#lolo #لولو_محمد
(((((((((بكابوزه)))))))))))
الحلقه الاخيره
معتز / غيرت رايى
شيماء / بجد يعنى مش هتسافر
معتز / لا مش هسافر
شيماء / كويس على فكره انا قرايه فتحتى الخميس الجاى
معتز / الف مبروك
شيماء / هو ابن عمتى ماما بقالها فتره بتكلمنى و انا كنت بتهرب بس هو لما كلمنى غيرت رايى
معتز / ربنا يتمملك بخير انتى طيبه و تستاهلى كل خير
شيماء / و انت كمان يا معتز طيب و تستاهل كل خير
معتز / شكرا
.......
فى البيت
بسمه فى اوضتها و نبيل و اخلاص قاعدين عالكنبه و معتز يدخل
نبيل / انت بجد هتسافر السعوديه
معتز / لا مقدمتش
بسمه تفتح الباب بسرعه
بسمه / بجد
معتز / لقيتها مش جايبه همها هضحى بحاجات هنا متتعوضش
اخلاص / تعال كلك لقمه
معتز / مش جعان انا هدخل انام شويه قبل منزل تانى
معتز يدخل الاوضه و نبيل يدخل لبسمه
نبيل / اهو مش مسافر اهو قومى كلى بقى
بسمه / مليش نفس يا بابا انا لما هجوع هاكل
نبيل / يا بنتى انتى مكلتيش لقمتين على بعض من امبارح قومى بدل متقعى مننا تانى
بسمه / يا بابا بطنى وجعانى و بجد مش قادره اكل خالص سبنى براحتى لما هجوع هاكل اتفضل حضرتك كل
نبيل / و هو الاكل بيبقاله طعم منغيركوا مش عارف بس احنا ايه اللى جرالنا يا اخلاص ابقى بخرى البيت اكيد محسودين
اخلاص فى سرها بره / دى مش عين دا ذنب ذنب معتز اللى ظلمته و بتتردلى فى بنتى
...............
فى الشارع تانى يوم
كامل / معتز استنى انا كنت عاوزك
معتز / انا متاخر بص معلش لازم امشى و لما ارجع هبقى اعدى عليك
كامل / طب بص بس انتوا نسيتو .....
معتز يمشى
كامل بصوت واطى / دبلتك فى علبه الشبكه
سيد يدخل
سيد / مالك يا برنس
كامل / مفيش يا برنس اخبار هند ايه
سيد / فاضلها شويه و تاكلنى
كامل / ههههههههه ربنا يكملها على خير
سيد / انت عرفت ان معتز هيسافر
كامل / لا هيسافر فين
سيد / هيسافر السعوديه راح امبارح قدم فى مكتب سفريات
كامل / مقاليش حاجه يمكن عشان كدا جرى و انا بكلمه كان فاكرنى هكلمه فى الموضوع ده
سيد / او يمكن كان متاخر اصلا
كامل / او يمكن مش عاوز يكلمنى بعد اللى حصل
سيد / مهو كلمك بعد اللى حصل فعلا و بعدين هو ايه اللى حصل عادى يعنى انت بس اللى مكبر الموضوع
كامل / و مدام انا اللى مكبر الموضوع بسمه مجتش الشغل ليه
سيد / انت هتسيبها تكمل شغل
كامل / و ايه المشكله لو هى عاوزه مفيش مشاكل
سيد / شكلها وحش بيتهيالى على كل انا هبلغهم انك معندكش مانع و ربنا يسهل
كامل / تسلم يا سيكا
سيد / هاتلى بقى الدوا ده
كامل / حاضر تعال
سيد و كامل يدخلوا الصيدليه
.............
