قلوب بينها برزخ

٢

صار قريب تقصدت من اسد الباب اگول شكرا برغم جانت مي بداخل البيت
ماسمعتني لكن ردت اسمعه حتى ينتبه علاقتي بيها رسميه ما يشك بيها اختي
برغم اكو شبه بيناتنا لكن مو ملحوظ
كملت طريقي وهو ورايه الى ان وصلت تقاطع الشارع اكو اسواق قريب من الاسواق قررت التفت له
التفتت بعصبيه انتظرته يقترب اول ما صارت بيني وبينه مسافه امتار
قليله
نترت بي انت شكو لاحگني انتبهت عليه ابتسم
نترت
على شنو دا تضحك مو عيب هالتصرف واحنه جيران اذا بعد لحكتني
حگول لعمي وللولد
_ اسمعيني اني حبيتج من اول مره شفتج بيها بالسطح وتعلقت بيج
ردت منج تنتبهين عليه وانت ولا يمج
_ ردت اگله اني متزوجه بس خفت يعرف البيت الي دخلته بيت اهلي
جاوبته
اخويه
اني لا مال علاقات ولا حب وبعد لا تلحگني اني مرتبطه الله يخليك
لا تسببلي مشاكل ولا تجيبلي الكلمه اهلي عالم معروفين بالمنطقه مو حلو انت
لا حگني
_ بس اسمعيني انطيني مجال احجي وياج
_ ماعندي حجي وياك وكافي رجاءا
مشيت وتركته وهو مستمر يمشي ورايه وبقت هاي عادته يوميا
يمشي ورايه ويبقى يحجي واني اسمعه ولا كأنه اسمعه ولا كأنه هو موجود
كنت مطمئنه من الطريق بي  ناس ومحلات ما يكدر يسويلي شي ولا هو اصلا بدر منه شي غير الكلام والغزل لكن بقى موضوعه شاغل تفكيري مره اگول خلي يولي ومره اگول لا خلي احجي لثمين واتراجع اكول اخاف يروح يتعارك
وياهم ويسوي بالولد شي او تصير  عداوه وتالي اتندم
بقى هالشاب الي من خلال كلامه وهو يمشي ورايه عرفت اسمه سلام يراقبني
صرت اشوفه مو بس من ارجع من المدرسه حتى من اطلع انظف الكراج
يبقى بالسطح العالي واگف يدخن واحس بي مراقبني  برغم ما جنت ارفع راسي
الا مره مرتين صدفه يصير كدامي من اريد ادخل البيت او اشر الملابس
جنت احجي بقلبي فتره ويشوف ما بيه امل يمل واخلص منه بقى هالحال
الى ان خلصت الامتحانات وبدت العطله صرت ما اشوفه حتى
الكراج بطلت اغسله بعد ما لمحت للهيب ان الجيران عندهم ولد واني ما اكدر اطلع اغسل الكراج بسببهم صار هو يغسل الكراج
........................
بعد مرور فتره ( اكثر من شهر ونص تقريبا
تخرج ثمين من الكليه العسكريه بمرتبه الشرف ( من الاوائل )
...............
