الباب الثالث عشر
في دروب العشق الملتويه
كغمامه اعوم بين سراب اتأمل شي جميل من بعيد
وابتسم في كل خطوه نحو قدري كفجر يوم جديد
احايل النفس واتلاعب بمشاعري وادعي كره ذلك العنيد
ما ان يلين ويبتسم لي حتى يحترق القلب له ويذوب مابيننا من جليد
ميامي : تمددت بفراشي احس نفسي بحلم وراح استفيق منه
رفعت ايدي اي ماكو حلقه ....غمضت عيني على امل انام واصحى الصبح كلشي تمام وراح اسولف عن هالكابوس لمي بس اكعد
_ فزيت الصبح على صوت بت عمي رقيه
_يله ميامي اكعدي ثمين يريدج
_صباح الخير .... صباح الخير
تمطيت بالفراش ما ودي اگوم ... اوه ورايه دوام ... نزلت من فراشي بوجهي للمغسله وبوجهي الصابون حسيت احد بجانبي ... غسلت بسرعة ونشفت وجهي التفتت
_هاج الحلقه اللبسيها
_ معالم وجهه والحلقه ذكروني هذا واقع حال مو كابوس ... للحظه الدموع اتجمعت على حافه عيني ما اعرف شنو الي صار بيه
فجأه نترت بي بهدوء
العالم تكول صباح الخير ... والحلقه خليها عندك اخاف اضبعها لان بالمدرسه ما اكدر اللبسها
_هاي منو يحجي بالصباح الخير غير الي يريد العالم تصبح بوجهه يمسي عليهم بالليل لو انت عندج انفصام بالشخصيه
يله صباح الخير... وين ابقيها يمي بعد نص ساعه لازم اطلع للكليه وباقي الذهب موجود بكنتوري بالبيت من تريدي بس اتصلي على لهيب يجيبه واي شي تحتاجي هم اعتمدي عليه بين ىا انزل نهايه الاسبوع ... جيبيلي الجواريب والقميص ...وتعالي ورايه ....
_ ياربي مديدخل بعقلي خلص صرت لثمين وهو ولي امري ... مدا اطيقه ولا دا اتحمل اسلوبه وطريقة معاملته الي ... ليش بداخلي ما مرتاحه
ليش قبل جنت ارتاحله يمكن لان اسلوبه غير عن هسه حتى ملامحه ونبره صوته كلها غضب احسه مجبور عليه وارتباطنا بالنسبه اله مجرد رد اعتبار لنفسه وعقاب الي لان تركته اول مره.
سحبت القميص والجواريب من الحبل دخلت اشعه الشمس بعيني وصوت زقزقة الطيور والسما صافيه ...ونسمات الهوا البارده ريحتني حسيت انطتني طاقه وأمل الي اختاره الي رب العالمين هو الافضل ... دخلت للصاله فارده وجهي
لكيته ديخلي غراضه بالجنطه التفت ...
_ بسرعة جيبيلي الاوتي وشي اكوي عليه ....
_ جبتله الاوتي وبطانيه بعد ما دلتني رقيه على مكانهم ...
فرشت البطانيه وربطت الاوتي بالكهرباء... التفتت عليه اكوي اني
_لا روحي حضري نفسج وراج دوام ... مديت ايدي الها ... هاج
_هاي شنو
_مصرف
_ تحركت من مكاني خجلانه وبنفس الوقت ما كدرت ارفض وما اخذ لان اخجل من بيت عمي واذا احتاج شي صعب اطلب منهم ... بنفس الوقت
قلبي رف عليه لان مفكر بكل صغيره وجبيره تخصني ...وما يريد يعرضني
لاي حرج او ضيق بغيابه ...
اخذت الفلوس من ايده... چلب بكف ايدي
_اخاف يجي احد لبيت عمي خطار اخوة مرت عمي ولد هم ما تطلعين من الغرفه ...واذا تضوجين او عندج شي بالسوگ اتصلي بلهيب يجي يطلعج لاي مكان لا تخلين بالي ينشغل
خليني التهي ارتب وضعنا ... وشلون ارجعج لبيت عمي .
