بكابوزه بقلم / لولو محمد ( كامله )

الحلقه ١٢

#lolo #لولو_محمد
((((((((((((بكابوزه ))))))))))))
الحلقه الثانيه عشر
بسمه تبصله و تبتسم
معتز/ انا كنت مخبى واحده فى اوضه بابا استنى هجيبهالك
معتز يحاول يقوم بسمه تمسكه
بسمه/ مش عاوزه شيكولاته
معتز/ طب عاوزه ايه يخليكى تبطلى عياط
بسمه/ معرفش
............................................
معتز/ بكره هاخدك عند دكتور تخسيس و هعملك اشتراك فى الجيم و كل كيلو هتخسيه ليكى منى ١٠٠ جنيه ايه رايك
بسمه/ ماشى
معتز/ و هشغل وقتك الفاضى هكلملك الواد كامل يوقفك فى الصيدليه تتمرنى عشان ميبقاش عندك وقت فاضى تاكلى فيه
بسمه/ شكرا
معتز / احكيلى بقى ايه اللى حصل لدا كلوا
معتز يحط حته الفرخه تانى قدام بق بسمه و بسمه تزقها
بسمه/ فريال هزقتنى قدام الدفعه كلها بتقول انى برمى نفسى على فارس و قالت كلام يجرح اوى يا معتز و انا معرفتش ارد فضلت ساكته مقدرتش ارد
معتز/ دى بت زباله اصلا و متحطيهاش فى دماغى
بسمه/ عايرتنى بطخنى و بنضارتى و بوشى اللى بايظ عايرتنى جامد
معتز/ دى بت كلب اساسا و بكره لما تخسى هتضربيها بالجزمه تعرفى لو كلتى حته الفرخه دى هوديكى لدكتور جلديه كمان يعالج الحبوب دى و مش بس كدا دانا هوديكى تعملى لنسيز او نضاره جديده لو تحبى انشالله معن حد حوش سيبك منها البت الغلاويه دى
بسمه/ مليش نفس
معتز/ انا على لقمه الفطار مالفجر و العشا ادنت حرام عليكى كلى معايا انا لقمه و انتى لقمه و بكره بعد الكليه هنروح للدكتور و الاكل اللى هيكتبهولك هجيبه و لو كتب دوا هجيبه بس كلى اى حاجه دلوقت عشان خاطرى لو معتز غالى عندك كلى اى حاجه متخليش العيال الزباله دول يزعلوكى والله ميستاهلوا دمعه واحده مالعنين الحلوه دى
بسمه/ انت اصلا شايف عينى من ورا الفترينات دى
معتز/ انتى عارفه انتى عامله زى ايه
بسمه/ ايه
معتز/ عارفه الموز اللى بيبقى منقط باسود ده و شكله هيضرب من بره و تفتحيه تلاقى موزه مستويه و ناعمه و طريه تدوب فى البق من اول قطمه
بسمه تبتسم
معتز/ انتى بس عاوزه تتقشرى و نرمى القشره دى تحت رجلين العيال الزباله دول ان شاء الله  يتزحلقوا تتقطم رقابيهم و نخلص منهم قادر يا كريم يارب
بسمه/ يارب
معتز/ قومى بقى ناكل لقمتين و تقومى تزاكرى عشان الكليه بكره و هنزل اعدى على اى دكتور احجزلك ماشى
بسمه/ مش عاوزه اروح الكليه تانى
معتز/ لا انتى اقوى من كدا متقوليش لحد انك بتعملى دايت روحى و انتى رافعه راسك محدش كاسر عينك و لا حد له عندك حاجه دانتى بسبوسه معتز
بسمه/ انا بحبك اوى يا معتز
معتز/ و انا والله بحبك اوى يا بسبوستى بس كلى لقمه بقى دراعى وجعنى
بسمه تعد تاكل مع معتز و ينزل و هى تدخل تشطب المطبخ
.......،
قدام الدكان
اخلاص/ اكلت
معتز/ اكلت
اخلاص/ مالها
معتز/ زمايلها فى الكليه اللسوا عليها
اخلاص/ و ايه الجديد مالكل بيالس عليها  انا ياما قولتلها تخس
معتز/ خلاص بقى يا ماما على كل بكره هاخدها سنتر كبير نشوف هيعملوا فيها ايه
اخلاص/ماشى يابنى روح انت شوف شغلك
معتز / عن اذنك سلام
معتز يروح ورشه سيد
سيد/ خير يا صاحبى
معتز/ مفيش ياعم مشاكل فى الكليه
سيد/ العيال اياها
معتز / اه انا هروح السايبر بتاع صبحى ساعه  عاوز حاجه
سيد/ اه ابقى اعملى سيرش على كوبايه شاى
معتز/ هههههههه ماشى سلام
......