يمه
شنو تحتاجون لان حطلع للحلاق
روح اني اذا احتاج شي ادز اخوك
ما اتصور محتاجين شي اني وخالاتك كملنا الاكل
منا لحد ميجون العالم نكون محضرين كلشي
- عمي باسل هسه اتصل جايين وياهم عمي بلال وعمتي ورجلها
_ ميامي ميامي
_ نعم
_ جيبيلي المحفظه اندك الجرس طلعت للكراج
دخل عمي بلال وعمتي ورجلها
بيدهم صواني
_ روح لعمك باسل ساعده
_ نزلت بيدي المحفظه صارو بوجهي عمتي وعمي بلال
سلمت
المكان مكتض بالاشخاص خالات ثمين واهل ابويه
دخل عمي باسم ومرته وبنات  عمي
بيدهم صواني الاكل
رحبت بيهم عمتي مستغربه
_ ليش متعبين نفسكم والله سويت اكل خير من الله
_ مها هذا ثمين عزيز الكل
متريدين نتعب له بحفله تخرجه
بعد نفرح بولاده ميامي ان شاء الله
-الله يسلمك
_ ها عمو شلونج
_ الحمد لله عمو
_ بعد ان انفصلنا الزلم بالصاله والنسوان بالمطبخ
عمتي سهاد ومرت عمي باسل طلبوا مني ان ارتاح هم ويا عمتي وخواتها والبنات وياهم يساعدوهم
سألتني عمتي سهاد
_ عمه شو بعدها بطنج صغيره ولا كأنه حامل
_ ابتسمت ما اعرف
_دخل ثمين اخذ المحفظه وهمسلي
محتاجه شي حطلع
_ لا سلامتك
_ بعد اكثر من ساعتين اكتظت الصاله
بالمعازيم
والهول والمطبخ بالنسوان
اتنغصت مكان اهلي بين هالجمعه  بقيت وياهم استمع لاحاديثهم
من انتبهت ترتبت كل الامور
صعدت اسبح واغير ملابسي بعد ما تأكدت
ان عمتي مها ما تحتاجني 
بعد اكثر من نص ساعة نزلت اول ما دخلت المطبخ
تفاجئت بامي ومي  وياهم
انفرجت ابتسامتي وقلبي  رف بسعاده
واني اسلم على امي ومي
وهمست لمي منو جابكم
_ ثمين مر علينا للبيت
دخل على ابويه وراده يجي بس ابويه مقبل
فطلب منه اني وامي وهنودي نحضر
الله هداه وقبل وهاي اجينا
هنودي وين
اخذه ثمين يمهم بالصاله
تعالي اختي خلي نصعد بالغرفه ماطول ملتهين بين ميصيحونا نصب العشاء
لهيب_ من شفت مهند بحضن ثمين استغربت وسألته
منو جابه
_ اني مريت جبت عمتي وقلبك وهنودي
_ مي موجوده
_ بالمطبخ بس اثگل
_ دخلي اروح اسلم
_ ادري بيك مشتاق لعمتي منيره
_ ابتسمت اروح اجيب مي للجماعه
_ خلي انعشي العالم وجيب المي
_ اروح اسلم
دخلت للمطبخ سلمت وهي ماكو بين الوجوه
سألت ميامي وين ثمين رايدها
_ ميامي يمكن بالهول
- طلعت للهول ماكو ويا البنات
صعدت بوجهي لغرفتها
دكيت الباب
فتحته اول ما شافتني
هاعيني
انتبهت  ميامي عيني مو يمها جانت بداخل الغرفه
ابتسمت اول ما لمحت الي گاعده  على حافه السرير
شلونج مي
_ هلو هوبي
_ الحمد لله
_ شو هنا متنزلون
_ احد صاحنا
_ لا
بس يمكن ثمين رايدج
_ يله خلي ننزل لعد
_ اول ما وصلنا للهول وميامي
توجهت للمطبخ
همست لمي
مشتاق يا شمس حياتي
العطله كطعت بيه
_ لهيب لا احد يسمعك
رجعت ميامي
_ هوبي وينه ثمين
_ هسه اصيحه
_ دخلت للصاله اشرت لثمين
من تقرب مني شوف مرتك مو ردتها
ابتسم
