بكابوزه بقلم / لولو محمد ( كامله )

الحلقه ١٨

#lolo #لولو_محمد
((((((((((بكابوزه )))))))))))
الحلقه الثامنه عشر
اخلاص / اما بتعمل صينيه بسبوسه مقولكيش تاكلى صوابع وراها
حنان/ ياختى دا هى لوحدها بسبوسه بس يا خساره السكر مانعنى مالحلويات بتعرفى تعملى محشى يا بسبوسه
اخلاص/ مقولكيش دى لهلوبه اشى كرنب و اشى بتنجان و اشى كوسه و كمان الورق العنب
حنان/ اه والله الورق العنب طب والله نفسى ريحاله لا   مقولكيش بقى كامل ابنى بيموت فى الورق العنب
اخلاص/  طب و غلاوتك لخليها تلفلك حله بكره و تجيبهالك لحد عندك
...................................
حنان / و هو فى ورق عنب اليومين دول
اخلاص/ بسمه مخزناه اصل بسمه كمان روحها فى ورق العنب شوفى سبحان الله
بسمه/ لا انا بحب ....
اخلاص/ بتحبه بقى كمان لما تعملى جنبه لحمه ببصل بالصلصه و تغمس الصابع فيه يلهوى تنسفه نسف
حنان/ سبحان الله ما جمع الا اما وفق خلاص انا مش هعمل اكل بكره دبستى نفسك يا بسبوسه
بسمه/ ماما....
حنان/ قومى بقى يا بسبس ارقصى كدا و فكى عن نفسك بلاش تقعدى معانا احنا العواجيز
اخلاص/ ههههههههه على رايك يا حنان العيال كبروا بسرعه
حنان/ الله متقومى يا بسمه
ايمان/ تعالى قومى  و لا مكسوفه خلاص انا هقوم معاكى قومى بقى
ايمان تشد بسمه و بسمه تبص لامها شظرا و امها تدحك و شيماء تجرى بسرعه تقعد فى النص مكان بسمه
شيماء /ياربى تعبت مش قادره خالص ازيك يا طنط
اخلاص/ كويسه يا حبيبتى
...........
فى الحنه عند الرجاله
سيد/ انا اتهلكت يا جدع
معتز/ هانت بكره و خلاص
سيد/ على رايك
كامل يدخل
سيد/ ايه الاخبار
كامل / ياعم متقلقش  كل الرجاله كلت و مبسوطه و زى الفل و الطباخ و الرجاله شغالين زى الساعه فى الستات اهو و  حماتك هى اللى بتنظمهم اهو
سيد/ عقبال ليلتكوا
كامل / يارب ادعى بزمه
معتز/ههههههههههههه اللى يشوفك و انت مستعجل كدا ميشوفكش و انت بتتامر عالعرايس
كامل / يا بنى هو انا هشرحلكوا مليون مره انا مش بتاع جواز صالونات انا يوم مهتجوز لازم انقى واحده تهز كيانى تحرك الحاجات المستخبيه
معتز/ يا كبدى يابنى
كامل / الس الس مانت مجربتوش
سيد/ الا هو ايه ده يا كوكو اللى معتز مجربوش
كامل / الحب يا سيكا الحب
معتز /هههههههه لا شكلك مجربه يا كوكو
كامل / ياعم انا لو كنت جربته كان زمانى قاعد جنبكوا كدا ياخويا اتوكس انت راخر
سيد/ هههههههههههه الواد ده مشكله
كامل / ياعم و لا مشكله و لا حاجه بص انا ليا نظره فى حوار الجواز ده
معتز / لا منك نستفيد اتفضل اشرحلنا
كامل /الست كدا كدا مهما كانت حلاوتها مع الوقت بتطخن و تكرمش و تتحول لبطه بلدى فى البيت بتاكل و تبيض و ترقد عالبيض و تاكل و تبيض و ترقد عالبيض
