قلوب بينها برزخ

الباب الثامن تم كامل

ويلي من اشتياق القلب اذا فُتنَ بمحبوباً
وويلي من عناق الاعين عند اللقاء
وويلي من زله لسان المحب  وحمره الخجل  على الخد اذا آ فاق
وويلي من غطرسه الكبرياءِ عند الحياء
وويلي من اللهفهِ وما نبوح  به من غزلاً عند ذلك اللقاء
اعترفت بحبي لها غير نادما .... فرقصت على يدي
كحمامه بيضاء.
_الو
-الو منو
-شلونك ابو ثمين اني منيره
يا اهلا وسهلا خيتي ...
-اذا متصير زحمه مها قريبه عليك
-اي هسه اصيحها ... تركت السماعه ورحت للمطبخ
منيره على التلفون  رايدتج ... رفعت حاجبها
-ها والله سوتها وتصلت طبعا تريد تمشي بتها براسي ماميته عليه وين تلگى هيج شاب مصدگه مجذبه هسه تلگيها طايره من الفرح 
-لا حول الله امشي جاوبي المره وبلا هالتكبر ... شويه استهدي ابنج كتل روحه على بتها  هو الي اندل دربهم ...ما جابتها لبيتج وهدتلجياها ...
-اي غير ملعبه عرفت شلون تجيبه
_ كافي حجي زايد واحجي ويا المره بأحترام ... لا اطلعين لسانج
_ الو
_الو هلومها  شلونج ان شاء الله بخير
_ هلا منو
_ ليش ابو ثمين ما كلج منيره على التلفون
_ لا والله گلي بس ردت اتأكد  مستغربه شذكرج بيه كل هالسنوات
_ بقلبي ( ولا تتغيرين )
احنه خوات الي فات مات ... الدنيا ما تسوى الي بيناتنا عشره لا يوم ولا يومين
_ دا ارد ... شفت الرجال خازرني بدلت
اي على گولتج .... شوكت عندج مجال حتى نطلع ناخذ المحروسه نشتري النيشان ونرتب موضوع الحفله
_ اني العصر ماعندي شي وميامي متكدر حاليا تطلع ويانا رجلها بعدها 
تحبين نطلع اني وياج وانتو شوفوا الانسب احنه  اهل ما بيناتنا هالسوالف والماديات  هو ابن عمها  ما ندور مهر ومقدم ومؤخر مشترين رجال
_ اي والله عاد نعم الرجال ...
_ ان شاء الله تشوفين ميامي وتعرفين هي هم موالمته مابيها قصور
ربج يگول الطيبون للطيبات
_ ان شاء الله تطلع على قلبي مثل ما ثمين طلع على قلبج ومرامج
_ ان شاء الله
_ خلص لعد اردلج خبر باجر اي ساعة امرلج  نروح  لشارع النهر
_ ان شاء الله
_ عود مري نشرب كهوه العصريه
_ بأذن الله نكمل الامور على خير وامرلج اني هم مشتاقه اكعد وياج مثل كعداتنا ايام قبل
_ زين بعدج تذكريها ....
_ مها خلي قلبج ابيض اني ما بيوم انطيت بيج كدام احد ولا تصدكين احجي عليج ... والله يجازي السبب الي خرب بيناتنا
_ منو تقصدين
_ اقصد الي جان ينقلج كلام اني ما حاجيته وانت صدگتي ... ماكو داعي نفتح مواضيع راحت خلينا  اهل اليوم ... صفحه وانطوت والقلوب متصافيه ان شاء الله  يله اخذي راحتج مع السلامه
_ ان شاء الله  يله مع السلامه
سديت السماعه يمه يا ثمين شلون الله وكعك بعمه حيه تتمسكن وتكرص
الحمد لله وراك ام محد يكدر يقشمرها .... والله لا اخلي يعرفها على حقيقتها
خلي تصبرلي
_ يا مره شبيج ادردمين
_ لا هيج دا احجي ويا نفسي ... شبيك شو شايط على مها  كاعد على لسانها بس تريدلك لزمه حتى تطبك ويا مرت اخوك
_ استغفر الله ... سدي الموضوع ما الي خلك اتناقش وياج
_ اي طبعا بعد منيره ... تسد حلك اكبر واحد .... هو اني لفلفتني بلسانها
وراحت مو عاد انت ولا ولدك ... توديكم للشط
_ ها ماما شو حسيت كلامج هم بي مناوشات
_ لا ماما ما انطيتها مجال ... وبنفس الوقت ما اريد تحقد عليه وهالشي ينعكس عليكم انت وابن عمج ... اعرفها عقلها صغير وتحب القال والقلت
بلكت هسه كبرت تغيرت
_ وانت ليش اتصلتي عليها  غير هي تتصل وترتب وياج امور النيشان
_ ماما اني لو ما شفت الولد. شاريج ونيته صافيه وياج  ومبين اله كلمه عد اهله ولا ما اتصل ...
