#lolo
#لولو_محمد
(((((((((((بكابوزه ))))))))))))))
الحلقه السادسه
كامل / مباجرهاش بس انت مش غريب دانت اخويا يا جدع وبعدين امك و اختك مش غرب و هيحافظوا عالحاجه
معتز/ والله يا كامل انت فاجئتنى و كمان بتحرجنى
كامل/ بس يا اهبل بكره هجيبلك المفتاح
معتز/ لا خليه لما نشوف هيسافروا امتى اصلا
سيد/ تصدقوا يا عيال احنا لو ايه بالذى حصل مفيش حاجه هتفرق بينا
..................................
معتز/ عيب عليك يا جدع داحنا اكتر من اخوات
كامل/ فاكر ياض منك له لما اتقفشنا بنشرب سجاير فى حمام المدرسه
معتز/ انتوا السبب ياولاد التيت انا مكنتش عاوز
سيد/ هههههههه فاكر يوميها فضلنا نغيظ فيك و نقول انك عيل و خايف فالدم ضرب فعروقه و شد السجاره و لسه بيسحب هوب الاستاذ رمزى بتاع التاريخ دخل
معتز/ يا جدع دا القفا اللى اخته يوميها لسه معلم وربنا
كامل / هههههههههههه و لا لما روحنا اهلينا كملوا علينا
سيد/ هههههههههههه الحمد لله اننا بطلنا القرف ده بدرى بدرى
معتز/ على رايك بلا قرف
كامل / بس منكرش بتيجى عليا اوقات بيبقى نفسى اوى اشرب سجاره
معتز/ بجد
كامل / اهو حاجه بتنفخ فيها همك
سيد/ انت اللى بتقول كدا
كامل / قصدك ايه
سيد/ يعنى عماره على اول الشارع و صيدليه و الدكتور راح و الدكتور جه دا غير شقه اسكندريه و عربيه دا غير ابوك و امك اللى شايلينك من عالارض شيل ناقصك ايه
كامل/ تصدق و تؤمن بايه يا مؤمن
معتز/ لا اله الا الله
كامل / كل ده ناقص منغيرها
معتز يحط الدامبل من ايده و يتعدل / لا كدا الحكايه هتحلو هى مين بقى
كامل / هههههه مش عارف والله بس اكيد هلاقيها
معتز/ ماشى يا صاحبى بس ابقى اعزمنا عالفرح
كامل / وانت ياد يا سيد مش هتنجز بقى
سيد / قريب ادينا بنفنش اهو فى البياض
كامل / ربنا معاك
سيد/ ادعى بزمه لحسن انا ضهرى نشف مالنوم فى الصاله هنا
معتز/ ربنا يسهلك يا سيكا
.........
فى البيت معتز يدخل
بسمه/ انتوا كنتوا بتتمرنوا و لا جايبين بنات
معتز/ افندم
بسمه/ ايه الدحك دا كلو دانا سامعه صوتكوا من هنا
معتز/ وهو احنا مندحكش الا لو معانا بنات و بعدين ايه جايبين بنات دى اساسا هو احنا بتوع كدا برضه
بسمه/ و انا اش عرفنى ياخويا
معتز يقرب من بسمه اوى و يضربها على راسها من ورا
بسمه/ اه
معتز/ اتعدلى
بسمه / طبعا هتدخل تستحمى و تلبس و تنزل الصلاه و ترجع تفطر و تنام و تصحى تنزل الشغل و ترجع تستحمى و تغير و تتغدى و تنزل الشغل و ترجع تستحمى و تروح الصاله و ترجع تستحمى و تنزل الفجر و هكذا و هكذا
معتز/ الدنيا حر و انا بعرق ايه هتعدى عليا الحوما
بسمه/ لا بس متسبليش كوم هدوم اغسل و انشر و اطبق كل يوم انا مش خدامتك
معتز يتعدلها / حقك عليا متغسليهمش
بسمه/ يا سلام و لما مغسلهمش و متلاقيش حاجه تلبسها
معتز/ ماما هتغسلهم و لو مغسلتهمش هبقى انزل عريان متشغليش بالك انتى
بسمه/ يا سلام يعنى ياما ماما تتخانق معايا ياما تفضحنى و فى الاخر تقولى مشغلش بالى
معتز/ مالك يا بسمه
بسمه/ مفيش
معتز/ لا بجد مالك بتجرى شكلى ليه فى ايه
بسمه تعد عالكنبه / مفيش خش استحمى و انزل
