شكر ... الله كرمج بيه
_ انت كل مره بحال ... ترى ضوجتني بهالحجي ...
شو قبل كم ساعة جنت غير شكل ويايه ...
_ مو من اشوفج ... قلبي يحجي  ...
_ يعني
_ يمكن حبيتج يا كسيحه
_ ثمين احجي الصدك ليش خطبتني اذا شايفني مو حلوه
_ ابتسمت ... مو كتلج لخاطر عمي ....
_ لا تشاقى الله عليك ....
_ والله .... همست بدون ما تسمع تخبلين
_ والله لخاطر ابويه  يعني مو لغير سبب
_ لا گتلج قلبي رادج ... وخطبتج  هم بت عمي ومؤدبه واحسن من الغريبه
_ ليش محجيت هالكلام  العصر ... جنت تضحك عليه يعني بكلامك
_ لا والله كل كلمه حجيتها وياج العصر  طالعه من قلبي
_ اوي ترى حيرتني ... يله مع السلامه
_ اوگفي  اني الي دگيت يعني من انهي حديثي يله تروحين
_ والله نعسانه اريد انام ... وكلامك غثني
_ اوي غثيتها ... هههه يله حبيتج
_ يله شنو ... لا والله مسوي فضل
_ باجر اي ساعة امرلج
_ لا تمر ما بيه حيل اروح للدكتور ...
_ اوي زعلت ... شوفي سوالف الزعل هاي ما احبها ...
امرلج ب٩ حتى اخذلج اجازه واوديج للدكتور ...
_ ماشي
_ والله متفضله ... هم كسيحه وهم تتعيقل ...
_ ترى رجلي مجروحه ... مو بيها اعاقه وثانيا هاي الكلمه مو حلوه
_ يله روحي نامي .... يا روح روحي
_ افففف تصبح على خير ... سديت السماعه  التفتت على مي (لكيتها مبتسمه )
لج هذا صدك مخبل والله شكلي تورطت بي
_ انت هم مخبله اختي ... هو هذا الي يرهملج
_ اوي شنو هالعائله المصيبه ياربي ... كلها  دهريه  بالوراثه
شنو اخبار النار
_ ماكو لكيتها  خامده  يمكن احد مطفيها ....
_ ورا اكثر من نص ساعة ... سرحان
التفتت لج مي
_ نامي ميامي ... يحبج
_ بس اسمعي
_ غطيت وجهي بالبطانيه ... ما اسمع اريد انام ... انت هم نامي وبطلي
تفكرين وتحللين كل كلمه واهم شي بطلي حساسيه
_  باجر نزليلي ملابس خليليها على القنفه حبابه
_ رفعت راسي شنو احضرلج
_ نفنوف ( الفستان )  و حذاء فلات وجاكيت
في صباح اليوم التالي
كعدت على صوت الجرس .... فزيت ماكو احد بالبيت
من التعب حتى اهلي طالعين للدوام واني ما  حاسه عليهم
كعدت  اثاوب واتمطى .... والجرس  مستمر
اتذكرت هذا يمكن ثمين ... التفتت على الساعة تسعه وربع 
لگيت ابويه مخليلي العكازه  ...
رحت غسلت وجهي وبعدها اتجهت  للمطبخ  ...
... شفته واگف باب المطبخ ...فتحت الشباك ومديت راسي
صباح الخير ... باب البيت جان مفتوح
_ اني فتحته ودخلت ... هاي بعدج نايمه
_ مو هياتني كاعده ... هسه ابدل واجيك انتظرني بالسياره
_ لا بله مو اني السايق مال حضرتج
افتحي الباب ...
_ وين افتحلك ماكو احد بالبيت ...
_ واذا  قابل اني غريب ...
_ لا ميصير اهلي ماموجودين ... هسه ربع ساعة ابدل واجي
_ واني ربع ساعة ابقى واگف هنا ... افتحي الباب ... ابقى انتظرج بالمطبخ
سويلي جاي بين ما تكملين
_ اخاف ابويه ميقبل ويرزلني
_ انت اشوفيها حلوه ابقى بالشارع  ... گلبت وجهي  راح اروح من تكملين
خابريني ... امرلج
_ التف ديطلع ... فتحت الباب ...تعال انتظرني بالمطبخ ... بس عوف الباب مفتوح 
_ ابتسمت  تخافين مني
_ طبعا لا ... اعرف انت حريص عليه اكثر من نفسي
دخل  ... اول ما التفتت  بأتجاه داخل البيت ...
