الحب التائه

الجزء 18

الجزء 18 :
مشات نادين للكوخ مع ديك الوحدة ... ملي سالات الحفلة ... ولكن مقدراتش تنعس بسبب الجوع ... ناضت صاوبات سندويتش باللحم والفرماج وكاس سخون ديال الكاكاو ... خرجات قدام الكوخ كتاكل وكتستمتع بريحة البحر والورد ... ولكن شي صوت فشكل كان ورا الشجر ناضت باش تشوف .. غير قربات وبانت ليها شيحاجة كبيييرة بقات مصمرة فبلاصتها ... ممتيقاش اش داكشي ...واش شبح ؟ ولا خيال ؟ ... قلبها كان غيسكت ... هذا كلب كحل وباين متوحش وكبيييير ... عينيه كيشعلو ... حاولات تغوت ... ولكن مقداتش من كترة الصدمة ... الحل الوحيد هو الهروب ... بقات كتجري بلا عقل حتى حسات بالألم فالرئة ... مشات نيشان لكوخ جود ... وبقات كتغوت : جووووود جوووووووود دخلني دخلني !!!! تفووو غيكون ناعس ونعاسو ثقييل .. مكاين حتى شي ضو مشعول !! اوووف عنداك ميكونش لاداخل ! ولا يكون عند ديك ناومي ... اوووف ياربي اش غنديير !!! عنداك يكون داك الكلب مورايا ....
تحل الباب فجأة ... حاولات تهضر ولكن الخوف كان مسيطر عليها ... كولها كترعد وحاطة يديها على قلبها
جود : نتي ؟؟ اشنو واقع ؟ تابعك شي حد ؟
نادين (شهقات) : سمحلي ... كلب .. كلب
جود : كلب ؟ اووف
دخلها للكوزينة بحال شي بنية صغيرة ... وسد الباب برجليه .. جلسها فوق الكرسي .. وشعل القنديل .. وحطو فوق الطبلة ..
نادين (كتلهث) : ماكنتش عارفة .. ماكنتش عارفة واش كاينين كلاب هنا !!
جود : كاينين فالغابة .. ولكن مكتجيش بزاف ... قلييييل فاش كتجي .. قولي ليا اشنو وقع ؟؟
نادين : ماجانيش النعاس ... حيت كان فيا الجوع ... نضت طيبت وملي خرجت لبرا ... شفتو
جود : اشنو طيبتي ؟
نادين (شافت فيه باستغراب ) : اللحم ... والفرماج ... ولكن ...
جود : الكلاب كيعجبهوم اللحم ... اقدر الريحة هي لي جابتو
نادين : اوا راه ماراجعاش للكوخ ... هاد الليلة
جود : راه غيكون مشا ... يلاه نوصلك .. معندك مناش تخافي ...
نادين (صرطات ريقها ): مغنرجعش ... واش مكتسمعش ؟؟ مغنتحرك من هنا حتى طلع الشمس
بدات سنانها كترعد ... ومشا صاوب قهوة دغيا ومدو ليها ... ولكن رفضات ...
جود : خودييه !!
نادين : مكتعجبنيش القهوة بالليل !!
جود : مكيهمش واش كيعجبك ولا لا ! شربييه ... نتي مصدومة دابا !