بس لخاطره اتصلت وصفيت النفوس  ثانيا اني حبيته وقلبي يگلي ...
راح اطمئن عليج ويا ... ترى امج واعيه وتعرف الاوادم  من نظره
هالولد بي صفات حلوه ... ماكو انسان كامل بس شين الي تعرفه احسن من زين الي متعرفه على الاقل ابن عمج ومهما يكون  حريص وقلبه عليج
مواقفه وياج  كفيله تثبت كلامي
_ اي صح  اكو بي صفات حلوه ... شوكت اتفقتوا تطلعون
_ علو الاكثر باجر تردلي خبر على اي ساعة نطلع العصر
_ تتوقعين رجلي تتحسن منا ليوم النيشان ... بعدها تأذيني
_ بعد ماما كدامج كم يوم يله يفتح الخيط وان شاء الله  تلحگين منا لنهايه الاسبوع
_ ان شاء الله
كان هذا اول يوم يمر عليه بمشاعر اشتياق وفقدان لوجود ثمين
تذكرت وقت الغروب هيج ساعة كان يمي ... استذكرت حركاته وكلامه
اتمنيت يرن التلفون واسمع صوته
مر اليوم ثقيل ....
وحتى اليوم الي بعده ماكان بي شي يسعدني ... غير
كلام امي عن النيشان ... والاغراض الي اشترولياها دخلت البهجه لنفسي
وتلهفت اشوف الذهب والملابس وباقي التجهيزات
التهيت ويا امي وخواتي بمخططات الحفل ...
ومن وين راح اخذ البدله ... وشنو التسريحه الي راح اسويه
بعد ثلاث ايام رحت ويا والدي فتحت الخيط ... ورجعت  للدوام .... لكن والدي طلب من جيارنا  يشتغل تكسي يوصلنا  ويرجعنا بأجره  لان المسافه مو قريبه بين المدرسه والبيت  ورجلي تحتاج بعد فتره راحه
كان يوم خميس .... طلعت اني و مي من المدرسه ...
دورت على السياره بعيني ... الى ان وصلتني لسياره ثمين وهو واگف منطيني ظهره مستند على الباب  متكتف ... صوت البنات وحركه المجاميع
خلته يلتفت وينتبه انتهى الدوام
بقيت بمكاني انتظر عينه تلمحني ....
شفت ابتسامته عرفت لمحني ... بادلته الابتسامه ... بعد ما خطى بأتجاهي ...
كنت احفظ تفاصيله قبل ما يوصل وينتبه على نظراتي ...
_ولج ميامي هذا ثمين جاي
_ ادري
_ هذا منو الحلو
_ ولج هذا ابن عمي خطيب ميامي ...
_ هذا خطيبج ميامي ...
_ اي
_ مرحبا
_ هلو ثموني ... طلعت مني بدون وعي ...
ملامح الاستغراب والابتسامه على وجهه خجلتني ... والتفاتت مي السريعه وهي تبحلق بيه  ربكتني
_ اجيب السياره لو تكدرين تمشين ... جنت راكنها هنا بس الحارس گلي ممنوع
_ كلشي مابيها تركض مثل الحصان ...
_ الحمد لله .. يله لعد اخذت الجنط منهن ... ومشيت قبلهن
_  اكلج انوصلج ويانا
_لا مع السلامه
_ اول ما مشينا كرصت مي ... شبيج خبله
_ بصوت ناصي هلو ثموني ... والله ولا عرفتج ... اصلا اذني ما صدكت عبالي نورس الي حجت الا التفتت وتأكدت طلعت منج
_ اصلا اني هم ما ادري شلون طلعت مني ...
