بين اسواره

البارت الـ 24

بين اسواره

قرائه ممتعه ♥

وفاء

بدايت يوم جديد وشهر جديد وسنة جديده .. وان شاء حياة جديدة.. بدون مشاكل وعرك .. وهاي صايرلي ٣سنوات متزوجة ..

بهاي ال٣ سنوات مرت هواي اشياء خلتني اعرف ناسي كلش زين واعرف ليحبني من اليكرهني .. واكيد نعيمه  زادت مانقصت طبع البدن مايغيره الا الجفن ..

وثائر نفس سوالفه ماتغير  بس الحمد لله مامقصر وياي بشي من يجي بس من يروح توكلني حو نعيمه ..

لبس بالجيش وضل يروح ٢٠ يوم هيج وينزل وعمي وعمتي خطيه ينطرون بالباب وعمتي دمعتها بعينها كل ليله لمن يرجع..

حبلت مرتين وطرحت .. مره بنيه .. ومره تؤم ولد وبنيه .. جانت عدنه خطار ووهسه ونشبت وياي نعينت الا انه اغسل الجدوره لكبار .. صاحن عليها البنات مارضت الحقيره الا انه .. وانه ادري بالدوره غايبتلي وعمتي تدري بس هيه بيها دودة ..

كعدت فوك النص ساعه اغسل واشيل ثكل لمن نكطم ضهري بالنص متت .. رجلي ماكامت تشيلني متت .. لليل بطني وضهري كللي كضي روحج ياولادتي بنورس ياخبر ردت اموت الطروح يموووت اكثر من الطلوك

وطرحتهم ثنين شافتهم عمتي ولطمت على وجهها ودعت على نعيمه من كل گلبها .. كالت هذا ولد سبحان الله جنه هاي الطكاكه الي بطن السمجه .. والبنيه جنها جبده صغيرونه ..

وهسه انه هم حامل .. ادري غلط بس يهو الي يجيبلي مانع محد كلها تصيح نريد ولد .. حبلت وعليه ثالث .. شلت صينيه بيها عنب وخبز كعدت بالحوش جو مغرب وعمتي مشغله الجانون وتسيح سياح ..

وعمي فارش حصيره وكاعد ومكعد نورس بحضنه.. ويغنيلها .. ومخلي جدامه طاسه مالت ماي وكعك

كعدت يمهم وسوالفهم ترد الروح .. عمي يداحر عمتي يحب يضوجها وهيه عصبيه بسرعه تكب وانه اضحك عليهم

ابو ثائر: نورس يابعد جلاوي يدج شنهي هلجمال ولج .. همزين ماطلعتي على حبابتج عبيده

ام ثائر: هسه مو عيب فروخ ولدك بطولك وتكلي عبيده

ابو ثائر: ههه جا انه مجذب ماتنعرف ايدج من شيلتج

وفاء: ياا عمي شبيها عمتي تخبل اصلا تنكرط كرط شوف هاي الايدين الحلوه تخبل .. شلت ايدها وبستها

ام ثائر: شوف جنتي الغريبه احسن من بزر بطني ذيج دايحه وبس تلفي تسوي مشاكل وهاي ام لسلف لبربوك شالعه كلبي

ابو ثائر: بناتج برعات مايردن شسويلهن ..

دخلت مرت عازم وتسحسح بالجهال وهمه كلهم طين ووصخ وتراب .. وتصيح عليهم..

: ولكم اليوم اطيح حضكم كلكم وصخ يلا سبحوو

: مانسبح ذاك السبوع سبحنه