تانى يوم
بسمه/ مش عاوزه اروح الكليه
معتز/ لا هتروحى محدش له عندك حاجه وحطى صابعك فى عين الطخين
بسمه/ مفيش طخين غيرى
معتز/ يولعوا كلهم هو ده اللى هما عاوزينه انك تستلمى و تخسرى بس مستقبلك اهم مش هينفعوكى
بسمه/ هيالسوا عليا
معتز/ ودن من طين و ودن من عجين كبرى مخك
بسمه/ مش هعرف
معتز/ انا حاجزلك الساعه سبعه فى سنتر لو مروحتيش الكليه هلغى الحجز
بسمه/ خلاص ماشى هروح
.......
فى الكليه
بلسم/ مبترديش على موبايلك من امبارح ليه
بسمه/ مخنوقه و مش عاوزه اكلم حد
بلسم/ فارس الكلب جايب دبدوب كبير لفريال و عمال يتمشى بيه فى الكليه كلها و سمعت واحده بتسالها اسمه ايه قالتلها بسمه
بسمه/ شكله حلو الدبدوب ؟؟؟
بلسم/ اه اوى للاسف
بسمه/ خلاص مش مشكله
بلسم/ ههههههه يعنى كان هيفرق لو شكله وحش
بسمه/ كبرى دماغك يا بلسم
بلسم / فاتك الكويز امبارح كان سهل على فكره
بسمه/ حصل خير نعوض فى اللى جاى يلا عشان منتاخرش
.........
فى البيت
نبيل/ لابسه و نازله تانى و لا ايه
اخلاص/ هتروح لدكتور تخسيس
نبيل/ عالبركه مع انى شايف ان ملوش لزوم هى بس بطلى حشر و هتخسى لوحدك متبصى لكل اللى فى البيت محدش فينا طخين كلى زينا هتخسى
اخلاص/ معلش اهو تعمل اللى عليها
نبيل/ يلا بجمله المصاريف طبعا معتز اللى هيدفع
بسمه /عن اذنكوا
اخلاص/ هو معتز جه
بسمه/ هنزل استناه فى الشارع او اطلعله عالناصيه
نبيل/طبعا مهى كلمتى بتقف فى الزور مبتتبلعش لو كانت طبق محشى و لا حته فرخه كانت اتظلطت
بسمه/ كتر خيرك عن اذنكوا
بسمه تفتح الباب و تنزل
اخلاص/ ليه كدا يا نبيل امال لو مكنتش عارف ان زمايلها اللسوا عليها دى دمعتها منشفتش من امبارح
نبيل/ هى اللى سابت نفسها لحد موصلت للى هى فيه ده ياما قولنا وهى تلغ
اخلاص/ اقولك انا كمان سيباهالك و نازله الدكان قطم فى نفسك بقى
نبيل/ ياختى براحتك بلا وجع دماغ
.......
فى الشارع بسمه واقفه لوحدها
سيد يجيبلها كرسى
سيد/ اتفضلى يا ست الدكتوره
بسمه/ لا شكرا
سيد /دا نضيف والله متخافيش
بسمه/ لا انا كدا كدا هتمشى لاول الشارع على ممعتز يوصل
معتز يوصل
سيد/ ابن حلال اهو جه هناك اهو
معتز / ايه اللى موقفك كدا
بسمه تبصله وتسكت
معتز يتنهد /استنينى هنا هجيب المفتاح و انزلك
اخلاص تنزل / المفتاح اهو
معتز / تعالى يلا
.....
فى السنتر
الريسيبشن / فى حجز باسم الانسه بسمه مختار جلديه الساعه سبعه ثوانى الحاله اللى جوه تطلع و حضرتك تتفضلى
معتز/ شكرا
معتز و بسمه يقعدوا
بسمه/ جلديه ايه مش هنخس
معتز / دا جدول الجيم ليكى اتناشر حصه فى الشهر ظبطى مواعيدك مع الكليه و دكتور التخسيس الساعه تسعه فهنكشف جلديه الاول
بسمه/ كويس
معتز / و فى  بكره كشف نظر و اسنان
بسمه/ اسنان ليه
معتز /  هتخسرى ايه ادلعى
الريسبشن / انسه بسمه
.....