معتز يقعد جنبها / انتى اتخانقتى مع بابا
بسمه/ لا
معتز / امال مالك
بسمه/ قولتلك مفيش و قوم من جنبى ريحتك هتموتنى
معتز/ صبرنى يارب استحمى و ابقى نضيف مش عاجب اعرق و ابقى معفن مش عاجب
بسمه تبتسم
معتز/ هى طالبه معاكى جنان قوليلى انا فى الجنان محصلتش انكش شعرى و اقطع هدومى و اروش اهلك عادى
بسمه تدحك / ههههههههه
معتز/ مالك يا بت
بسمه/ زهقانه من ساعه مخدت الاجازه و انا فى البيت مسح كنس طبيخ غسيل زهقت
معتز/ انتى مش خرجتى النهرده مع صحباتك
بسمه/ اه روحنا نتفرج على لبس و كالعاده مفيش حاجه عدله مقاسى و ماما هتاخدنى لام ممدوح تفصلى بلوزتين و جيبه للكليه يا فرحتى
معتز/ اه فهمت
بسمه/ عمرك مهتفهم انت بتدخل اى محل تشترى اللى يعجبك لكن انا لا
معتز/ لا فاهم بجد و حاسس كمان
بسمه/ و اخر المتمه ربنا يرزقك بشويه عيال زباله يختموا اليوم صح
معتز/ كدا مش فاهم
بسمه/ لو عايز تعاكس الحلوين اهم عاكسهم الله ايه الجمال ده يا ارض احفظى معليكى اموت انا و اعيد السنه اي هبل ليه عشان تعاكس واحده تجرح فيا انا مش عاجباك خلاص انسانى ركز فى اللى عاجبينك انا ذنبى ايه
معتز/ بسمه
بسمه تدمع / ليه كل مره اخرج مالبيت الناس تعمل معايا كدا ليه مش سايبنى فى حالى ليه عنيهم دايما على بطنى هو انا باكل من جيوبهم
معتز/ بسمه كفايه
بسمه تعيط/ حتى صحباتى بيدحكوا لما الناس بتعلق مهم ليهم حق برده مهو الكلام كان يدحك اى حد مكانهم كان هيدحك اى حد غيرى انا كان هيدحك بس كلامهم بيوجعنى انا مخترتش اكون كدا
معتز/ طب بس اهدى
بسمه / انا مش عاوزه لبس و مش عاوزه كليه انا بس عاوزه اموت
معتز/ ليه يعنى ميولعوا كلهم ليهم عندك ايه
بسمه/ سهل تقول كدا انت مفيكش غلطه كل البنات بتموت فيك
معتز/ بجد
بسمه/ طبعا انت فاكرنى صغيره مفيش واحده بتشوفك غير لما تتهبل و انت اللى حالقلهم كلهم لكن انا مش لاقيه كلب جربان يهبهب عليا
معتز/ يهبهب و جربان كمان
بسمه/ حاسب يلا لحسن دى فاضلها بونبونايه و تنفجر فى وشنا وانا بقول الارض بتتهز ليه امسك نفسك ياض دا زلزال تسعه رختر انتى ازاى خارجه معاها مش خايفه تاكلك
معتز/ خلصتى ندب
بسمه / قوم من جنبى امشى انا داخله انام
معتز/ ماشى انا هقوم بس عاوز اقولك انك الوحيده اللى تقدرى تغيرى كل ده
بسمه/ خسى اسهل كلمه الكل بيقولها خسى بطلى اكل انتوا فاكرينها سهله
معتز/ لا مش سهله بس لو عاوزه تخسى لازم تتعبى و لو مش عاوزه يبقى لازم تتصالحى مع نفسك و تبصى فى المرايه بفخر و تشوفى الجمال الحقيقى اللى جواكى و لو كل الناس مشافتوش انتى لازم تشوفيه فاهمه ولا لا
بسمه/ انت الوحيد فى الدنيا اللى شايف الجمال ده اشمعنى انت
معتز/انا اللى مستغرب ازاى محدش شايف الجمال ده و لا حتى انتى ..... ينهار ابيض فاضل خمس دقايق عالاذان اوعى بقى انا لو ملحقتش استحمى الصلاه هتقلب بجنازه سقوط عشرات القتلى و الاف المصابين بسبب رائحه عرق معتز نبيل
بسمه/ هههههههه اتفضل
معتز/ احنا مخلصناش كلامنا فى الحوار ده لينا قاعده نشوف الحوار ده ماشى
بسمه تهز راسها
........
