قلوب بينها برزخ

تهامس حبيبين ش

- الان انا المحتال مكرت بي
حتى استسلمت لحنان كفها وهو يداعب شعري
متدللا وانا ارى شرار الغيره كالشهب ترميه اعينها
اجابت محتالة تخفي نيران حبها لا بأس انه ماض
عاتبتني وعاتبتها في ليلة صافيه داعب نسيم شعرها وجهي مبتسمةً
مشككه بنوايا  ما باح لها به القلب ودعتها وقلبي كله شوقا لاستقبالها
وهي عروسي في يوما جديد
-منو هي
_ سمعتك تگلها اريج
_ استنشقت الهوا وزفرته براحه طلع متيه بالكلام وميعرف الاسم
يويل هاي البنيه ويايه بالدرس الخصوصي ثانيا اني چبير اعرف الحب انت شمفهمك بهالسوالف من تكبر عود حب هسه التهي بدروسك وميصير تحجي تگول علا تحبني هي تحبك مثل اخوها انتو كلكم اخوه بالمدرسه ماشي
_ ماشي
_ عفيه
_ فتحت الباب لكيتها متمدده وصافه ... انتبهت عليه ونظرتلي نظره
زعل تحاول تبين ما مهتمه
_ شنو نعسانه
_ لا بس مو تدري راسي مصدع اجيت ارتاح
_ ها يعني بس راسج مصدع مو غير شي خطيت باتجاه السرير
وتمددت بجانبها
_ التفتت مثل شنو
_اخاف انغثيتي  من حجي هالزعطوط
_ وليش انغث على شي فات ومات قبل ماعندك مره حاليا عندك
ايام اللعب انتهت لو عندك رأي ثاني
_ اكيد لا
_ تحركت بوضع الجلوس
اكيد لا  شنو ... ابتسم
_ اقصد ماعندي رأي ثاني كلامج صح
_ رجعت تمددت
_ اكلج شو من جنت خاطبج جنتي مكضيتها عليه طاولي
وورق
شو من تزوجنا ميبستها بليل يركبج جني والصبح
عجوزيه گومي لا تنامين اخاف انام وورايه انظف السطح
باجر ترى عندي دوام خلي الله بين عيونج
_ ثمين اكلك شي بس متزعل
_ گولي
_ بس الله عليك مو تزعل وتفسر غلط
_ ميامي احجي شكو
_ والله انتبهت من افوت للغرفه احس بضيق شي بداخلي والله ما اعرف اوصفه غير من اكون برا الغرفه يروح هالشعور
_ لان بعدج مامتعوده يمكن عليه وعلى البيت وتغير مكانج
_ ثمين اني بقيت بيت عمي اشهر يعني هم تغير مكاني وبيتي
بس ما صاير الاحساس الي دا احسه
اخاف احجيلك شي وتگول تؤمنين بخرافات
فتح عينه  ونظرلي بتركيز مستفهم عن الي اقصده
_ خرافاتيش احجي اسمعج
_ اني سامعه عن هالامور قبل ان وحده متزوجه يصير عدها نفور من زوجها او بدايه زواجهم يصير بي مشاكل من هالسوالف وسامعه سببها نفس او المكان بي شي
_ تحجين صدك ميامي انت تصدگين بهالامور
گولي يا الله لا تخلين هاي السوالف بالج لان من تخليها تصدكين بيها وتؤمنين وراها تتخيليها
_ زين ميخالف بس اسمعني حباب
اذا صار ويايه نفس الشي خلي نغير الغرفه ناخذ الغرفه الثانيه
_ لج بابا هاي الغرفه اكبر باجر عگبه يصير عدنا طفل ذيج الغرفه متكفي غرفتنا وسرير طفل وغراضه