معتز/ كرهتنى فصنف الحريم بتشبيهك الزباله ده يا متخلف
سيد/ ههههههههههههه
كامل / انا بتكلم جد و ربنا يبقى يوم متفكر تتجوز لازم تنقى بطه تحب تتفرج عليها وهى بروطه كدا تبقى مبسوط و هى قاعده مبتعملش حاجه قدامك كدا
معتز/ الواد ده رومانسى اوى
سيد/ الرومانسيه انتحرت ياعم
كامل / انتوا اللى سطحيين
سيد/ ايوه يعنى انت بتدور على ايه فى البنت يعنى
كامل / تصدق سبحان الله كنت لسه بتكلم مع بسمه فى الموضوع ده
معتز يبص لسيد و يرفع حاجبه /انت كنت بتتكلم مع بسمه فى الحب و الجواز
كامل / اه النهرده الصبح سالتنى ليه متجوزتش مع ان ظروفى مرتاحه
معتز/ و قولتلها ايه
كامل / قولتلها انى بدور عالبنت اللى هيبقى عندى استعداد اسمع حواراتها التافهه لباقى حياتى
سيد/ انا بقول اقوم ابص عالطباخ
معتز/ ماشى قوم
سيد يقوم
معتز / و قالتلك ايه
كامل / كالعاده قلبت الحوار عليك و قد ايه انت بتسمعلها و تحكيلك الافلام الهندى اللى بتتفرج عليها و كدا يعنى
معتز / ماشى
كامل / مالك
معتز/ مفيش ياعم انا بس مستغرب انك واخد على بسمه اوى
كامل / ايه يابنى انت انا و بسمه بنقف بالتمن ساعات وشنا فى وش بعض فى الاول كانت بتعد تزاكر لكن فى الاجازه بتبقى فاضيه فبنرغى
معتز / انا فاهم يا كامل بس انا بخاف عليها اوى
كامل / هتخاف عليها منى طب تصدق زعلت
سيد يرجع
سيد/ فى ايه
كامل / تصدق الواد ده بيخاف على بسمه منى
سيد / حقه يا جدع دى الغاليه برضه
كامل / للدرجادى شكلى واطى
معتز/ انا مقولتش كدا بس الناس مبترحمش لو حد دخل بدالى النهرده و شافكوا و انتوا بتدحكوا كدا هيقول ايه
كامل / بسمه بت زى البرلنت و اللى يفتح بقه عنها بكلمه اخرسه قبل منك
سيد/ ايه انتوا كبرتوا الموضوع اوى معتز معاه حق ابقى خد بالك يا كامل احنا فى حته شعبى و الناس مبترحمش
كامل / خلاص يا سيد هتخرس
معتز/ يابنى انا مقولتش كدا انا بس بقولك ابقى خد بالك
كامل / خلاص خلاص عن اذنكوا
كامل يمشى
سيد/ انت ياتفهمه يا تسكت انت عارف انه بيتقمص
...............
معتز / خلاص هروح اصالحه
معتز يروح يحضن كامل
معتز / انا بحبك يا اهبل
كامل / انا هخاف على بسمه زيك بالظبط
معتز / عارف و الا مكنتش خلتها تيجى تشتغل عندك
كامل / امال ايه لزمته كلامك بقى
معتز / بنصحك هو انت مش اخويا و ليك عندى النصيحه انا دخلت لقيتكوا مسخسخين مالدحك اى حد كان ممكن يدخل
كامل / انت مبتدحكش فى الشغل ابدا
معتز / خلاص يا كامل حقك عليا انسى
كامل/ انا مش زعلان
معتز / طب يلا بطل القمص بتاعك ده و تعالى اقف جنب اخوك و متنكدش عليه فى فرحته
كامل يهز راسه
........