احتضني مكتف ايديه وكعت مني العمازه
وحق الله اعيط الم عليك الجيران اذا متعوفني
_ ههههههه خليت ايدي على حلگها ... ها وهسه  ...
حسيت تأذت من حركت رجلها .. تحاول تتملص مني ...
تركتها ... غاضبه مني ...
هذا اول درس اتعلمي لا تأمنين بأحد ... ولا تخلين عاطفتج تتغلب على عقلج
كعدتها على الكرسي  متألمه من رجلها ...و قلبها من الموقف حسيته راح يوگف
لزمتني حاله الضحك الي نرفزتها  شلت العكازه وخليتها بصفها
_ انت تحجي صدك ... اني امنت بيك  لان ابن عمي
_ حتى لو ابن عمج ... ميصير تأمنين بيه  لو عاقدين بيها باب وجواب
تگولين رجلي ... بس اني حاليا غريب عنج
اني احب البنيه السباعيه الي محد يكدر يلعب بعقلها ...
_ واني محد يكدر يلعب بعقلي ... بس تصورت انت غير
_  ابتسمت شنو قصدج اني دوني .... روحي بدلي ...
_ لا اطلع انتظرني بالسياره ... ما أأمن بيك
_ ها
_ اي والله ... مو انت علمتني ما اتقشمر بعد
_ ابتسمت ... يله راح انتظرج بالحديقه ... بس كملي بسرعة
_ طلع وسديت الباب ... بالله مو صاحي  من عابت  هالنصيحه
اخ رجلي
غيرت ملابسي ... اوه مي ناسيه تنزلي فرشه امشط شعري ...
فتحت الباب وطلعت للكراج ...لكيته يتمرجح 
_ ها كملتي
_ بس محتاجه الفرشه امشط .... ما اكدر اصعد للغرفه  جيبه عفيه
_ وين بيا مكان
_ اول متصعد الغرفه الي بصف المحجر ... ادخل تلگي على الميز لو بالمجر الاول
_  تريدين بعد شي ... عطر ساعة  حمره ... اخاف ناسيه  شغله
_ صفنت بوجهه  بس العطر  ...مكياج  ما اخلي وساعة ما احب اللبس
_ روحي اكعدي بين ما اصعد  اجيبهن
_ كعدت على حافه الصبه الي ابويه زارع بيها نباتات بناها حتى  تفصل الكراج والحديقه  وترك فتحه  صغير تربط بينهم قريبه على  باب البيت
_ دخلت للغرفه  انتبهت  على تفاصيلها ... ٣ اسره  مصفوفه بصف بعض ومرتبه
ومقابلهن خزانه ملابس ... وبالحايط الي كدامي شباك تغطي ستاره لفتت نظري قماشها ابيض خفيف ...
وبجانبي  ميز تواليت ... مرتب   عليه عطور و علبتين خشب  .... الفضول خلاني افتحهن ... بيهن اكسسوارات
فتحت المجر بحثا عن المشط ... التقطته  لفت انتباهي علبه شفافه بداخلها
دفتر ثار فضولي لمن شفت بي قفل  فتحت العلبه شفت مفتاح القفل موجود
فتحته وقلبت صفحاته ... عباره عن دفتر ذكريات  لمي ...
ابتسمت هذا هوبي هسه يكيف عليه لو واگع بيده ...  سديت المجر وبديت استشق العطور عجبني واحد منهن اخذته ونزلت ...
_ شو تأخرت
_ عن الحلال والحرام بحوشت بالعلب الي على الميز ...
هاج ...
بقيت اراقبها وهي تحرك الفرشه على شعرها ... بعد ما انتهت خلتها بجانبها والتقطت العطر ... نظرتلي خجله ... من حيائها  استثقلت تخلي العطر كدامي ...
غضيت بصري ... واتجهت لداخل المطبخ 
فتحت الثلاجه ... صفنت بيها  لكيت كرات تمر بالسمسم ... سحبت الصحن
واكلت وحده ...
