عندما تتقاطع الطُرق

الرحله السابعه عشر

والان نبدا بالرحله السابعه عشر من قصه" عندما تتقاطع الطرق "

بقلمي:فاطمه القاف

——————

مصدومه ما اعرف شحجي اول مره واحد يحجي هيج وياي...

توترت واحس صخنت من الخجل وهو مستمر يباوع عليه بهيام عينه تتنقل بين ملامحي

رفعت عيني علي وارمش بطيء
لتين:وبعدين؟

جان مستند على الستيرن وره كلمتي كعد عدل وباوعلي مستغرب:شنو وبعدين؟

-نهايه هذا الحب شنو؟
تنهد
-زيد:انتِ تحدديها

ضليت ساكته مجاوبت اريد بس نرجع للبيت
ما اعرف شجاوب وهو يعرف كلش زين مشاعري تجاه ايليا...

-احجي شي
-شحجي
-كولي اي شي

-شحبيت بيه؟

-شعليج

-شنو شعليه دحجي اريد اعرف
طلع باكيت الجكاير من جيبه و اخذ وحده ورثها وفتح الجامه طلع ايده منها اخذ نفس منها و وزفره بعيد عني 

فتره طويله اني مشايفته يشرب جكاير يشرب بس ڤيب..

-زيد:من تنطيني الجواب اكلج عود

سكتت وكلبي يدك سريع وايدي بيها رجفه خفيفه
اني بالمواقف العاديه اتوتر مو انوبه واحد يعترفلي ومنو انوبه زيد الي كل مواقفي وياه تفشل...

باوع عليه وصفن بعيوني واني منزلت عيني من عينه

زيد:عين بعين والتايه گلبي

كال هيج واني كلبي يدك يدك قوي
مسامعه احد يكلي هيج احساس غريب ..

خلص الجكاره شمرها من الجامه وحرك السياره  وصلنه طبك السياره كبال بيتنه نزلت بسرعه بدون ما اباوع بوجه ولا التفت اله

سديت باب البيت وهسه يلا حسيت نفسي تنفست زين خليت ايدي على كلبي  ويه كل دكه احس بيها...

احاول استوعب الصار والموقف ينعاد ببالي الف مره ..

دخلت للبيت مجان اكو احد سبحت وبديت افكر
لازم ابتعد عنه اذا اكول لبابا ما اريد هذا الخط
عبالهم بي شي لو مدري شنو

بس ابتعد احسن لا احجي وياه ولا اذب ميانه زايده ولا اكعد ليكدام اخلي البنات يكعدون شنو شامريني يمه...

جنت دائما اتخيل واحد يحبني ويعترفلي افكر شنو رده فعلي تكون
وهسه صارت صدك وياريت مصايره
مشاعري تجاه ايليا موكفه كل حياتي العاطفيه

مفكرت بالموضوع اكثر لان جوابي حيكون واضح من خلال تصرفاتي..

بعدين اجوي عبودي وحمودي من المدرسه
راحوا رابع علمي ثنينهم

غرفتي تفصل عن غرفتهم بكنتور يعني الصوت ينسمع واضح لا اكو خصوصيه ولا شي

متمدده ومغطيه نفسي اريد بس الدفو يجيني بعز هل حر سمعت عبودي يحجي وياي من غرفته