_اني ردت مرتي !!!يا كذاب
هسه شنو اگلها
_ تصرف
امممم
_ السياره رايدلها غسله
_ اغسل حتى ملابسك بس قرب المحبين
_ ههههههه
دا اشتم ريحه حرگ
_ هذا عطاب قلب اخوك
_ ههههههههه
لك والله ضحكتني وضعك اليوم يخوف
_ لا لاتخاف هسه وضعي تمام من شفتها
_ بعد ماعندك درب مدرسه حتدخل جامعه
وين حتشوفها بعد
_ هي هاي المصيبه مترجي من اخويه يلم الشمل
_ عمك مامنه رجاء رحت عليه قافل بعده
بس ماطول عمتي وهي حضروا اكو امل تشوفها هنا
_ كثرلنا عزايم ولمات
اكسب اجر الاقربون اولى بالمعروف
_ هههههه لا انت وضعك صعب
_ ها عيني رايدني
_ اي ردت منج تنزلين لعمتي ومي
بس لهيب گلي موجوده يمهم
بهالاثناء سمعنا صوت الطبل والموسيقى
طلعنا اني وثمين مثل ما الكل طلع متفاجئ
الصدمه خلتني ما اكدر اتحرك من مكاني
ابويه بالكراج هو وعمامي يتسالمون والموسيقى ومراسم الفرح
خلتنا متفرجين
ابتسم ثمين وتركني وراح لعنده حضنه وبوس راسه وايدي
والتفت الي اشرلي اجي تقدمت
بين متوتره وخجلانه منه
وبين اشتياقي لحظنه حظنته ودموعي غدرتني بهاللحظه
بقيت متشبثه بي اعاتبه بهالدموع بدون كلام ( وبظهره اهل الموسيقى يهتفون وعمامي والاقارب
يكرموهم بمبلع وينعاد الصخب )
وهو هم ما نطق بشي لكن احتضانه الي زاد قربني منه لدرجه حسيته
يريد يدخلني بقلبه
بوس راسي وهمسلي
شلونج بابا
_ مسحت دموعه واني ابتسمله الحمد لله ماطول انت بخير اني بخير
_ الله يرضى عليج حبيبتي
بعد ما انتهت هالوصله الموسيقيه
تقدم ثمين وخلى ايده على ظهر ابويه وهو يحثه ان يدخل للصاله
مرحب بي
_ يله ميامي خلي عمي يفوت يمنا
بعدين نكعد كلنا
_ بدخلتنا شفت الملامح امي ومي
عيونهم تلمع تعلن عن دموع نزلت
وعمتي مها وجهها مابي تفسير ولا تعبير من الصدمه لكن ما كانت ملامح الفرح ماره على هالتعابير
عمتي ومرت عمي باسل وجوههم مستبشره بعد هالصلح وكل الوجوه
فرحانه حتى خوات عمتي مها مبتسمين على الموقف وعلى فرحه ثمين بهالمبادره من ابويه
اكتظ المطبخ بالتعليقات والسوالف
بقى سؤال ببالي شنو الي غير موقف ابويه بعد هالخصام بالخصوص واني اعرف
ثمين جان عندهم بالبيت
اكيد دار بينهم حوار وكلام كدر ثمين يكسر بي قلب ابويه ويحنن قلبه
الفضول قتلني اريد اسأل مي شنو الي صار
دقايق وطلع ثمين
ينطي خبر
_ صبوا الاكل
_انطلق صواني الاكل وهي متوجهه للصاله اخذنا الوقت الى ان
غادروااصدقاء ثمين وبعض الجيران المباركين
بقينا فقط الاقارب
طلع ثمين نادى عليه وعلى الكل ان نجتمع كلنا بالصاله
مابقى احد غريب
الي دخلنا فقط البنات وعمتي
اما امي ونسوان عمامي وخالات ثمين وامه بقوا بالهول
ما كان اكو مكان بصف ابويه لان عمامي كاعدين يمه
لكن كعدت بمكان كدامه بالضبط اريد
املي عيني منه
اريد اصدك الي كدامي ابويه
وحرجع التقي بي واحجي ويا مثل قبل
حسيته منحرج وديجامل الكل