_استحي اتصل على بيتكم لا يطلعلي احد غير لهيب ...
_واذا ؟موضوع وانحسم صرتي مرتي ... وابويه ما مانع على كل حال هو لهيب راح يتصل بيج الظهر والعصر گلي حتى يشوف شمحتاجه .
_ماشي ... تريد مني شي قبل لا اروح ابدل جانت هالكلمات طالعه مني اغواء وغرور بعد ما لمحت محاوله تودده الي بملامحه ونظراته ومن لمسه ايده لكف ايدي ... ابتسامته اكدتلي فهم اني فهمت الي براسه
_ لا هيج الشيطان لعب براسي للحظه خيلي راح اشتاقلج ردت اضمح لصدري ... بس تذكرت ما تستاهلين
_ حسيت الكلمه لچمت قلبي وألمتني لدرجه نزلت دمعتي بدون احساس
شكد شايف نفسك ...مو صوجك اني استاهل سحبت ايدي منه بقوه وطلعت
قبل ما اسمع كلمه من الي حاول ينطق بيها ....
دخلت للغرفه دموعي تجري طلعت ملابس المدرسه غيرت
وقرفصت احضر بالجدول ...وادخل الكتب بالجنطه سمعت صوته يم باب الغرفه
_ميامي
_ما جاوبته دك الباب ما جاوبت ... سمعته من ورا الباب يهمس
بصوت واطي
_يله اني رايح في امان الله
_جاوبت مع السلامه .... انفتحت الباب دخل
قرفص ورايه ... انسحب راسي فجأه لصدره وطبع شفايفه على جبيني
بطرف اصابعه رفع وجهي صارت عيني بعينه
سألني
_راح تشتاقيلي )
-طبعا لا
_ ليش لان غثيتج
_ وليش دا انغث هو انت هذا طبعك وشخصيتك فكلامك ميأثر بيه
بلمح البصر لملم شفايفي بقبلات اعتذار بعثر كياني
تركني ووقف مستعد للرحيل
_مثل ما فهمتج ... ومو تنسين تتفقين على وقت رجعتج من المدرسه ويا الولد ... يله اني اروح
_ هزيت راسي بأيجاب ،... الله وياك ج
ورا اكثر من ساعتين متلهفه اشوف مي اول ما رن الجرس ... طلعت من الشعبه بوجهي لشعبتها
اول ما لمحتني احساس غريب صار بيناتنا كأنه صار فتره طويله ماملتقين
_معبالي راح اداومين ... اليوم
_لا ثمين رتبلي موضوع الروحه والجيه ... احجيلي ابويه شلون صار والوضع بالبيت
_لا الحمد لله صار احسن لا يبقى بالج ... بس بعده متضايق من الي صار
وامي دتحاول ويا ... ولو دتصير مشاكل بس حسب ما فهمت من امي
بس حجي لسان قلبه عليج وباله يمج
انت شنو الوضع
_ والله يا مي احس حياتي نقلبت كلشي مو بعيني ولا مرتاحه ولا متقبله الوضع حتى علاقتي بثمين غير عن قبل مو طايقته هو هم متغير مدا اتقبل
تصرفاته ولا كلامه احسه ارتبط بيه بس حتى يلقني درس على الي سويته
وخايفه لا بمرور الوقت يتندم ... وتالي يعوفني واخسر حتى ابويه اخاف هسه عندي امل يلين ... اوف يا مي احس كبرت فوگ عمري عمر
والله حتى دماغ ماعندي افكر ولا اعرف اتصرف عايشه يومي لحظه بلحظه
بدون معنى .... ان شاء الله ربج يكتبلي الاحسن
_ ميامي لا تخافين ولا تخلين هالافكار براسج هو مو طايش ولا زعطوط حتى تخافين منه يعوفج ... هو لو ما رايدج مجان سوى كل هذا ...