_ هسه موضوع الطفل مو گلت نأجله لحد ما اكمل وانت هم تتخرج
_ لج بابا غرفتنا متكعد بذيج الغرفه
_ لالا تكعد
_ تكعد برعبله شي لازگ بشي اني ما احب الهوسه
انت بس لاتفكرين بهالسوالف وعوفي الباقي على الله وعليه
انت عندج رد فعل من امي على السالفه القديمه والبيت فتحسين نفسج مامرتاحه اصبري اسبوعين تتعلمين
دكومي جيبي الطاولي نلتهي بين بين ما تكسر الشمس
_ بالاول كان دماغي مشغول احاول اركز ويا باللعب لكن من انتبه عليه
ضربني على خدي بمزح
_ ركزي فدوه اروحلج ولا تتخيلين وتفكرين بهيج امور هاي وساوس تفكرين بيها تبقى بعقلج الباطن وتحلمين بيها بالليل
- اقتنعت بكلامه وبديت اركز باللعب وبمزاحه ويا اخر رميه زهر مني
سحب القطع وبدا يعد  رفع وجهه الي
غلبتيني 
والي يغلب يطيب خاطر الخسران
_ هههههه وشلون اطيب خاطرك  اخاف تريدني اقبل خدك لو راح تگلي قبلي شفايفي اعرفك
_ لا والله وعيونج مو الي توقعتي ذني بدون ما اطلبهن احصلهن
قصدت اطلعين تنظفين السطح ويايه
لان ذولي اعرفهم مابيهم خير يدحسون الغراض شلون ماكان
وهم ترجع الهرجه
اريدج تساعديني نرتب السطح انت لاتشيلين شي بس دليني وين احط الغراض بترتيب
حتى اخر شي نغسل السطح حتى من تطفى الكهرباء نطلع نام بي لان
غرف الطابق الثاني بدون كهرباء متنحمل من الحر
_ بس الكهرباء ما انطفت عدكم بس كم دقيقه
_ حبيبتي هذا صاحبي يشتغل موظف بالكهرباء بايك النا والهم  كهرباء من المنطقه الي گبالنا
من تنطفي عدنا تجيهم فنحول عليهم بس مرات يتوحد موعد الانطفاء
ونموت حر قبل لا نتزوج نفتح باب الصاله والشبابيك وانام
خو اني مرات بالحديقه افرش حصيره وانام ومرات حتى بالكراج
بس بعد  تزوجت  وورايه مره لازم احير بيها
_ عادي انام وياك بالحديقه لو الكراج
_ اي ليش لا ونصير فرجه للعالم
_ لعد بالسطح مو هم اكو سطوح يمكم ونصير فرجه
_ دخلي نكمل السطح وراها اشوفج شنو فكرت اسوي
دكومي هم يله نلحك نكمله
_ بعد ساعات من التنظيف قضيناها بين ضحك وغزل ومزاح
كملنا التنظيف التفت عليه ثمين
_ لج هاي شصاير بيج باع بجامتها يا الله ناكعه والطين حتى بشعرها
وملابسها
دفوتي اسبحي اني اكمل
_ غير انت كل شويه ومنكعني ، يله خلي نخلص حتى نطبگ الجرابي
بعد  ان كملنا
هلكنا من التعب جلس كل واحد من عدنا على سرير نلتقط انفاسنا
التفتت عليه بعد ان ارتاحيت يله ساعدني خلي نطبگهن حتى نغسلهن
اخر شي
_خلص انت فوتي سبحي وصيحيلي لهيب يساعدني
_ بعد ما تركت ثمين واني منهكه كعدت انشف شعري ورا ساعة ونص تقريبا
دخل مستعجل
-حبيبتي حضريلي ملابس بيت عمي باسم جوه كملي وانزلي يمهم بين ما اكمل وانزل وراج
