بكابوزه بقلم / لولو محمد ( كامله )

الحلقه ١٧

#lolo #لولو_محمد
(((((((((((((بكابوزه )))))))))))))))))))
الحلقه السابعه عشر

معتز / و ملكيش راى ليه عيله نغه ملكيش شخصيه
بسمه / طب اهدى بس
معتز يمسك ايد بسمه جامد 
معتز / اهدى ليه ردى عليا اهدى ليه
بسمه  تدمع/ ايدى بتوجعنى يا معتز
معتز يسيبها / انا اسف بجد مكنش قاصدى 
.................................
بسمه /انا مبعملش حاجه فى دنيتى الا لما باخد رايك الاول بثق فرايك اكتر مبثق فنفسى و طول اليوم بفكر اقولك و لا لا مكنتش اعرف انك هتدايق اوى كدا
معتز / انتى عاجبك اللى اسمه تامر ده فايه
بسمه / مش عاجبنى انا لحد النهرده مكنتش شايفاه اكتر من زميل جدع بيساعدنى
معتز / و ايه اللى جد
بسمه / انه قال انه بيحبنى
معتز / و اى حد يقولك بحبك كدا يلخبطك
بسمه / دى اول مره حد يقولهالى
معتز / يعنى انتى كل اللى بتفكرى فيه فى شريك حياتك انه يقولك كلمة بحبك طب يا ستى بحبك
بسمه / يا معتز انا عارفه قد ايه انت بتحبنى بس انت مش فاهم انا ببص للبنات فى الكليه ببقى نفسى احس انى زيهم نفسى حد يقبل بيا انت فاهم نفسى ارتبط
معتز / كان فين سى زفت من كام شهر ولا البيه مخدش باله منك غير بعد مخسيتى و لبستى اللانسيز
بسمه / معرفش
معتز / انا مش واصى عليكى و رايى فى الموضوع ده ميفيدكيش خصوصا انك مش قادره تفهمى مش عارف اعمل ايه
بسمه / يعنى هتسيبنى
معتز / مفتكرش هقدر حتى لو عوزت بس فكرى شوفى كدا اللى اسمه تامر ده لو كان بيحبك بجد مجاش لاهلك ليه و ياترى لو بيحبك بجد عنده استعداد ان الناس يتكلموا عليكوا
بسمه تبص فى الارض/ مش عارفه
معتز / ارفعى راسك لفوق مفيش حاجه تكسر عينك الا الشمس
بسمه / انا جيتلك عشان عارفه انك هتقولى الصح
معتز / وفرى قلبك يا بسمه للى يستاهله اللى بجد مستعد انه يضحى بكل حاجه عشانك اوعى تقبلى انك تكونى محطه فى حياه اى حد يقف يرتاح فيها شويه و يكمل طريقه حافظى على قلبك لانه غالى اوى عينيه للى بيحبك بجد
بسمه / و اعرفه منين
معتز يتنهد / حسبى الله و نعم الوكيل فيكى يا شيخه ربنا عالمفترى
بسمه / بتكلم جد اعرفه منين اعرف منين ان الشخص ده بيحبنى بجد اعرف منين انى بحبه بجد اعرف منين انه حب حقيقى مش اى كلام اعرف منين انه مستعد يضحى بكل حاجه عشانى اعرف منين كل ده
معتز / لما تلاقيه هتعرفى
اذان الفجر
معتز / وسعى بقى عشان بابا هيصحى
...........