تريدين الصدك اني هم انقهر عليه ... يمكن شغله خطوبتج خلته يحقد عليج ويتغير بس اكيد يحبج لان هو ما وكف بس بوجه ابويه حتى بوجه اهله
يعني انت تعقليها هو مرايدج يخطي هيج خطوه ويعرف يجوز وراها يخسر اهله ويقاطعوا
_ ما ادري كتلج حتى عقل ما بقى براسي ... بس الي فهمته عمي ماعنده مشكله ويا ولا بقراره
_ هسه عوفج من هالحجي ... شنو محتاجه حتى انطي خبر لامي ...
تحضرلج الي تريدي ... لان ناويه تمرلج لبيت عمي هالايام
لو ادري بيج مداومه جان جبتلج فلوس ...
_ فلوس عندي انطاني ثمين وموصي لهيب اذا احتاج شي انطي خبر ...
بس استحي منه ... اليوم اتصل على امي واشوف شنو محتاجه اوصيها .
ها مي شبيج ابتسمتي
_ صار ساعة تحجين ما مستوعبه صرتي على ذمه رجال ... هسه من گلتي
انطاني فلوس استوعبت صار رجلج وبعد ما الج مفر منه والله نسيبي
طگه ونص بس عنده طلعات مال رياجيل
الله عليج احجيلي ... ولا مره قلبه لان ...
_ تريدين اوصفلج حاله مثل الي متلبسه جني بس قلبه يلين يخبله
عليه ... ولسانه يذب سم كلش يقهرني
_ زين انت اسلوبج ويا ... شلونه
_ ما ادري هو مينطيني فرصه اصير زينه ... من انغث اغثه بس من احسه تندم ويحاول يعتذر انطي مجال بس هم يبقى يحجي ويايه من ورا خشمه
يخليني اتندم انطيته مجال .
_ اختي تريدين الصدك انت حاليا وضعج مو مال تبقين على نفس اسلوبج
وما تتنازلين بعد عقدتي يعني صرتي مرته شرعا ... يجوز بعد فتره تزوجون ليش متحاولين تكسبي هو الولد قلبه طيب ... وانت عاشرتي
بالفتره الي جنتوا مخطوبين واكيد هم عرفتي شلون تتعاملين ويا وشنو يحب وشنو يكره
_ كلشي ما اعرف اكلها صاير واحد ثاني مو هو
_ دك الجرس ... يله اشوفج بالفرصه الجايه
_ ان شاء الله
كلامي ويا مي وفضفضتي ... زاحت من داخلي حمل كبير
خففت عن ابتعادي عن بيتي واهلي ... واشتياقي الهم
بالاخص بعد ما مرت امي عليه ... بعد الدوام لبيت عمي ....
لحظه الي اندك الجرس وسمعت بيها وصلت ... طلعت مثل الطفل الي مفتقد
حضن امه ... اتمسكت بيها واتمنين تكلي يله حضري غراضج حتى ترجعين ويايه ...
لكن من شفت الوقت مر وطول فتره كلامها ما ذكرت هالشي عرفت ابويه بعده زعلان مني ....
استسلمت بعد ما امي حاولت اطمني وتهون عليه
_ ماما حبيبتي هنا وهناك واحد هذا بيت عمج مثل ابوج والناس تكولين
فرحانين بيج وما مقصرين اتحملي وصير سباعيه ... انتبهي على الكلمه والتصرف الي يبدر منج ... مهما كان انت ضيفه لازم تشوفين اذا مرت عمج تحتاج شي تحسسيهم انت من اهل البيت ومرتاحه وياهم من تزوجين اول وتالي تعيشين بغير بيت هيج احسبيها
لا تبقين متكأبه وتفكرين انتبهي على دراستج واي شي تحتاجي تلكيني يمج
ان شاء الله فتره وتنگضي وكلشي يرجع لمكانه ...