فى الدكان
سيد / ازيك يا ست اخلاص
اخلاص / الحمد لله نشكره انت عامل ايه و مراتك عامله ايه
سيد / كويسه الحمد لله ادعيلها
اخلاص / ربنا يقومها بالسلامه هى و اللى فبطنها هو واد و لا بت الاول
سيد / لسه والله مشوفناش بس اول مهنشوف هقولك
اخلاص / ماشى
سيد / الا صحيح ايه اخبار الدكتوره
اخلاص / راقده فى سريرها مبتبطلش عياط
سيد / ليه كدا بس
اخلاص / والله يا سيد معرف دى لا بتاكل و لا بتتكلم و لا بتتحرك و حالتها تقطع القلب
سيد / انا كنت مع كامل
اخلاص / قطع و قطعت سيرته
سيد / ليه كدا يا ست اخلاص بس دا كامل طيب و ابن حلال دا حتى كان بيقول لو بسمه عاوزه تكمل شغل هو معندوش مانع
اخلاص / كتر خيره بس انا بنتى مبتشتغلش عند حد احنا الحمد لله مش محوجين اوى كدا
سيد / ايوه يا ست الكل بس الحوار مش حوار محوجين و لا لا الحوار تعليم و الست الدكتوره
اخلاص / يا سيد بقولك لا بتاكل و لا بتشرب و لا بتتحرك هتنزل تقف فى الصيدليه سبنى فى حالى يا سيد
سيد / و ان كنت عارف علاج بنتك
اخلاص / بتتكلم جد قول تعرف شيخ كويس
سيد / شيخ ايه بس انا عارف هى ايه اللى مزعلها
اخلاص / مكلنا عارفين هو اللى حصل كان شويه مكلنا زعلانين
سيد / يا ست اخلاص انا جاى اقولك ان بسمه بتحب معتز
اخلاص / انت بتقول ايه يا سيد
سيد / بقول الحقيقه و معتز مسافر عشان بسمه قالتله انها بتحبه و عشان حضرتك طلبتى منه يبعد عنها قالها انها زى اخته و دلوقت عاوز يسيب البلد كلها يمكن تنساه
اخلاص / انت بتتكلم جد
سيد / و هو انا ههزر فى الحاجات دى انا عارف يا ست اخلاص انك عاوزه لبنتك احسن حاجه بس مفيش حد هيحب بنتك و لا يخاف عليها زى معتز
اخلاص / ازاى بعد كل اللى حصل
سيد / يا ست الكل اللى حصل كلو كلام فاضى انتى بس وفقى بينهم و ربنا هيحل الباقى
اخلاص / اقولك ايه يا سيد بس
سيد / متقوليش انا هطلع اوصل الدوا لهند فكرى فكلامى و شوفى راحه بنتك فين بس بسرعه قبل ممعتز يسافر و ان كان على كامل انا هقوله الحقيقه كامله و افهمه كل حاجه الموضوع ده لازم يتحطله نهايه بقى يا ست اخلاص اللى بيحصل ده كتير بصراحه
اخلاص / انت فاكرها سهله عليا يا سيد
سيد / و لا عليكي و لا على اى حد يا ست الكل بس الصراحه هى الحل الوحيد قطمه احسن من نحته اقطع عرق و سيح دمه
اخلاص / يعنى انت بتشور عليا بايه يابنى
سيد / انا هقولك و انتى اعملى اللى تشوفيه صح يا ست الكل
.......