يوم الحنه فى الصيدليه
كامل / عقبالك
بسمه / ميرسى شكرا و عقبالك انت كمان
كامل /  يارب من بقك لباب السما
بسمه / ههههههههههه غريبه مع انى كنت متخيله رد تانى خالص
كامل / لا متقوليش رد ايه بقى
بسمه / متزعلش منى
كامل / مش هزعل قولى
بسمه / انت مرتاح و عندك شقه و عربيه و عندك صيدليه و باباك و ماماتك ربنا يخليهوملك مرتاحين و كل واحد منهم بيشتغل شغلانه مريحه انا والله مش بعد عليك بس مقارنه بسيد و معتز انت كان المفروض اول واحد يتجوز يعنى مثلا معتز معندوش شقه و بيشتغل شغلتين بس عشان يوفر مصاريفى فاهمنى
كامل / بس انتى ناسيه اهم حاجه عشان الواحد يتجوز
بسمه / و هى ؟؟؟؟
كامل / العروسه هى اللى بتكمل كل ده
بسمه / انت عاوز تقنعنى ان عندك كل ده و مش لاقى عروسه ترضى بيك
كامل / انتى الموضوع ملخبط معاكى خالص
بسمه / طب اشرحلى
كامل / تعرفى ليه سيد اتجوز قبلى انا و معتز مع انه اقل واحد فينا فى الامكانيات
بسمه / ليه
كامل / عشان حب الحب يا بسمه بيعمل المستحيل الحب بيلغى اى عقبات
بسمه / بلسم بتقول الحب بيموت بعد الجواز و ماما بتقول الحب بيجى بعد الجواز الحب هو اللغز اللى عمرى مفهمته و لا هفهمه ابدا
كامل / انا قابلت بنات كتير اوى صالونات ماما و اهلى و حتى سيد و هند جابولى عرايس بالهبل بس من اول خمس ست دقايق بحس ان الحوار قفل ياما بتبقى تافهه و مبتعرفش تتكلم او ياما بتبقى شايفه نفسها اوى و فاكره انها ملكه الكون و الكون كله بيدور حواليها او بتبدى الحوار بالماديات او بترفضنى منغير سبب
بسمه / ههههههههه
كامل / لحد النهرده ملقيتش البنت اللى اتخيل نفسى برغى معاها و اسمع قصصها التافهه باقى عمرى
بسمه / تافهه
كامل / كنت قاعد مره مع جوز اختى فبيحكيلى ازاى لازم كل يوم بعد ميروح يعد يسمع المسلسل التركى اللى هو اصلا مش متابعه مش هتصدقى قد ايه الموضوع ده رعبنى
بسمه / على كدا معتز له الجنه
كامل / ليه انتى بتتفرجى عالتركى
بسمه / لا بس بتفرج عالهندى
كامل / هما هبوا بعض هما هبوا بعض
بسمه / معتز بيهتم باقل التفاصيل بيسمع لاتفه المشاكل عمره مقالى انه تعبان او عاوز ينام بالعكس هو اللى كن بيصعب عليا و اقوله كفايه عليك كدا خش نام بقى
كامل / اللى يسمعك بتتكلمى كدا عن معتز يفتكرك بتبالغى مفيش راجل كدا
بسمه / لا فى معتز كدا دايما بقوله يا بخت اللى هتتجوزك لانه صبور و هادى
كامل / اتقى شر الحليم اذا غضب
بسمه / انت هتقولى على قد مهو حنين اوى بس زعله تيت ابن لذينه
كامل / متشوق انى اسمع الوش التانى لمعتز منك
بسمه / قال يعنى عمرك مشوفته متنرفز
كامل / لا شوفته بس عمرى متخيل انك تكونى انتى شوفتيه معتز لما بيتنرفز بيبقى عنيف و مفتكرش انه عمره يكون عنيف معاكى
بسمه / لا طبعا معتز راجل مبيضربش بنات بس بيخاصمنى مش بيتكلم معايا و مش هكدب عليك انا عندى الضرب اهون ملوين مره من انه يخاصمنى
كامل / معقول
بسمه / طبعا ...المهم بغض النظر عن الكلام ده باذن الله تلاقى عروسه تحببك فى انك تسمعلها و هى بتتكلم بالساعات فى حاجات متخصكش خالص و الاهم انك تحبها و تحبك
كامل / ممكن اسالك سؤال شخصى
بسمه / اسال
كامل / انتى حبيتى قبل كدا
بسمه تبص فى الارض بحزن/ لا للاسف