_ طرت من الفرح من سمعت بيت عمي موجودين حسيت اهلي جوه
حضرت ملابس ثمين ونزلت متلهفه اشوف عمي ومرته والبنات
اول ما دخلت تلگتني مرت عمي واني اقبلها همستلي
_ شلونج حبيبتي مرتاحه
_ الحمد لله
بعدها سلمت على عمي وسألت عمتي ام ثمين بيني وبينها شنو اضيفهم
گلتلي تعالي ورايه  طلعت الكليجه وطلبت مني احضر الشاي
بقيت بالمطبخ وهي رجعت يمهم شويه ودخل ثمين بينما كنت اوزع الشكر على الاكواب
تقرب مني اخذ قطعه كليجه
_ اليوم سهرتنا  تحت ضوء القمر
_ كملتوا السطح
- كملنا من نصعد تشوفين الترتيب
_ ثموني روح يمهم عيب  خلي اصب الشاي
_ قابل هم خطار ،باجر نتفارك اسبوع  هالمره وضعي غير
_ ليش
_ ابويه انتِ
قبل انت بغير بيت واني انتظر الاجازه يوم يوم هسه
انت يمي اول دخلتي للبيت الگاج كدامي
_ دا اصب بالشاي وابتسمت رفعت راسي اله ثموني شكد حلوه
هالكلمه الي طلعت منك
_ يا كلمه
_ ابويه انتِ
تقرب مني واخذ راسي وهو يقبل جبيني
_ انطيني الصينيه وانت جيبي الباقي
_ بعد ما وزع الشاي هو راح كعد يم عمي واني كعدت بصف مرت عمي
همستلي
_ مشتاقتلج حبيبيتي
_ والله عمه اني هم مشتاقتلج
_ ثمين شلونه وياج
_ الحمد لله زين
واني اجاوبها اتذكرت اسألها
_ عمه عندي حجايه وياج بس شلون لازم وحدنا لا احد يسمع
_ ماشي هسه شويه واگول كدامهم اريد اشوف غرفتج ونصعد
_ اي عفيه عمه ضروري
_ التهينا بالسوالف ويا الكل التفتت الي مرت عمي
كدامهم
-ميامي مراح تشوفيني غرفتكم
-جاوبها ثمين
_ عمه البيت بيتج قابل انت غريبه وتستأذنين
عمتي ضافت تعليق
_ شوفي الفرشه الي اشتريتها من السوگ الي يمكم
_ صعدنا اول ما دخلنا للغرفه صلت على النبي
غلقت الباب وكعدنا على السرير
عمه اني دتصير ويايه حاله كل ما يحاول ثمين يتوددلي بهالغرفه
تصير كتمه على صدري ما اتحمل قربه مني احس اختنك ما اريده
_ يعني شنو بعدكم
_ لا عمه اقصد من يوم الي رجعنا من الفندق لليوم كل واحد ينام بصفحه
_ احجيلي بالتفصيل شنو الي صار
_ بقي ت اسردلها من اول يوم دخلت لهالغرفه عن الكوابيس والحاله
والمشاعر الي تصيبني لحد اللحظه الي هي ويايه
عمه اني حتى لثمين حجيت بس هو تخيل اني اوسوس واصدك بخرافات
_ لاتخافين هسه من ننزل وعمتج تدخل للمطبخ تسوي العشا اتحجج اريد اتصل على البيت اطمئن على البنات اتصل على اختي الي بكربلاء اشوف شنو تشور عليه
_ ليش عمه هي تعرف بهالامور
_ والله عمه هاي اختي اول ما تزوجت تكول ما اريده وما احبه واشوفه
عبالك خنزير والكل تسمعها عبالهم نافره منه لان هي حلوه ومدلله وهو استقتل عليها لحد ما وصلت مرحله متريده ادك على الطلاك اهلي