_ اوي مشتاقه ام مشاعر بارده ... همزين طلع عندج احساس وتشتاقين
_ لج ولج عوبه ...شبيه ماعندي مشاعر اصلا اني اكثر وحده حنينه بيكم
_ اي صح بس متحبين تظهرين مشاعرج ... والله احس قلبج تحت سيطرتج بي دكمه تشغليها وتغلقيها شوكت ميعجبج
_ احسن ... ها من الله اني هيج بس اكيد الي يعرفني يعرف مشاعري مو صح
_لا مو صح ... لان اكو ناس تحب العاطفه بالكلام ما تكعد تتكهن المشاعر بالسكوت والذكاء
شفتي شكد فرح ...بثموني ... حتى وجهه نور حسيته يريد يشيلج ويطير بيج
_ الله عليج هيج بين على وجهه
_ والله يمكن لان خجلتي واتربكتي مشفتي نظراته شكد مشتاقلج والكلمه صدمته من الفرحه هو هم ارتبك ... بدل ميشيلج شال الجنطه ههههه
_ وصلنا يم السياره ... اكلج اصعد بصفه لو ورا يمج
_ ميامي اني ترى اختج الصغيره مبينه ... متحتاج نصيحه تكعدين كدام
هو مو سايق عدنا ... ثانيا بلا ثول وارتباك ذاك اليوم اخذج للدكتور گلتي صعدت بصفه .. يعني ماره عليج السالفه
_ ثول هو اني هم صوجي اسأل منشار مثلج اصعدي واسكتي ... لا اخلي
ميوصلج ادكيها مشي
_ صعدنا ... جمدتني بمكاني من حجت ويا ثمين
_ اكلك ابن عمي ترضى خطيبتك تتمنن عليه بالتوصيله وتگلي ترى اخلي
ميوصلج وذكيها مشي للبيت
ضحك ...
_ لا طبعا  انت اختي ... حجايتها متمشي عليج
_ التفتت رمقته بنظره  ورمقتها هي هم بنظره ... تعبر عن الانزعاج
_ التفتت على مي ديري بالج لا تنتقدنا بال اوي  مالتها
_ اوي شكد مكروهين ... شلون ثنين متراهمبن والله
_ شفتي اكو جينات متشابهه بالدم بيني وبينه .... هيهات  تفرقينا
هههه
_ انت ترضيها ...اعوف  خاله جهالي المستقبليه  واخليها تمشي وانت ارجعج بالسياره يا ظالمه ... هاي عود احتج وهيج حقوده وياها
لعد ويايه شلون اذا فد يوم  صار سوء تفاهم
_ ليش متدري بيه ... ماعندي صاحب صديق حتى اختي متوگف بعيني من تضوجني ... عندي روح الاجرام
_ شلون بله
_ احطلكم سم بالاكل ... واروح اتفرج تلفزيون بين ما تتوكلون
_ والله عمي شكلج يوحي بالاجرام  بالاخص ويا برود المشاعر الي عندج
جايه مضبوط
_ افتهمت ديعاتبني على  اخر مره التقينا  الصبح وعرف ما اتصلت
حتى مي افتهمت قصده ... جاوبته
_ اكو صفه ثانيه لازم تعرفها ... مرات تكذب لان عدها كبرياء زايد
_ نظرت لمي بالمرايه على حركه الابهام على اذنها والعنصر ( الاصبع الصغير على شفايفها ) فهمت شكل السماعه بس ما فهمت  ...
بقيت افكر بالقصد من هالحركه
وصلتهم ....
مي _ انزل ابقى يمنا بين ميجون البقيه ونتغذا سويه
ميامي _ اي انزل ترى ميتأخرون ...
_ اروح بشغله اكملها وارجع ... ما اتأخر ان شاء الله
_ يله براحتك
مي_ راح ننتظرك  مو  تتأخر ... بس افتحلي الصندوك اخذ الجنط
_ لا ان شاء الله اكملها واجي يجوز لهيب هم يجي ويايه ...  نزلت فتحت الصندوق وصارت مي بصفي ...
ما فهمت حركة ايديج
_ التفتت شفت ميامي دخلت ... والله اذا تعرف راح افتن تشنقني
_ كولي والله ما احجي ....
