رسمت بشفاهها ابتسامه نالت بها من فؤادي
واودتني طريح العشق وفارس من فرسان العاشقين
مهرتي روضتني بعنادها .... واسرتني
بلونها الخمري الجميل
اطلقت لنفسها لقب محبوبتي ... وقيدتني بقانون
جنونها حيث تميل اصبحت اميل .
ميامي: دخلت للغرفه احس نفسي طايره ... وگفت كدام مرايه الكنتور ...
شلت شعري قلبته صفح ... اتأمل منو احلى تسريحه عليه
لملمت بأيدي دشداشتي وقصرتها
والله حلو هسه اخذلي هيج شي مقسم وقصير ...
للحظه انتبهت على نفسي ... هاي شبيج ميامي هاي اول مره
تسويها وتركزبن على مفاتنج ... هالمكروه بدا يثيرني احس ما مقتنعه
بلي صار ومتخوفه منه ... لكن بي شي يحسسني بأنوثتي نظراته نبره صوته تسيطر عليه اكره طريقه تعامله ويايه وبنفس الوقت مستلذه
بمغثته والمداهر
مكدرت انام ... بقيت افكر واتخيل هالطلعه ... حابه فكره
دا اعيش فتره خطوبه ... يعني هو صح مخبل وما يطاق ... بس
بس مواقفه ويايه مال رجال صدك
وهذا اهم من اي شي ثاني ... بعد ساعتين
دخلت عليه
ثمين يله عمتي سوت عصريه
_ خطارهم راحوا ..
_ اي
_ اول ما طلعنا من باب البيت ... لزم كف ايدي
_ التفتت عليه
_ نروح مشي للشيخ عبد القادر .... قريب وبعدها ناخذ تكسي نشوف وين نروح نتعشى
_ طول الطريق باله ويايه ويسولف لكن كم مره لمحته انتبه لوحده كدامنا سمره شعرها اشقر ولابسه لبس كصيف جذابه
بقى يسترق النظر حتى لا احس
هالشي ثار غيرتي ... اتضايقت اتسرعت ونطقت
ترى كافي ... وبنيتي اكمل ....(تبصبص عليها )
لكن فجاءه غيرت الكلام ب...تبقى لازم ايدي وتمشي سريع هلكتني
_ ما منتبه ... يله راح امشي بطئ
_ ما ترك كف ايدي ... لكن تغيرت طريقه كلامي ويا
جانت جافه بقيت متضايقه منه احاول اتصرف طبيعي مكدرت
_ وصلنا قريب المكان التفت عليه خلي الحجاب ....
_ لبسته ودخلنا .... لان نهايه اسبوع المكان مليان ...
والاطفال يلعبون بهالفسحه الواسعه .... جالسين على الارض الي ياكلون
ولي يسولفون ...
التصميم العمراني والاضاءه ... وصفاء السما
خلوني احس براحه ... دخلني نزور المرقد ... بديت اسمع همساته بدون صوت
التفت عليه شبيج صافنه متذكرين الله
_ قريت الفاتحه ودعيت رب العالمين بهواي امور اتمناها ... لكن بقلبي احجيها
التفت مبتسم ... كمل الدعاء
_ خلي نطلع انصلي برا ... زحمة المكان خلته يحسسني كأنه ويا طفله وخايف لا تضيع وينطي اوامر
_ اوگفي هنا ورايه وصلي
_ ترى اني مو طفله حتى تعاملني كطفله
_وين جبت سيره طفله ... لو انت متكدرين
_ التفت بدا يصلي ... اني هم صليت وسلمت بس ردت اعانده مو كلشي بمزاجه بقيت كاعده اسبح ... هو كعد كدامي سند ظهره على الحايط يتفرج على الناس الي حولنا تحركت من مكاني يله نروح
اشرلي اكعد بصفه
_ لا خلينا نبقى شويه ... جلست بصفي ليش ضجتي
_ انت ما تتعامل ويايه كبنيه جبيره ... كأنه طفله كدامك
_ غير امانه واخاف عليج ... ثانيا انت بعدج صغيره
_ لامو صغيره ... بعدلي بس سنه وادخل جامعه ...
