قلوب بينها برزخ

الباب الخامس عشر

كالليل تلفني بعباءتها .... تاره تعذبني
وتاره بشهب الشوق تقذفني ... بعود الكلمات
تنتشل ملامتي وغضبي ... وتعود بي لحب جديد
اقسو وترسم على شفتي ابتسامة الودود
بعذب صوتها وخنوعها وتدلها ... وتردني من غير قرار
تقلب مزاجي بضحكتها ...وتصبح امنيه لا اطيق رحيلها
لثانيه بعصبيه اجيت ارجع اضربه ... لكن من مسكت ايدي
هدأت ورجعلي عقلي .. فكرت بيها وخفت عليها اذا اتعارك اخاف البقيه
يتحارشون بيها ... فكرت ارجعها وارجعله ....
طمنتها ماكو شي وكملنا الطريق ... بس بداخلي اغلي ... احس الطريق صار شطوله بقيت ساكت
وصلنا لباب بيت عمي ... فتحت الباب
يله فوتي
_دخلت وهو بقى واگف .... شو وكفت
_ دا اجيب شغله ... شويه و ارجع
_ باجر عود جيبها ... يله فوت ويايه بغلاتي عندك ... لاتسوي مشكله
خلي يولون سرسريه لايروح واحد منهم يأذيك
ثانيا خلينا متونسين وهاي اول طلعه النا ورا العقد خليها ذكرى حلوه
مو تنختم بمشكله
جريت ايده ... يله فوت اليوم اريد اكضي وياك ... مشتاقه لكعدتنا ايام قبل
ثانيا اذا سووا بيك شي ... منو ينكد عليه ويغثني
_دفوتي هسه
_ ما افوت والله الا انت ويايه ... انت عقلك اكبر من هالمزعطه واذا ذبله حجايه راح يقدم يأخر انت عندي بالدنيا ... بشعر وبدونه
_ اني على الشعر ... لو صلف تحارش بيج وانت ويايه ...طبعا لان اكثر من مره انبهج تلبسين الحلقه وانت ولا يمج
عباله صاحبتي ودا اتمشى وياها ...
_ خلص لعد ... عوفه مثل الكلب ... جريته بقوه يفوت ... الله عليك
لاتنغص عليه الطلعه اذا الي خاطر عندك ... انسى هالسالفه وخلينا متونسين نكمل سهرتنا ...
_وتالي فوتي عاد
_ وتالي وياك انت شو شكلك تحب المشاكل ...
والله اذا رحت وما دخلت لخاطري ... معنى ما الي خاطر عندك ... نظرتله نظره توسل ...
بقى صافن بوجهي ... استغفر ونزل راسه ديقرر رجع رفعه
_ يله فوتي ...
_ شنو راح تروح
_ لا بس اقفل الباب واجي
_ لا اقفلها وندخل سويه ... ابتسم ...
صلي على النبي
_ اللهم صل على النبي ... قفلت الباب ومشينا كم خطوه
لا تحجين الي صار لاي احد
_ التفتت عليه اداهره ليش هو شصار ( مدعيه الهبل )
_ ابتسم ومسح بكف ايده على راسه .... من اخلص الكليه راح يرجع يربى
_ ابتسمت يله اتحملك منا لحد ميطلع حتى وراها بعد من تعاند اجرك من شعرك
_ اي ليش لا ... حتى ما انتف شعرج .... دخلنا سلمنا  ذبيت جسمي على القنفه من التعب .... همست لميامي  جيبيلي كلاص مي
_ همستله  بأبتسامه تروي عطشك لو شعرك حتى ينبت بسرعة ....خزرني بضحكه
بعد ما غيرت ملابسي ... رجعت لكيته يلعب  ويا عمي  طاولي ... كعدت بصف مرت عمي الي كانت تتفرج عليهم 
التفتت مبتسمه
_ ها شلونها طلعتكم
_ والله تونسنا مكانكم خالي ....
_ الف عافيه ... يا جماعه يعجبكم اسويلكم شاميه
شوفي مركزين محد جاوبني ...