وطلعت يمها ... هذا عمتي مسويته
_ اي
_ هاج
_ لا ما اريد
_ من نرجع خليلي نصه اخذه ويايه للكليه
_ بداخلي استغربت الجرأه  والميانه الي عنده ... اخذ على البيت بسرعة
_ انت الاسبوع كله تبقى هناك متنزل ...
_ لا نهايه الاسبوع اجازتي ... يله نتوكل
_ اي
_ التقطت المشط والعطر منها دخلتهن على ميز المطبخ ورجعت الصحن للثلاجه ...
سحبت المفتاح من الباب  غلقته وقفلته ...
التفتت عليها ... خلي افتحلج باب السياره ... وارجعلج
طلعت فتحت الباب التفتت لگيتها واگفه بصفي ... ساعدتها  تصعد غلقت الباب
والتفيت صعدت بصفها ...
اول شي انروح للمدرسه 
_ اخاف بدون ورقه دكتور متقبل المديره تنطي اجازه
_ ماشي
اخذتها للدكتور ... كان اكو رض بسيط هو سبب الورم ... كتبلها  وصفه
وورقه  للمدرسه علمود الاجازه
... بطريقنا للمدرسه ... سألتها
_ اي واحد من الاسره  الي تنامين عليه
_ بالاول الي بصف الشباك ... بس لان اخاف حولت بالوسط
_ من شنو تخافين ...
_ من الشباك والظلمه ... ومي متنام الا تعتم الغرفه ....
_ صدك ستاره الغرفه خفيفه ... المفروض غرفة بنات يخلولها ستاره ثخينه
_ ماكو احد يكدر يطلع علينا لان ماكو بصفنا بيت قطعه
_ بس ممكن الي يصعد بالسطح  يشوف بالاخص من اكو شمس  ... فالاحتياط خلوا  ستاره ثخينه
_ عدنا وحده .... اليوم اخلي مي تعلگها
_  وصلت للمدرسه تركت ميامي بالسياره
دخلت للمديره اخذ  الاجازه
بعد ما قدمتلها ورقه الدكتور سألتني عن صلة القرابه
جاوبتها ابن عمها وخطيبها طلعتلها الهويه تأكدت من اسم   الجد
انزعجت ...
وهي تنطي ملاحظه بتذمر ... التفتت على المدرسه  الي جالسه كدامي
ووجهتلها الحديث
هاي الاهل يظلمون بناتهم بالزواج وميخلوهن يكملن دراسه
_ صدمتني شگد صلفه وقويه ... حسستني اني زعطوط كدامها وما محترمته
_ العفو مو كل الناس متخلفين ... ولا كل الناس يظلمون بناتهم
مثل حالتنا الارتباط ما اله علاقه بالطموح والمستقبل ولا اني ولا اهلها نقبل متكمل دراستها ...
_ اي زين اذا مراح تأثرون عليها ... ومفكرين بمستقبلها ولو اني بعدني ضد ارتباط البنيه بهالعمر ... انت عندك شهاده
_ اني طالب سنه اخيره كليه عسكريه
كلامها بثقه واسلوبها القوي وضعها نافشه روحها ... خلاني اشك هاي عدها ظهر
طلعت من المدرسه بعد ما قبلت تنطي لميامي اجازه وتأجللها ماده امتحان
ركبت بالسياره ...
_ شو تأخرت
_ مو مديره ... أمر لواء اسهل منها بالتعامل ... ما تتحجه
_ هاي اخوها ... فلان بس ترى طيبه وحنونه ... لا تنغر بشكلها وعصبيتها ولان ميصير عدها اطفال
هواي تساعد بنات عدنا بالمدرسه ... ومره بنيه بطلوها اهلها. راحتلهم بنفسها قنعتهم ورجعوها للدوام
اسمها شروق ويايه العام بالشعبه ...
_ والله عرفت ... بس صدك مديره محترمه ...
هسه وين نروح
_ رجعني للبيت ...
_ليش متجين ويايه لبيتنا ... امي موجوده لا تخافين
_ لا غير مره اريد اروح انام ... البارحه نمت متأخر
_ وصلنا لباب بيتهم ... نزلت فتحت باب المطبخ ... ورجعتلها
ساعدتها تنزل ... وصلتها لباب المطبخ
التفتت عليه
_ ان شاء الله اشوفك اسبوع الجاي
_ العصر امر اشوفج ... ان شاء الله روحي ارتاحي
اوصلج لو تسيطرين
_ لا وصلني للهول ...وروح
_ ودرس الصبح
_ اوي ثمين مابيناتنا دروس ... اني من الصبح لسى وياك راح اخاف منك على هالدقيقه .