فى البيت
نبيل / الحمد لله الفجر اذن و قفلتوا الليله انا مش عارف كنتوا هتوصلوا الحنه بالفرح يعنى و لا ايه
اخلاص / هههههه ياخويا سيب العيال تفرح عقبال عيالك
نبيل / يارب يلا تصبحوا على خير انا مفيش حيل انزل شغل انا داخل انام
معتز / تصبح على خير يا بابا
اخلاص / انا كمان داخله انام .... الا صحيح يا بسمه انتى هتروحى الصيدليه بكره
بسمه / اه على الضهر كدا
اخلاص / طب تمام تصبحوا على خير
بسمه / تصبحى على خير يا ماما
اخلاص تدخل ورا نبيل و بسمه تتهبد عالكنبه
معتز / ياعينى عالحلو لما تبهدله الايام مالك شكلك خربتيها
بسمه / تعرف لما تفضل طول حياتك تتفرج على فيلم و يوم متمثل ميعجبكش الدور
معتز / دا اسمه النحس يا عزيزتى
بسمه / منبسطش خالص
معتز / ليه ايه اللى حصل
بسمه / تسمع عن سوق عكاظ بتاع الجوارى
معتز / للدرجادى
بسمه / البنات كانوا لابسين حاجات كدا لاهى محصله فساتين و لا هى محصله قمصان نوم
معتز / خونه و سايبنى تحت كل ده
بسمه / معتز
معتز / ايه كنت هزعقلهم و اخلهم يلبسوا الدنيا برد
بسمه / انا غلطانه انى بتكلم معاك اصلا
معتز / خلاص خلاص احكى
بسمه / البت شيماء لزقت لماما بجد انا مش فهماها
معتز / كبرى مخك
بسمه / حتى ماما مش فهماها بجد كنت مبسوطه فى الاول و انا برقص بعد كدا حسيت انى متراقبه الكل بيتفرج عليا
معتز / ليه متقوليش انهم منبهرين بجمالك و محروقين منك لانى واثق انك كنتى اجمل واحده فيهم
بسمه / افهمك ازاى عارف مارى منيب لما راحت تخطب لابنها و تشد فى شعر البنت و تقلب فيها يمين و شمال
معتز / ههههههههههههه
بسمه / و لا ماما عماله تحلى البضاعه فعين الزباين بجد كان هاين عليا امشى
معتز / كبرى دماغك
بسمه / هو انت و شيماء
معتز  / انا و شيماء ايه
بسمه / يعنى هى شكلها معجبه بيك اوى و انت و لا فبالك
معتز / هبله
بسمه / ليه هو حد لاقى حد يحبه بجد فى الزمن ده
معتز / المشكله مش انها تحبنى المشكله انى مبحبهاش
بسمه / كويس
معتز / ليه
بسمه / معرفش بس يمكن مبحبهاش يمكن معرفش بس مش متخيلاكوا سوا
معتز / امال متخيلانى مع مين
بسمه / مش عارفه لسه ملقيتش البنت اللى تكمل الصوره انت كتير على كل البنات اللى اعرفهم
معتز / دا من زوقك بس
بسمه / لا بجد انت تستاهل حاجه محصلتش معرفش هى ايه بس لازم تكون حاجه محصلتش
معتز / ادعيلى
بسمه / بدعيلك والله ربنا يرزقك ببنت الحلال اللى تسعدك
معتز / قومى نامى عشان بكره يوم طويل تانى
بسمه / تصبح على خير
........
تانى يوم
بسمه تصحى تلاقى مامتها فى المطبخ و معتز و نبيل مش فى البيت
بسمه / صباح الخير
اخلاص / كويس انك صحيتى
بسمه / هو معتز فين
اخلاص / نزل من بدرى هو و سيد مش فاكره راحوا فين
بسمه / و بابا فين
اخلاص / هيكون فين عالتاكس بيشوف اكل عيشه
بسمه / ماشى انا هدخل اغسل وشى و اللبس و انزل
اخلاص / ماشى متتاخريش عشان تلحقى توصلى الحله دى للست حنان و هى سخنه
بسمه / حله ايه اللى اوديها دى كمان انا رايحه الصيدليه مش رايحه لطنط حنان
اخلاص / بسيطه اديها لكامل يطلعها لامه عادى يعنى
بسمه / انا مبحبش الحركات دى على فكره قدمت اوى
اخلاص / سبنالك الجديد ياختى يلا خشى اتشطفى يلا اش فهمك انتى اصلا
بسمه / يا ماما مفقوسه اوى و معتز لو عرف
اخلاص / يعرف و لا ميعرفش و هو ماله و بعدين انتى مكبره الموضوع ليه الست نفسها فى المحشى و انتى عملتيهولها متاخديش انتى الامور على اعصابك و تكلكعيها
بسمه / يا سلام
اخلاص / يا بت هو انا هعمل حاجه تضرك
بسمه / يا ماما
اخلاص / انتى عماله ترغى و تضيعى وقت بصى انا وعدت الست بالمحشى وصليهولها و خلاص
بسمه / و مفيش حركات من دى تانى
اخلاص / ربنا يسهل
بسمه / اوعدينى
اخلاص / الله قولت ربنا يسهل انجزى بقى
بسمه تدخل الحمام
.........
عند الحلاق
معتز / نعيما يا عريس
سيد / الله ينعم عليك بس ايه رايك بزمتك مش مكان فخم
معتز / كان ايه لزمتها المصاريف مكان اى حلاق قام بالواجب
سيد / ياعم ملعون القرش اللى مينزهش صاحبه خلينى اروش
معتز / نطلع بقى اعزمك على اكله فسفور تخليك تنور
سيد / قشطه يلا بينا
.........