_ميامي انت متعبه دماغج بسوالف مال بطر اني دماغي دايخ بهالوضع
دا انتظر كم شهر اتخرج ... حتى اتعين ونتزوج ... واجيبج يمي
_ ثمين يعني راح ابقى هالاشهر كلها يم بيت عمي مراح تشوف حل وتراضي ابويه
انت تصور اني هينه عليه بعيده عنهم ثانيا شلون نتزوج انت مو گلت
اشترطوا عليك الا اكمل السن القانوني حتى نعقد بالمحكمه يله نتزوج
_ ليش اني هينه عليه بس شسوي العمي قافل ... دا انطي بعد وكت يهدئ واروحله
ثانيا ماكو حل غير نتزوج وتجين يمي ... اني بس اتخرج مباشره اتعين لان
من الاوائل كل سنه ادعيلي هالسنه هم احصل درجه شرف
بس تحملي فتره بين ما ارتب الوضع
_ ان شاء الله ... شوف الجو حلو
_ اي حلو والمكان هم يريح النفسيه ....
_ ها يعني المكان ريح نفسيتك مو لان اني وياك
_ ليش انت مريحتني ... انت التعب بعينه .... لو ما انت وعنادج مجان
صار هذا كله ولا وصلنا لهالوضع
_ والله ما گتلك تعال اوگف بوجه الكل ... واعقد عليه وخليهم كدام الامر الواقع التفت عليه
_ ميامي تدرين مرات شيخطر على بالي ....
_ شنو
_ انزع الحزام واشطب جلدج بي اطلع كل القهر الي اجاني منج
_ بلكت تسويها صدك حتى اكرهك
_ ليش انت تحبيني ....
_ مرات
_ لا بله
_ اي والله ... حسب وضعك ويايه مرات احس قلبي يلين عليك ومرات اكرهك
_ ها يلين مو يحب ... كلش زين لا توفقت
_ ترى الحب مو كلام ... الي اعرف بي افعال ... اني ما حابه قبل حتى اعرف هالمشاعر
انت اول شخص يصير عندي تجاهه مشاعر ... بس ما اعرفها حب او اعجاب ... لان ارتباطنا تقليدي ... صار سريع ما لحگت افهمك وتفهمني دخلنا بمشاكل ... وصار الي صار
_ ابتسمت مرات احسج صغيره بس من انصت وانت تحجين
عقلج جبير ... تحركت من مكاني
بس عنوده وراسج يابس ... مديتلها ايدي يله نروح
_مديتله ايدي سحبني ... وين راح نروح
_ ما اعرف نمشي ونقرر ...
_ بالاول مشينا واحد بصف الثاني بدون ما يحاول يمسك كف ايدي ...
بعد خطوات واني قريبه منه ...
تجرأت وتشبثت بأصبعه الصغير ... دعوه مني اله يمسك ايدي من نمشي
التفت عليه مبتسم حسيت هالحركه مني فرحته
_ بديتي تفهمين بدون ما احجي ... شنو الي يريحني
_ شنو الي يريحك انت علمني عليه واني اتعود عليه
_ اني ما اعلم لان من اعلم راح تسوين الشي كواجب حتى ترضيني ...
اريد الفعل يكون نابع من مشاعر تفرض عليج تسوين الشي الي بي راحتي وراحتج مو بس راحتي ... اخذ وعطاء متبادل
لان هالشي ينعكس على العلاقه بيناتنا
_ ثمين راح استغلك اليوم ... لان بيتنا من اشتهي اي اكله اخلي امي تسويها ببيت عمي استحي
_ ليش تستحين بيت عمج بيتج ... بالاخص عمي باسم ومرته نفسهم طيبه
مع ذلك اني وياج واحد ما بيناتنا استغلال ... شنو الي عاجبج اجيبلجياه
_ أشتهيت فلافل ....