كامل / ياعينى للدرجادى يابنتى انتى عندك كام سنه بكره يجى و يخبط على بابك و فى ايده احلى بوكيه ورد
بسمه / هو مين ده
كامل / الحب يا هبله
بسمه / ههههههههههه
معتز يدخل
معتز/ بتدحكوا على ايه دحكونى معاكوا 
كامل / كنا بنم عليك هى بسمه ليها سيره غيرك
معتز / طب ايه مش هتروح بقى عشان ماما عوزاها تنزل تشترى معاها شويه حاجات للحنه و الفرح
كامل / وربنا مماسكها تروح
معتز يبص لكامل و بسمه و يرجع يبص لكامل تانى
بسمه / هتيجى معانا
معتز يبص لكامل و يسكت
كامل / مالك ياض
معتز / ولا حاجه انا بس مرهق شويه يلا سلام
بسمه تمشى مع معتز
معتز / كنتوا بتدحكوا على ايه
بسمه / عادى كنا بنتكلم عن الحب و عنك و عن سيد و الجواز و كدا يعنى
معتز / بصى يا بسمه انا مش عاوز اى كلب يفتح بقه عنك بكلمه
بسمه / انا معملتش حاجه غلط على فكره
معتز / عارف بس الناس مش طيبين و فاضيين و موارهمش غير الكلام و انتى عارفه انى مبستحملش عليكى الهوى
بسمه / خلاص مش ههزر فى الشغل تانى حاجه تانى
معتز / اطلعى يلا شوفى ماما عوزاكى فى ايه على مبص على سيد
معتز يروح عند سيد واقف مع الراجل بتاع الفراشه
معتز / الف مبروك يا سيكا
سيد / عقبالك يا معلم
معتز / ناقصك حاجه
سيد / خلاص بفنش مع الراجل بتاع الكهربا و الطباخ عند هند مالصبح يخلصوا تعليق الكهارب و اطلع استحمى و اللبس
معتز / ماشى ياعم
سيد / مالك
معتز / مليش فى ايه
سيد / عليا برده مالك يازفت
معتز / مش عارف بس كامل بدا ياخد على بسمه اوى و دا مش مريحنى
سيد / كامل راجل متخفش منه عمره مهيقل معاك
معتز / انا عارف بس الوضع مش مريحنى هزار و دحك
سيد / متحطش فى دماغك دا شغل و اكيد يعنى لازم يبقى فى هزار عاوزهم طول الوقت ده مبوزين ايه الغم ده بص بسمه ست البنات و كامل صاحبنا و راجل متخفش و شيل الشيطان من دماغك
معتز / تمام هطلع انا بقى استحمى و اللبس  و انزلك يلا سلام
........
فى البيت
بسمه / ايه رايك فى لبسى
معتز / حلو جدا انتى لحقتى تلبسى
بسمه / اه ماما قالتلى اللبس عشان اروح معاها الكوافير
معتز / و انتى قلعتى الحجاب امتى
اخلاص تطلع من جوه
اخلاص / لا طبعا مقلعتوش بس الستات هيبقوا لوحدهم و هيفكوا الحجاب
معتز / ماشى معترضتش مع ان بسمه كدا كدا شعرها حلو مش محتاج يعنى بس اهو خليها تنبسط
............
فى الحنه عند الستات شيماء قاعده جنب هند و فى بنت بترقص و البنات بتسقف و بسمه جنب مامتها
هند/ قومى يا بت اقعدى جنب حماتك خليها تشوفك
شيماء /ايه اروح كدا اتزنق هناك
هند / وكسه توكسك اكتر مانتى موكوسه قومى قوومى بسمه خليها ترقص و اقعدى انتى مكانها هو انا برده اللى هعلمك
شيماء / لا بس الست دى تقيله و مبتهزرش
هند/ طب قومى ارقصى انتى كدا و فكى و بكره تدعيلى
شيماء / بركاتك هاتى ركبتك اما اقرصك
هند / يخربيوتكوا ورمتونى من امبارح
شيماء تقوم ترقص و شويه و تشد بسمه و بسمه مترضاش هند تقوملها
هند / قومى يا بسبوسه انتى مش عاوزه ترقصى ففرحى و لا ايه
بسمه / معلش يا هند والله بتكسف
هند/ كلنا بنات قومى قوليلها حاجه يا طنط
اخلاص / طب دا حتى بسمه فى الرقص استاذه قومى يا بسمه كدا فرفشى عشان خاطر هند
بسمه تقوم ترقص
............