فى الصيدليه
كامل / نموسيتك كحلى
بسمه / كان لازم تفتح النهرده يعنى
كامل / لو تعبانه روحى و مش لازم النهرده
بسمه / ممكن قبل اى حاجه تطلع الحله دى فوق لطنط
كامل / انا شامم ريحه ورق عنب انا بموت فيه
بسمه / الف هنا طلعه فوق بقى
كامل / و اطلعه ليه انا اكله انا و انتى هنا فى الاستخبص و لا من شاف و لا من درى
بسمه / لا و النبى ايه مامتك اللى طلبته من ماما و ماما صحيت من بدرى تلفهولها و تيجى انت تاكله عالجاهز
كامل / طيب خلاص خلاص شكلك مش فى المود لهزار انا هطلع الحله و جاى ثوانى
........
فوق عند حنان
حنان / ريحه المحشى تهبل هات صابع اما ادوق
كامل يغرف طبق كبير و حنان تاخد صابع تدوقه
حنان / طعمه يهبل تسلم ايدها بسمه اول معرفت انك بتحبه صممت تعملهولك مخصوص
كامل / بس بسمه قالتلى انك انتى اللى طلبتيه و ان مامتها اللى حاشياه
حنان / و انت صدقت دا تقل بنات امال يعنى عاوزها تقولك انها سهرت طول الليل تحشيلك المحشى اللى انت بتحبه عشان تنول الرضا
كامل / انا ورايا شغل مش فاضى انا للكلام ده سلام
حنان / انت هتاخد الطبق معاك
كامل / اه جعان و مضمنكوش الصراحه لولا الملامه كنت خدت الحله سلام
حنان / هههههههه الف هنا
.........
فى المطعم
سيد/ يخربيتك مين هياكل كل ده
معتز / انت طبعا الليله ليلتك
سيد / تفتكر الواد كامل مش هيزعل انك معزمتوش معانا
معتز / و مين قالك انى معزمتوش انا اتصلت بيه الصبح و صحيته و صممت انه يجى بس هو خم نوم و قالى روحوا انتوا انا اصلا مبحبش السمك
سيد / اه بس بيحب الجمبرى و الكابوريا
معتز / معرفش والله بس هو مرضاش يجى تلاقيه كان عاوز ينامله ساعتين كمان مانت عارفه خم نوم
سيد / او يمكن لسه زعلان منك
معتز / مفتكرش انت عارف كامل لو كان زعلان مكنش رد عليا اصلا
سيد / بس انا لسه مش فاهم انت ليه مصمم متقولوش على اللى بينك و بين بسمه
معتز / باختصار عشان مفيش حاجه بينى و بين بسمه تتحكى و مكدبش عليك انا ندمان اصلا انى حكيتلك
سيد / لا يا شيخ
معتز / مش عارف اقولك ايه يا سيد بس الموضوع كبير كامل رومانسى اوى و بيظيط فى الحاجات دى و لو قولتله انى معجب بيها هيفضحنى و مش بعيد يروح يقولها
سيد / لا بس كامل عمره ميطلع سرك بره يا صاحبى
معتز / لا مش هيقول هو هيعمل مانت عارفه متهور و قلبه اللى ممشيه
سيد / والله و دى احلى حاجه فيه
معتز / مش عارف انا حاولت اقوله كذا مره تحصل حاجه و حد يدخل معرفش اقوله و دلوقت بسمه بتشتغل معاه يعنى الموضوع اتلعبك
سيد / بس هند قالتلى بااليل ان مامته و مامتك كانوا حبايب اوى طول الحنه
معتز / و فيها ايه
سيد / معرفش بس خلينا فى المهم انت مش ناوى تتحرك بقى هتفضل مستنى ايه
معتز / يابنى معلى يدك كل مكسر قرش اجيب بيه الشبكه يطير بس الحمد لله جبت الدبله
سيد / هههههههه بكره تتعدل يا صاحبى
معتز / ياريت والله لحسن صاحبك تعب اوى
سيد / كل كل محدش هيبقى احن عليك ماللى خلقك
.........
فى الصيدليه
كامل نازل بطبق محشى كبير و بسمه بتكتب على الكمبيوتر
كامل / تاكلى
بسمه / شكرا
كامل / ماما بتقول انك انتى اللى عملاه