بين اسواره

البارت الـ 37

...بين اسواره
...زينب الاسدي

وفاء : اليوم دخلت بالشهر الرابع من حملي ، بعد حجي واقناع حملت وكلت بالكي الله يرزقني وليد  وحته لو بنيه ميخالف خلي يصير عندي سبع وردات انه راضيه ..

رحنه انه وثائر وسلوى مرت عازم وثائر مخلي ايده على گلبه ويندعي ياربي هلمره ولد .. صادف بيومها محرم بداية ايامه .. رحنه للدكتوره وكصينه باصات وكعدنه .. اجه دوري ودخلت للسونار ..

لحظات صعبة توتر خوف قلق كلهن مريت بيهن ، اذا كالتلي بنيه شنو راح يصير ؟ رح يزعل ثائر رح اسمع حجي رح تتكرر بأذني كلمة ام البنات رح يباوعلي الكل بطريقه موحلوه ؟ بعد ضلت وراك ياربي ..

كعدت وبدت الدكتوره تمشي السونار على بطني ..

كالت : شكد عندج بنات ؟

وفاء : خير من الله عندي ست بنيات ..

ابتسمت وضلت تباوع بالسونار وكالت : وشتتمنين هسه الله يرزقج؟

وفاء: والله ليجي من الله حي الله ماتعافى انه

الدكتوره: ورب العالمين انطاج على كد نيتج هاي جاي اشوف بالسونار فصمه وحصوتين صغار..

مادررري شعوري بوكتها شلون اوصفه .. بلعت ريكي : حلفي دكتوره !

: والله هاي واتاكدت اكثر من مره فصمه وحصوتين صغار ، ان شاء الله رح يجي اخيي لبنياتج ..

نزلت دموعي وانه مامصدكة لجاي اسمعه .. كمت بسرعه وطلعت لاگتني سلوى .

سلوى : ها ولج بشري ليش تبجين

وفاء : نزلت دموعي اكثر وكتلها : ولد بيه ولد..

خطيه من فرحتها كبل شبكتني وبجت .. ضلت تهلهل والنسوان ليمنه يتباركن النه وهنه مايدرن شسالفه .

هلهلت سلوى وكالت : المعذررره منك ياابا عبد الله المعذره منك بس فرحتنه جبيره بفضل الله وفضلكم ..

: شكد صايرلج ماحابله يمه

سلوى : واخيرا اجاها وليد لو بنيه جان تطلكت .. رحمتك ياربي ..

ضلن النسوان يتباركن ويندعن .. طلعنه وسلوى شترت جكليت ووزعته على النسوان .. وثائر فرحته كلش جبيره ..

باوعلي وعيونه تلمع ومبتسم .. وكال : الف الحمدلله الف الحمدلله..

رجعنه واحنه طايرين من الفرح وتلفون ثائر احترك بالأتصالات كلها تخابر وكلها تتبارك ..

ورجعنة للبيت ولگينه عازم وجناينه وولده كلهم عدنه وبيومها نگلب البيت بالفرحه والضحكة .. الكل فرح بحملي بولد ..

وعمتي تمسح بدموعها وتردد : ماقصرت ويانه يابو فاضل حشاك نخيتك وتقربت لربي بيك وماقصرت

بليل كعدنه ولبنات ملتمات يمنه انه وثائر ..وثائر مشتريلهن موطه وياها نساتل ويحطلهن وينطيهن ..