عبالهم هو مأذيها ومتحجي مسوي شي كارهته بسببه لحد ما الولد
اشتكى لابويه گله يا عمي بنتك متريدني لا تخليني الزمها لا اطيق مني حجايه افوت للغرفه عبالك دخل عليها عدوها ولسانها يكت ويايه سم
وكل حجايه ما اريدك طلگني خبلتني ما اعرف انتو غاصبيها عليه
ابويه گله ابني احنه نعرف الحلال والحرام شلون اغصب بنتي على زلمه حتى بالشرع مو حلال زواجهم اذا ما كو قبول انت بس خليني احجي ويا امها تشوفها وتفهم منها بس خليها هالايام يمنا وانت روح لاهلك وبينا تلفون ان شاء الله
الولد لف وجهه ورجع لكربلاء وبدت سالفتهم تنعرف يم اهله امه وخواته بعد افتهموا مرته زعلانه من راحت مو زياره مثل ما مفهمهم
بعد هن النسوان اتذكر اتصلن بأمي وفهموها البنيه بيها شي وراها
بقن يسألن عن احد يفهم بهالامور وراحن اله گلهم اكو تفريق والي مسوي من طرف البنيه ورجال
يا عمه الحمد لله نحلت عقدتها ورجعت لرجلها وهاي صارلها ٢٠ سنه
متزوجه
_ عمه معرفتوا منو الرجال
_ لا عمه نعرفهم ابن خال ابويه بشارعنا وابنه حبها ورادها وابويه ما نطاهم الولد مو راكز ابو مشاكل وعركات ويوميه طلايب وناس تهد بابهم فالظاهر هوووحده من نسوان بيتهم دلته درب الشعوذه الله ينتقم منهم
_ يعني عمه اني راح يصير  بيه مثل اختج
_ لا عمه اسم الله ان شاء الله ماكو شي يجوز انت بعدج متعردتي على المكان ولان عمتج من الاول تعبتج صار عندج رد فعل تفكرين بهالامور تحلمين بيها وهم التفكير يخلينا نتوتر ونتعب ونخاف وننقهر
بعد كل هالامور هم تخلي المره مابيها حيل الرجال
_ لعد عمه الله عليج هسه خلي ننزل واتصلي افتهمي منها
_ يله امشي قبل ما الجوه يذكرونا وينتبهون تأخرنا
_ نزلنا وما صارت فرصه لمرت عمي تتصل لان ورا عشر دقايق
اول ما نطقت عمتي ام ثمين تطلب مني اكوم اساعدها نسوي العشا
نهض عمي وگلها لا والله نترخص البنات وحدهن بالبيت وبالفعل
بعد الحاح عمي والولد ان يبقوهم على العشا لكن من دون فايده
سلموا وطلعوا
وطمنتني مرت عمي تشوف سالفتي وتنطيني خبر  بقيت وياهم
بالكراج يسولفون وعمي يمازح ثمين
_ عود جيب مرتك وتعال باتوا يمنا
_ ان شاء الله نمرلكم على اجازه الي تجي
_ ها انت باجر تلتحق ان شاء الله اگول شبي مو على بعضه
بس تريدنا نطلع
_ هههههههه لا والله ظلمتني دبقوا واجيب الطاولي هسه نكعد اني وياك وابويه نلعب بالحديقه بين ما النسوان يكملون العشا
_ هههههه لالا انت جيب مرتك وتعالوا باتو عدنا
_ ان شاء الله
_ دخلت قبلهم للبيت رتبت الهول وغسلت كم شغله على السنك
دا امسح ميز المطبخ دخلوا عمي
گال
_ حضروا العشا .
