عندما تتقاطع الطُرق

الرحله السادسه عشر

والان نبدا بالرحله السادسه عشر من قصه "عندما تتقاطع الطرق"

بقلمي:فاطمه القاف

——————————-

بعد فتره كم يوم خابرني مُتيم
فتحت الخط وكلي كلام خلاني افكر بأهلي مية مره
اجاني صوته وهو يكول بتنبيه

مُتيم: مهجه دير بالج تطلعين هالايام من البيت

مهجه:ليش؟

جر حسره وكال
مُتيم:ما اريد اخوفج بس سمعي كلامي ولحد يطلع من بيتكم .... مع السلامه

سد الخط واني كلشي ممفتهمه
خليت التلفون على الفراش و الافكار تتوالى عليه
شصاير غير يفهمني عافني هيج بدون جواب
مثل الاطرش بالزفه

مدوخت نفسي اكثر وكلت الله كريم كلشي ينعرف بعدين شعدي مدوخه نفسي من هسه...

فكرت شويه حسيت الموضوع جدي
اريد احاول اخاف بس ماكو ما اخاف مشاعري متبلده جامده

صادف يوم جمعه ماكو عياده وسبت هم ماكو
اذن توضيت وجبت السجاده صليت
قريت سوره الكهف تنور ما بين الجمعتين
ومية مره "اللهم صل على محمد وال محمد وعجل فرجهم"

خلصت ونزلت يم ماما

مهجه:مامااااا
نيران:قزرقرط
جانت واكفه تراقب الطباخ رحت قريب عليه كرصتهه من خدهه
نيران:ايييي دوخري ليش هيج تأذيني
مهجه:اووي شمسوين قابل هسه المهم اريد اسوي كيك

باوعت عليه بأستهزاء واشرت عليه بالچفچر البيده
-انتِ تسوين كيك؟
-اي شنو الغريب يعني
-وكفتج بالمطبخ هي الغريبه
-لتبالغين عيوني
-وداعت عيونج منريد نتسمم وتنذب النعمه
-لا يابه اني اذب النعمه؟ اله تاكلون اصابعكم وراه

-سوي اني معليه
-انطيني المقادير وصفه شي
-وشبيه مخبله انطيج وصفتي تشوهين سمعته
-الله ليعوزني عليج

وخرت من يمه رحت كعدت وبدت رحلة البحث عن وصفه للكيك ومقادير

طلعت باليوتيوب وشكله جان يشهي جبت الاله
وخليت المكونات والخلطه حلوه وشكلها طبيعي

خليته بالقالب ودخلته الفرن وره نص ساعه تقريبا
طلعته قسمته و وزعته بالاماعين صحت بأعلى صوتي
مهجه: تعالوا اكلوا
نزلت توتي من الدرج وبيدها الايباد
توتي: ها شكوو

مهجه:تعالي ضوكي طيبه لا
انطيته الماعون اكلت اول لكمه وانگلب شكله
مهجه:ها شكو طيبه؟
توتي:متشوفين خلقتي نگلبت يا طيبه
هاي شلون مسويته تلعب النفس

-دروحي انتِ متعرفين تضوكين
-الميعرف يركص شيكول الكاع عوجه
-بطول رجلي وتحجي هيج وياي ولي من وجهي يلا