الناحيه التانيه ست و بنتها قاعدين
الست / هى بسمه اللى بترقص دى
البنت / خست اوى يا ماما و احلوت كمان
الست / اه هى من جه احلوت فهى احلوت ايه رايك فيها
البنت / والله ختيها من على طرف لسانى كنت لسه هقولك ايه رايك فيها لكامل
الست / اخوكى مش هيرضى
البنت / ليه دى حتى فى صيدله زيه و بكره تساعده فى الشغل
الست / مهو عشان كدا بقول مش هيرضى مهى بقالها قد ايه بتشتغل معاه فى الصيدليه عمره مكلمنى عنها
البنت / بقولك ايه متيجى نروح نعد جنب ماماتها و نسلم عليها كدا
الست / و ماله
......
ناحيه اخلاص شيماء تروح تعد جنبها
شيماء / تعبت ازيك يا طنط
اخلاص / ازيك يا حبيبتى
شيماء / بسم الله ما شاء الله بسمه خست خالص و احلوت كمان
اخلاص / بسم الله ما شاء الله  و انتى كمان احلويتى اوى انتى لسه متخطبتيش
شيماء / لا والله لسه النصيب مجاش
اخلاص / بكره يجى انا عارفه الرجاله مالهم عميوا و لا ايه بقى الجمال ده يتساب ياخواتى
شيماء /والله يا طنط ان كان عالعرسان اهم فى كل حته بس هو النصيب هى الواحده فى الدنيا عاوزه ايه غير واحد كدا ابن حلال و كويس و مكافح و الله يا طنط مساله الفلوس و المهر و الشبكه دى متفرق معايا ابدا مدام الشاب متدين كدا و اخلاق و من عيله اهم حاجه العيله والله امال ايه
اخلاص / اه يابنتى والله عندك حق
مامه كامل و اخته يجوا
اخلاص / اهلا اهلا ست ام كامل
ام كامل / تسلميلى يا ام بسمه استاخرى كدا شويه يا شوشو اما اقعد لحسن انا مبقدرش اقف
شيماء / لا الف سلامه عن اذنكوا
اخلاص / سلامتك يا ست ام كامل
شيماء تقوم و ام كامل تقعد مكانها
ام كامل / ركبى يا اخلاص مقولكيش نار ياختى
اخلاص/ لا اوعى تسكتى لازم تشوفى دكتور
ام كامل / والله كامل خدنى عند كذا دكتور بس ولا واحد جاب نتيجه
اخلاص/ ربنا يخليهولك والله كامل ده جدع طيب و امير و ابن حلال
ام كامل / بس باخته مايل كل منجيبله عروسه يطلع فيها القطط الفاطسه و انا نفسى افرح بيه قبل مموت
اخلاص/ بعد الشر عليكى ياختى متقوليش كدا دانتى لسه صغيره عقبال متفرحى بيه و تشيلى عياله و تجوزى عيال ايمان كمان
ام كامل / ههههههههههه من بقك لباب السما انما البت بسمه بسم الله ما شاء الله احلوت اوى لما خست
اخلاص/ ياختى البت طول عمرها حلوه انتى اللى مكنتيش واخده بالك هتطلع وحشه لمين
ام كامل / والله عندك حق بس دى خست اوى ما شاء الله
اخلاص/ استنى اناديهالك تقولك عالرجيم بتاعها ......يا بسمه تعالى يا حبيبتى
بسمه / ايوه يا ماما
اخلاص تنقل عالكرسى اللى جنبها و تقعد بسمه فى النص
ام كامل / بسم الله تبارك الله لا انتى بالحجاب حاجه و بشعرك حاجه تانيه خالص
بسمه/ شكرا
ام كامل / شعرك حلو اوى ما شاء الله دا بتحطى عليه ايه اصل البت ايمان شعرها بيقع و اخوها جابلها كذا حاجه مجبتش نتيجه
اخلاص/ ياختى ولا حاجه شامبو بس هو فتلته ناعمه كدا و حلوه من يومه
ام كامل / بسم الله ما شاء الله لا و ايه مفرود و سايح ياختى حلوه
بسمه/ اصل الكوا...