_ لان  بعدها تستحي منك كذبت عليك ... من گالتلك ما اتصلت  والله كدامي اتصلت مرتين  مره  رد عليها لهيب وسدته والمره الثانيه محد جاوب
_ من ارجع فهميني شنو الي خلاها تكذب عليه ورا ما عرفت جنت نايم
هسه روحي لا تنتبه ... ساعة وارجع ان شاء الله
_ يله الله وياك ... بس ها من هسه وعدت مو تخلف الوعد وتگلها
_ لا  اطمئني سرنا بيناتنا ما يدخل بي ثالث  يله اترخص
_ اخذ راحتك  دخلت  ورا ميامي لگيتها واگفه يم السنك تشرب مي ...
_ انطيني  مي بدربج  من تكملين
_ مليت الكوب وقدمته الها شنو جنتو تحجون ... شو مدخلتي بسرعة ورايه
_ وين حجينا نزل الولد انطاني الجنط .. وسألني اجيبلكم ويايه شي من السوگ
جاوبته لا كلشي عدنا ... سأل شنو طابخين گتله ما اعرف امي تطبخ بليل المركه واحنه هسه راح  نسوي التمن  ها هيه .
_ اروح اغير ملابسي مشيت كم خطوه التفتت على مي
عود طلعي التمر  حبابه حتى اكعد افلسه ....
_ شنسوي بي
_ مو الكم اريد اسوي لثمين ....
شبيج فكيتي عينج
_ اختي دتصدميني بسوالفج طلعتي مو هينه والله
_ هههه من عابتلج مو خطيه ذاك الاسبوع حبه وبالي اگلها لامي تسويله ونسيت  فأخذ الي كان باقي  ويا للكليه بس قليل
_ هسه اطلعه  ادللي ست ميامي انت واستاذ ثمين ....
_ صعدت للغرفه دخلت بلهفه  ادور شي اللبسه ... فتحت الكنتور
صفنت بمحتوياته ... التقطت بلوزه  قطنيه وجينز هاي ويست
ارتديتهم وبقيت كدام المرايه اسرح شعري الي رفعت نصه من الخلف بكيتر وتركت النص الثاني ينسدل على ظهري
لوهله  اجتني فكره اثير اعجابه  مثل وسوسه شيطان
دخلتالبلوزه  بداخل الجينز ... ونزلت اول درجايتين سمعت صوته
ما حسيت بالوقت من مر واني بالغرفه فوگ
كملت طريقي الى ان وصلت قريب باب المطبخ ... شفته لمحني لا اراديا
خجلت واتراجعت كم خطوه للوراء طلعتالبلوزه  فوك البنطلون ودخلت
لكيت لهيب موجود
هلو شلونك
_ هلو ميامي شلونج
_ الحمد لله الله يسلمك ... رحت يم الطباخ بصف مي ...
شنو اخبار التمن
_ لا هاهيه بين ميوصلون   يكون جاهز ... نصيته
_ خلصتوا يله تعالوا اكعدوا ... اشرت لميامي تكعد بصفي وبجنبها مي ولهيب كدامي
_ كملتي امورج ...
اي بس اليوم العصر كالت امي اروح اشوف البدله واتفق ويا الصالون
_ اني اوديكم ...راح ادشنين السياره الجديده
_ يا سياره
_ هاي الساعة رحت بيها للمعرض متفق ويا ولد من قبل اسبوعين اراوس السياره وادفعله الفرق
هسه اني ولهيب رحنا كملنا الاجراءات وجبناها  ...
_تشوف خيرها ان شاء الله ويكفيك شرها 
_ امين
مر الوقت بين حديث وضحك وبعدها  التمت العائله على السفره
كان كل دماغي وياها حافظ كل حركه وكل كلمه تصدر منها ... مترقب فرصه يختلي بيها
يعبر عن كم اشتياقه الها ... ويتغزل
حانت هالفرصه بعد ما لهيب  اكتفى من الكلام ويا مي ... والراحه بانت على ملامحه بسبب انسجامهم ويا بعض وكلامهم الودي بلغني اكو امل  تكون هالمي من نصيبه حسيت اكو اعجاب متبادل حتى وان كان ببراءه من غير مشاعر حاليه
عمي ترخص يروح ياخذ قيلوله الظهر ...  مابقى بالمطبخ غيري اني وميامي وعمتي ...
