بين اسواره

البارت الـ 30

.. بين اسواره

.. زينب الاسدي

ـــٓــــٓــــٓــــٓــــٓــــــٓـــٓــــٓــــٓــــٓـہ

البيت مخبوص وجهال تتراڪض بڪل مڪان وهاي تريد ڪحله وهاي حمره وهاي اصيح وين حذائي ...

وڪلها مجتمعه اليوم بخطوبت زهره
اي خطوبتها اليوم

ڪلشي تغير بفتره قليله ڪلش

بت عازم رجعت بعد ما اجه عمها وزوجها وطاحو عليهم واعتذرو يلا

نعيمه الي رجعت للبيت وطب وتطلع براحتها

والناس الي اجو خطبو زهره اصلا مانعرفهم ومن منطقه اهلي

ولا زهره تعرفهم ويعرفوها قبل لا يجون ويشوفونها

مانستبعدها لان هي ماتڪعد بل بيت وطب وتطلع تعرف منطقتنه احسن مني

وعلى ڪولت عمتي دايحه

يمڪن نعيمه جانت فرحانه اڪثر من زهره بيوم خطوبتها...

اي ليش لا غير ارتاحت منها وبعدتها عن طريقها وراح تمشي عدل بلي تريده

::ـ امشط بحنين ونورس اصيح وهي تسحل بڪنوشه :ـ يماا تعاي الها وصخت روحهاا

:ـ نورس جم مره ڪتلج لا اجرينها من ايدها تنملخ وتعاي حيري بيها

:ـ مااشوفينها دبه وين اڪدر اشيلها

::ـ اخذتها منها وانه اڪلها .. محد غيرج راح يحسدها اصيحين دبه ودبه

:ـ اهووو تولي هسه هذا حماده توا طڪني

:ـ يا طلابت حماده الماتخلص شبيج انتي فاهيه اطڪه مثل مايطڪج

صاحت حنين منوراي :ـ يمه هي فاهيه اروح انه اڪتله؟!

:ـ دسڪتي بله عصعص مابيج طڪه وحده وتموتين

:ـ هو شني يطك اختي واسڪت اله اموته

:ـ يييي سڪتن بله سڪتن لهيتني يلعن ابليسجن ميت شغله وراي

خليتهن وطلعت اسلم على الي اجن

وابتدت القوانه تنعاد بڪل جمعه بڪل مناسبه بڪل فاتحه تنعاد نفسها

ـ شڪد صار عندج بنات؟

ـ ماصار عندج ولد؟

لو الي يتهامسن ياا خطيه ماصار عدها ولد .. مرتمن هاي؟ مرت ثائر

ـ خطيه اربع بنات وماعدها وليد

ـ جا حبلي بلڪت جيبين ولد

ـ جا زوجو بلڪت يصير عنده ولد يشيل اسمه

من غير حجي نعيمه .. ماتخلف ولد .. خلفتها ببس بنات .. عاڪر .. مابيها خير

بهذا حجيهن يڪرهني بڪل ڪعده محسساتني الولد فدد شي واذا جبت بنات ومامقسوملي يصير عندي ولد؟؟!