_  هاي ثقه عمياء ....
_ اني منطيتك الثقه لان انت مو غريب ابن عمي يعني مثل الاخ 
_ ابتسمت ولج يا اخ هذا الي يخطبج
_ههههه والله نسيت اقصد يعني شلون الاخ يخاف على اخته ابن العم نفس الشي .
وصلني للقنفه ... حاول يقبل خدي 
لا عفيه
_ راح ابقى اسبوع ما اشوفج ... وخري ايدج
_ شنو حجيت وياك هسه عن الثقه
_ احتضنتها ... استنشقت عطرها ... حاله غريبه مسحور بيها
احس براحه طول ما عيني عليها ... وقريبه مني ... تأثيرها قوي عليه
من ابتعد عنها يخف هالتأثير
حسيت بكفوف ايدها تبعدني ...
استغربت سكوتها وعدم تذمرها .... ابتعدت مبتسم على ملامح الخجل
بدون خوف
_ انت سكتي وما سويتي اي رد فعل لان مأمنه بيه ؟
_ طبعا لان متأكده مراح تأذيني .... وتخاف عليه ... يله روح واقفل الباب وراك
وخلي جوه السندانه الي باب غرفة الخطار
_ هذا مكان العائله السري
_ اي هسه مي على جيه حتى هي تفتح الباب ...
كعدني على القنفهزوقرب عليه البطانيه يله نامي
العصر امر ...
طلع سمعت صوته الباب انغلق ثواني ورجع انفتح ...
وصلتي صوته
_ميامي اخاف تحتاجين شي ... ا تصلي اني باقي بالبيت
_ ماشي
التعب غلبتي ... اول ما خليت راسي على المخده حسيت براحه
تلفلفت بالبطانيه .. استرجعت الاحداث من اول ما صحيت وصبحت بوجه ثمين
_ اول ما كعدت من قليلوله الظهر ... طفرت على التلفون ... دكيت على بيت عمي
طلعتلي منى ... بلغتني ميامي بعدها نايمه ...
سديت السماعه ... واتجهت للكنتور غيرت ملابسي ونزلت ....
لكيت امي بالهول تتفرج تلفزيون ...
صار يومين اتجنب اثير غضبها ... لحد ما تبرد واكعد وياها ... حتى اقنعها
وصلت للباب دا اطلع
_ بالعافيه على منيره الله دزلها الولد ... مها. تخلف وتتعب  ومنيره تستلم رجال على الجاهز ...
والله حريمه التعب بيك
_ التفتت ليش شفتيني صحتلها يمه ... حتى حسبتيني ابنها
انت امي وما ابدل اظفر رجلج بالدنيا
بس حقدج هذا على ميامي باطل ... لان حتى لو امها مأذيتج
هي مو مذنبه وميصير تحمليها اغلاط اهلها .... وللعلم المره  ترى سلمت عليج 
_ ها شكلت ... سلمت عليه الحيه حتى شوفوني اني خوش ادميه ما عندي شي وياها بس هي مها الحاقده
_ يمه ترى اني البنيه خطبتها وصارت محسوبه عليه وعليكم ... لخاطري
انطيها فرصه ... لا تكرهيها وانت حتى ماشايفتها صار كم سنه
من تشوفيها وتگعدين وياها تحبيها ....
_ طبعا احبها ... شو شسوتلك هي وامها ... وخبلوك بين ليله ويوم دكيت رجل الا تخطبها
مو هاي زينه بت عمك ... من تشوفك تنثول ... وتتلوگلي حتى بلكت اخذها الك
عمي شفايتلي لو ماخذتلك زينه ولا هالمصيبه وامها
_ اني طالع للسوك يم الولد محتاجين شي اجيبه ويايه
_ كلشي منريد الهم الي جبته كافي
_ استنشقت وزفرت الهوا ... وطلعت هاي شلون راح تفض ويا امي خلت البنيه براسها
يتبع