بكابوزه بقلم / لولو محمد ( كامله )

الحلقه ٢١

#lolo #لولو_محمد
((بكابوزه))))))))))))
الحلقه الواحد و العشرون
فى الصيدليه
كامل بيتكلم فى التليفون / طب انا كدا كدا كلها نص ساعه و هقفل استنى و اقفل و اواصلك .... خلاص خلاص حاضر .... يا ستى قولت حاضر .... حرف كمان و هقولك روحى لوحدك ..... سلام ياختى
بسمه/ اهدى بس مالك
كامل / بصى كفايه كدا  هقفل النهرده بدرى و روحى
بسمه/ انا فاضلى الكرتونه دى بس هرصها و خلاص
....................................
كامل / انا مش عاوز اسيبك لوحدك فى الصيدليه دلوقت الوقت متاخر
ايمان تدخل و شايله الواد و كامل ياخده منها
بسمه  / امشى انت متقلقش انا هخلص و هقفل و همشى
ايمان / يلا يا كامل اتاخرت
كامل / انا مش هتاخر هاجى علاطول
ايمان / سلام يا بسمه
بسمه/سلام يا ايمى
كامل يمشى من هنا و شويه و حنفى و رجالته يدخلوا الصيدليه بسمه تشد المفاتيح من درج الفلوس
حنفى / مساء الخير يا ست الدكتوره
بسمه/ مساء النور خير
حنفى / هو الدكتور مش هنا و لا ايه
بسمه/ بيجيب حاجه من اول الشارع و زمانه جاى عاوز حاجه
حنفى  يطلع شريط دوا فاضى / انا عاوز ده
بسمه/ معاك روجته
حنفى/ ليه بقى السؤال اللى بيزعل ده
بسمه/ الدوا دا جدول و مبيخرجش غير بروجته حتى بص
بسمه تفتح الكراسه حنفى يقطعها و واحد من اللى معاه يشد الباب الصاج و يفضل بره و يفضل حنفى وواحد كمان مع بسمه جوه
.........
فى العربيه عند كامل
ايمان/ والله البت بسمه دى بت حلال مصفى
كامل / اه والله سهلت عليا كل حاجه و بسم الله ما شاء الله ذكيه اوى تعرفى انها فى الفتره الصغيره دى ذاكرت اطلس الادويه كلو و فهمت الشغل ماشى ازاى و تقريبا خلاص معدتش محتاج اراجع وراها او اتابعها
ايمان/ طب والله كويس بس تفتكر لما تتجوز جوزها هيسيبها تنزل الصيدليه تانى
كامل / هى بسمه هتتجوز
ايمان/ اكيد هتتجوز امال هتفضل قاعده كدا علاطول طب دانا سمعت ان مامتها مش ساكته خالص فى الموضوع ده
كامل / بس بسمه لسه صغيره اوى عالجواز
ايمان/ الصغير بكره يكبر و البنت حلوه و متتعيبش و الف و ميه يتمنوها
كامل / انتى بتلمحى لايه
ايمان/ و لا حاجه انا بس بقولك خساره تعبك فى تعليم بسمه يروح هدر بكره تتجوز و جوزها يفتحلها صيدليه تنافسك و انت ياولداه تعد تدور على  واحده  تعلمها الشغل من اول وجديد
كامل / الارزاق على الله ياختى و انزلى بقى وصلنا عشان اللحق ارجع للبت الغلبانه المتزنبه فى الصيدليه لوحدها دى
ايمان/ سلام يا خويا بس فكر فى اللى قولتهولك
........
فى الصيدليه
بسمه/ انت بتعمل ايه يا حيوان انت
حنفى / كدا انا هزعل منك انا جاى  و قصدى خير و ربنا هديكى الفلوس و هاخد الشرايط و همشى و يا دار مدخلك شر
بسمه/ انا هطلب البوليس
اللى مع حنفى يشد الكرسى و يخبط الكونتر يكسر الزجاج عالارض و حنفى يعدى لبسمه الكونتر جوه
حنفى / يا ست الكل انتى برده بنت حتتى و مش عاوز ائزيكى
بسمه/ انت متقدرش تعمل حاجه انت لو قربتلى معتز هيقتلك
حنفى / انتى شايفه معتز هنا معتز مش موجود و الباب مقفول وانا و انتى و الشيطان تالتنا
بسمه/ انا اسفه بس طلبك مش عندى
حنفى يفتح مطوته / انا لحد اللحظه دى مؤدب بس انتى فهمانى غلط انا هاخد اللى انا عاوزه بالزوق بالعافيه هاخده فلو عاوزه الوش الحلو ده ميتشرحش النهرده اصرفينى
حنفى يزنق بسمه و يحط المطوه على راقبتها
بسمه/ اخرك اعمله عشان معتز زمانه جاى و هيربيك كويس
حنفى يشدها من طرحتها و يزقها فى الارض الطرحه تطلع فى ايده و يبدا يكسر فى الصيدليه هو و اللى معاه
.......