_ اني اسويها عمه ... دخلت للمطبخ  وحالتي غير عن كل يوم صار فتره محاسه بهالراحه النفسيه ...صافنه  على حبات الذرى وهي تفرقع وتنفش
ودماغي سرح من اول ما طلعنا من البيت لحد هاللحظه ... بداخلي احجي ويا نفسي  شوكت راح تستقر الامور وترجع المياه لمجاريها بيني وبين ابويه
تنهدت تنهيده اشتياق ... تمنيت بلحظتها اكدر اروح اشوفه واسمع صوته
اخذت كاسه الشاميه خليتها يمهم ... ونسحبت للصاله  غلقت الباب ورايه
ورحت على التلفون ... دكيت على بيتنا ... كأنه حس بيه مشتاقتله
_ الو
_ الو بابا ... ونهمرت من عيني الدموع  بألم ... وزداد ت هالدموع من ما اجاني الرد ... وبقيت انتظر اجابته لثواني اجاني صوت امي
الو ها ماما حبيبتي
_ هلو ماما ليش ميقبل يحجي ويايه والله اني ما الي ذنب بلي صار ... لشوكت راح يبقى مخاصمني ... لهدرجه ما الي مكان بقلبه وكرهني ...
مو اني ميامي عزيزته ...
_ كافي لا تبجين ... طبعا عزيزته بس هذا طبع ابوج متعرفي ... من
يزعل زعله مو سهل ... الله كريم  ان شاء الله ... فتره ونفسيته ترتاح
ويزول هالزعل ... متشوفي الا هو جاي عليج حتى يرجعج للبيت
_ شوكت متكليلي شوكت ... مو حتى كرهت نفسي ... أنظلمت من الكل واني مامسويه اي ذنب بحق احد
اخ يا امي لو تعرفين شكد تعبانه...
_اعرف والله بس شنو الي بأيدي
_ تنهدت ... يله حبيبتي اني اترخص  لا يبقى بالج بس جنت مشتاقتلكم هسه ارتاحيت من سمعت صوتكم
_ يله بنيتي شده وتزول ان شاء الله
_ان شاء الله ... غلقت السماعه  لملمت رجلي على القنفه وخليت ايدي جوه خدي سرحت لدقائق ... سحبت خصله من شعري وبديت اللعب بيها بدون وعي ... قربتها لانفي ...
ويا دخلة ثمين ... فزيت من حاله الاعتكاف الي جنت بيها
_ ها شو كاعده وحدج ... وتشتمين بشعرج ... صارلج شكد مسابحه
_ مدا اشتم دا اللعب بشعري ...اليوم سابحه ... وقفت من مكاني ... وخطيت كم خطوه بتجاهه ... خليت خصله الشعر كدام انفه ... بتحدي واستفزاز
هاك متع حاسه الشم  عندك شوف ريحته شكد طيبه
_ سحبتها بعناد وتحدي ... استنشقتها  متودد غير مشكك غازلتها
بنظرات المحب من لملمت كل شعرها بين ايديه ودفنت وجهي بي ....
_حاولت استفزه ... لازم عجبك عطره
_اي والله نوعيه هالتايت تجنن شنو اسمه حتى اغسل ملابسي بي بعد
_ سحبت شعري متنرفزه ...مو نسيت كرعتك ميرهملها  الا صابون الحصه
يزحلك عليها ههههه
_ شنو هذا الشامبو ... مكلف .... لمحت ملامح الغضب على وجهها ضحكت
وحركت كف ايدي على راسي ... هاي كرعة ولد الملحه سامعه بيهم
_ اوي راح يبدي يتفاخر .... اشوفك ما صدكت جلبت بيك حتى متروح تتعارك ... خزرني بحركه سريعه مسكني من ذراعي
_ هو مو صوجج ... شتحجين من ايدي لان السوايه الي سويتها مو مال رياجيل ... بس باجر كلشي يرجع لمكانه واتحمل نتيجه غلطتي
تركتها ... التفتت لملمت غراضي ...
_ يا الله شسويت ... بقيت اراقبه عرفت راح يطلع بالليل
رحت لمست كتفه ... اسفه والله طلعت مني مو مقصوده
_نتر بيه نزلي ايدج ... تركني وطلع عصبي ...
سمعت عمي سأله وين رايح
_ابويه اتصل رايدني بشغله الصبح ... لازم اروحله
_ الصبح اطلع هسه فايت وقت
_ غير مره ان شاء الله ابات ... يله اني اترخص
_الله وياك انتبه  وانت تسوق
_ان شاء الله
_ بقيت متبسمره بمكاني ... الوم نفسي يا الله شكد غبيه ...