فى البيت
بسمه نايمه و اخلاص تدخل عليها
اخلاص / انا قولت هتنبسطى لما تعرفى ان معتز مش هيسافر
بسمه تتعدل / مانا فرحانه
اخلاص / انتى تعرفى ان كامل كلم سيد انك ترجعى الصيدليه تانى و كان مفيش حاجه حصلت
بسمه / كامل طيب و ابن حلال و انا ظلمته معايا
اخلاص / بصراحه انا اللى ظلمته و ظلمتك و ظلمت معتز بس والله كان قصدى خير
بسمه / لا متخافيش ميتهياليش ان اللى حصل هياثر على معتز و كامل
اخلاص / انا فى حاجه مخبياها عليكى معرفش هتفرق معاكى ولا لا
بسمه / حاجه ايه دى
اخلاص / معتز طلب ايدك منى و انا رفضت
بسمه / معقول طلب ايدى عشان صعبت عليه يا ريتنى مكنت قولتله
اخلاص / مكنتى قولتيله ايه
بسمه / لما كامل قعد يكلمنى عن الحب و انى اشوف يعنى مين اللى بحبه لقيت انى مش قادره افكر فى حد غير معتز فجريت عليه و قولتله بس هو قالى اننا اخوات فمقدرتش اكمل مع كامل عشان مقدرتش اخدعه
اخلاص / عشان كدا سبتى كامل بس معتز اتقدم قبل حتى متتخطبى لكامل
بسمه / انتى بتقولى ايه
اخلاص / يوم قرايه فتحتك معتز قالى انه بيحبك و انه اولى بيكى قولتله اننا فقرا و انك تستاهلى الاحسن زعل و مشى و مفتحش الموضوع ده تانى
بسمه / يعنى معتز بيحبنى فعلا بس عشان انتى رفضتيه قالى كدا
اخلاص / انا معرفش قالك ايه بس اللى اعرفه انه بيحبك
بسمه بابتسامه عريضه / هو الساعه كام اوعى زمانه جاى مالمحل
اخلاص / طب استنى يا بسمه مهو هيجى هنا استنى يا بنتى
بسمه تقوم تجرى تحط الشال على راسها و تيجى تنزل امها تمنعها
اخلاص / استنى هنا رايحه فين انتى عاوزه تاخدى قلم تانى من بتوع معتز و لا ايه
......
فى اول الشارع
معتز جاى و الشيخ يوقفه و معاه كامل
الشيخ / ازيك يا معتز
معتز / ازيك يا مولانا
الشيخ / صحيح يابنى انك نويت تهاجر
معتز / هو الخبر لحق ينتشر يخيبك يا سيكا
كامل / يعنى صحيح
معتز / هى كانت فكره فى دماغى بس خلاص شيلتها و مقدمتش و لا حاجه
الشيخ / ريحتنى يابنى ووفرت عليا محاضره طووووويله فى انك متسافرش
معتز / لا انا مش هسافر
كامل / طمنتنى يا جدع
اخلاص تدخل تشاور لمعتز يستاذن و يروحلها
معتز / معلش ثوانى .... فى ايه مالك
اخلاص / بص انا جبت جاز مالبت دى لا اكل و لا شرب مبتبطلش عياط و اخر المتمه حابسه نفسها من صبحيه ربنا
معتز ينفخ و يبص فى الارض
اخلاص / هى مبتسمعش غير ليك يا معتز عشان خاطرى يابنى انسى اى كلام قولتهولك انسى اى زعل من نحيتى و فكر فبسمه قولها كلمتين عقلها
معتز / حاضر انا هطلعلها
معتز يسيب اخلاص و يطلع
كامل / فى ايه
معتز ميردش و يطلع يجرى عالبيت و كامل يجى يروح وراه سيد يمسك كامل من ايده
سيد / استنى عاوزك
كامل / فى ايه
سيد / عاوزك فى حوار عالسخان
كامل / خير فى ايه
سيد / انا هحكيلك مالاول بس و غلاوه امك يا شيخ متزعل منى و تبقى هادى عشان اعرف افهمك
كامل / متنجز يا سيد متوترنيش
............................