اتبادلت وياها الحديث بخصوص  ترتيبات الحفله واتفقت وياها اني  اتكفل بتوصيلهم لاي مكان وبعض الامور اني اروح اجيبها
خلال هالحديث ميامي دترفع الصحون عن السفره ... توديها للسنك
ترخصت مرت عمي وطلعت من المطبخ بعد ما مهند بدا بالبكاء والملجه
_هذا نعسان خلي اروح انيمه 
_ وهي تلتقط اخر استكان شاي على  الطاوله مسكت كف ايدها
واخيرا بقينا وحدنا .. تدرين شكد مشتاقلج
_ بخجل جاوبته ثموني  ايدي مو نظيفه ... خلي اكمل غسل المواعين  واجي اكعد وياك
_ يله بس كملي بسرعة ...
_ اصبلك جاي بعد ...
_اخاف اتعبج
_ لاماكو تعب ادلل ... بس واني انظف سولف ويايه حتى ما احس لان اموت من غسل المواعين اليوم الدور عليه
خليت الاستكان كدامه .. مبتسم
_ لعد شلون ببيتنا ماعندي خوات يساعدوج ... بتقسيم الشغل
_  جاوبته  مبتسمه قريب الى الضحك ..انت اتساعدني ...
_ لا بله  اني كلاص مي ما اعرف اجيب لروحي ... واكع للهيب وهذال صخره طول ما اني كاعد بالبيت
_ ليش عيب الرجال يساعد مرته
_لا مو عيب بس اني تعلمت على هالطبع ما اعرف اسوي شي بالبيت  ... بس اعرف اغسل ملابسي اطبخ كم شغله  ارتب فراشي هذا الي تعلمته من الكليه ...
_ هاي انت طلعت رجل متعاون اذا تعرف تسوي كل هالامور 
بثانيه كان بجانبي خلى الاستكان بالسنك وايده الثانيه على اكتافي
_ ترى اعرف اطبخ شغلات قليل رجال يعرفوها ... تحبين حلاوه الجزر
_ اي احبها
_ لعد راح اجيب جزر نظفي وبرشي حتى اسويلج
_ابتسمت الله عليك تعرف
_بالكليه انجبرت اتعلم  هواي امور ... اني مو اكال بس
اشتهي الشي اكل منه قليل اكتفي بس علتي ب الحلى افقد
_ اني عكسك مو صداقه ويا الحلو بس احب المالح ... بس تدري ابد ممبين عليك لان ضعيف
_ غير احرگ بالتمارين والتدريب ... تدرين شكد نعسان اريد اروح انام ... بس قلبي مينطيني اعوفج
_ مو ابويه كلك ابقى ... لا تروح  هسه افرشلك بالهول ونام ...
حتى العصر نروح اكمل باقي الامور
_ طلعتيالبلوز  من البنطرون خجلتي مني لو  لان عرفتي لهيب موجود
_ الاثنين ...واني غالبا احبه فوك البنطلون ...
فاجئني من قبل راسي وسحبه على كتفه يمسد على كتفي بكف ايده
_ تدرين شكد فرحان بيج ... احس الله عثرني بكنز
_ سحبت نفسي منه ... مرتبكه من كلامه ونظراته ... انعقد لساني عن اي رد
كملت نروح للهول افرشلك
_ ابتسمت صرت افهم خجلها وردودها ... هالحمره الي تصيب خدودها
تخليني متمتع  بمداعبه عقلها وقلبها بالكلام
دخلت للهول قبلها هي صعدت تجيبلي دوشك
_ اول ما دخلت شايلته خلته بصف القنفه على الارض ... ورمت فوگاه البطانيه
_ يله نام ....
_ بحركه سريعه بأتجاهها فهمت حاولت تفر منها ... لكن احتضاني الها قيدها
_ثمين والله هسه امي تنزل عيب تشوفنا هيج
_احبج
_ هالكلمه مفعولها مخدر على مسامعي روضني بيها ... قللت من قوة دفع ايدي لصدره
ثموني ابتعد اخاف امي تنزل
_ ابتعد بس تركصين شلون اني ذاك اليوم ركصتلج ابتسمت
_ استحي والله
_هو اني اريد اخليج متستحين مني ... حاولي
_ ما اكدر
_ بداعتي ... زين انطيني ايدج 
_خليت ايدي بأيده  التقطها ورفعها  ليفوگ  وبدا يفرني  مثل
راقصه البالي بالصندوق الموسيقي  وخلاني اتمايل ويا ...