جلست على الكرسي ... دماغي يجيب ويودي لا يصير عليه شي بالطريق
بديت اطرق على الطاوله بأصابعي بتوتر ... وانظر الساعة
اخمن مده الطريق ... بعد نص ساعة  من التوتر ... رفعت سماعه التلفون
الو
_ الو
_ هلو لهيب ثمين وصل
_ هلو ميامي ... اي قبل شويه دخل وصعد للغرفه ... هسه اخلي يرفع السماعه الفوگ
_ لا خلص بس ردت اطمئن عليه ... يله تصبح على خير
_ وانت من اهله
_ دخلت للغرفه تمددت بفراشي حاولت انام ... مكدرت جافاني النوم
زين من تمالك نفسه وما مد ايده علي على هالحجي ... يا الله اني ليش
هيج اسلوبي هجومي ويا ما افكر بالكلمه ولا اداري مشاعره اففف
شراح يسوي شنو يقصد بكلشي يرجع بمكانه ...
_ دخلت للغرفه لگيته مسند راسه على خلفيه السرير ويدخن ... سرحان
ميامي اتصلت
_ شوكت
_ هسه دتطمئن عليك وصلت ... خو ماكو شي
_ تنهدت ... اني هاي بت عمك متفيدني  ولا راح نتراهم  ولا راح يكون اكو ود بيناتنا بيوم ...
استعجلت وغلطت اكبر غلطه بحياتي من جبرتها على هالارتباط
_ گول يا الله هسه انت مبين مغثوث ... ودتحجي هالحجي ...
_ لا باجر اروح لعمي وادز على ابويه وعمي باسل ... وانهي الموضوع
_ ثمين انت بيك حاله محلوه بساعة الغضب كلشي تسوي بتسرع ...
بعدين تتندم عليه الخطوه من بدايتها غلط ... لكن بعد صارت وعقدت على البنيه يعني صارت بذمتك ... هسه تريد اطلك ترى هيج مو لعب
اليوم اعقد باجر اطلك ... انت اختاريتها تتحمل مسؤوليه اختيارك صح او غلط ولو اني متأكد اختيارك الها صح متلگى بنيه مثلها ...
هاي سوالف الزعل تصير بين اي اثنين مرتبطين ...
_ انتظرت الكل نامو ... ورجعت للصاله مكدرت اتحمل حاله القلق الي صابتني
اتصلت على بيت عمي ... اكثر من مره ... الى ان اجاني صوت عمي
_ مرحبا عمو اسفه دا اتصل بهالوقت بس ثمين وصاني على شغله ردت اذكره بيها
بلا زحمه عليك  ممكن تصيحه
_هلا عمو ... شلونج هسه ثواني اصيحه
_الحمد لله اسال عنكم
_ بابا ثمين ... ميامي على التلفون ...
_  سده يابه من جوه راح ارفع السماعه ... غلق ابويه الباب ورا
رفعت السماعه ... اشرت للهيب
تعال جاوبها
_ نعسان وما الي خلگك انت ومرتك ... استهدي بالرحمن وجاوب البنيه
_ سمعت صوت انفاسها ... الو
_ ثمين
_ لا ابن عمه ... شكو
_ الله عليك لا تزعل مني والله جنت اداهرك مو قصدي اجرحك  وداعت ابويه طلعت مني بدون قصد ...
_ هاهيه كملتي
_ لا انت گلي شلون اصالحك واعتذر
_ليش انت حجيتي شي غلط حتى تعتذزين
_ كل الي حجيته غلط ...
_ لعد ليش حجيتي ...
_ما ادري والله هذا مو اسلوبي  ... ما ادري ليش هيج اكون وياك
_ يجوز لان تكرهيني ... اطلعين الي بداخلج بهالاسلوب
_ لا ما اكرهك ... الله الشاهد ... يجوز بسببك
_ هو اني السبب ... اظاهر جبرتج على شي انت مرايدته صار عليج واقع حال
_ بالاول يمكن ... بس هسه غير ما كان اتصلت عليك بهالوقت وانت تعرف اني اخجل اتصل عليك بالبيت ... وفوگاها بهيج وقت
لو ما تهمني ...مكدرت اخليك تنام متضايق مني
_ لا اطمئني جنت نايم ... وكعدوني
_ رفعت الغطاء عن راسي ... بصوت عالي وحق الله ما نام لحظه گضاها يدخن ويفكر بيج ههههه
_ ابتسمت ... اختفى صوتها ...