ايده ثمين
_ اي والله بسرعه شي خفيف باجر ورايه دوام اريد انام
_ هاي من شوكت انت صاير تنام من وقت
_ باجر عندي تدريب لازم اكون مصحصح وميامي هم عدها دوام تطلع ويا لهيب
_ بعد اكثر من ساعة خلصنا العشا وكل واحد شاف طريقه لهيب واح يدرس وعمي وعمتي كدام التلفزيون
وهذال يكتب الواجب وهو ديترزل من عمتي لان التهى ويا بيت عمي وترك واجبه لوقت متأخر
وثمين اول ما دخلت گلهم احنه تصبحون على خير
التفتت عليهم سألتهم
_ عمو عمه تحتاجون شي قبل لا اصعد
بعد ما اطمنت محد يحتاجني صعدت ورا ثمين الي سبقني
لگيته واگف يم المحجر كدام باب السطح ينتظرني
همسلي جيبيلي شرشف جبير اريده
_ شتسوي بي
_ دجيبي وتعالي ورايه فتح باب السطح وطلع واني دخلت للغرفه جبت الشرشف ورحت لعنده
شفت السريرين مطبوكات وداك حبلين بالحايط يمرون بالسرير
اخذ الشرشف مني وذبه على الحبال
صار مثل مضله على السرير ونازل من الجانبين مثل الخيمه
التفت مبتسم يله جيبي المخاد وشي نتغطى بي
_ راح انام هنا
_ دجيبي الي گتلج عليه اذا ما ارتاحينا نرجع للغرفه
_ دخلنا بهالخيمه مثل طفلين كل واحد شايل مخدته هم تمدد
واني فتحت الشرشف حتى نتغطى بي التفتت لكيته مبتسم وماد ايده حتى انام عليها
شعور بي طمأنينه رجعني لذكرى قديمه تخصنا تمددت بصفه وغطيته
احتضني واحنه نباوع للسما
همستله تذكرت مره واحنه صغار صاحتنا بيبي حتى تنيمنا بصفها الظهر
ابتسم
_ اي وشصار
_ نمت اني بوسطكم انت وبيبي وبقت اطبطب علينا وهي غفت اني رفعت راسي انت قربتني منك وبديت اطبطب عليه حتى انام اتذكر بيومها بيبي لان سمعنا كلامها
ونمنا انطتنا كل واحد فلوس نشتري عسليه من ابو حسان بيومها ماكدرت اشيلها واكلها وهو عصب عليه
لان وكعتها بالكاع انت جانت بيدك شويه انطيتنياها
اوي ثمين  لعبت نفسي
انت جنت ملطع بيها لحد ما گايل بس واني اجيت كملت عليه
وحلوكنا وخشومنا كلها  طحين ههههه
_ ههههههه شنو هالذاكره العندج شوفي معنى الله خلقج بهالدنيا الي
من صغار احنه لاعبين دور الزوج والزوجه
تذكرين بيت البيوت انت الام واني الاب وصلاح وزينه هم ام واب
والبقيه ولدنا ونسوي زيارات وناكل سويه شوفي برغم البراءه بس اكو شي معنى جان بداخلي مجنت اقبل زينه تصير زوجتي ولا مره دائما اني الاب وانت الام وصلاح يتكربس بزينه وسبحان الله صلاح اخذ بت خالته واني اخذت الي طبعت سنوني بايدها
_ ثمين اول مره التقينا  من بعد هالسنين ليش گتلي مابيج شي حلو
وبقيت تتفرس بوجهي بيومها كرهتك حسيتك قبيح ومو راحه
_ والله ميامي صارت عندي صدمه اني اخر مره شايفج يمكن انت صف خامي او سادس ابتدائي بعرس عمي باسم وراها لهيب التقى بيكم وگلي مو كلش حلوات يعني
ثاري النذل خاف لا اسمع بيكم حلوات وهو خلى عينه على مي خاف مني لا ينثار فضولي واسويلي حجه واجي اشوفكم وانعجب بمي فهو اختصرها گلي محلوات
_هههههههههه معنى يعرفك مو راحه
_ تصدگين اذا اكلج بيومها اجيتي انت على بالي ردت اشوف شلون صرتي نزلت على فديو زواج عمتي وشغلته بس ما كان واضح
