قلوب بينها برزخ

تابع

كانت الاسابيع الاولى الي تلت الخطوبه اسعد ايام بالنسبه الي بالاخص من ينزل اجازته ويقضي الوقت ويايه
بيوم من هالايام طلعت ارش الزرع بالحديقه التفتت لگيته واگف باب البيت متخوصر وعاكد حاجبه
هلو شوكت اجيت
_ شعندج فاتحه الباب وترشين بالزرع الرايح والجاي يتفرج عليج
_ هاي شكو شبيك .. من طلعت الباب مسدود احتمال احد طلع وما انتبهت بقى مفتوح
_ دفوتي يله بلا لغوه زايده بدلي دتجين ويايه لبيتنا
_ شنو هالاسلوب  ترى ما اقبل بي وثانيا ابويه طالع هسه خلي يرجع استأذنه  يله اكدر اروح
_ اخذت منه الاذن من البارحه  ونسيت ابلغج ... اخذتلها صفنه للحظات
_ ثانيا عندي امتحان لازم اكعد ادرس ... اخاف اتأخر
_ انت شنو قصتج كل ما اكلج تعالي عدنا اطلعين حجه ...
_ تنفست وزفرت هذا شنو اجاوبه
اكله بالمرتين الي اجيتكم بيها امك تسممني بالكلام وطلعني وطلع اهلي ماعدهم تربيه ولا غيره ...و حاسبتني حساب الغريبه
_ شو ساكته متجاوبين لو ما عجبج كلامي
_ انت شنو قصتك اليوم شو جاي ادور مشكله بالگوه
_ لان انت حتى اهلي لخاطري متقدريهم ... ليش من امي متصله عليج كايلتلج تعالي تغدي يمنا انت مفشلتها كايلتلها من ينزل ثمين امرلكم
_ ممفشله احد  وثانيا مو هيج الحجي ... اني الي اتصلت دا اطمئن على عمي
وعمه الي ردت وگلتلي متعرفين تمرين اذا خايفه على عمج جاوبتها مو ماعندي احد يجيبني ابويه عنده دوام مسائي هالايام ان شاء الله من ينزل ثمين اجيكم لا گلتلي تعالي ولا متصله عليه _
_يله بدلي حتى نروح لبيتنا
_ طريقه كلامه ما حبيتها ... دخلنا سلم وكعد ويا امي والبنات واني صعدت ابدل مكرهه على الروحه ... بس ردت اكسر الشر وما انطي لزمه عليه
بعد اقل من نص ساعة طبك السياره باب بيتهم ... دخلنا للبيتهم
لگينلهم ملتمين بالهول الولد وعمي فرحوا بجيتي بس امه قلبت وجهها ...
بداخلي جنت كلش حذره منها ... بعد ما عرفت عدها استعداد حتى تلفق كلام وطلعني كدامه بصوره سيئه ...
جلست بصف عمي
شلون صرت عمو
_ الحمد لله بابا بخير ...
_ اعذرني جان المفروض اجي ويا اهلي اطمئن عليك بس ما ادري بيهم من مرولكم لان جانوا طالعين للسوك قبلها بس اتصلت عليك كم مره اطمن على صحتك
_ ادري بابا سمعتج تحجين ويا عمتج اهلج شلونهم
_ بخير يسلمون
شويه ومرت عمي راحت للمطبخ ... بقيت بمكاني الى ان انطاني ثمين اشاره اروح يمها
رحت وراها للمطبخ ...
عمه تحتاجين شي
_ليش دشوفين البيت بي قصور ... حتى اريد منج شي
_ لا مو قصدي بس كلت اخاف تعبانه تريدين اساعدج بشي حتى ترتاحين
_ لا ما اريد
_ ويا ما التفتت دا اتوجه للهول گلتلي تعالي
_ اكعدي هنا يمي شعندج رايحه يمه ... ترى عمج موجود عيب اثگلي
_ التفتت متفاجئه من كلامها هاي شتقصد ... اتوترت واتضايقت من تلميحها
احجي ويا نفسي اني ما مره اجيت يمهم بدر مني اي تصرف حتى شقى ويا الولد وثمين ما اشاقى ولا هو بدر منه فد تصرف يخليها توجهلي هيج كلام
هاي اني بأولها وهي مطايقتني ولا اني اتحمل احد يتبلى عليه
هاي شلون اذا عشت وياها بنفس البيت
بقيت كاعده يمها مخليه ايدي على خدي اتصفن وهي تفتر بالمطبخ ...