فى العياده
الدكتوره / بصى دا طبيعى فى سنك تغير هرمونات و بشره دهنيه اهم حاجه عشان ده يروح النضافه
بسمه/ انا بغسل وشى كل يوم
الدكتوره / دى صابونه طبيه تغسلى وشك بيها مرتين فى اليوم و دا صنبلوك يتحط كل اربع ساعات قبل متنزلى مالبيت بنص ساعه و دا دوا يتاخد حبايه كل ١٢ساعه و المرهم ده يدهن قبل متنامى بالليل و الشيكولاته و الشيبسى و السودانى و اى تسالى ممنوع
بسمه/ كل ده
الدكتوره/ علاج الحبوب احسن بكتير من علاج اثارها اوعى تفتحيها باى طريقه اللتزمى بالدوا زى مقولتلك و اشوفك الاسبوع الجاى زى النهرده
بسمه/ شكرا
.......
فى الاستقبال
بسمه/ ايه الكروته دى مخدناش عشر دقايق
معتز/ ههههههههه و لا يهمك اقعدى هحجز الاسبوع الجاى و اجيلك
بسمه تروح تعد و هى مدايقه
معتز يخلص و يعد جنبها/ مالك
بسمه/ بتقول النضافه ايه شيفانى معفنه
معتز/ يا ستى نوع الصابونه اكيد تقصد كدا
بسمه/ وانا هعد بقى كل اسبوع اجيلها و لا ايه
معتز/ لا فاضلك مرتين كمان و فى جلسه تنضيف فى اخر الشهر
بسمه/ بجد
معتز/ مكتوب كدا فى العقد الباكدج بتاعك قايل كدا
بسمه/ باكدج
معتز/ اه ليكى اربع جلسات  جلديه  واحده كشف و اتنين متابعه و جلسه تنضيف بالبخار و ليكى كشف نظر و كشف اسنان و متابعه لكل منهما عند الحاجه و اتناشر جلسه جيم و اربع كشوفات مع دكتور تغذيه و حصه سونا
بسمه/ انت دفعت كام فى كل ده
معتز/ فلوس
بسمه/ خفه ....كام
معتز/ بتسالى ليه هترجعيهوملى يعنى بقولك ايه انا مش هعد لحد تسعه هنا انا متغدتش تعالى ناكل سندوتشين كبده من اى حته و نرجعلهم
بسمه/ لا انا هفضل هنا كفايه مصاريف
معتز/ لا النهرده بتاعك يلا عشان من بكره الاكل مش هتشميه حتى
بسمه/ طب بص شكل المكان هنا غالى و انت دفعت كتير بلاش عطله انزل شوف شغلك الساعه  دى و ارجعلى على تسعه ندخل سوا
معتز/ هتفضلى لوحدك هنا ساعه
بسمه/ مش مشكله يلا روح انت بس
معتز/ ماشى سلام
......
الساعه تسعه ونص
معتز/ اتاخرت معلش
بسمه / لا احنا تالت حاله و الدكتور لسه مجاش اصلا
معتز /طب كويس الحمد لله
بسمه/ اكلت حاجه
معتز/ لما اروح ابقى اكل مش مشكله
بسمه/ قولى بقى دفعت كام
معتز/ الف و خمسميه مقفولين
بسمه/ ليه كتير اوى
معتز/ لقيت كدا ارخص من كل حاجه لوحدها
بسمه/ بابا لو عرف هيولع فينا
معتز/ مش هقوله كبرى دماغك بقى
بسمه/ انا بجد مدايقه جدا كل متكسر قرش اخده كدا بابا معاه حق
معتز/ انا اصلا بشتغل عشانك فمتشغليش بالك انتى بالهبل ده
بسمه/ و كنت عاوزنا ناكل بره
معتز/ خلاص يا بسمه بطلى بقى
بسمه/ انت بتعمل كدا ليه انا مستهلش التعب ده كلو
معتز/ مين قال كدا انتى تستاهلى اكتر من كدا بكتير بس ربنا يقدرنى بس و احققلك كل اللى بتتمنيه
بسمه/ و لسه معاك فلوس للدوا دا كلو اللى انطلب
معتز/ كل اللى معايا اول عن اخر سبعميه جنيه بس متشيليش هم هتدبر
بسمه/ هتسرق يعنى مانت الجمعيه اللى دخلتها قبضتها و صرفتها عالدروس و المصيف و اللبس و لسه بتدفع فاقصاتها و اللى بيطلع مالتاكس بتصرفه مصاريف الادوات اللى اطلبت فى الكليه و الكتب و ادى كمان كل اللى حوشته فاضل ايه
معتز/ متولعى فيا احسن خلاص فضحتينا اههههههه
بسمه/ انت ازاى قادر تضحك و تهزر
معتز/ عشان انا عندى هدف عاوزه اوصله فكل الهبل ده مش فارق معايا
بسمه/ و ايه بقى الهدف العظيم ده
معتز/ انى اشوفك مبسوطه دا فحد ذاته كل اللى بحلم بيه
بسمه تتنح
معتز/ ايوه يا بسمه انا بشتغل ليل نهار بس عشان احققلك اللى انتى عوزاه بحوش عشان اجيبلك اللى انتى عوزاه فلزمتها ايه الفلوس و انتى زعلانه
بسمه/ و انت بتستفيد ايه بقى
معتز/ ملكيش دعوه انتى خليكى فحالك
بسمه/ افرض الادويه كانت غاليه افرض احتجنا حاجه
معتز/ متشيليش هم كلها اقل من اسبوعين و اقبض و اللى بيطلع مالتكس من هنا لساعتها محدش هيحس بحاجه متشيليش هم انتى بس
بسمه اما نشوف
الاستقبال / انسه بسمه دور حضرتك .
