الجزء 25 :
جود(بلا ميشوف فيها ) : اه عفاك ...
حبسات العاصفة ملي قربات تشرق الشمس ...كانت نادين واقفة بوحدها على الشاطئ ... ومدورا عليها ايزار ... وكتشوف فسامنتا ناقلينها للطوافة ... صاحب جود وصل مع ممرضة مع الفجر ... وغياخدو الأم وولدها للمستشفى فالجزيرة الرئيسية ...
سامنتا : بسلامة نادين ... عطي لجود عنوانك ... بغيت نزورك
نادين كتافات بابتسامة وكتلوح ليها بيدها صافي ... حيت تأثرات بهاد الموقف .. ملي مشاو ... ضارت باش ترجع ... وهي غير جارة رجليها .. طلعات للدروج وسنانها كيترعدوا ... مشات شعلات العافية وكتنشف حوايجها ... ومشات جمعات حوايجها ... وملي ترجع ناومي غطلب منها باش توصلها لكاستريس .. ومن تماك غتاخد طيارة لفلوريدا عاد للندن ... مبقات تاحاجة هنا من غير الحزن ... مشا للكوزينة كتكب ليها القهوة ... وشي حد كيدق الباب ... مشات تشوف شكون .. كان جود لي عند الباب ووجهو مخطوف
جود : واخا ندخل ؟
نادين مصدقاتش اش كتسمع ! فيناهي العجرفة والغرور لي ولفاتهوم فهاد الراجل ؟؟
شارت ليه باش يدخل بلا ماتهضر ... ودخل ومعاه ريحة الجزيرة ... السما كانت رمادية وكولشي رمادي ... سدات الباب وراه .. وتقدمات للموقد ووقفات وضهرها ليه ... غصة فشكااال طلعات لحلقها ... وبصعوبة قدرات تصرطها .. كانت غتهمس بكلمة : كنبغيك ... كنبغيك ... ولكن التوتر خلا صوتها يبان قاسح ..
نادين :اشنو بغيتي ؟
جود (شاف فيها بعينيه الزرقين .. والبؤبؤ ديالو كان متاسع ): جيت نشكرك حيت عاونتي سامنتا
نادين : اوه ...
بدات تعاير فراسها ... لهاد الخيبة دالامل ... اش كانت كتسنى ؟ يدخل ويهزها لشي بلاصة واعرة على عود بيض ؟؟
نادين : كنت فرحانة بزاف حيت كنت تماك ... كانت تجربة زوينة ولأول مرة
جود : ريحة القهوة زوينة
نادين : بغيتي كاس ؟
جود : اه ... شكرا
نادين (مشات كتكب ليه كاس ) : مع السكر .. ولكن بلا حليب ياك ؟
ماجاوبهاش ... سمعات غير صوت مخنوق ... ضارت كتشوف فيه وجمدات فبلاصتها ... كان حاط مرافقو على الطبلة .. وراسو بين يديه ... ومغطي عينيه بالكفين ديالو ... وهي ممتيقاش اش كتشوف واش كتسمع ... الصوت المخنوق مرة أخرى ...
طاح السكر من يديها ومشات كتجري لعندو وركعات حداه .. وكتحاول تشد يديه وتبعدها على وجهو ...
نادين : ماالك ؟؟ جود عفاك قولي اش واقع ليك ؟ ....
جود (بصوت غليض ومخنوق) : سمحيلي ... سمحيليا ... ماكانش عليا نجي لعندك .. ولكن خاصني نهضر مع شي واحد ...
نادين (بشوية خلاتو ... ومشات جلسات فكرسي مقابل معاه .. وهي مبعداتش عينيها عليه ) : أنا هنا ا جود ... قوليا !
YOU ARE READING
الحب التائه
Short Storyقصة جديدة (صراحة كنت كتبتها ف 2018)... تحمل في طياتها الرومانسية ... الدراما ... الحزن ... التشويق ...الفرح ...الغيرة ... والأجمل أن القصة كدور فمكان هادئ وراقي وجو ساحر ومشمس ☀🌈 ... لأي واحد أو وحدة كيعجبوه الجزر والأجواء الصافية والهادئة ميترددش...