_ ان شاء الله
دخل بهالاثناء عمي
_ لا يبقى بالج يمها هناك بيتها وهذا بيتها قابل اكو فرق هي بنتي ...
حالها حال البنات ...
_ لا والله هسه نفس الحجي حجيته وياها ادري بيكم متقصرون اني اترخص يادوب الحك ارجع للبيت
_ وين اتغدي يله تروحين
_ لا والله ما اكدر ... (همستله هشام ميدري اني جايه
وما اريد مشاكل حاليا ويا خلي يهدأ ما اريد يحسبها عاندته واجيت )بس قلبي
يمها مكدرت ما امر واشوفها وهي هم كلت من تشوفني واحجي وياها ترتاح نفسيتها
_ عين العقل ... هاهيه لعد انت كل ميصير عندج مجال هذا بيتج شوكت متجين هلا بيج
_ الله يحفظك اعرف والله قابل دا اجربك لو اجرب اختي ام رقيه
_ بعد ما طلعت امي ... اتوجهت للمطبخ اساعد مرت عمي ...
ما قبلت ...
_ روحي عمه ارتاحي وادرسي عود العصر انت والبنات ... مثل كل يوم
لملموا البيت
_ عمه والله ماعندي شي اليوم ... انطيني شي التهي بي
_ لعد ابقي يمي خلي نسولف بين ما اكمل المطبخ
حتى وراها اروح اكمل خياط وجوه المخاد وانت لبسيهن ....
_ الوقت ويا مرت عمي يمر خفيف وممتع لان شخصيتها مرحه وتحب الشقى والضحك ... بقت تسولفلي على ايام قبل ... وشلون صارت القسمه بينها وبين عمي ...
والمقالب الي مسويتها ببدايه زواجها ومحصله عليها رزاله من عمي ...
وشلون تتمسكن حتى يجي يصالحها ... نستني همي ورسمت الابتسامه على شفايفي
طلبت منها اتعلم اخيط وجه المخده المره مانعت اجرب بلحظتها گلتلي اتعلم يله
واني لحيت بأدعاء ان اعرف ...
اول ما مشيت القماش جوه المكينه مشى تمام لكن بحركه سريعه وبغرور ...
دخلت بطرف اصبعي الابره ... حسيت روحي شاغت
والمره انرعبت من شافت الدم ... حركت حلقه المكينه ورفعت الابره عن اصبعي وسحبت ايدي ... وسحبتني وياها للمغسله ... فتحت ديلاب الاسعافات الي مخلي فوك المغسله وطلعت معقم وشاش
عقمت الجرح و ضمدته ... احس بالالم يضرب بقلبي ... انطتني حبايه مسكن ... وطلبت مني اروح انام وارتاح
دخلت للغرفه ... تمدد ت مستغربه من موقفها ابد ما انبتني ولا حاولت
تلومني ... بالعكس طمنتني بأبتسامه وكلمات رنت براسي ...
_كل ألم بعده درس اليوم صارلج درس طول العمر راح يبقى بالج تكونين حذره وما يصيبج الغرور من تبدين بأي شي لازم ما تستهينين بي حتى وان كان شي بسيط ...
مرت الايام ... يوم ورا يوم ... اهون من ايام الاسبوع الي قبله
التقي بمي بالمدرسه اغير جو وياها ومن ارجع ... اغلب المرات اتصل بأمي اسولف وياها هالشي يخليني احس براحه نفسيه تنعكس على تصرفاتي
صرت احس بالتعويد والانتماء لبيت عمي بديت امون عليهم وعلاقتي قويه بمرت عمي ...
خلتني اكدر اسألها اي شي يخطر على بالي بدون ما اتحرج منها ... حتى بخصوص تعاملي ويا ثمين واسلوبه ويايه تنصحني ... وتفهمني امور جنت اجهلها بالرجل وتربيته الشرقيه الي تفرض عليه افكار وطباع مكتسبه من التربيه والمفاهيم الي يتعلموها من المجتمع الي يعيشون بي
بنهايه الاسبوع ...