.....
الدكتور / سمنه من الدرجه الثانيه و معدل الدهون عالى جدا انتى عملتى اى نظام غذائى قبل كدا
بسمه/ جربت حاجات كتير بس مبكملش يوم و لا اتنين و ببطل
الدكتور / دا شئ كويس دا نظام غذائى تمشى عليه مظبوط هتخسى فى حدود اربعه كيلو فى الاسبوع ده
بسمه/ طب لو لعبت رياضه
الدكتور / طبعا النتيجه هتبقى احسن و خدى بالك كويس من قايمه الممنوعات
بسمه/ هتدينى حاجه تسد الشهيه
الدكتور / مفيش اى ادويه الا لما تعمليلى التحاليل دى و تجيبيها الاسبوع الجاى هنشوف مدى الاستجابه بتاعك و تحاليلك و ساعتها نحكم بقى محتاجه ادويه او لا
بسمه/ طب انا فى الكليه و برجع متاخر و كدا الغدى هيفوتنى
الدكتور / مواعيد الاكل مهمه جدا عشان الحرق بس ممكن فى وسط اليوم لو جعانه تاخدى ثمره فاكهه او بار بروتين حبوب كامله او بسكوت شوفان هتلاقيهم فى الهايبرات و السوبرماركتات الكبيره
بسمه/ يعنى مينفعش اكل بسكوت عادى
الدكتور / لا دا دقيق ابيض و ميه سعرات كتير و هيجوعك و اهم حاجه الميه كل مهتشربى ميه كل مهتخسى اسرع و مش بس كدا وشك مش هيبان عليه انك بتعملى دايت و شعرك و صحتك مش هيتاثروا و ده اهم حاجه
بسمه/ حاضر
الدكتور / بصى هاتى متر و خدى مقاساتك و تابعى التغير فى الحجم و فى شويه ملاحظات عاوز اقولك عليها قبل متمشى مدام هتلعبى رياضه
معتز/ خير
الدكتور / الرياضه متتلعبش فى نفس اليوم اللى هتوزنى فيه او حتى اليوم اللى قبليه ولازم كوتشى وانتى بتلعبى عشان روكبك متتاثرش و طبعا تلتزمى بالكميات و المواعيد لا تزودى و لا تنقصى
معتز/ متنقصش
الدكتور / طبعا لو قللت ممكن جدا تتعب و الحرق يقل او انيميا و دى سكك مش عاوزينها
بسمه/ شكرا
......
فى التاكس
بسمه/ ادويه و تحاليل دا غير بكره كشف النظر و الاسنان هيقولوا ايه
معتز/ ملكيش فيه تعالى اوصلك و هروح انا اكمل شغل وربك هيفرجها
بسمه/ ماشى ماشى
........
فى البيت
نبيل/ حمدالله عالسلامه
بسمه/ الله يسلمك
اخلاص/ عملتى ايه عند الدكتور
بسمه/ طلب شويه تحاليل و ادانى النظام ده امشى عليه
نبيل يشد الورقه
نبيل/ فطار ربع رغيف و بيضه مسلوقه و دا قبل الاكل و لا بعده هههههههههه
اخلاص/ ورينى كدا الغدى اربع معالق رز و ربع فرخه و سلطه و خضار
بسمه/ منغير زيت
اخلاص/ ياختى دا اكل عيانين ده لا يسمن و لا يغنى من جوع
بسمه/ معلش على الله يجى بفايده