_ هذا الاستغلال عندج ... عبالي راح اطلبين شي يطير الفلوس الي بجيبي
طلعتي قنوعه ...
_من تتحسن الظروف وتشتغل اصير طماعه
_ ... ادللي اقصر على نفسي وما اقصر عليج ثانيا عندي راتب وعندي شغل خاص ويا جماعه يعني مرتب وضعنا المادي
ومن تريدين شي ... اطلبي موتخجلين
_ لا والله ما محتاجه شي ... امي من اجتي جابتلي الي وصيتها علي وانطتني مصرف لسى ما صارفه منه شي
_ هاي اخر مره توصيها على شي لو تاخذين منها فلوس ... اذا الفلوس الي خليتها مكفتج ... باجر اخلي مبلغ جوه ايدج ... اصرفي منه براحتج
وقبل ما يخلص تنطيني علم انطيج غيره
_ اصلا الفلوس الي انطيتنياها ما صرفت منها غير شي قليل وعبالي بالليل
ارجعلكياها ...
بس ماطول انت رايد احد يستغلك ... خلص اجمعهن عندي يفيدونا بعدين
_ والله اذا تعرفين أجمعين ... وتلمين رجلج ... شكو فلس يصير بأيدي
زايد اخلي يمج ... حتى ما اصرفه
_ جربني وشوف ....
_ خلص الي يجيني من شغل التكسي ... نجمعه بعد ما اصرفه
_ ليش تشتغل تكسي ....
_ تنهدت وابتسمت ... ايام الاجازه اطلع اشتغل بالسياره كم ساعة
وبالعطل لا يوميه اطلع من الصبح للمغرب ...
بس بأيام الي اروح للكليه انطيها لنوار ... يشتغل بيها والي يجي بالنص
_ هالحديث كشف كدامي هواي امور من شخصيه ثمين جنت اجهلها ...
حسستني بالامان ... لان فهمت عنده احساس بالمسؤوليه مو شاب اتكالي
والشغله الثانيه ديحسسني اني ويا صرنا واحد ... ويحب اشاركه المسؤوليه من البدايه دينطيني ثقه ودعم ... اثبتله كلامي
بلحظتها اكو شي تغير بداخلي نحوه ... احساس بالانتماء لهالشخص
قربني منه خلاني اتصرف ويا كشخص مسؤول عني بدون ما اخجل منه
وصلنا يم ابو عربانه يبيع فلافل ...
_ تاكلين منه لو اشوفلج محل
_ وليش ما أكل ...
_ ها العفو ... مو أتذكرت الاوي كلت هاي خاف تتعيقل براسي
ودور محل فلافل مو عربانه فسألت
_ اوي ثمين شكد تحب اداهر ... متتحمل ما تضوجني
_ اوي شكد نحسه متتحملين شقى ... دوگفي هنا على صفحه بين ما اجيب واجيج
_ اجي وياك ...
_ وين تجين مو دشوفين يمه شباب ... ساده لو اخلي يحط كلشي
_لا كلشي ما عدا العمبه
ابتعد لكن عينه يمي طول ما دينتظر يم العربانه ...
جاب الفات من وصل يمي ... سلمني وحده منهن
_ اي عفيه صيري نازكه اتخبل من ريحة العمبه ... عاد اشتمها بيج
اشمرج باب اهلج ...
_ اوي طلعت انت الي تنقنق ... شوفلنا مكان حتى اكدر أكل
_ تعالي نوگف بهذا الفرع ... ما ادري ليش دا احس طالع ويا نوار
هم نضرب ركن اغلب المرات وبيدنا اكل لو كاسه لبلبي ... براس الركن مال السوگ
_ اني حاليا دماغي كله يم معدتي ... فمراح انغث حبيبي
_
هالطلعه وضحتلي امور عن شخصيتج
اولها تحبين الخواره ثانيها اسلوبج يتحسن ولسانج ينطلق صار بيها حبيبي
ثالثها همج على بطنج رابعها
_رابعا انت كلش نكدي .... متكدر على روحك لازم تحاول تضوجني
ابتسمت بس طك مراح انغث .... هاك ( انطيته كمع الصمونه البقى)
شوف وين تخلي
_ رابعها من تضحكين انسى مغثتج ... يا عكره
_ ما فهمت هذا مديح ذم
_ انت شنو تكولين
_ابتسمت مديح
_لا ذم ولا تبتسمبن احنه بالشارع
_ ههههه يعني مديح ما طول تغار عليه ...