الى ان دخلت مي ... وگفت قلبي ...
_ دخلت خجلت وهم هم خجلوا ... حاولت اخفف علينا الوضع مازحتهم
ها ميامي وثمين ... عبالي متيهه ودخلت كواليس فلم اميره البجع ويا الفارس
ضحك ثمين ضحكه مخنوگه ... وميامي استرسلت بالضحك ...
_ هو ابن عمج طلباته غريبه ... اظاهر جان عاجبه يتزوج راقصه بالي
_ ذبيها براس ابن عمي ... وانت على حس الطبل
_ ولج
_ اني ما الي شغله رجال اجيت انام گلتلي اريد اركص وياك مثل الاميره والامير بالافلام
التفتت عليه بعصبيه
_ هاي اني ...والله انتو الاثنين الله الي يستر منكم ... اروح افلس التمر احسن الي
طلعت مي وهي منتعشه من الضحك
_ تعالي دا اشاقه بلا تمزعل
_حاول ثمين يداهرني التفتت عليه لما وصلت الى الباب وايدي على
مفاتح الكهرباء بنيتي اطفي الضوه  التفتت
لگيته متمدد بالفراش وايده على جبينه
اخذ  راحتك ونام
_ تعالي وين رايحه ... امشي جيبي الطاولي  حتى ادوخيني  وانام
_ ماكو نام ... هم تروح امي تجي وتگلها ردت انام جابتلي الطاولي ومخلتني انام
_ لا والله ما اسويها  امشي جيبي ... خلي نلعب حتى انعس هو انت اصلا طيرتيلي النعاس
لا تعالي بطلت فركي  قدم رجلي احسن ...
_ انت شايل المستحى  ويايه كلش ... ترى بعدني بس خطيبتك  بله نزلت امي نزل ابويه ويشوفوني كاعده يم رجلك افركها مو عيب
_ اعتبريني اخوج مو ابن العم اخ ؟...
والله هالاسبوع بالتدريب انلوت ...ودتأذيني لا تصورين دا ادلل عليج
_ ما اكدر استحي والله
_ مي مي وينج
_ نعم
_تعالي انت وميامي فركولي رجلي ... اريد اجرب احساس لو عندي خوات
وارجع من الدوام  شلون راح يداروني
_هههههههه
_ تعالي مي اني هم اريد اجرب لو عندي اخ  عاجز ... ويحتاج عنايه خاصه
_ كعدت اتفرج على المداهر مالتهم هي تعصر قدم رجله  حتى تأذي ... وهو يضحك عليها  يگلها ما بيج خير ايدج ناعمه  مال فاهيات
كان صاحب روح مرحه  وقلب طيب ...
ما يتصنع  بالكلام او التصرفات .. عنده  فطره سليمه  تخلي يتصرف على طبيعته ويانا غير عن اول مره زارنا بيها ...
_________
_ كان هاليوم احساس غريب اعيشه لاول مره
امي بصف ثمين واني ورا ... بجانبي فستاني ... ومتجهين للصالون
بعد ما دخلت وبلشوا بالمكياج والتسريحه وارتديت الفستان كان ستره وتنوره لونه
زهري فاتح ... ومطرز بخيط حرير ابيض وخرز ناعمه لؤلؤيه
وتسريحه  مجرد ويڤي عادي ...
رجعتنا للبيت صارت ويا عمي بلال الصغير لان مي ومنى وعمتي انوار لحگونا للصالون عدهم موعد واحنه رجعنا ويا
دخلت مستعجله البيت مزدحم خالاتي وبناتهم ومن اهل ابويه هم موجودين
سمعت الهلال ... حتى بدون ما اعرف منو لان
نسيت اذكر نورس على الكاسيتات ...اتصلت عليها ذكرتها
الاصواتوالزحمه سببتلي حاله توتر .... صعدت لغرفتي بقيت كاعده
انتظر مي
شويه وانفتح الباب ... زينه بت عمي
استغربت من ملامح وجهها ... كانت جافه غير عن عادتها ويايه
حتى سلامها اختصر على كلمه
_هلو ... اكلج عمتي تگول خلي تنزل
_ هلو هسه نازله ... طريقه كلامها بدون مقدمات خلتني احتار بأمرها بقلبي هاي شبيها
نزلت
صوت الاغاني عالي ... دخلت للصاله كعدت خجلانه من نظرات كل الموجودات ...