ومن صرتي كدامي يوم الي تحارش بيج الولد صار بيه شي بحياتي كلها ما حاس مثله بوقتها ما فهمت هالمشاعر او الحاله بس ورا فتره
عرفت نحرتيني قتيلا في محراب العاشقين لذلك بيومها محسيت على نفسي واني اهيم بهالملامح رأسا تلافيت حالتي بكلام يغثج وردت
ما ابينلج ان انت حلوه لذلك يتحارشون بيج شي بداخلي مثل غريزه غيره على شي هو الي بلحظتها مردت افتح عيونج على هالامور وتنغرين ان انت اكثر من حلوه انت جذابه
_ اني هم جنت اضحك على نفسي واقنع اني ما احبك بس اكو مواقف حسيت بالانتماء الك حسيت قلبي يمك جنت دائما تجي على بالي وانذكرك
_ قصدج من رجعتي الحلقه الفتره الي وراها
_ اي والله شكد حاولت اتأقلم ان انت مجنت تحبني وما بدر منك رد فعل على الي صار حتى من وافقت على بشار جنت انتقم منك ما جنت موافقه بداخلي ولا راضيه بالخطبه
ليش تأخرت ثمين
_ والله ما اعرف بوقتها شلون فكرت جنت متوقع انت تحبيني مثل ما احبج وراح القنج درس وشوكت ما يصفى قلبي عليج راح اجي وكأنه شئ لم يكن يعني مثل الرجال والمره من يصير بينهم خلاف وتروح زعلانه شهو او شهرين ويرجعون حبايب اني جنت محسب انت الي ما خطر ولو لحظه ممكن تصيرين لغيري من لمحتج بيومها ثرت ما تحملت فكره ان احد ياخذج مني وقامت القيامه لحد ما صرتي الي
وحاليا انت صديقتي وحبيبتي وبت عمي والاهم شريكة حياتي الله يحفظج الي طول العمر
_ ثمين انت حجيت كل هالحجي لان تريدني ارتاحلك واطمئن واسلمك نفسي صح
_ هههههههه والله عرفت راح تفسرين كلامي هيج بس وحق هذا الله فوگايه
اشرت باصبعي للسماء حجيت وخليتج تحجين وانت مرتاحه حتى مايبقى بعد بيناتنا عتاب وامور مبهمه تبقى بداخلنا وتأثر علينا بالمستقبل
لان اعرف اني وياج جانت اكو امور غلط بتصرفاتنا وحتى بطريقه فهمنا لبعض غلط وصلتنا لمرحله غلط بس الحمد لله هسه احنه سويه وما اريد ابدي وياج بنفس الطريقه السابقه لازم نبقى نفضفض ونتعاتب حتى الود يستمر واي شي ثاني ما مستعجل عليه
اول وتالي انت الي
وهسه نامي ادري بيج تعبتي اليوم واني هم تعبت ورانا دوام
_ اشتنشقت الهوا وزفرته رفعت راسي طبعت قبله سريعه على شفايفه
وتكورت بحضنه واني بداخلي مشاعر ما اعرف افسرها بس بكد ما هي
شي حلو بيها راحه وامان خلتني اتكور والتصق بجسمه باكبر قدر مثل الطفل وهو يستمد الحنان هو التفت واحتضني بثنين ايديه قربني منه للحد الي حسيته يريد يدخلني بقلبه وينام مطمئن
همس
تصبحين على خير
_ وانت من اهله
_ ثاني يوم حسيت بقبلات على خدي وصوت همس
كومي ميامي ادخلي نامي جوه بالغرفه
_شكد الساعه
_ بعدها خمسه ونص بس راح تطلع الشمس قبل لا الناس تكعد ترى كلها نايمه بالسطوح واني اريد افوت اسبح واحلق
مو مال اتركج وحدج كومي ابويه انت
_ تحركت من مكاني اخذت مخدتي ويايه وهو جر مخدته والجرچف
ودخل ورايه
تمددت وهو خلى المخده والشرشف على السرير
همستله الله عليك تعال تمدد بصفي خلي احضنك قبل لا تروح
راح ابقى اسبوع بلياك
ابتسم
واجى بصفي بس بوضع جلوس خلى ايده جوه راسي وقبلني من اعلى راسي دقايق وهمس
هم يله اروح اكمل اموري حتى اكعدج تبدلين ونتريك سويه قبل لا اطلع
واوصي لهيب عليج
