الفصل الرابع عشر
من #قلب_مغلق_للصيانة
بقلم #fatma_taha_sultan
____________
اذكروا الله
____________
المأساة لا تكمن بالفقدان فقط ، أنها تشبه الكوابيس التي ترفض تصديقها رغم أنك الضحية بِها
{أحمد النخال}
__________
أخيرًا عادت دنيا من عند جدتها...وعادت إلى بيتها....وكانت أول زيارة تريد القيام بها هو الذهاب عند نهال....للحديث معها بعد تجاهل دام لاسابيع...وها هي بالفعل فعلتها وتتواجد في بيت نهال
رحبت بها نهال كالعادة لم تتغير بشاشتها عند الترحيب بأصدقائها....وأتت بمشروب لها...وما أن جلست نهال وأنتهى الترحيب التقليدي...
هتفت دنيا في نبرة جديدة كليًا:
-رامي عامل أيه؟
رفعت نهال حاجبيها وأجابتها في دهشة:
-رامي تمام.
أردفت دنيا في سؤال:
-أنا موافقة على رامي.
شهقت نهال وسألتها في غباء واضح:
-موافقة على أيه؟
أجابتها دنيا في نبرة عادية:
-وافقت على طلب رامي للجواز مني...مش هو أتقدم ليا؟! مالك يا نهال ما تركزي.
أردفت نهال مستمرة على وتيرة استيعابها البطئ ودهشتها اللامتناهية:
-رامي مين؟!
تحدثت دنيا في انفعال ظنًا منها أن نهال تقوم بإحراجها لا تدري أنها بالفعل تشعر بالصدمة فهى لم تتوقع للحظة أن دنيا ستوافق على رامي بسبب يقينها من حبها لصادق..
-جرا ايه يا نهال هو أيه اللي وافقتي على أيه ورامي مين أنتِ بتهرجي صح...وبتلاعبيني في الكلام كده ليه؟.
أردفت نهال في نبرة عادية لتصحيح الأمور:
-أنا مش بلاعبك بالكلام بس أنا متفاجئة أنك موافقة أنا قولت مش هتوافقي على رامي أو غيره لأنك بتحبي صادق.
هتفت دنيا في حدة:
-كان...كنت بحبه...موضوعي أنا وصادق أتقفل من شهور يا نهال....وكان غلطة عمري...وحاليا أنا عايزة أعيش حياتي صح مع الانسان الصح اللي دخل البيت من بابه وعايزني....وأنا مرتاحة لرامي وحاسه أنه في الخير....إلا لو أنتِ مش موافقة علشان تعرفي موضوع صادق.
أستطردت نهال في انفعال مبالغ:
-أنتِ مجنونة يا دنيا يعني أنا هرفض علشان كده....والله أنتِ اتهبلتي صحيح....وعلى العموم براحتك توافقي أو ترفضي دي حاجة أنا مقدرش أتحكم فيها أنا في كل الأحوال بتمنالك الخير...سواء مع رامي أو مع صادق أو مع أي حد...
ثم هتفت في نبرة ذات معنى:
-وياريت تصالحي يقين لأنها زعلانة من تجاهلك ليها وأنا فهمتها أن دي حالتك مع الكل مش معاها هي بس.