لا تصدگي اظاهر سمع الي دا اگوله راد يجاملج
_ اعرف ما كنت نايم ... مبين من صوتك اميزه من تكون نايم او صاحي
شنو قصدت بتنهي كلشي ... يعني ننفصل
_ يعني انت متصله عليه بسبب هالكلمه تريدين تعرفين شقصدت
_ اتصلت اعتذر واطمئن عليك ... وبنفس الوقت اريد اعرف شنو تقصد
_ مابيها قصد كلمه  وطلعت بساعة عصبيه
_ اريد اعرف شنو الي جان بالك من حجيتها
_اتذكري الكلام  والطريقه الي حجيتي بيها ... راح تعرفين
وحتى لا الف وادور ... اني جبرتج على هالوضع وانت مامتقبلته ولا كدرتي تتكيفين ويا   ... صار عليج واقع حال كرهتيني بسببه
الي تريدين اني اسوي
_ انت شتريد
-اني الي ردته سويته انت شتريدين
_انتَ
_شبيه
_ سألتني جاوبتك
_ ابتسمت ... ما فهمت شنو سألتني جاوبتك
_ استنشقت الهواء وزفرته خجله .... جاوبتك أنتَ
_ شبيه
_ اوي مامعقوله مد تفهم ...
_بديت اراوغ ... شفهم هي حزوره ...
_ ثمين انت تعرف اني بصعوبه دا اجاوب ...
_ ليش ... شو لسانج ما شاء الله يكت سم ... يله سمميني عادي تعلمت عليج
سمعيني جوابج ...
_ مو جاوبت انتَ ... ولا تبقى تغثني مو معنى تطلبني اعتذار اطلع روحي
_ ابتسمت ... نترت بيها شبيه
_ فزيت من النتره ...اريدك انت
_ شتريدين مني ... اشرلي لهيب بحركه  محتج تعني ( ينعل بليسك طلعت روحها ) ضحكت
_ ترى اني من طلعت لحد هاللحظه متضايقه ومكدرت انام ولا ارتاح  ... وصار ساعة احاول ارضيك ومصدكه انت مفاهم الاجابه...
ما ادري بيك دتستهزء بيه وماخذ الموضوع ضحك ... ماكو شي يضحك
وانت تعرف معنى كتلك بصعوبه اجاوبك ... لان ما بحياتي حاجيه ويا شخص بأمور تخص المشاعر
_ عاد انت لگيتيها من الله تتحججين وتفرين الموضوع عليه ... ليش اني اي  شخص المفروض مشاعرج وكلج الي
واذا سمعتيني ضحكت ... لهيب دخل للغرفه وعثر اخذتني الضحكه
شنو دتحاسبيني عليها ... بعد بس عديلي النفس ... ابتسمت لحظه سديت السماعه
من عرفت لهيب راح يحجي
-والله انت مفتري .. كافي ترى لحيت ...
_ ابتسمت ... امشي نام جوه بالهول
_يله نازل .. بس اتسامر وبطل مداهر
_ الو
_ يله اخذ راحتك ... ماطول لهيب يمك بالغرفه
_ لا نزل جوه ... اخاف نعستي
_ بدت دموعي تنزل لا بس توترت بالزايد ... واني من اتوتر انفعل واخاف يطلع مني كلام
ميعجبك
_ ليش توترتي ... على شنو هالبجي ( البكاء)
_ ما ادري ثمين ... دا احسك ضغطت عليه بطريقه كلامك واسلوبك
اني ادري غلطت بس ما اتحمل احد يذلني ويستغل اعتذاري
_ شلون بله ادك الدرب بهالليل واجي امسح هالدموع وننهي هالخلاف
_ لا وين تجي بهالليل ...
_ من خايفه عليه شكو غثيتيني ... جنت ناوي اليوم اكعد اتسامر وياج
والطاولي والشاميه كلها طيرتيها
_ ابتسمت (لان تغيرت نبره صوته بهمس) وانت شدعوه هيج اعصاب متتحمل مني حجايه ... بعدني محجبت شي بس خليت ايدي على كتفك نترت بيه وطلعت
_والله بعدني مغثوث ...منج بعد اتعامل وياج برسميات افضل
_ يعني بعد ما اسميك ثمين ... استاذ ثمين لو سيدي ههههه
_ لازم اجتي الحاله ...
_ يا حاله حبيبي ....هسه لو بايت يمنا مجان كعدت بصفك خليت راسي على جتفك ونسولف  بدل سماعه التلفون تعبت ايدي
_ سدي الموضوع ... وتمددي على القنفه وخليها جوه اذنج متتعيبين
_ اي افضل ... انت ددخن مو
_ اي ... من قهرج ... لو مو عيب من بيت عمي  اجي بهالليل اقلقهم
كان اجيت ...
_ شعندك جاي ...