معتز يدخل الشقه يلاقى هدوء تام يخبط على باب اوضه بسمه متردش
معتز / بسمه ... ممكن اتكلم معاكى شويه لو سمحتى
محدش يرد معتز يخبط تانى محدش يرد يفتح الباب بالراحه و يدخل يلاقى بسمه نايمه و حاضنه ورقه يروح يقعد جنبها
معتز / انا عارف انك زعلانه منى بس مانا لغيت حوار السفر اهو و بعدين انا مستهلش والله
معتز يزق بسمه مبتتحركش يمسك الورقه و يقراها ووشه يتغير و يمسك ايد بسمه يرفعها و يسيبها تقع عالارض الدموع تنزل من عنيه ورا بعض ورا بعض و ينزل على ركبه جنبها
معتز / متعاقبنيش بالطريقه دى لا قومى بسمه بسمه
بسمه مبتتحركش معتز يشيلها و يجى يمشى الباب يتفتح و اخلاص و كامل يدخلوا
معتز / اللحقنى يا كامل بسمه انتحرت
معتز يحطها عالكنبه بتاعته و كامل يمسك ايدها و يعمل انه بيشوف النبض معتز يجرى يبص فى الاوضه يلاقى عالسرير بتاعها علبه دوا يجيبها و يديها لكامل كامل يمسكها
كامل / ينهار اسود هى خدت مالدوا ده
معتز / متعمل حاجه يا اخى
كامل / حقك عليا يا معتز انا لازم امشى
اخلاص / انا السبب انا اللى موت بنتى
معتز / لا انا السبب انا اللى قولتلها انى مبحبهاش انا اللى شوفتها الفتره دى كلها بتتعذب و مقدرتش اقولها الحقيقه قومى يا بسمه والله بحبك بحبك اكتر مبتحبينى
بسمه تقوم تقعد / بجد
معتز يمسح دموعه و كامل يدحك معتز يبص لكامل
كامل / احسن عشان تبقى تخبى عنى تانى يا متخلف ... و انتى يا جزمه مش عارفه تمسكى نفسك شويه ممثله فاشله
معتز / بقى كدا انتوا بتهزروا انتوا بجد تافهين اوى كدا
بسمه / وانت كداب و انانى و متخلف على فكره
معتز يبص فى منتهى الاندهاش
بسمه / ماما قالتلى على كل حاجه على فكره
نبيل يدخل ووراه سيد
نبيل / هو فى ايه انتوا واقفين كدا ليه
بسمه / البيه بيكدب عليا هونت عليك للدرجادى قلبك قسى عليا
معتز / انا ماشى
بسمه / لا مانتش رايح فاى حته انا لازم افهم منك ليه عملت كدا
معتز / انا عملت ايه بقى
بسمه / انا عشت اسوء يومين فى حياتى بسببك
معتز / يومين انتى زعلانه على يومين انا بقالى كام شهر فى الهم ده و حضرتك مكنتيش حاسه بحاجه
بسمه / عشان انت جبان
معتز / انا جبان ؟؟؟
بسمه / انت راضى عن نفسك
معتز / مش وقته يا بسمه
بسمه / امال امتى فهمنى
كامل / انت ليه مقلتليش انك بتحب بسمه و ليه سبتنى اخطبها ليه سكت طول الوقت ده
بسمه / عشان جبان
معتز / دا رايك فيا يعنى و مدام كدا عاوزه ايه
بسمه تعيط/ انت عارف انا عاوزه ايه
معتز / انا مش هقدر اوفرلك اللى انتى عوزاه لا هقدر اجيبلك شقه كبيره و لا عربيه و لا حتى هتعرفى تتفشخرى بيا وسط الناس
كامل/ بيتهيالى .....
بسمه / و انت هتعرف اللى انا عوزاه اكتر منى؟؟؟ انا مش عاوزه حاجه من دى
كامل / انا بقول .....
معتز / يا سلام يعنى لما صحباتك يقولولك الدكتوره اتجوزت السواق مش هتدايقى
كامل / ممكن اتكلم ....