رجعت من المدرسه كالعاده ... دخلت لبيت عمي ... لكيت رقيه تغسل الكراج
ومرت عمي مخبوصه بالمطبخ ...
اول ما سلمت
_ ميامي فدوه بدلي ملابسج بسرعة وتعالي ساعديني ... بيت اخويه
جايين من كربلاء وعمج عرف اتصل عليهم عزمهم على الغدا ...
هم وبقيه اهلي ...
_ دخلت للغرفه مستعجله ... غيرت ملابسي وغسلت ودخلت للمطبخ
اساعدها ... اخذنا الشغل ما حسينا بالوقت
الا من رن جرس الباب ... بين خجل من ناس ما اعرفهم وبين خجل ان اترك مرت عمي ... وادخل للغرفه حتى نسيت شوصاني ثمين
دخلوا اربع رياجيل وشابين وواربع بنات شابات و اربع نساء
ما ان دخلوا للهول ... بعد السلام ...
جريت رقيه سألتها اتعرف عليهم ...
بيبيتج وجدج اعرفهم وهاي خالتج الصغيره البقيه منو
_ اثنين الكبار خوالي ونسوانهم والشباب ولد خالي الجبير وفلانه وفلانه بناته
وفلانه وفلانه بنات خالي الاصغر ...
والرجال الثالث هذا رجل خالتي الجبيره هسه تطلع من دوام وتجي لهنا
_ دروحي اسألي عمتي شنسوي بعد ... بسرعة وارجعيلي
_ امي تگول حضروا السفره والكلاصات وخلوا الزلاطه بالكوس
خلي اشر الخبز لا يعرگ
_ اخذت قطعت خبز حاره بديت اكل منها ... من شفته تذكرت
هذا الخبز منو جابه ...
_ بيبيتي هي تخبزه ... كل كم يوم تخبزلنا وجبه ودزه .... لان ابويه يحبه
_ هههه بيبيتج مداريه عمي
_ هي تحب الكل قلبها طيب وتعاملهم مثل ولدها
ابويه وازواج خالاتي هم يحبوها هي وجدي ... من خالي ماموجود ويحتاجون شي ابويه يقوم وياهم بالواجب ...
_ الله يحفظهم ... يله صيحي عمتي ... خلي تصب الاكل
بعد ما خلينا السفره ومليناها بالاكل .... والكل التم حولها
عمي طلب مني اجلس قريب منه يم البنات ... المرآه المسنه كانت مثل ما وصفتها
حفيدتها مثال للنفس الطيبه ... تركت الكل وخلت بالها يمي ...
كل شويه تنبه مرت عمي ... تخليلي اكل بصحني او تقرب مني الاكل ...
وتبتسملي
_بيبي اكلي مو تستحين اني بيبيتج وهذا جدج وخوالج وخالاتج ... ماكو غريب
رن الجرس ...
هاي نهاد اجتي ...
_ راح عمي يفتح الباب ... ومن دخل اتفاجئنا بلي ويا ماكانت نهاد ...
ثمين
_ الله بالخير
_الله بالخير ...
تعال اتغدا
_ لمحني بين الموجودين ... وتقدم كعد بصف عمي من الجهه الثانيه ...
شهقت وزفرت بتنهيده ... ما عرفت هي اشتياق لو راحه لوجوده
همسلي
_ها شلونج
_ الحمد لله .... بدا ياكل ويتبادل الحديث ويا اهل مرت عمي ... بحكم تواصله المستمر ببيت عمي فهمت يعرف اهلها من طريقه الكلام والميانه بينهم ... بالاخص ويا البيبيه والجد يتعاملون ويا كأنه حفيدهم ابنه لعمي مو ابن اخو
وفهمت كم مره هو مودي ابو مرت عمي للدكتور ....