الى ان مرة فتره من الوقت دخل ثمين ولهيب ...لگوني صافنه ... ثمين انتبه عليه تقرب مني وهمس شبيج
اجى الجواب من امه
_ ميامي بعدها مستحيه من عدنا من كعدت لهسه ما فتحت حلگها حتى نسيت هي ويايه بالمطبخ
عمه ترى اني اريد ونس ماعندي بنات والله دزج الي بنيه اريد اشوف
علاقه الام وامها وصداقتهم على ايدج
_ جوابها هذا خلاني اعرف اني هاي المره مراح اكدر اجاريها ولا اكدر اخذ حق او باطل منها عدها حيله ومكر بدهاء .... تنهدت ما عرفت اجاوب شي حسيت نفسي شنو راح اجاوب تردني بكلام لصالحها ... فأكتفيت بالابتسامه الي حاولت اخفي خلفها خوف وصدمه وتردد من المستقبل ويا هالعائله
بعد نص ساعة طلبت من ثمين يرجعني وما قبل الا ورا العشاء لكن من حسن الحظ ابويه مر يشوف عمي بقى نص ساعة ورجعت ويا للبيت ثمين وصلنا وكانت ملامح وجهه ادل متضايق ... حتى ما نزل ويانا ولا وجهلي كلمه غير تصبحون على خير وراح
من هالليله بدت اول مشكله بالتلفون .... بعد ان اتصل بيه بمنتصف الليل
يوبخني على عبوس وجهي و عدم تكيفي ويا بيتهم واهله ... وكأنه محنطه
ومجبوره على الجيه ...
بيومها اسمع كلامه بالتلفون ...وافكر احجيله عن السبب ؟
لو اسكت احسن اكيد مراح ينطي بأمه
واكيد راح يتوقع تصرفاتها مو بقصد اذيه لان هي كدامه تمدح وتسوي نفسها تحبني ... فمستحيل يصدك
بالعكس راح يگول عليه نحسه ومتحب امي وددور عليها حجج وتأخذ كل كلامها بسوء نيه
بدون وعي جاوبته كملت يله اريد انام تعبانه
ما سمعت غير صوت الطططططوط بأذني غلق بوجهي السماعه
تهسترت على هالاهانه وعلى هالاسلوب .... صعد الدم لراسي
اريد ارجع اتصل عليه اسمعه حجي يبرد قلبي .... بس تعوذت من الشيطان وصعدت نمت ... التحق بالكليه بدون حتى ما يسلم او يتصل
بقينا متخاصمين اسبوعين حتى من نزل الاجازه ما مر ولا سأل ....
قبل يوم من ما يلتحق امي رادت تروح لبيت خالتي وهو من عرف ابن خالتي كان رايدني قبله ... منعني ان ازورهم وحتى من اطلع لاي مكان لازم عنده علم ...بالطلعه وبالمكان
بهاليوم قلبي حاقد عليه ... بدلت ونزلت گتلهم اروح وياكم ... وبالفعل رحنا
كلنا وغيرنا جو ويا بنات خالتي وحتى الولد بشار ( ابن خالتي ) ما كان موجود بيومها طالع ... فأخذت راحتي
رجعنا لليل ... تقريبا بالعشره ونص ... صعدت للغرفه اني والبنات
بين مدنغير ملابسنا ونستذكر المواقف المضحكه ويا بنات خالتي
صاحت امي عليه ...
نزلت ... اشرتلي ثمين على التلفون ...
اول ما رفعته ... الو جاني صوت عالي
يا رعنه يعني فوك ما طالعه بدون ما ادري رايحه لبيت خالتج بسيطه اني اعلمج
_ شوف اني امري بيد ابويه ... من تصير رجلي ذاك الوكت الك حجايه عليه بس بأحترام مو اهانه .... سمعت تنهيده بعصبيه
وغلق التلفون بوجهي ... فقدت اعصابي
رجعت دكيت طلعلي هذال ...
حبيبي صيحلي ثمين
_هياته ...
_ شكو
_ الي بيناتنا انتهى ...
_ الى حيث فاهمه
_ الحمد لله من فهمت قبل لا اغلط غلطه عمري
سديت السماعه بوجهه بدون احساس ... شي مؤالم بداخلي
ما اعرف افسره مو حب يمكن بدايه نعلق وتعويد على شخص
مصدومه بي ... استرسلت دموعي ....دخلت على امي وابويه بالمطبخ كاعدين يسولفون ...
الدموع الي غرگة عيوني ثارت فزعهم وفضولهم
_ شكو ماما شبيج
_ بألم ووجع بلغت اهلي بلي صار وبدايه الخلاف وسببه
نهيت الحديث بجمله اخيره بابا ما اريده لثمين انهي الخطبه ورجع لبيت عمي النيشان
جنت اعرف غلاتي عند ابويه لكن ما متصوره لحد الي يلبي رغبتي بهالسرعة
ثاني يوم من راح ابويه لعمي ونهى الخطبه ورجع النيشان كان ثمين ملتحق الصبح للكليه ماعنده علم بلي صار بهاللقاء من خلاف شديد
رجع والدي حزين وكعد ويا امي بخلوه يحجيلها الي صار ويا من اول ما دخل بيت عمي واشتد الموقف بينهم بالكلام حد التجريح وموقف مرت عمي
المفاجئ كانت واگفه بجنب ابويه وموقفه من فسخ الخطبه ... موقفها هذا
اكدلي الخطوه الي خطيتها صحيحه هالمره ما حبتني ولا رايدتني لابنها .
هاليوم كانت احمل قلق غريب ... على كد عصبيتي وفقداني للندم ... على كد ء
ما بليلتها راودني طيف ثمين وتخيلت موقفه من يعرف ... اكيد كرامته ما تسمحله يواجهني او يجي للبيت بعد ما حتى الاهل رجعوا تخاربو ا