بسمه / اخرس انت
كامل / حاضر
بسمه / يولعوا صحباتى و تولع الكليه كلها عالحاره عالناس عالدنيا كلها انا كل الحاجات دى متفرقش معايا
معتز / لا تفرق و انتى قولتى
بسمه / كانت تفرق لانها هى اللى كانت نقصانى لانك كنت جنبى بس لما انت روحت ولا حاجه من دى كان ليها طعم و لا حتى عيد ميلادى و انت عارف قد ايه بحب عيد ميلادى
نبيل / انا بقول نسيبهم لوحدهم شويه يصفوا الموضوع
كامل / لا انا بقول نبعت نجيب الماذون و نختصر الوقت
معتز / انا معنديش اى حاجه اقدمهالك
بسمه / معندكش ازاى و انت بتقدملى من سنين عشر سنين و احنا سوا عمرى محسيت انى ناقصنى حاجه الا لما قررت تبعد
كامل / ممكن بقى اتكلم
معتز / اتفضل خير عاوز تقول ايه
كامل / انا من الواضح انى دخلت بالغلط بينكم بس انت اللى حيوان لو كنت قلتلى مكنش فى حاجه من دى حصلت و الحمد لله انها جت على قد كدا بس....
بسمه / يا سلام يعنى كنت عاوزه يقولك اذا كان مكنش قايلى
سيد / كان قايلى
معتز / سيد
بسمه / سيد يعرف و انا لا للدرجادى سيد اقربلك منى
معتز / مكنش ينفع اقولك انتى صغيره و احنا فى بيت واحد خفت انا حتى مقدرتش اقول لبابا
كامل / هو انا مينفعش اكمل كلامى يا بشر
نبيل / اتفضل يا كامل
كامل يطلع دبله معتز من جيبه / انتوا نسيتوا دى بالغلط معايا و بيتهيالى ده وقتها
الكل يبص للدبله فى صمت
معتز / مينفعش الموضوع مش بالبساطه دى
سيد / انت اللى هتعقدها ليه اتفضل خد الدبله و لبسها لعروستك
معتز /انا معنديش شقه اتجوزك فيها ولا حتى فلوس اجيب عفش و لا فرح و لا فستان و لا اى حاجه
بسمه / هو انا هتحايل عليك تتجوزنى
نبيل / الماذون عليا حد يروح يناديله يا اخوانا
كامل / و الفستان و الاستوديو و الكوافير عليا
سيد / و الفرح عليا يلا انشالله معن حد حوش
معتز / انتو هتلمولى انا مش عاوز من حد حاجه
معتز ياخد دبلته و يمشى
بسمه تعيط/ غور فستين داهيه تاخدك
اخلاص / ممكن تهدى طيب
بسمه تسيبهم و تدخل اوضتها
سيد / هيهدى و يرجع متقلقش
........
فى البيت بالليل
بسمه بتعيط فى البلكونه و اخلاص و نبيل فى الاوضه
اخلاص / انا السبب فكل ده
نبيل / الفجر قرب ياذن و الواد لسه مجاش مش عاوز اسمع صوت
صوت باب الشقه نبيل و اخلاص يطلعوا يجروا يلاقوا معتز داخل يشاورلهم و يدخل البلكونه على بسمه بتعيط
معتز / عامله ايه
بسمه / و انت مالك
معتز / لا مالى و مالى اوى كمان
معتز يروح يقعد جنبها
معتز / وحشتينى على فكره
بسمه / صح صح
معتز / والله وحشانى اوى واحشنى هزارنا سوا و كلامنا و لعبنا وحشنى دحكتك و هزارك
بسمه / ماشى
معتز / انتى عارفه انا ليه مسافرتش
بسمه / ليه
معتز / خفت مشوفكيش تانى خفت توحشينى اوى مقدرش اشوفك انا عايش عشانك هروح هناك لمين فى مين فى الدنيا زى بسمه مين يستاهل انى اتعب عشانها غير بسمه مين بيفرحنى زى بسمه مين بيفتح نفسى عالاكل زى بكابوزتى بسمه