_ بعد ما طلع من الغرفه صحيت مكدرت ارجع انام بقيت اتقلب بفراشي احاول اكسر نعاسي
تحركت من السرير رتبته ورتبت ميز التواليت وبديت احضر جدول الدروس وملابسي
خليتهم على السرير وطلعت من الغرفه لگيته واگف بالحمام يدندن وهو يحلق
مديتله راسي مبتسمه
صباح الخير
ردلي وياها قبله هوائيه من بين شفايفه
_ صباح النور
زين سويتي صحصحتي حتى نتريك سويه وحتى الحگ اشوفج واحجي وياج بكم شغله قبل لا اطلع
_ شنو اسويلك ريوگ
_ والله ما ادري انت نزلي شوفي شكو بالثلاجه سويلنا واحسبي حساب لهيب هم حتى اروح اكعده من تكملين
_ بعد ما نزلت وحضرت الريوگ صعدت لكيته بالغرفه لابس زي عسكري اول مره اشوفه بهالملابس وبهالمنظر انتبه على نظره الاعجاب الي لمحها على تعابير وجهي
_ شلونه رجلج بالبدله يمكن انت ولا مره شايفتني بهالزي
_ الله يحفظك ويحرسك
شكلك بيهم حلو
لا ولا مره لان دائما جنت من تجيني تگلي رحت للبيت غيرت بملابسي واجيتج
_ بعد راح تتعودين تودعيني وتستقبليني بهالوضع
والله شايل هم هالاسبوع شلون حيگضي وانت بعيده عني
احتضنتها
_ اني هم والله من هسه بديت اشتاقلك من ورا كلامك
بعدته وي ثمين الاكل برد
بسرعة روح كعد لهيب
كعدته ونزل شفته اخاف بالحمام
نزلنا سويه لگينا لهيب كاعد على الميز ينتظرنا صبحت علي
_صباح الخير هوبي
_صباح الخير
_ اكلك ميامي تروح وبالرجعه هم مر عليها رجعها وياك
_ ماشي
_ واذا تحتاج شي هاي هي دتسمعني تجي عليك
_ تدلل
_ صبيت الشاي وكعدت وياهم استمع الهم
لحد ما كمل ثمين ووقف گال شو ما اكلتي
_ ما اشتهي اكل بس شربت جاي
هسه اسوي لفه اخذها ويايه
_يله هم يله تغيرون ملابسكم قبل لا يجي نوار حتى اوصلكم بدربي
_ اول ما دخلنا للغرفه فتح الكنتور وديعد بالفلوس الي باقيه عنده
وهو يحجي ويايه منطيني ظهره
هاي يمج فلوس هنا اخاف تحتاجين شي وهاي خليهن بجنطتج
التفت وابتسم
خجلت منه لبست الصدريه بسرعة
سمعت صوت ضحكته
_ والله يا ميامي اسبوع الجاي لا اخليج حتى ركص تركصيلي
_ ابتسمت اي مو گلولك عليه كاوليه
_ واني كلولج عليه راهب ماخذج راهبه ونس ويايه بهالغرفه
_ ههههههههه
فتحت شعري وبديت اظفره
_ على الله هالاسبوع تشتاقيلي واجي الگى حالج ويايه  متبدل
_ يله كملت 
تقدمت منه وهو ديقفل الكنتور بالمفتاح مدلي ايده ينطينيا
دا اخذه لزم ايدي وقربني منه بدا يقبل شفايفي مثل
الي يرتوي بشربه مي قبل الامساك والصيام ابتعد مبتسم
_ ابويه انت گومي دننزل لا تاليها احصل عقوبه ومينزلوني نهايه الاسبوع
_ نزلنا وبعدها طلعت ورا فتحلي باب السياره الورا كعدت وهو كعد بجانب صاحبه دقايق وكعد لهيب بصفي
نزلنا لهيب باب مدرسته ووصى ثمين
_ مو تنسى بالرجعه تمر عليها
_ لا يبقى بالك اعتمد
_ وراها وصلني لباب المدرسه نزل فتحلي الباب وهمسلي
اخاف لهيب يصير ويا شي ويتأخر  يعني شي طارئ ارجعي ويا مي
وهو فهمته يمر ياخذج مناك
ماشي
_ ان شاء الله
_ يله اني اتوكل اتذكري مامحتاجه شي
_ الله وياك لا اريدك سالم
_ دفوتي كدامي للمدرسه ترى تأخرت
دخلت ورفعتله ايدي وهم هم رد السلام ودخل بالسياره وانطلق
للكليه .