من خلال حديث ومديح البيبيه اله كدام ابنها الجبير الي عايش بكربلاء
ما ان انهت الحديث ويا ابنها التفتت لثمين
(لله يوفقك يمه وينطيك بنت اوادم مثلك ونفرح بيك )
صابني حاله ارتباك وخجل ... ما اعرف سببها
عمي نطق واشر عليه
_ حجيه اخذ بنت اخويه
_ اي حجيه هاي مرتي كدامج
_ والله زين ما أختاريت بنت اصول منك وبيك
_ همستلها بخجل شكرا وهو جاوبها الله يحفظج .
بعد ما انتهى الكل من الغدا رفعنا السفره ... انقسمنا نصين ... النسوان بالمطبخ ينظفون والرجال بالهول يشربون الجاي ...
سمعت اسمي ...جاي من الكراج ... تركت الي بأيدي ... عمه راح اروح ثمين يصيحني
_روحي عمه ... خطيه من اجتي من المدرسه وهي ويايه بالمطبخ
_ فتحت باب المطبخ وطلعت ... لگيته واگف باب الصاله الخارجي ...
صحتني ...
_ ليش اكو غيرج ميامي بهالبيت ... تعالي
_ بقلبي اوي رجعنا للمغثه ... مريت من يمه دخلت للصاله ... دخل ورايه وسد الباب اني مو كتلج من يجي خطار متطلعين ...
_ يعني اذا مرت عمي طلبت اساعدها اكلها لا ما اساعدج واذا عمي صاحني اكعد بصفه اتغدا اكله لا ثمين ميقبل وافشله كدام خطاره
انت متقبل اخليهم بهيج موقف ثانيا اني مو خطار عدهم يوم يومين لا شغلتي اظاهر مطوله بسببك يعني حالي حال اهل البيت ... مامحسوبه خطار حتى اختل بالغرفه ومحد يصيحني
كعد على القنفه
_ تعالي نزعيني الحذاء
_ انت متأثر بالافلام المصريه .... كلش عاجبتك سالفه المره تزعك الحذاء
بس اني ما احبها
_ حبيها ... ترى طلعت من الكليه للبيت على كد سبحت بدلت واجيتج ... يعني راسي مسطور وتعبان ... لا دوخيني بالمداهر
_ التفتت شفت جايب ويا جنطه ... راح تبات
_ انت شتريدين ابات لو ارجع للبيت العصر
_ بركت كدامه وبديت افتح رباط الحذاء ... انت اصلا ناوي تبات ماطول جايب جنطه ...
_ والله مابيها غير ملابس طلعه ... كلت اطلعج المغرب لمكان تغيرين جو
وراها ارجع للبيت بالليل ... بس اذا تريدين ابات سهله اخذ من عمي دشداشه
انام بيها من شفتها كملت ردت اداهرها
طگطكي الاصابع ...
_ نظرتله بغضب وتملل
اهو ما اريد اطلع ....
_ جاوبتها ببرود ليش اني اخذت رأيج تطلعين لو لا حتى تگولين ما اريد اطلع ...
لا اني عاجبني اطلعج فراح تطلعين ...
_ فردت وجهي .... بتدلل وديني لعد لمكان احبه ...
_ ابتسمت وين ....
_للمنصور
_ شعندج هناك ...
_ محتاجه شغله واريد امر لمكتبه الصباح اجيب ملزمه
_ اني بالي اخذج للشيخ عبد القادر الگيلاني وراها نتعشى بمكان ونروح للشط
والمنصور خلي باجر اوديج ....
_ يله بكيفك
_صارت بكيفي لان بيها طلعه ...
_ ثمين ذكرتني بالتعب والله فد نعسانه ... تحركت بأتجاه القنفه الثانيه المقابله اله تمددت عليها لملمت نفسي وخفيت ساقي جو الدشداشه
هو هم تمدد على قنفته ... وخلى ايده جوه خده وجهي ووجهه متقابلين ...
_ شصار وياج هالاسبوع
_ امي مرت عليه مرتين ... ولهيب ردت منه شغله هم دزها بيد بلال
ويوميه اشوف مي بالمدرسه نلتقي بالفرصه نسولف ...