لكن الي حببني  بثمين اكثر
تفهمه لوضع ابويه بقى مهتم بي اكثر من البقيه
ويسولف ويا ويحاول يضحكه ويجذبه بمواضيع
يعرف ابويه يحبها ويشارك بيها
مر الوقت
ما حسينا بالاميال الا من صارت الساعة ب٢ الصبح
هنا عمي باسل اطلق تنبيه المغادره
_ يله احنه هم يله نتخرص
_ عمو بعد وقت
_ عمو ٢:١٠ بعد احسب سوالف النسوان بالكراج
لل٣ يله نتحرك ونوصل لبيوتنا
_ عمو دباتوا
_ لا والله غير يوم
انت ومرتك تعالو باتو يمنا
_ لا من رخصه ابو ثمين
ثمين وميامي يباتون يمنا
_ هالكلمه من ابويه طيرت اخر صبري
نظرت لثمين الي نظرلي وابتسم
_ ها بيج حيل نروح نبات بيت عمي
_ من الخجل والارتباك فشلت جاوبته
بكيفك
عمي ابو ثمين رحب بالفكره
وطلب من ثمين ان نروح نبات عند اهلي
من فرحتي اول ما طلعوا عمامي للكراج
ناديت على مي
_ تعالي ويايه خلي احضر ملابسنا حنجي نبات يمكم
_ الله عليج
_ اي والله ابويه عرض هالشي على ثمين
_دخلنا الغرفه واني افتح الخزانه طلعت ملابس لثمين
وملابسي مي انتبهت عليه
_ميامي على كيفج شكو مخبوصه
_ لج والله مامصدگه
_ ميامي انت عندج رجال دره
لو تدرين شلون من دك الباب وفتحتله امي راد يشوف ابويه
بقت خجلانه بين تخاف ابويه يطرده ويرجع يحقد عليه وبين تفشله وهو جاي فرحان بتخرجه
شفتها واگفه ويا بالكراج ما ادري شنو حجوا وراها دخل بوجهه للهول
ما انطى مجال لابويه على كد شفت ابويه تفاجئ بدخلته
صار ثمين راكع ولازم ايد ابويه بوسها وراد ينزل على رجله ابويه
وهو الولد گله عمي انت بمقام ابويه واني جنت وياك ابن عاق
ابويه صار احمر من الخجل والموقف  رفعه ما قبل يخلي ينزل على رجله
جره يكعد يصفه 
ثمين گله عمي اني جاي اليوم اتشكرك على هالتربيه وعلى هالدره ورفعه الراس الي انت ابوها
عمي انت غلاتك عندي مثل غلاة ابويه وعمي باسل ميهون عليه افرح
وهم ملمومين يشاركوني فرحتي وانت مابيناتنا وانت متفضل عليه بزواجي من بنتك عزيزتك اعرف غلطت وجاييك دخيل ما تفشلني اليوم حفله تخرجي
اريدكم تحضرون ويا كل الاهل وننهي هالزعل بعد كم شهر ميامي بأذن الله
تولد الطفل ابنكم وحقه عليكم مثل حق امه عليكم لا تبقى غضبان عليها وهي ما الها ذنب ذنبها اني حبيتها وردتها
ابتسم وگله لابويه وذنبك انت بعد سنين قطيعه احتضنتنا اني ولهيب ودخلتنا بيتك  وعتبت علينا لان ما نسأل ولا نزورك وهاي من زرناك شفت بنتك وحبيتها
شفت ابويه ابتسم
گله اخذ عمتك والبنات اني غير وقت اجي
بقى يتوسل بي
ابويه گله لا تضغط عليه خليني براحتي هو هم
بقى يشاقى ويا ابويه يگله ما اطلع من البيت الا ترضى عليه وگف لزم راس ابويه يبوس بي مجلب كل ما يبوس راسه يگله يابه اني اليوم ما اعوف راسك الا
ترضى عليه حسيت كلمه يابه خجلان
وحس بثمين يوده من كل قلبه مو ديجامله علمود الصلح بقى ابويه يبتسم تالي رفع راسه گله خلص ابني راضي عليك