اخلاص/ طالعه لامها هتجيبه من بره هههههههه
ام كامل / بس انتى يا بسبوسه لسه فاضلك حبه كمان اوعى تكونى هتوقفى الرجيم
بسمه/ لا يا طنط انا ناويه اكمل
ام كامل / ايه يا اخلاص البت بتقولى يا طنط لا لا لا انا كدا هزعل
اخلاص/ جرا ايه يا بسبوسه دى الست حنان مربياكى على اديها تقوليلها يا ماما
حنان / اه امال ايه و الله ازعل قال طنط قال
بسمه/ حاضر
حنان / قوليلى بقى يا بسمه بتعرفى تطبخى
اخلاص/ دى لهلوبه ست بيت درجه اولى
حنان / ما شاء الله ما شاء الله ادب و اخلاق و عيله و شطاره و علام كامله من كله
اخلاص/ اسم الله عليها هى اللى شايله البيت كلو مسح و كنس و غسيل و مكوه و طبيخ
حنان/ ما شاء الله ما شاء الله و بتعرفى تطبخى ايه بقى خدى بالك انا ست صاحبه مزاج و فى الاكل مكولش اى حاجه اه
اخلاص/ ياختى و هنروح بعيد ليه انتى شوفى بتحبى ايه و اخليها تدوقهولك
بسمه/ ماما ....
اخلاص/ قومى يا بت ارقصى ههههههه بنات اليومين دول ياختى ميعرفوش يسمعوا المزيكا الا اما نلاقى وسطهم بيلعب كداهوا
بسمه/ نعم ...
اخلاص/ مقولكيش على  بسمه بقى طول النهار و الليل بترقص ياختى فى يوم دخلت عليها و هى بتغسل المواعين لاقيتها بترقص كداهو بوسطها و مندمجه عالاخر و لا الاجنبى اللى طالعالنا بيه من يوم مبدات تعمل دايت يلهوى
حنان/ بسم الله ما شاء الله و بترقصى اجنبى كمان
بسمه/ لا يا طنط دى زومبا
حنان / و دى تطلع ايه دى كمان و بعدين مش اتفقنا مفيش طنط دى تانى
بسمه/ معلش يا ماما الزومبا دى تمارين على شكل رقص
حنان / ماشاء الله ما شاء الله لازم تعلمينى مع ان الواحد مفيهوش حيل بس فى الرقص مقولكيش اموت انا فى الفرفشه
اخلاص/ بعد الشر عنك يا حنان
حنان / الله يخليكى خلاص اتفقنا
بسمه/ على ايه
حنان /هههههههههه يخراشى عليها عسل انا لازم ادوق طبيخك
بسمه/ ان شاء الله
اخلاص / اما بتعمل صينيه بسبوسه مقولكيش تاكلى صوابع وراها
حنان/ ياختى دا هى لوحدها بسبوسه بس يا خساره السكر مانعنى مالحلويات بتعرفى تعملى محشى يا بسبوسه
اخلاص/ مقولكيش دى لهلوبه اشى كرنب و اشى بتنجان و اشى كوسه و كمان الورق العنب
حنان/ اه والله الورق العنب طب والله نفسى ريحاله لا و مقولكيش بقى كامل ابنى بيموت فى الورق العنب
اخلاص/  طب و غلاوتك لخليها تلفلك حله بكره و تجيبهالك لحد عندك