عالفطار بعد الصلاه
معتز/ صحيح كامل قالى انه هيدينى مفتاح شقته فى اسكندريه
بسمه/ بجد
معتز/ شوفوا تحبوا تسافروا امتى عشان اخد منه المفتاح
نبيل/ الواد كامل ده واد محترم وربنا روحتله امبارح اقيس الضغط و مرضاش ياخد منى فلوس
معتز / و قال لو عوزتى اى حاجه فى الدراسه هو فى الخدمه
بسمه/ شكرا
اخلاص / طب ها المصيف امتى
نبيل/ انا مش فاضى اتفقى مع معتز ياخدكم و خلاص
معتز/ انا مقدرش اغيب مالشغل و لو يوم واحد المدير مش طايقنى اصلا متنسيش انى غبت كل ايام امتحاناتك يا بسمه
بسمه/ مفيش مشكله مش لازم اصلا
معتز/ بصى يا ماما ايه رايك نسافر الخميس بالليل بعد الشغل علاطول و ارجع انا السبت الصبح عالشغل و ابقى اجى كل يوم بعد الشغل
نبيل/ و ليه الشحطته تسافر كل يوم رايح جاى طب مكفايه خميس و جمعه و ترجعوا كلكوا السبت
معتز/ عشان ينبسطوا يا بابا مفيهاش حاجه
اخلاص/ انا مع ابوك يابنى تطلع مالشغل يوم الخميس الساعه سبعه نكون جاهزين نسافر كلنا نتفسح بالليل و الجمعه الصبح ننزل البحر و نتفسح طول الليل و نرجع كلنا السبت الصبح ايه رايكوا
معتز/ بس بسمه
بسمه/ انا شايفه ان كدا احسن اصلا هتسافر و انت تعبان و هترجع عالشغل و انت تعبان حرام كمان تسافر و ترجع كل يوم كفايه يومين حلو اوى احسن من ما فيش
معتز/ خلاص هاخد منه المفتاح على الخميس الجاى
بسمه/ خلاص ماشى
اخلاص/ تمام متيجى يا نبيل غيرلك جو دا يومين بس
نبيل/ ربنا يسهل اما نشوف
،........
فى الصيدليه
كامل/ ازيك يا برنس
معتز/ هنسافر الخميس يا معلم لو معندكش مانع
كامل / و ادى المفتاح يا صاحبى هتلاقوها نضيفه انا كنت هناك قريب
معتز/ هتلاقيها زى الفل يا صاحبى
كامل / فاكر العنوان ياض و لا اكتبهولك
معتز/ فاكره طبعا
كامل / ميتوهش و لو فى اى مشكله كلمنى و لو عاوز ممكن اجى اوصلكم كمان
معتز/ لا ياعم مش عاوزين نتعبك كفايه علينا خدماتك ربنا يقدرنا و نردهالك
كامل/ اطلع بره ياله بدل مضربك
معتز/ هههههه ماشى يا دكتره
........،
فى البيت يوم الخميس الفجر
اخلاص / هى شنطه واحده هناخدها يلا انا حطيت طقم خروج ليا و طقم بيت و طقم للبحر و عملت كدا لابوكى
معتز/ ثوانى اجيبلك هدومى
بسمه/ خدتى فوط كفايه
اخلاص/ طبعا
بسمه/ طب شباشب
اخلاص / كويس انك فكرتينى روحى لميهم على مشوف الاكل اللى عالنار
معتز/ ادى هدومى اكل ايه
بسمه/ دى سندوتشات كفته و بانيه للطريق
معتز/ هتعملوهم من دلوقت
بسمه/ لا هنتبلهم بس و نسويهم و نعبيهم على خمسه كدا
معتز/ ماشى
نبيل/ متنسيش كيس الدوا بتاعى يا اخلاص
معتز/ شواحن الموبايلات يا بسمه
بسمه/ كلو تمام يا جماعه
معتز / تمام انا هدخل انام شويه بقى عشان انزل الشغل
بسمه/ تتمسى بالخير
معتز يدخل ينام
نبيل/ انا كمان هنزل هتعوزى حاجه تانى يا اخلاص
اخلاص / لا يا حبيبى تسلملى متتاخرش
نبيل/ انا مش هتاخر سته بالدقيقه هكون هنا
بسمه/ سلام يا بابا
نبيل ينزل
اخلاص / انا تبلت الفراخ و المفروم ابقى صبعيهم بقى و احشى حله الكرنب دى اعملى صينيه رز معمر و روقى الشقه و خلصى الغسيل
بسمه/ متنسيش و انتى طالعه تجيبى الحاجات اللى فى الورقه عشان ناخدها معانا
اخلاص / حاضر سلام
.......
فى الشارع قدام البيت
نبيل/ ازيك ياسطى سيد
سيد/ ازيك يا استاذ نبيل
نبيل/ التاكس اخباره ايه
سيد/ كلو تمام هيوديكوا و يجيبكوا بالسلامه
نبيل/ كتر خيرك حسابك كام
سيد/ عيب يا استاذ دا تاكس المستشار
نبيل يطبطب على كتف سيد و يركب التاكس و يمشى
....................
