بين اسواره

البارت الـ 28

بين اسواره.....

وفاء..

مرت الايام بألم قاتل يوم عن يوم يتنشر المرض الخبيث وياكل بجسد هدى الي مذبلها وماخذ روحها وعافيتها ..

حاكم الي ماعافها ولا لحضه يضل يسولف وياها حد ماتنام ويضل يقره قرآن يم راسها .. وبس تفز يوكلها بيده وينيمها ..

كالو المرض انتشر ولازم ينطوها جرع كيماوي الي رح تسبب بتساقط شعرها واكل روحها من الداخل..

صدمة صدمة النا كلنا مرض هدى .. هدى البنيه المتدينة الي ما أذت نمله اجاها هلمرض .. مانكول غير الحمدلله

خذتني عمتي ورحت للمستشفى.. لان صحتها صارت بالأسوء والبيت مايصيرلها.. بعدني ماداخلة واشوف حاكم كاض المكينه بيدة الترجف وعيونه التهمل وگلبة المكسور .. بلجمات گلب وصل المكينة يم راسها وبعدها .. وبجه بقهر

: شلووون شلوووون انه بيدي ازززين شعرج الاحبه شلوون شعرج العندي ريحته تسوا الدنيا ولبيها شلون بيدي ا.. ياربي اختبارك صعب عليه ارحمني ارحمني ..

خلت ايدها على ايده وكالت بابتسامة مكسورة
: زينه احسن من ما انه اشوفه يطيح بيدي وكدام عيني .. اخسره مره وحده سهلة من مااخسره شوي شوي..

حاكم بدموع   هدى .. هدى كلبي واجعني وربج مختنك خنكة بس الله يعرف شكبرها .. ياروحي انتي يابعد دكات كلبي.. شلون بيه انه ياربي ارحمني..

هدى : الف الحمد لله الي خلاني اعيش اخر لحضات عمري يمك انت وجهالنا .. الحمد لله الي ماحرمني من ان اصير بنت باره بأهلها وزوجه راضيه زوجها وام ام لاجمل ثلاث اطفال بالدنيا.. ربي ماقصر ورزقني كلشي اتمناه .. ربي رحيم ومن اروح يمه اروح ونفسي مطمأنه ..

بوس ايديها الي مزوگة من الكانونه وصافيه جلد وعضم .. حاكم: واحلا بنت واحلا زوجة واحلا ام .. واجمل ماخلق ربي خلق واخلاق عمري انتي ضحكتج تسوا الدنيا والبيها عندي..

حضنها لصدره وكالت بتعب : حاكم اخاف انه من شي واحد .. اموت وربي ماراضي عليه.. خاف مقصره وياه بشي.. خاف اموت واوكف كدامة ويطلعن ذنوبي بيا وجه اقابل ربي انه .. وانه عاصيته وهوا يهطل عليه بالنعم .. صليلي من اموت اقرالي قرآن .. تصدق على روحي...

حاكم ؛ موتيني هدى موتيني كلبي نمرد والله ماتحمل اشوفج بهذا الضعف

غمضت عيونها وردتت : جهالي الله عليك لا تضلمهم من وراي لا تخليهم يحسون بغيابي..

رفعت راسها وانطته المكينه وبده يحلق شعرها .. ودموعهم مابطلت .. خلص ولزم شعرها بيده باسه وشماه وكال

: راح احتفظ بي لاخر يوم بحياتي

خلاه بعلاگه .. وباس راسها ولبسها الكبوس والحجاب فوكاه .. وضمها لصدره وضل يهمس الها وهيه تبتسم بتعب..