_لا عايزه ما اغار عليج غير بت عمي
_قشمر روحك ... اني ما اتقشمر،.. ادري تحبني ... وراح تشتريلي الطاولي
_ ابتسمت اذا ما اشتري يعني ما احبج
_ لا هم تحبني .... كول لا
_ لا راح اشتريها
_يله مو الا تحجيها .... مبينه من الافعال
_ ميامي
_عيونها
_ بيج شي اليوم شو حالج مختلف....
_ اي قلبي ديدك ... يمكن بدا يحب
_حبتج حيه
_ اني هم دا احب هالحيه
_ ابتسمت ... ها بدينا
_ اوي غير انت كلت على روحك حيه ...
_ دنطيني ايذج .... دا اشوف حالج ورا منشتري الطاولي
خايف لا يتبدل ....
_ ها عبالك علمود الطاولي ...لا اطمئن مغزره بيه الطلعه
_ بس
_ لا طبعا ... لان انت ويايه
_ عصرت ايدها .... تحبيني
_ اخ اذيتني
_ انت اخوج صغير ميكدرلي كولي اوي
_ابتسمت انت اخويه
_ يا غبره ... اني رجلج
_ليش مو الرجال اخ وصديق و ....سويت نفسي دا افكر
_ وشنو لا تتعيقلين احجي ....
_ انت متعرف ... تصير رومانسي ...
_ لا اعرف ... بديت اغني ... يم العيون السود ماجوزن انا خدج الگيمر انا تريگ منه لابسه الفستان وقالت لي انا
حلوه مشيتها دتمشي برهدنه
لو تحب خادم خادمها انا
ولعوف الدوله واعوف السلطنه
واقفه بالباب تصرخ يالطيف
لاني مجنونه ولا عقلي خفيف
من ورى التنور تناوشني الرغيف
يا رغيف الحلوه يكفيني سنه
لون خمري لا سمار ولا بياض
مثل بدر تام واشرف ع الرياض
باللما تحي وتقتل باللحاظ
بغنج تحكي وترد بعنونه
طالعه بفستانها الوردي الجميل
وانزوت حين اسفرت شمس
_ صوتك حلو
_ ادري ... فد يوم اجيب العود ويايه ...واطربج
_اوي شكد مغرور
_ اخ ولج اني اداهرج .... حتى تكولين هالاوي
_ گول والله
_والله ... احب هالكلمه من تطلع منج هسه نرجع لل
و ... شنو ردتي تحجين
_ ما احجي انت اعرف من وحدك
_ ماشي براحتج ... هي اصلا من تطلع عفويه احلى
_ بقينا نفتر اندور على الطاولي ... لگينا دومنه اشتريناها
وبطريق الرجعه ... مرينا من يم شباب
ويا ما عبرناهم بكم خطوه دنضحك ...
واحد ذب حجايه
( دشوفيني حتى شعر عندي ) اني ما فهمت عليه
بس ثمين لان يحلق شعره خفيف فهم القصد
حسيته بدا يغلي ... شفته وگف لزمت ايده شكو
_
أنت تقرأ
قلوب بينها برزخ
Roman d'amourثمين وميامي كالمياه المالحه والمياه الحلوه يفصل بينهما برزخ جمعهم دم وفرقهم. الاباء من سيسقط في حب من ومن سيروض نفسه من اجل من طباع مختلفه .... وشخصيات عنيده وطيبه فراق وتعلق .... كبرياء بين طريق واحد او طريق لكل عاشق
