البارت 7
اشياء في صدري كثير..اشياء وأتعبني الألم
ياطول هالعمر القصير..اللي بداياته ندم
انا الاسم بس الاسم
*****
ويني انا .. حبيبتي ويني انا
ماتذكرين اول لقاء والعهد في اخر لقاء
يوم امسك يدينك واقول..انا بدونك بس اسم
حبيبتي حبيبتي ويني انا
انا مع الاحزان وانتي السهر..حبيبتي ليه الجفا هذا قهر
اشتاقلك واقول..يمكن واحتريك على شبابيك الاماني والقدر
*****
زعلان منك واستحي اقول انتي ناسيه
ان كنت غلطان اسمحي ليه
زعلان منك واستحي اقول انتي ناسيه
ان كنت غلطان اسمحي ليه انتي دايم قاسيه
*****
ابتسمي ما اطيق الزعل .. ارجوك يالله حاولي
ابتسمي وتميلي الغصون .. ابتسمي ويطيح الثمر
ابتسمي هالعالم يكون اشياء بس انتي قمر
حبيبتي ويني انا .. حبيبتي ويني انا
" ياسر التويجري "
ــــــــــــ
يوم جديد
قصر ابو سطام ..
الضحى .. ابو سطام جالس بصالة الداخلية لحالة .. وواضح على وجهه الضيق والهم .. وباله مشغول ..
ابو سطام حاط يدينه على عصاه .. وبنفسة .." اعوذ بالله منك يا ابليس .. هذي الحلم منه .. لا حول ولا قوة الا بالله ..
الحلم تكرر ثلاث ليالي متوالية .. ويش تفسيرة .. " هز راسة يحاول ينسى الحلم ..
خرج رعد من جناحه لابس ثوب وشماغ ..انتبه له .. قبل راس ابوه ..
رعد بمحبة / صباح الخير يالغالي ..
ابو سطام / صباح النور .. " وبتساؤل " طالع ؟
رعد / ايه .. الله يطول بعمرك .. رايح للجوازات .. تامر على شيء
ابوسطام عاقد حواجبه / ويش عندك بالجوازات .. " وبحدة " ليكون بتسافر ..
رعد بهدوء / ايه يبه .. " وبسرعة " اخلص اشغالي هناك اسبوع وارجع ان شاء الله
ابو سطام بنبرة مقصودة / اسبوع والا مثل قبل ..
رعد يبتسم / الله يخليك يبه .. قايل لك اسبوع وراجع ويش له هالحكي والتنغز ..
ابو سطام بحدة / من شين افعالك .. هالج من ديرة لا ديرة والسبب حرمه ماعرفها الا يومين ..
رعد بضيق يقاطع ابوة / يبه واللي يخليك لي ويسلم والله ان عارفا خطاي ..واني ضايقتكم ..
واعتذرت يبه وهذا انا ابي انهي امور سفري وارجع وتووووووبه توبه ان سافرت مرة ثانية ..
ابو سطام حس بضيقة ولدة / يابوك ماراح تحس بذا " وهو ياشر على صدرة " اللين ماتصير ابو ..
لشلت ولدك على يديك وشفته يحبي قبالك ويقوم على رجليه ويطيح ويصيح ..
هذاك الوقت تعرف بقيمة اللي نسوية عسى ربي يطول بعمري واشوف عيالك ..
رعد غص الحكي بحلقه وماقدر يتكلم اخذ نفس .. وقف وقبل يد ابوة .. / الله يمدك بالصحة والعافية ..
وتشوف ان شاء الله عيال عيالي يالغالي ..
ابو سطام بضحكة / هههه يالله يابوك ان شفت عيالك زين .. اخذ زمني وزمن غير .. يالله حسن الخاتمة ..
رعد / بسم الله عليك يبه .. الله يطول عمرك ويعطيك الصحة والعافية .. جعل يومي قبل يومك ..
ابو سطام بجزع / تهبا .. الله لا يذوقني حزنك جعلكم تدفنوني ولا ادفن احد منكم ..
لا عاد اسمع منك هالكلام مره ثانية ..والله ان سمعته مرة ثانية لا زعل عليك وما اكلمك طول عمري ..
" ارتجف صوت ابو سطام اختناق بالعبرة ودموعة تحجرت بعينه " ..
رعد اللي انتفض من سماع تغير صوت ابوة وشوفت المعه بعيونه .. يجلس بسرعة على الارض ..
ويقبل رجل ابوة / السموحه يوبه والله من غلاك .. والله ما اعيدها .. بس لا تضيق صدرك يبه ..
ابو سطام يمسك يد ولده ويجلسه جنبه ويضمة على صدرة .. وبصوت اثر فيه الزمان ../ الله لا يحرمني منكم ..
ولا يفجعني فيك .. يالله ياكريم .." وزاد ارتجف صوته " .. يالله ياكريم ..
رعد صمت ما يبي يقول كلمة تزيد في الضغط على اعصاب ابوة ..
