بين اسواره

البارت لـ 38

...بين اسواره
...زينب الاسدي

وفاء

صباح يوم عادي مشيت بناتي للمدرسة ، نورس وحنين وامنيه وبنين اول ابتدائي.. راحن وضلن گمره وزينب يلعبن يم اخوهن وانه گمت خلصا شغلي ..تنضيف وكنس وغسل ماعين .. اجت سلوى يمي تسولف لمن خلصت شغلي وراحت ..

اجة ثائر من للدوام ونام .. كضيت گمره من ايدها : ولج مو تسون هوسه ابوجن نايم

زينب : يماااا خذت لعباتيييي

گمره : مالتيييي والله

وفاء: ولجن صوتجن روحن يم حبابتجن لا يكعد ويكتلجن

خافن وراحن يم حبابتهن وانه كملت الغده .. شلت ملابس ثائر وتلفونه شفت وصلن رسايل .. جان وكت تلفون الدگم .. كعدت بالمطبخ وفتحت التلفون..

ياريتني مافتحته ..!

ياريتني ماشفت شمكتوب بي..!

ياريتني متت ولا أشوف خيانة ثائر الي..!

كلام الغزل والحب اول مره اشوفه ! اول مره ادري ثائر عنده هلجانب الرومانسي لا الغزل وشومه والارصده وحبيبي واشتاقيتلك شنو هاي !!!!! بعد كل هل سنين انخان !!

ايدي ترجف وعيوني تصب لوحدها الخنكة مكسره بداخلي ماعرف شحجي ماعرف شسوي ووين اروح ..

سمعت صوت حمودي يبجي ، كمت عفت التلفون ومسحت وجهي اخذته وانه بعدني مصدومه مامصدكة متفاجئه مادري.. ثائر يسويها ويخوني !؟

كعد وراح يم اهله شوي ورجع اخذ التلفون وضل يدخن وينرگل وشوي وصعد فوك ودك مخابره .. اذن الضهر وهوا مانزل ..

تالي نزل وتوضه وصلا ليسمع صلاته عباله ملأ وشيخ يخطب بالجامع ..

منا للضهر اخذتله الجاي ورحت يمه .. كتله : شنو ثائر شو هليام بلتلفون شعدك

ثائر : هههههههه انتن النسوان تشمن الريحه

وفاء: شقصدك شنو؟

ثائر : ماكو شي شبيج

وفاء: شعندك شنو عندك

ثائر: وشنو تحاسبيني؟

وفاء: يمته محاسبتك بس مدري شعندك

ثائر : معليجج شعندي ماعندي يلا اخذي هذا السم لجايبته ولي من وجهي

اخذت الجاي وطلعت ومنا لليل كال : امشي بدلي نروح للكورنيش

كلهن البنات كالن : انه اروح انا اروححح

ثائر : لا روحن يم حبابتجن لو تجي يمجن مانكدر ناخذجن كلجن ..

وفاء : بس حمودي ناخذه ؟

ثائر: وبنين وامنيه

وفاء: خوش .. بدلت لبنين وامنيه ولبنات لبقيه ضاجن لان ماراح يرحن