شويه و اخلاص تفتح الدكان سيد يجرى يساعدها
سيد / صبح الخير يا ست اخلاص
اخلاص/ صباح الخير يا سيكا عجبك البتنجان امبارح
سيد/ تسلم ايدك وربنا الواحد لولاكى كان بطنه نشفت من اكل السوق
اخلاص/ انت ابنى يا سيد
سيد/ الله يخليكى يا ست الكل انا هروح الورشه لو عوزتى ايوتها حاجه اندهى بس
اخلاص / متحرمش
.......
فى البيت فوق
معتز يصحى بسمه قاعده بتحشى حله كرنب عملاقه عالطبليه
معتز/ ازيك يا بسمه بتعملى ايه و ايه الريحه دى
بسمه/ دا رز معمر
معتز/ طب الكفته و البانيه
بسمه/ للطريق
معتز/ و المحشى
بسمه/ فطار بكره انا هحشى بس مش هسويه وفى بطه مسلوقه فى الفريزر بشوربتها
معتز/ محشى و بط عالفطار تمام طب الرز المعمر
بسمه / دا للعشا هناك متبله شويه لحمه فى الفريزر هعمل صينيه بطاطس جنب الرز
معتز/ هههههههههه ايه دا كلو احنا رايحين اسكندريه مفيش سمك
بسمه / عشا بكره سمك فاى حته بقى
معتز/ و الغدى هيكون ايه بقى بالصلاه عالنبى
بسمه/ مكرونه بشاميل وفراخ و شيبسى حاجه خفيفه لما نرجع مالبحر
معتز / طب السبت و احنا راجعين مفيش اكل و لا ايه
بسمه/ نبقى نقضيها اى حاجه بقى انا تعبت حرام عليكوا انتوا ايه مبتزهقوش مالاكل
معتز/ ههههههه لا والله عندك حق هو حد قالكوا ان مفيش هناك اكل
بسمه تبصله/ انا مليش دعوه ماما قالت كدا انا ضهرى اتقطم
معتز/ ماشى انا نازل لحسن هتاخر الساعه سبعه بالثانيه تكونوا قدام المحل ماشى
بسمه/ ماشى حاضر
.......
قدام المحل
معتز واقف و التاكس يوصل معتز يركب مكان ابوه و يسوق و يطلعوا على اسكندريه
فى الشقه
اخلاص / حمدالله عالسلامه .... بسم الله ما شاء الله حلوه و شرحه و برحه
بسمه/ دى اكبر من شقتنا
معتز/ جوه اوضتين واحده ليكى و واحده لبابا و ماما و المطبخ و الحمام من هناك و الكنبه دى لما بتتشد كدا بتتفتح سرير انا هنام هنا
نبيل/ بسم الله ما شاء الله شكها مفروشه كويس
معتز/ فيها كل حاجه انا جيت هنا كتير مع كامل كل حاجه فركه كعب
بسمه/ طب يلا نتغدى و ننزل بقى نتفسح
نبيل/ امال السندوتشات اللى طول الطريق دى ايه
بسمه/ خلاص نتعشى يلا بقى الساعه عشره و نص
نبيل/ هنا عشره و نص دى المغرب عندنا
اخلاص / طيب انا هدخل اسخن و نتعشى و ننزل
معتز/ انا بقول ننزل و ناكل بعدين
نبيل/ انزلوا انتوا انا هريح ضهرى واجعنى مالسفر
معتز و اخلاص و بسمه ينزلوا و يروحوا خالد ابن الوليد زحمه موت
معتز / عيشوا بقى وانا هستناكوا عالقهوه دى اشرب كوبايه شاى
اخلاص و بسمه يلفوا عالمحلات و بعد وقت طوووووووويل يرجعوا
معتز/ ايه اشتريتوا السوق كلو و لا ايه دا الفجر فاضله ساعه و ياذن
اخلاص / فى شويه حاجات حلوه اوى هوريهالك لما نروح
معتز/ مالك يا بسبوسه زعلانه ليه
بسمه مبتردش
اخلاص / هاتلنا ايسكريم يا معتز عشان نصالح بسبوسه
معتز/ ملقيتيش حاجات حلوه و لا ايه
بسمه مبتردش
معتز/ طب ايه رايك اعزمك على حواوشى ريحته هبلانى مالصبح
بسمه/ مش عاوزه اكل مليش نفس
اخلاص / يابت متكبريش الموضوع و بعدين مالها ام ممدوح مهى اللى مفصلالك البلوزه اللى عليكى
أنت تقرأ
بكابوزه بقلم / لولو محمد ( كامله )
Romanceمعاناه بنت مراهقه مع السمنه و البحث عن الحب رومانسي كوميدى