عند الورشه بتاعه سيد
معتز يركن العربيه
سيد/ ازيك يا متر  طالع الصاله
سيد يقفل الورشه
معتز/ اه هطلع الحاجات دى لبسمه و انزل علاطول
سيد/ امال مجبتهاش معاك مالصيدليه ليه
معتز/ الصيدليه مقفوله انا لسه جاى من عليها
سيد/ انت بتقول ايه بسمه مروحتش اصلا
......
عند الصيدليه
كامل يوصل الصيدليه يلاقى واحد واقف عالباب و الباب مقفول و صوت تكسير جوه
كامل / هى حصلت يا ولاد الحرام
كامل يضرب الواد اللى عالباب و معتز و سيد يجو يساعدوه و  فجاه الباب يتفتح من جوه و حنفى و اللى معاه يطلعوا يجروا معتز يجرى على جوه و سيد و كامل يطلعوا يجروا ورا حنفى معتز يدخل يلاقى بسمه بتنطر الزجاج عن طرحتها و بتلبسها
بسمه /انا مكنتش خايفه كنت عارفه انك هتيجى
بسمه تقع فى الارض فاقده الوعى
معتز يجرى عليها و يحضنها / بسمه لا ياولاد الكلب فوقى يا بسمه
معتز يحاول يفوق بسمه تفتح عينها و تحضنه جامد و تعيط
بسمه/انا كنت عارفه انك مش هتسيبنى كنت عارفه انك هتيجى
معتز / عملوا فيكى حاجه حد منهم حط ايده عليكى ورحمه امى لموتهم الكلاب و لاد الكلاب
بسمه/ انا كويسه مقدروش يعملوا معايا حاجه كانوا عارفين انك هتيجى مخلتهمش ياخدوا حاجه مالصيدليه
معتز/ ملعون ابو الصيدليه
كامل و سيد يدخلوا يلاقوا معتز قاعد فى الارض و بسمه قاعده على رجله و حضناه و بتعيط
كامل / هى كويسه
معتز/ انا الغلطان انى امنتك على بسمه اصلا انا الغلطان
معتز يقوم و يقوم بسمه
معتز/ يلا يا بسمة عالبيت
كامل / انا قولتلها تروح
معتز يرجع و يزق كامل يوقعه فى الارض
معتز / انت تخرس خالص
سيد/ اهدى يا معتز بسمه كويسه
بسمه/ كانوا عاوزين جدول
كامل/ انا الغلطان حقك عليا مكنش المفروض اسيبك لوحدك
معتز / و اكيد الغلطه دى مش هتتكرر يلا يا بسمه عالبيت
معتز ياخد بسمه يروحها و سيد يشد الباب الصاج و يقفل الصيدليه
كامل / بتعمل ايه
سيد / بقفل الصيدليه
كامل / والله انا روحت اوصل اختى متاخرتش وربنا
سيد/ انا عارف هى الظروف جت كدا بس اللى انا متاكد منه ان اللى حصل النهرده مش هيعدى على خير
كامل / انا قولتلها تروح و كنت هقفل و هى صممت تخلص انا بجد مش عارف اقول ايه
سيد يطبطب عليه / مكنتش غلطتك و هى كويسه و ان كان عالصيدليه
كامل / فى داهيه ياعم الصيدليه لو كان جرالها حاجه مكنتش هسامح نفسى ابدا
سيد/ تعال بس معايا شويه اما نشوف معتز هيعمل ايه
.......
