للحب الساقي

-23-

الثالث والعشرين

*يوم الأربعاء ... الصبح*
قررت العايلة كلها انهم يسيرون اليوم الشالية يباتون ليلتين هناك يغيرون جو وبالمره عوشة وشمسه بيكونون وياهن !
منزمان ما تيمعت العايلة ومحتاجين هاللمة في مكان بعيد عن بيوتهم وعزايمهم
فعشان جيه قررو اليوم يسيرون كلهم خاصة انه ذياب هالمره بعد موجود فماشي عذر العايلة كلها متيمعه
نقطة التجمع كانت في بيت بو سالم والحشرة كلها هناك خاصة في حوي البيت ..
كانت توها طالعة من الصاله وشاله شنطتها وياها رغم انها حامل بس ريلها وين يسأل عنها اصلًا ، شافت أمها ركبت بسيارة عوشة و انقهرت لانها كانت تبغي تسير وياها عشان تفتك من ذياب بس دام أمها راحت مع عوشة هي مابتروح لانه اكيد شمسة وياهن بعد!
اتجهت علطول صوب ذياب و وقفت هي ويا شنطتها حذاله
ذياب رفع حايب وكتم ضحكته: خير ختيه؟ تبين شي؟
مهره تخصرت: هيه اخويه ابغي سويج السياره
ذياب نزل نظارته الشمسيه وعقد حياته: نعم اختي ؟ تشحتين سيايير؟
مهره قلبت عيونها: اوهوووو ... اشحت فعينك عاده -وبنبرة صارمة- بيي وياك
ذياب باستهزاء: يلا يلا يلا بعييد .. انا مش حضانه أطفال عشان اتيين ويايه
مهره من القهر ضربته في بطنه و شلت سويج السياره من ايده وقلدته: انا مش حضانه أطفال عشان اتيين ويايه -وردت لصوتها الأصلي- غصباً عنك بيي وياك !
ذياب مسكها من ايدها وهو اصلًا مستنكر فعلتها الغريبه: ليش تبين اتيين وياي؟ شو صاير؟
مهره فجت ايدها من مسكته: ماشي .. ويلا تعال حط شنطتي فالدبّة انا ماروم
في نفس هاللحظة ظهر مايد بخطوات سريعة من ملحقه وهو متحمس اخر حماس ومروق بعد
فتح موتره وعق نظارته الشمسيه جان يسمع صوت من بعيد
نهيان: حوووووووه ميود شو تسوي!
مايد بروقان: ازهب عمري بعد شوي بنحرك
زايد عقد حياته: بس ع أساس بنسير في موتريه؟!
مايد رفع حايب: انا بسير في سيارتي وعلي وسلطان معايه بيكونون... بتون ؟ يا مرحباكم ما بتون بالطقاق
نهيان علطول لف ع زايد: اقولك ! سير روحك والله ما اسير طول الدرب للشماليه معاك انت بس
زايد سحب نهيان: نهياااانووه بتخليني اروحي شوو!
نهيان دزه: خووز عني هب حرمتك اناا
زايد زاعق: اصبببببروو بسييير وياااكم
بو علي في هاللحظة وصل بموتره الجمس المخصر وبركن في نص الحوي
نزل جامته وقال بصوت عالي: يلاااااا شباب حملووو الأغراض
علي طالع ابوه: اصبببر ابويه بعق العصا في موتر ميود وبييك
بو علي عقد حياته: حق شو بعد هالعصا !
سلطان ابتسم بغباء: عميي ما تعرف اونك ... بنقلب موتر ميود عزبه محد قاله هو يشلنا وياه

سلطان ابتسم بغباء: عميي ما تعرف اونك ... بنقلب موتر ميود عزبه محد قاله هو يشلنا وياه
مايد عقد حياته: نعم نعم نعم ! ترا ما ضربتكم ع ايدكم وقلت لكم تعالو معايه
ام سالم ييت في هاللحظة وفي ايدينها دلة الكرك: يلاااا شو تسوون تأخرنا !
سالم قرب منها وهو شايل ولده: امييييه ترا عندنا مكان جان بطرشين حد معانا
ام سالم ارتخت ملامحها: زين فديتك شل فريدة وماريه وياك
سالم توسعت عيونه: امييه كم بشكاره بتشلين؟
ام سالم بعفويه: ثنتنين
سالم عقد حياته: ما يحتاي ما يحتاي
ام سالم عصبت: لا لا يحتااااااااي اباهن بشاكيري ! -وزاعقت- فرييييييدة فريييييدة
فريد يايه تركض من بعيد: نعم ماماا
ام سالم: ويييين سلة الفواكة؟!
حمدان قرب منهم وهو يضحك: خالوه فديت روحج ما يحتاي كل هذا !
ام سالم باعصاب متوترة: لا يا حمدان تعرفني انته ما فيني اتوتر
سالم ضحك من خاطره: يالله يا امايه كله ولا توترج عيل
بعد الحشرة كلها هاذي واليولة انقسمو كلهم فالسيايير
(السيارة الأولى) كانت سيارة عوشه وشايلة معاها ام حمدة وشمسه بنتها ورا ميلسينها فالنص بين بشكارة ام حمدة وبشكارتهم
(السيارة الثانية) سيارة حمدان ومعاه شيخة اللي ماسكه عذاري الصغيرة ، وورا كانت ام سالم معاها سلامه والعنود اللي ضايعين مع عشبة
(السيارة الثالثة) سيارة سالم ومعاه حرمته وولده احمد وبشكارتهم وبشاكير امه
(السيارة الرابعة) سيارة مايد وشايل معاه الشباب علي وسلطان ونهيان وزايد
(السيارة الخامسة) سيارة نايف ومعاه حمدة ، (السيارة السادسة) سيارة منصور ومعاه وديمة
(السيارة السابعة) سيارة ذياب ومعاه مهرة ، (السيارة الثامنة) موتر بو علي الجمس ومعاه حرمته والاغراض كلها وياهم ، واخر موتر (السيارة التاسعة) سيارة بو حمدان وشايل معاه حرمته والبشاكير
طلعو كلهم تسع سيايير من بيت بو سالم ... اما السيارة العاشرة فكانت سيارة بو سالم اللي ظهر علطول من مزرعته لي يبات فيها ومتوجه للشماليه من هناك
*بعد ما قطعو مسافة كبيرة ... في موتر مايد*
كان علي يالس جدام و وراه سلطان و زايد و نهيان ، وكل واحد بجو ثاني .. اللي يصور تيك توك و اللي يغني بحماس وحشرة وصدعة كالعاده ، بس اتصال ام علي خرب عليهم جوهم
علي زاعق: امااايه تتصل .. حوووووه بند بند
مايد ضحك: وليش ابند بس بقصر عالصوت
علي: زين زين برايك -ورد على امه- الووو
ام علي: شو الو الناس يقولون السلام عليكم -وعلطول احتشرت- بعدين شو هالحفلة اللي عندك؟
علي ضحك: شو بلاج امايييه .. نوّنس عمارنا فالدرب
ام علي حرجت: يأذن الظهر يالهررررم .. بندوا هالاغاني
نهيان ضحك: استلم عاده الحينه