صاح على امي حضروا روحكم حتى تروحون ويا ثمين واني بعدين اجي وراكم
ثمين گله عمي لا تكسر فرحتي وفرحه مرتي وما تحضر وراها طلعنا بس مجان اكو تأكيد من ابويه ان حيحضر فقط جاوب الله كريم والحمد لله حضر
_ ياربي يفرح قلبك ويوفقك يا ثمين مثل ما فرحتني
يله كملنا خلي ننزل
نزلنا ولگيناهم بعدهم واگفين بالكراج يسولفون
اهلي وبيت عمي باسل وعمي بلال مغادرين الموجودين من اهل ابويه فقط عمتي وزوجها وخالات ثمين واهلهم
اما ثمين جان واگف ويا زوج عمتي وازواج خالاته
مي : اهلي يمكن راحوا وتركوني
ميامي : يجوز ثمين گلهم ارجع ويانا
اكلج تعالي ماطول الجماعه مطولين خلي تفتر بالبيت اخاف اكو شي يحتاج ترتيب حتى عمتي ما تلگالها عليه حجايه
_مو نظفنا وياها كلنا المعزومين ما بقى شي حتى الكراج خاله ثمين سداد غسلته
_ميخالف أتأكد
_انت روحي وحدج اني حطلع يم عمتي تالي عمتج تگول شعدها هي واختها جوه وحدهن والبيت مابي احد
_ لعد روحي اني اكمل واطلع وراكم
_ دقايق وسمعت صوت ثمين ينادي بأسمي
_ نعم
_ يله حضري امورج هم يله نروح حتصير ب٣
_ جاهزه
_ لعد ننتظرج اني ومي بالسياره حترخص من الموجودين
_ دقايق وطلعت سلمت على الي باقين بالكراج وطلعت فتحت الباب الخلفي خليت الجنطه
وراها صعدت بصف ثمين
التفتت لمي خو ما نعستي حتى نبقى سهرانين باچر جمعه
_ زين اني من ضمن المدعوين بهالسهره لو احتكار بين الخوات
_ لا انت هم ويانا نسهر بالهول بس اول ما نوصل نفرش الدواشگ
ونرجع ايام قبل تذكرين مي من يجي ثمين ونلعب دنبله  والي يفوز يدز بالفلوس
اكل لو حلويات
_ تدرين يمكن هنودي ضيع كم كره
_ لا اليوم نلعب بات اني ومرتي وانت ومنى هاي اذا بعدها ما نامت
_ وصلنا لباب البيت
نزل ثمين فتح الباب من الاسفل دخل السياره ونزلنا
فتحت امي الباب
_ شو تأخرتوا
_ والله عمه يمكن لحد الان اهلي والي بقوا بالكراج متدرين بعد
السوالف ما تحلى الا باب البيت
عمي وين
_ عمك دينتظركم خطيه نعس ديريد يصعد ينام
_ دخل ثمين بوس ابويه واني من ورا بوسته من ايده وراسه
_ عمو اخذ راحتك واصعد نام  باجر الصبح بأذن الله ننجمع ونسولف احنه باقيين يمكم للغده
_ لعد تصبحون على خير
_ ويا ما صعدوا ابويه وامي دخلت مي ومنى بالدواشك فرشوهن
بهالحظات جنت افسر مشاعري
احساسي بهالمكان غير عن السابق وحتى علاقتي بابويه صارت  اكثر حياء ورسميه  غير عن السابق يمكن لان تزوجت وبنفس المكان ويايه رجلي احساس غريب
حتى ثمين انتبه على صفنتي وعدم تركيزي وياهم  سألني
_ ابويه انتِ شكلج نعستي
_ تريد الصدك اني بس كعدت على الدوشگ حسيت بالتعب
_ ميوش جيبي الدومنه اختج ما وراها سهره
_ تمددت بالفراش اتفرج على مي وثمين يلعبون دومنه  واني مبتسمه
على حديثهم ومداهرهم
_ ثموني كافي والله نعست اريد انام بس الضوه مديخليني انام