فى البيت
بسمه  / انت رايح فين
معتز/ راجع تانى
بسمه/  هتسيبنى لوحدى
معتز / العيال دى لازم تتربى
معتز يشد الباب و يقفل و ينزل يلاقى سيد و كامل مستنينه تحت معتز يسيبهم و يمشى و سيد يشده
سيد/ انت رايح فين
معتز/ لو كانت اختك كنت طلعت نمت يا سيد
سيد/ مهى اختى. برده ياجدع
معتز/ بص انا مش طايق روحى و لا طايق ابن الكلب اللى جنبك فسيبنى بدل مطلع عفاريتى عليكوا
كامل / مقبوله منك بس والله
معتز/ انت ليك عين تتكلم اصلا
كامل /والله كنت بوصل اختى
معتز / يعنى اختك اهم من بسمه مكنت روحت بسمه و بعدين روحت اختك و لا بنات الناس ملهمش قيمه عندك
كامل / وربنا قولتلها
سيد/ يا معتز كامل عمل اللى عليه و اللى حصل كان غصب عن الكل و الحمد لله ان بسمه كويسه اهدى بس
معتز / و انا مش ههدى الا لما اموت ابن الكلب ده و اللى معاه
كامل/ و احنا معاك بس انك تروحلهم دا انتحار
سيد/ بص بسمه تخصنا زى متخصك و احنا معاك فاللى تعمله بس صدقنى العيال دى مش هيقدروا يعتبوا الحاره تانى و لو فكروا احنا اللى هنقف المرادى قبل منك
معتز/ انا مقولتلكوش تيجوا معايا
كامل / ليه ياعم واحنا يعنى هنسيبك لوحدك
نبيل يدخل
نبيل/ اهدى يا معتز تعال معايا فوق نتكلم
معتز/ سبنى يا بابا ابوس ايدك
نبيل/ اسمع الكلام يا معتز اطلع الشارع كلو صحى
معتز/ ميولعوا
نبيل/ اطلع يا معتز بقولك البت مموته روحها مالعياط فوق
معتز يهدى و ينفخ  و يضير يضرب كامل بوكس يوقعه و يطلع
سيد/ ههههههههه قوم قوم
كامل / عاجبك كدا
سيد/ قوم ياخويا قوم
........
فى البيت
معتز يدخل يلاقى اخلاص حاضنه بسمه و بسمه بتعيط
نبيل/ خش نام والصباح له عنين
معتز/ انت بجد هتعرف تحط راسك عالمخده و تنام
نبيل/ اه هنام عشان تعبان و طالع عينى طول اليوم هنام عشان الضغط اللى على عندى من عمايلك انت و الست هانم
معتز/ عمايلنا
نبيل/ طبعا اللى يسيب اخته لحد نص الليل بره البيت يبقى بيعرضها فى فترينه
معتز/ انت دا رايك فيا
نبيل/ اديك ياخويا شوفت سى كامل صحبك الداكتور سابها و راح يوصل اخته كل واحد ملوش فى الدنيا غير اخته
بسمه/ يا بابا كامل قالى روحى
نبيل/ و انتى مروحتيش ليه يا حيلتها كنتى قاعده لوحدك فى الصيدليه ليه
بسمه/ يا بابا انا مغلطتش
نبيل/ بكره سيرتنا تبقى على كل لسان و نطاطى راسنا من كتر اللى هنسمعه و اللى مشافش يا سى معتز اهو سمع صوتك و انت بتجعر تحت
معتز/ انا مصدوم ماللى بسمعه
نبيل/ انا تعبت منك و منها عاوزين تموتونى ناقص عمر و انتى يا زفته الطين خلاص الضمير حبك و الشغل نقح مترمى الشريط فوش امه تمشيه لكن ازاى الست هانم لازم تشرب من عصير الشجاعه بتاع سى معتز و تقفله عاجبك كدا
اخلاص/ اهدى يا نبيل صحتك
نبيل/ انهى صحه هو حد حاسس بحاجه مانتى شايفه خلفه تجيب الهم
اخلاص / خش ياخويا ارتاح و الصباح رباح
نبيل/ مانا هدخل طبعا امال هعد مع خلفه الهم دى اعمل ايه
اخلاص و نبيل يدخلوا الاوضه و معتز بعصبيه يطلع الغطا و ينام عالكنبه و بسمه واقفه تتفرج
........
فى الصاله
كامل / انا غلطت كان المفروض اخلى ماما تنزل تعد معاها فى الصيدليه
سيد/ خلاص اللى حصل حصل و الحمد لله انها كويسه
كامل / انا قرفت من المنطقه الزباله دى
سيد/ عزل ياخويا محدش حايشك شوفلك كومابوند متكامل الاركان و انقل فيه
كامل / انا عمرى مكنت هسامح نفسى لو حاجه حصلت
سيد  / خلصنا يا كامل مفيش حاجه حصلت البت زى الفل و معتز بكره هيهدى و بكره تشوف
كامل / انا مليش مزاج انا هروح انام
سيد/ ماشى امشى يلا
كامل / سلام
........
