عندما تتقاطع الطُرق

الرحله الثامنة والعشرون

والان نبدأ الرحلة الثامنه والعشرون من قصه"عندما تتقاطع الطرق"

بقلمي:فاطمه القاف

———————-

مهجه:
بعد مرور شهرين
بين تنظيف وهوسه البيت وبين سوالف وعركات
جيب هاي ودي ذاك

صاحت رغده من فوك:وين فانيلتي الماخذتها من وسيممم

جتي علياء جايبتلها الفانيله و وسيم
يصيح حتى فانيلاتي مخلصوو منكم فد يوم الكي لبساني معلكه بغرفكم

وياهم جتي سناء لتين من شافتهه ضاجت ومردت السلام ولا انطتها مجال

تبارك ورغده اخذوها على صفحه يحجون وياها تتعامل زين ويه سناء جان جوابها

لتين:والله اني ممجبوره اكعد اجاملها واتلوك وهي تعرفف كلش زين شمسويههه من وراها صارت مشاكل يابوو مشاكلل وهسه جايين والله شنو تعاملي وياها عدل
اعذروني والله بس تعامل وياها ما اتعامل خوش لو لا
انتوا اذا تكدرون تجاملون الناس الاذتكم ف اني للاسف مو مثلكم

تبارك:ميخالف لخاطر وسيم

لتين:لا خاطر ولا صخام خل يربي بته بعدين ادور خواطر

ضلت رغده صافنه وتبارك تكول:بنات هالوكت
لتين:اي بنات هالوكت ميقبلون على الظلم

قرروا يسوون العقد بيت جدو لان اكبر
بدت تحضر علياء وترتب بالكوشه وهل سوالف تفتهم بيهم
وتبارك تباوع معاجبها شي

لتين مبينه متوتره تروح وتجي من بيتنه لبيتهم حايره متعرف شتسوي

خالو علي يحجي ويه وسيم يكله ممصدك كبرت ورح تعقد الضحكه على وجهه مفاركته اكيد بس مبين متأثر
خاصه لتين متعلقه بي وعدها ميانه وياه

اليشوفه ميكول هذا ابوهه وتشاقه وياه هيج عبالك صديقها
من يشاقون كل شويه وتضربه راجدي مرات خفيف مرات قوي انتَ وحظك بعد

حتى من يصير عصبي او نريده بموضوع يضوج منه ندز لتين بوجه المدفع محد يسيطر علي بس هي

عبودي وحسوني وكرار كل شويه ندزهم للمحل يجيبون شي بعدين سويناهم شفتات كل شويه واحد مو كلهم ندزهم سوه يتعبون

حسوني فرحان على ضايج من يشوف لتين يضحك
وعبودي اليكول مو اخته الرح تعقد بت الجيران
كاعد بلا احساس ومشاعر تبارك تكله شويه بين مشاعرك