_ يله ابن عمي مرتك تنحست خلي احنه هم نروح نام تصبحون على خير
_ بعد ما طفت مي الضوه قبل ما تطلع وبعد ما تمدد ثمين بصفي
ثموني ياربي يوفقك ويجعل ايامك كلها خير ودائما يفرحك اليوم حسيتك
فرحان من كل قلبك
_ الحمد لله فرحت فرحتين فرحه نجاحي وتخرجي وفرحتك ب دخلة عمي
علينا البيت
والله ايام من جنت اشوفج نايمه بصفي احس بتأنيب الضمير وانقهر لان
تسببتلج بهالبعد عن اهلج بالخصوص بيوم الي استلمتي النتيجه ناجحه
بس الحمد لله اليوم ربج فرجها
_ تقربت لعنده مثل الطفل الي يلتصق بأمه
اگلك شي اني تعلمت على حياتي وياك شكد فرحت اليوم بس اكتشفت شي
اني صرت استحي من اهلي ومكاني صار بالمكان الي انت بي دا احس بيت اهلي مثل بيت عمي باسل من نروح نبات عندهم خطار
_ تدرين اكثر شي فرحني اليوم شنو
_شنو
_راح نكون سويه مراح نفترق بعد راح انام واصحى وانت يمي
مراح يبقى بالي عليج
_ ثموني انت نعسان
_ لا ليش
_ اني هم طارت النومه من عيني خلي نلعب لعبتنا القديمه
_ يا لعبه
_ لعبه سؤال وجواب من التلفزيون
_ يله  انت ابدي
_ اسم برنامج اطفال يوم الخميس
_ سينما الاطفال
_ اسم المقدمه
_ نسرين جورج
_ مسلسل بي اسم حيوان
_ النسر وعيون المدينه
_شخصيه حبيتها بهالمسلسل
_ حسنيه خاتون
ضربتني بعكسي
ههههههههه شبيج
_ حتى بالمسلسلات تحب الكاوليات
_ حسنيه خاتون مو كاوليه
_ مثل الكاوليه الشخصيه بالمسلسل هم خفيفه وتتمركص وتصادق الرياجيل
_ ملازم احب اممممم
المشكله گمره فاهيه ما احبها لا ابقى على حسنيه خاتون
_ شكد مكروه
_ يله كملي
_ انت كمل
_ كارتون اطفال تحبي
ساندي بيل _
_ هذا مو بوقتنا
_ لا هم جنت اتفرجه جنت احبه علمود مارك
ضربني على خدي
_ مو اطيح حظج
_ ههههههههههههههه حلال عليك حرام عليه
صدك اذا ولدت بنيه اسميها ساندي
واذا ولد
_ نسمي غفوري
نامي يرحم اهلج انت شكلج ددورين حرشه نتعارك بسببها
_ انت صدك تغار من شخصيه كارتون
التفت انطاني ظهره
هههههههه ثمين ثمين
_ نامي
_بديت ادندن بأذنه
احبك حب جنوني واضمك في عيوني
واشوفك نور عيني يله صالحني ولا تتمزعل
ما جاوبني
تحركت من مكاني وصلت قريب باب الهول
اروح انام يم خواتي
_ ارجعي تعالي نامي هنا
_ لا ما ارجع زعلت خلي حسنيه خاتون تفيدك
_ درجعي لمكانج
_ صالحني وارجع
_ ارجعي واجيبلج سن ذهب مثل سن حسنيه خاتون
_ سمعته يضحك بالظلمه
ترى دا احجي صدك ليش تضحك
_ بعيني اجيبلج محبس بس تجيني فلوس
_ رجعت تمددت لا اريد زنجيل وايه الكرسي
وبعد متحب وحده غيري فاهم سحبت ايده
شو خليها هنا حتى انام
جبرته يلتفت ونمت على ايده
شو ما جاوبت
_ على شنو
_ على الي حجيته هسه
_ قصدج على الزنجبيل لو الفاهم
الزنجبيل بعيني بس الفاهم
لا مو فاهم لان اذا ولدتي بنيه ححبها اكثر منج
_ وانتهت هالليله بالحديث عن الاولاد
—————————-