ثمين بيت عمي ماعدهم طاولي لو ورق حتى نلعب بالليل
_ معنى تريديني ابات ...
_ اوي ثمين مو انت كلت تبات ...
_ اني وين جبت سيره ابات .... گومي نامي بالغرفه لا يروح احد يدخل ويلگاج هيج متمدده ...
_ مو كلت اخذ ملابس من عمي انام بيها ...
_ كلت اذا تريديني ابات ... وما سمعت الجواب فالافضل ارجع للبيت
_ ليش مو سألتك بيت عمي عدهم طاولي لو ورق ... غير معنى تبات
_وانت كبريائج ميسمحلج تجاوبين بصوره مباشره لازم فره دكومي جيبيلي
شي اتغطى بي
_انت متنطيني ريك حلو حتى اكدر احجي وياك براحتي ... كله جد وبعنطزه ...
خزرني
_بشنو ؟
_تقلب وجهك اقصد .
_ ديله روحي لا دوخيني ... ها وساعتين تكعديني الكاج مسويتلي جاي وكعك .
_ ترى مكاعدين بيتنا حتى اسوي بكيفي ... استحي
_ لا تستحين متعلمين عليه هنا واخد من البيت ... وانت الله بلاني بيج ونحسبتي مرتي محسوبه من اهل البيت
_ اوي ... (استفزني طلعت من الصاله جبتله الشرشف
هاك )
_غطيني زين ... جايبتلي جرجف ابيض هذا مال عرسان ... مو غربان تتناطح مثلنا
_ههههههه اني مو غراب كل واحد يحجي على نفسه ماعندك عيون تشوف الجمال مشكلتك
بحركه سريعه جرني من ايدي كعدني بصفه جر شعري
_ ليش متجرين عدل ... ترى مرمرتيني
_ نعمت صوتي اتذكرت كلام مرت عمي .... انت مرمرني متتعامل ويايه مثل قبل
_ قصدج من جنت غبي
_ اوي اكوم انام احسن الي
_ اذا تحركتي اكسر رجلج
انام واكعد الكاج على نفس الكعده ... متتحركين ... غطيت وجهي بأيدي ... غمضت عيوني ... دا احس بخيال وجهها تتفحص وجهي ...
ادعيت النوم ...
ورا اكثر من نص ساعة همست بأسمي ما جاوبتها .... حسيت بيها تحركت تصورت راح تگوم ... فاجئتني من رفعت الشرشف وغطتني لحد اعلى صدري ....
لا اراديا احساس بالسعاده يصيبني خلاني ابتسم
واجر راسها لصدري احتضنها واقبل راسها .... روحي نامي فد ساعتين كعديني حتى وراها نطلع
_ فد شويه اروح انام .... دماغي يشتغل شلون ارجعه طبيعي ويايه واخلي قلبه يلين عليه ... اريد اسوي شي بس الحياء يمنعني ... احجي ويا نفسي هو رجلي مو حرام ولا عيب ... اشجع نفسي وبثانيه اتراجع ...
_ ارتاحيت من بقت راسها على صدري ... رفعت وجهها وقربت شفايفها على خدي ... بعت ثكل بلحظه الي حسيتها طيرت قلبي للسما ... بخجل من دون ما تخلي عينها بعيني
_ يله راح اروح انام ... اخذ راحتك
_ انت راحتي ... من اشوف هالوجه كل تعبي يروح ... يله روحي نامي وذكريني من نطلع نشتري طاولي
_ ابتسمت ... ماشي
أنت تقرأ
قلوب بينها برزخ
Romanceثمين وميامي كالمياه المالحه والمياه الحلوه يفصل بينهما برزخ جمعهم دم وفرقهم. الاباء من سيسقط في حب من ومن سيروض نفسه من اجل من طباع مختلفه .... وشخصيات عنيده وطيبه فراق وتعلق .... كبرياء بين طريق واحد او طريق لكل عاشق