بسمه / بكابوزتك خست خلاص
معتز / انا محتفظ بكل صورك القديمه تحسبا انك تتنطتى عليا
بسمه / اتنططت عليك ؟؟؟ انا ذليت نفسى ليك مرتين وانت ولا فبالك مره منهم قدام الناس اتفضل بره
معتز / معاش و لا كان اللى يذلك بصى انا يمكن عمرى مهقدر احققلك اللى بتتمنيه
بسمه / انا مطلبتش منك تعمل اكتر ماللى بتعمله
معتز / اقولك ايه بس
بسمه / قول الحقيقه بتحبنى و لا لا
معتز / بحبك انتى الحب الاول و الاخير فحياتى انتى البنت الوحيده اللى اتمنيتها انا كنت بدعى ربنا كل يوم انك تكونى ليا اتمنيت بجد تحسى بيا و لو للحظه كنت بفرح بدحتك و بزعل لزعلك عشت اجمل زكرياتى معاكى انتى ساكته ليه
بسمه / بسمعك قول كمان
معتز / انا مبعرفش اقول انا عمرى مقولت الكلام ده لحد مش عارف اعبر كل الكلام باين قليل اوى عن الحقيقه اللى بحس بيها اشرحلك ازاى انا كان كلام الدنيا بيتخانق عشان يطلع و لسانى مش عارف يقول
بسمه / طب ليه عملت كدا معايا ليه كدبت عليا مصعبتش عليك
معتز/ كنت بموت بس من حبى فيكى كنت عاوزلك اللاحسن كنت خايف
بسمه / اللى بيحب حد بيحارب عشانه مش يسيبه لغيره
معتز / مانا فكرت و قولت ان فى حاجات فى الدنيا لازم الواحد يحارب لاخر نفس عشانها و مينفعش يستسلم بسهوله للفشل فيها
بسمه / طب و عرفت دا لوحدك
معتز / هقولك ايه مانتى عمرك مهتفهمى
بسمه / انا عشت سنين طويله اوى مش فاهمه بس دلوقت بس فهمت فهمت ان مهما لفيت الدنيا كلها عمرى مهلاقى حد يحبنى زيك انت الوحيد اللى شوفتنى حلوه ووثقت فيا و امنت بقدراتى
معتز / يا بسمه انتى لازم تعرفى انى خايف انا عشت عمرى كله بحاول احققلك احلامك بس انا مرعوب انى فيوم مالايام اكون العقبه اللى فحياتك انك تندمى انك تقولى فيوم انا كنت صغيره و اتسرعت
بسمه / اتسرعت انا خدت وقت طويل اوى عشان افهم بس الانسان اللى يحبنى و انا بكابوزه اكيد هيصونى و انا حلوه اللى وقف جنبى فاصعب وقت فى حياتى يستاهل انى اتحمل عشانه اى حاجه انت بس خليك جنبى و انا واثقه ان كل حاجه هتبقى احسن
معتز / و حلمك بشقه تلت اوض و خدامه
بسمه / الكوخ اللى بتضحك فيه البنت احسن مليون مره من القصر اللى بتعيط فيه و انا عمرى مكنت سعيده غير و انا جنبك دحكتى مبتطلعش من قلبى غير بسببك و الاكتر ان فرحتى مبتكملش غير بوجودك انا مبستحملش عليك كلمه لانك سندى
معتز / انا يمكن مقدرش اجيبلك شبكه غاليه بس ممكن نبدا بدبلتين و لما ربنا يفرجها هعوضك
معتز يطلع دبلتين من جيبه واحده فضى و التانيه دهب
بسمه / دى مكتوب جواها بسمه
معتز / اه و على مقاسى بالمللى لبسيهانى بقى
بسمه / دا بعينك
معتز / بطلى تقل بقى يلا لبسيهانى
بسمه / لبسنى انت الاول
معتز يلبس بسمه الدبله و بسمه تلبسه الدبله و اخلاص تزرغط
نبيل / احنا الفجر الناس نايمين
اخلاص / خليهم يصحوا الله
......