بداخلي افتقدت مي اتمنيتها موجوده واكعد التهي وياها عن هالتوتر
رفعت عيني لگيتها كدامي ... ابتسمتلي كأنه دتگلي هاي اني اجيتج
_ كعدت بصفها مسكت ايدها ... ميو راح ياخذج ثمين ويجي يوم تعوفينا
_ الله يخليج لا تجيبين سيره هالامور ... اني بلا شي احس مرتبكه وبداخلي قلق ما اعرف ليش ما مرتاحه
_ عادي توتر عرايس .... هسه يجي ثموني ... وينسيج هاللمه
_ اكلج صدك زينه شفتيها
_ اي شفتها
_ شوما ادري شبيها ويايه وجهها ثگيل
_ اني هم حسيتها مگلوبه عادي يجوز هم عدها غيره بعض البنات من يسمعون ...وحده انخطبت او راح تنخطب
استغفر الله
_ على گولتج ... دخلت نورس صديقتي ويا ما وصلت يمي تسلم
ترى وصل العريس ... هسه
بلحظتها سمعنا صوت الموسيقى بدت تعزف اغلب الي كانوا جالسين طلعوا بره يتفرجون
ودقايق ودخلوا ... صارت عيني على مرت عمي امه الثمين كانت فرحانه
وتتمايل برقصات ... ومن خلفها ثمين بين نساء منهم عمتي والبعض كا اعرفهم لكن اتكهنت خالاته واقارب امه
من صار قريب نزلت عيني تخيلت كل الي جالسين ديراقبونا ...
لحد ما كعد بصفي ... بدت اهازيج الفرح وصيحات اهلنا المتعارف عليها بالفرح
_ارفعي وجهج خلي اشوفج ... منين مستحيه كلها نسوان
_ رفعت وجهي قابلته ...
_ كتلوا روحهم رادوا يلبسوني قاط ... مقبلت
_ انتبهت لابس بنطلون اسود وقميص ابيض فوگاه يلگ صوف بيج
_ ابتسمت ها طالع حلو ...
_اي حلو
_ بس مو احلى منج .... دا احس العائله داخله بمنافسه منو يثبت وجود بهالحفله
_ ههههه
_ اي والله شوفيهن صايرات احزاب بالركص ناس اجر طول وناس اجر بالعرض ...
_ لحد يسمعك ويزعلون
_ اطمئني قبل ما يتوزع الاكل محد يفكر يزعل هههههه
_ ها نجوى شلونها العروسه
_ والله مها حلوه ... لايگين لبعض وابنج طاير بيها
_ ادري بي ... مشفتي بالبيت ثبرنا يله ويله ...
شفتي بله ما قبل يلبس قاط ... طالعه هي ارتب منه
شوفي زينه بت مديحه تريد تنفجر ... عبالها اللواكه مالتها تفيد ويا هذا
شوفي تالي ركضلي ورا بنت منيره ...
_ يمعوده يله المهم هو رايدها ومبين حابها
_ حظ يمعوده ذني طالعات على امهن محظوظه قابل مثل حظي ...
حتى ويا بزري مكاعد ... هذا وكفلي مثل السيف ... الا يخطبها
وتالي خطبها ويدري بيه مقابله ... بس شسوي بعد ما اريد اكسر بخاطره
ميامي _ تقربت ام ثمين حتى يبدون يلبسوني الذهب ...
صاحت صلوا على النبي ... وابتسامتها الي ... خلتي اتأكد هي فرحانه
انزاح الخوف الي بداخلي منها ...
بادلتها الابتسامه ...
بعد ما انتهينا من لبس الحلقات والذهب ... قبلني  على جبيني
وبدت المباركات من المعزومين وحده ورا الخ ... لكن مباركة عمتي ( ام ثمين ) كانت الاغرب والي سلبتني التفكير بذيج اللحظات
و هي تقبلني همست بأذني
_ مبروك والله طلعتي سباعيه عرفتي شلون تلفلفي من صديقتج وبت عمج

_
_