_ التقط هالشفايف
_اوي ثمين اروح انام ... لان ما احب هالسوالف
_ ابن عمي استهدي ... شاربج ثخنان
_لا والله ... متأكد
_ ميامي هسه جاي عود افتحيلي الباب
_ اكيد تشاقى بله من يشوفوك الصبح يمهم شيگولون عليه
_ نكعد بالحديقه سويه كم ساعة وارجع ... قبل متطلع الشمس
_ لا حياتي انت متريد تكعد بالحديقه ... تريد متكعد راحه ...
ترى ما استبعدها ادك الدرب وتجي ... بس راح تعب نفسك لان بس اقفل السماعة اروح انام وتجي تكعد بالحديقه وحدك
_دتلحلحي لعد ... وخليتي متمدد بفراشي ... وتغزلي بيه كفري عن الكلام الي سممتيني بي
_ هههههه شلون اتغزل ما اعرف
_هل يطلع منج راضي بي ...
_ ابتسمت ترى سالفه تكرهيني ما الها صحه بس بدماغك
_لعد
_ يعني ما اكرهك ... ولا راح اكدر
_ يعني
_ يعني انت حاليا شخص تعادل كل الاشخاص بحياتي
_ شلون
_اوي شكد طماع ... يعني رجلي واخويه وصديقي
_ ليش انت عندج صديق
_ صار عندي واحد قبل اشهر ... وافترقنا وهس رجعلي
_ تربعت  مفزوع و مركز ... لا بله هذا منو
_ انتَ
_ عبالي
_ ماعندج حبيب منا منا
_ يمكن بديت احب ... بس ساعات وساعات حسب حالته
_ ليش شبيها حالته
_ مخبل
_ يمكن انت مخبلته ....
_ لا هو مخبل من اول يوم شفته ...
_ لعد شحببج بي
_ ما اعرف بس يصير كدامي ما يبقى شي بالدنيا بعيني غيره ...
_وهسه وهو بعيد...
_ داحس اموت عليه ... وقلبي ما ارتاح الا من سمعت ضحكته
_ اويلي طلع اكو كلام احلى من الاوي ...
لعد ليش من اكون وياج متحجي
_ استحي منك وانت جرئ
_ والله اني فقير وياج .... ترى ويا امه محمد كلها ما انجرع
_ اعرف
_ شتعرفين
_ اعرف شكد تحبني ...
_شكد
_بكد النفس الي تتنفسه
_ والله النفس الي اتنفسه ... بس متعبتني
_ قبلته ... امواااه
_ بعد هالكلام بالسماعه متشفي ....
_ ههههههه لا تصير طماع ترى وجهي احمر ... دا احس نفسي
مستهتره
_ اخخخ لوعتي قلبي بهالاستهتار ... اريدج مستهتره ويايه
_ ثمين روح نام ... منعست
_ طار النوم من عيني ... شيطلع الصبح واشخط السياره لبابكم
_ههههههه صاير مراهق
_ ما راهقت قبل ... بس وياج اريد ارجع اراهق
_ اويلي عليه ... من خبالاتك شلون راح اعرف اجاريها
_ صيري ذكيه ... وجاريني ترى اني سهل وياج
_ اني الي سهله بدليل تقشمرني بكلمتين
_ انت الوحيده ما اقشمرها ... بس لان احبها اتساهل وياها
بس بعد اذا حجيتي كلام يغثني اكص لسانج
_ كصه انت التخسر بعد متسمع كلام حلو ... ولا تسمع الاوي
_ ها ... هم وجهة نظر ... نشوفلنا عقاب اخف
_ شنو العقاب الاخف
_ تخافين من الخنفسانه
_طبعا
_ خلص خنفسانه تحل الاشكال ههههه
_ بلكت صدك ...
_ والله اعيشج برعب ... بس تغثيني
_راح اروح يمكن احد كعد ... وي ساعة اربعه
_ واذا يدرون ويايه ....
_والله استحي ... بله طلع عمي شيگول
_ ينقهر عليج يگول ممصدگه ماخذه هالشاب الحلو تخاف لا يطير منها
مسهرته للاربعه تتغزل بي
_ها رجعنا ... صدك لو گالو اكرع واخبل شحال لو عندي شعر
_ بهالكرعة والمعجبات سره لو يطلع شعر ... انت بالضيم
_ لا بله ... حبيبي اني محد ياخذ مكاني ولا عينك تشوف غيري
واذا تشوف معنى اني خساره بيك فما انقهر عليك لحظه
_ ابو سمره عيوني وقلبي من يوم دخلتهن نعميت عن الدنيا والي بيها
_ احبك
_ غيرت قراري ... ما راح انتظر اتخرج ونتزوج
باجر احدد ويا عمي وابوج موعد العرس