فى اجازه نص السنه السنه اللى بعدها فى الشارع فراشه و دىجاى و الناس بترقص و العريس و العروسه فى الكوشه هما بسمه و معتز
بسمه / مالك سرحان فى ايه
معتز / خايف
بسمه / ايه ؟؟؟
معتز / اصل انا شوفت اللحظه دى كتير فى الحلم و خايف اصحى
بسمه / و انا فى الحلم كنت احلى و لا دلوقت احلى
معتز / انتى مفيش احلى منك و لا حتى انتى و انتى فى الحلم
كامل يدخل
كامل / الف مبروك يا عريس اعملى حسابك يا عروسه انك مديونالى بعروسه
بسمه تبتسم / من عنيا
كامل / طب البت اللى لابسه احمر هناك دى تعرفيها
بسمه / دى بلسم حكيتلك عنها كتير
معتز / انت جاى تباركلى و لا جاى تتجوز
كامل / جاى اتجوز امال عاوزنى افضل عازب لوحدى
بسمه / خلاص هعرفك عليها
سيد و هند شايلين بيبى يدخلو
سيد / الف مبروك يا عريس
و بسمه تنادى بلسم و الكل يتصور صوره جماعيه
اخلاص على ترابيزه قاعده مع واحده بتحكيلها
اخلاص / و اجرنالهم الشقه اللى فى الرابع معانا فى نفس البيت و ادناها وش بياض و روحنا دمياط جبنه عفش خشب ابيض و وديناه للاستورجى و فرشنالهم الشقه و اديكى شايفه اهو مفيش كام شهر كنا مجوزينهم
الست / بس تلاقى المصاريف قطمت ضهركوا
اخلاص / والله محسيت بحاجه سبحان الله ربك بيعين و بصراحه صحابه رجاله وقفوا جنبه عالاخر اللى شال الفراشه و اللى شال الكوافير و الفستان على الجمعيه اللى عملتها معاكى على الغوشتين اللى كانوا عندى و قضيت
الست / طب والله البساطه مفيش احلى منها و سبحان الله منورين فى الكوشه دانا فى فرح ابنى كان وشه اسود من كتر الديون اللى كانت عليه
اخلاص / والله ياختى ربك بيعين
......
فى جنب
كامل / ازيك
بلسم / الحمد لله ازيك انت
كامل / انتى صاحبه بسمه فى الكليه
بلسم / انا صحبتها الانتيم
كامل / البت بسمه دى جدعه اوى على فكره
بلسم / عارفه
كامل / هو ماما هنا
بلسم /اه قاعده هناك
كامل / طب ثوانى هروح انادى ماما
...........
فى الكوشه
بسمه / لو فيوم قولتلك انى ندمانه انى اتجوزتك او اى كلام وحش اعرف انه من ورا قلبى و ان ضغوط الدنيا هى اللى خلتنى اقول كده
معتز / انا مش عاوز اشيل هم بكره بدرى انا اصلا لسه مش مستوعب الى بيحصل النهرده و خايف اكون بحلم
بسمه تقرصه
معتز / ليه كدا
بسمه / عشان تتاكد انه حقيقه
معتز / على العموم لو حلم ياريت محدش يفوقنى ابدا
بسمه / فرحان
معتز / فرحان متوصفش شعورى انا طاير انا عامل زى العيل الصغير اللى لقى لقيه
بسمه تبتسم
معتز / و انتى
بسمه / النهرده اسعد يوم فى حياتى النهرده يوم فى العمر
معتز / لا النهرده بدايه العمر
بسمه / ربنا ميحرمنى منك ابدا و لا يحرمك منى طبعا ههههههه
معتز / امين يارب
سيد و كامل و هند و بلسم يشدوا معتز و بسمه من عالكوشه عشان يرقصوا معاهم
......
