للحب الساقي

-24-

البارت الرابع والعشرين


الدكتور كان يطالع النتايج والتحاليل اللي عنده وقال بهدوء: شوف يا اخوي علي ... انا ما بكذب عليك ، اختك صح انتو يبتوها اليوم عشان الطيحة لي هيه طاحتها والدم لي نزفته بس هذا امره هين ... اكتشفنا من خلال الاشعة انه اختك تعاني من شي ثاني ... اختك فيها ورم في الراس !
علي توسعت عيونه من هول الصدمة: نعم دكتوور؟!
الدكتور: انا اسف لاني قلت هالشي فجاءة بس حالتها بتتعدا المرحلة الطبيعية وبتدخل في المرحلة الخطرة لو ما تعالجت وتلاحقت على عمرها
علي بعده مش متقبل الوضع: كيف يعني المرحلة الخطرة؟
الدكتور بصراحة تجلط: يعني مافي امل انها تتعالج و بيعطونها الكيماوي عشان تعيش بس سنه او سنتين
علي بلع ريقه: نزين وين ممكن نعالجها؟ و يكون افضل علاج؟
الدكتور: ترومون تسفرونها برع البلاد على الدولة او على مسؤوليتكم و فيه علاج في مستشفى كليفلاند بس يفضل ان تسفرونها للضمان يعني
علي هز راسه: تمام مشكور دكتور
طلع برع الغرفه و تم متوتر مايعرف كيف يشرح الوضع لابوه و امه وبالأخص العنود ، تمت يمشي بين هالممر و هو يمسح على ايده وخطر على باله نهيان ، دق على طول فيه وكان يتمنى انه يكون واعي هالوقت:
علي بنبرة تزيغ: نهياان؟
نهيان حك عيونه ويحاول يفجهن عدل: خير علي؟ بغيت شي؟
علي بلع ريقه للمره المليون: نهيان تعال بسرعه المستشفى
نهيان عدل يلسته: ليش شو صاير؟
علي تنهد: تعال و بقولك بسرعة ، مستشفى *******
نهيان سكر عنه و راح غسل ويهه و يحاول يهدي عمره بس مش رايم ، شل السويج ونزل حرك موتره بسرعه و اتجه للمستشفى اللي هم فيها ، دق لعلي عشان يعرف مكانه و لما وصل هناك:
نهيان بدا يخاف اكثر: علي ارمس بلاه ويهك مخطوف؟ شو السالفه؟
علي طالع نهيان بعيونه المحمرة: والله ماعرف كيف يقولون هالشي يا نهيان ..... بس ختيه تعبانه و فيها ورم فالراس !
نهيان صح انه مش مهتم للعنود ولا كانها حرمته بس من سمع اخر كلمتين حس ان حركة الدنيا توقفت وهو الوحيد اللي فالعالم يروم يتحرك !
كانت اول مره يحس بشعور الخوف على العنود و توه يحس بالمسؤولية وبدت الذكريات تمر بلمحة بصر جدام عيونه لين ما وقفت في اليوم اللي شافها اول مره بكشختها و تذكر التفاصيل ، بس علي خاف على نهيان لانه من سمع الخبر تم واقف وماتحرك خير شر حتى مانطق بحرف
علي هز نهيان من كتفه: نهياان؟
نهيان استوعب وقال بضياع: من متى؟ ماتعرف
علي هز راسه بنفي: لا ، الدكتور قال انها على اخر مرحلة من المراحل الطبيعية و اذا تأخرنا اكثر وما سفرناها بتدخل فالحالة الخطرة
نهيان بصدمة: نزين منو يعرف بعد؟ عميه وحرمته يعرفون؟

نهيان بصدمة: نزين منو يعرف بعد؟ عميه وحرمته يعرفون؟
علي مسك ايده ونزل راسه: لا ماعرفت كيف اقولهم انته اول حد اتصلتبه
نهيان تنهد: تمام ... تمام ، بتصل فابويه هو افضل شخص يروم يشرح في هالحالات
نهيان ابتعد عن علي ودق لابوه ولحسن الحظ انه ابوه واعي و مارقد...
نهيان بعد السلام قال بهدوء: ابويه تعال المستشفى
بوسالم: خير شو صاير؟
نهيان: العنود تعبانه ، لاتخبر اميه تعال روحك
بوسالم حس انه في شي كبير صاير: ان شاءالله
نهيان قاله أي مستشفى ، بعد حول النص ساعه وصل بو سالم المستشفى واتصل علطول في ولده اللي قاله وين هم بالضبط وعشان ما يتلاقى في بوعلي وام علي قبلها
قرب بو سالم من علي ونهيان وهو بعده مش مستوعب لي صاير
بو سالم بهيبته المعهودة: السلام عليكم
نهيان قرب وباس راس ابوه من ورا خاطره وعلي سو نفس الشي
بو سالم رفع حايب باستغراب: شو صاير ؟ اللهم اجعله خير
نهيان طالع ابوه بنظرات ضايعة تايهه: ابويه
بو سالم: شو صاير نهيان ارمس
نهيان نزل راسه وبلع ريقه: ابويه ... حرمتيه تعبانه
بو سالم بنظرات مبهمة: ادريبها تعبانه ... شو بلاها العنود؟
علي طالع بوسالم وعيونه جمر: ختيه فيها ورم فالراس !
بو سالم توسعت عيونه بفاجعة ... يحس كل اطرافه تشللت !
بلع ريقه بخوف ماقدر يخفي رغم ملامحه المكابرة: يعني الورم خبيث ولا حميد؟
علي نزل راسه بيأس: ماعرف عمي والله ماعرف ... ماعرف كيف اخبر ابويه وامايه دخيلك عمي انته سير وصل لهم الخبر والله امايه عادي يستوي فيها شي كل شي ولا العنود عندها اخر العنقود
بو سالم غمض عيونه بتعب ... في حياته كلها ما اهتم لعياله عشان يهتم لحد من عيال اخوانه لكن اللي سمعه شلّ عنه حتى أفكاره ... تقول شنت حرب متضاربه في داخله من هول الصدمة !
حتى في موت امه وابوه وريل اخته ما صار فيه جيه ! احاسيس غريبه اجتاحته في ثواني
قال بصوت مكتوم: ابوك وين يا علي؟
علي بصوت بدا يصير مبحوح: هناك ابويه
بو سالم هز راسه بتأييد وسار بخطوات ثقيله صوب اخوه ... ولحسن حظه كان اخوه واقف بعيد عن حرمته لي يالسه ع الكرسي وتصيح ، غمضته ام علي وايد اذا هيه من الحينه تصيح كيف لو سمعت الخبر؟
بوسالم بصوت متقطع: بو علي
بو علي رفع راسه استغرب ! بو سالم شو يابه هنيه؟
بو علي قرب من اخوه: هلا اخوييه شو تسوي هنيه؟
بو سالم خنقته العبره: بو علي ... تعال ابغي ارمسك شويه بعيد عن الحرمة
بو علي زاغ: حد فيه شي!
بو سالم تنهد من خاطره: بنتك يا بو علي
بو علي رفع حايب: شو بلاها العنود؟
بو سالم رص ع عينه بالغصب ماحب يشوف ردة فعل اخوه: بنتك فيها ورم فالراس !
بو علي رمش بصدمة: شو؟