فى البيت عند معتز
معتز  نايم و متغطى و مدى لبسمه ضهره و بسمه واقفه
معتز / هتفضلى متزنبه كدا كتير
بسمه/ يعنى واخد بالك يعنى
معتز يقوم يقعد / انا مش طايق نفسى هطق
بسمه/ على فكره هو متحرشش بيا
معتز/ منتهى الراحه النفسيه مش عارف اقولك ابه
بسمه/ على فكره انا مش بهزر انا بتكلم جد هو كان خايف منى
معتز/ انا الغلطان بابا معاه حق مكنش المفروض اسيبك و اعتمد على كامل
بسمه/ ممكن تسمعنى
معتز/ وانا بعرف اعمل حاجه غيرها
بسمه/ كامل طلب منى امشى و انا كان فضلى حاجه بسيطه فمرضيتش و اخته كانت نزلت و الواد نايم قولتله يمشى و كنت بقفل و همشى لقيت حنفى دخل و كان عاوز برشام و لما مرضيتش بدا يكسر فى الصيدليه كان فاكرنى هخاف
معتز/ و مخفتيش
بسمه/ تصدق لو قولتلك لا انا قولتله انك هتيجى
معتز/ انتى هبله يا بت
بسمه/ اه والله قولتله كدا كنت واثقه انك هتيجى
معتز يبتسم /و ايه اللى خلاكى واثقه اوى كدا
بسمه/ معرفش كل اللى اعرفه انك دايما بتيجى فكل مره بحتاج حاجه كنت بتيجى فاكيد المرادى هتيجى و شوف سبحان الله جيت
معتز/ هههههه سبحان الله
بسمه/ اهدى كان ممكن يحصل فى اى مكان فى الكليه فى المواصلات فى الشارع
معتز/ مش المفروض انه يحصل ابدا
بسمه/ يا معتز اهدى انت ليه خايف اوى كدا تصدق لو قولتلك انى واثقه ان الكلب ده مرعوب و مش هيعرف ينام النهرده
معتز/ نامت عليه حيطه الكلب ده لو عتب الحته انا هقطع رجله
بسمه/ اهدى انت بس مش عوزاك تنام زعلان
معتز/ عمرك مهتفهمى اللى حاسس بيه انتى لو كان جرالك حاجه انا كنت ولعت فى البلد باللى فيها
بسمه / و الحمد لله محصلش وانا زى الفل اهدى و نام عشان بكره ورانا بلاوى
معتز/ ورانا ايه
بسمه/ كامل صيدليته ادمرت و انت لازم تقف جنبه فى ظروف زى دى
معتز  / انا مش طايق اسمع اسمه
بسمه/ لما هتهدى هتغير رايك يلا نام تصبح على خير
.........
فى الخرابه
واحد/ الليله وسعت يا حنفى
حنفى/ اما انا بمخمخ فى حته دين فكره هتاكلنا الشهد
الواحد / فكره ايه دى
حنفى/ الست الدكتوره
التانى / تانى يا حنفى قولتلك بلاش البت احنا ياما اتشطرنا على الدكتور و كسرنا العياده
الاول / و احنا كان اشعرفنا ان دماغها ناشفه كدا شوفت لما قالتلك معتز هيربيك
حنفى/ انت عارف يازفت انت و هو انا اصلا بفكر فى ايه
الاول / قول يا مريسه
حنفى/ اتجوز الدكتوره
التانى / انت تقلت العيار و لا ايه يا كبير
حنفى/ ليه يا كلب انت هو انا مش قد المقام و لا ايه
الاول / ميقصدش يا حنفى بس دى دكتوره بردك
حنفى/ و انا يعنى صايع مانا سباك قد الدنيا
التانى  / ايوه مهو دى المشكله
حنفى / انا هفهمك يا لوح منك له انا لو اتجوزت البت دى هتجيبلى التموين لحد عندى و منغير قلق
الاول / متزعلش يا ريس بس شكلها هربت منك
التانى / مقولنا مالاول الجوازه مش هتمشى
حنفى/ بعد اللى حصل النهرده هتمشى
الاول / اللى هو ايه و لا مؤاخذه
حنفى / ياهبل انت العيار اللى ميصبش
الاول / لسه مش فاهم
حنفى / هو مين كان جوه الصيدليه
الاول / انا و انت و هى
حنفى / حد شاف ايه اللى حصل جوه
الاول / لا
حنفى / خلاص انا غلطت و جاى قاصد خير جاى اصلح غلطتى
التانى / لا ياعم انت كدا بتلعب بالنار
حنفى / ياض انت انا لو اتجوزت البت دى طاقه القدر هتتفتحلنا
الاول / ياريس البت مش هبله دى بت تقيله و تقيله اوى و مسنوده