فى شقه معتز و بسمه
معتز و بسمه و نبيل و اخلاص يدخلوا و اخلاص تحط صينيه العشا و تتوشوش مع بسمه و بعد كدا تمشى هى و نبيل و يفضل معتز و بسمه لوحدهم و بسمه عماله تلف بالفستان
بسمه / واو
معتز / ايه رايك تخشى تغيرى بسرعه عشان عاوزين نصلى ركعتين لربنا نبدا بيهم حياتنا
بسمه / ممكن تساعدنى افك الدبابيس مالطرحه
معتز / اوك يلا
بسمه و معتز يدخلوا الاوضه و بسمه تقعد على كرسى التسريحه و تبدا هى و معتز يفكوا الدبابيس
معتز / انا واثق ان الكوافيره دى بتكرهنى
بسمه / ههههههه ليه يعنى عشان حاطه دبابيس كتير
معتز / دى مش طرحه دى دبابيس و طلعلها طرحه
بسمه / بطل رغى و خلص
معتز / اخيرا انا كنت نسيت شكل شعرك يا بنتى
بسمه / يا رخم
بسمه تفك الفستان و هى لابسه تحتيه بدى و ليجن
بسمه / خد حط ده بقى فى الصاله
معتز / ايه اللى انتى لابساه ده
بسمه / ملكش دعوه يلا طلع الفستان بقى لحد مغير
معتز / يلهوى انتى كنت لابساه ازاى دا تقيل
بسمه / و عاملى جيم و عضلات داحنا جامدين اوى
معتز اول ميطلع مالاوضه بسمه تقفل الباب بالمفتاح
معتز / بطلى استهبال بلاش الحركات القرعه دى
بسمه / ههههههه تدفع كام و افتحلك
معتز / و حياه امك بطلى يا بسمه و افتحى هزعل بجد
بسمه / ثوانى هغير و افتحلك
معتز / يعنى هتفتحى
بسمه / امال هنيمك فى الصاله انا قلبى حنين
معتز / ماشى انا مستنى
بسمه تفتح الباب و تبقى لابسه بيجامه لونها احمر
معتز / انتى بقيتى بتلعبى فى الاهلى امتى
بسمه / الدنيا برد
معتز / صبرنى يارب
بسمه / بهزر معاك انا لابساها لحد متوضى و هصلى و بعد كدا بقى ... الله ريحه الاكل تهبل و انا جعانه اوى
معتز / انا كنت عارف انى منحوس
بسمه / بقى كدا طب ايه رايك اننا هنصلى بالبقره
معتز / دا عند امك الكلام ده ياختى قدامك نص ساعه بالكتير انا بقالى تمانيه و عشرين سنه مستنى
بسمه / ههههههههههههه حاضر حاضر هدخل اتوضى اهو
بسمه تطلع مالحمام تلاقى معتز مستنيها و يصلوا و لما يسلم معتز يقوم يشغل اغنيه اسلو
معتز / تسمحيلى بالرقصه دى
بسمه / مشبعتش رقص
معتز / الرقصه دى ليها طعم تانى دى اول رقصه لوحدنا محدش شايفنا يقر علينا
بسمه / ارقص و ماله
معتز يشغل اغنيه تتجوزينى هانى عادل و يحضن بسمه و يرقص معاها
اي كلام لما بيتقال بيغير كل حياتنا معاه عنه بيستاهل اندور طول العمر ونستناه انا من اللحظات بقولك اني بحبك اكتر مني انتي اللي عشانك بكتب شعري انتي اللي عشنها بغني تتجوزيني
و يلفها و هى بتدحك و مبسوطه
مش عايز غيرك بالحياة اوعى تسبيني من غير متكلم انتي بتسمعيني عشانك اطول السما لو حبتيني انا حاسس ان الكون وياك بشوفو بشكل جديد الدنيا بتضحك وانت معايا تكشر وانت بعيد انا شايف فيك اولدنا ومستقبلنا ودنيا أمان مهما هنكبر ونعجز هفضل احبك زي زماااااااااان تتجوزيني
معتز / جعانه ؟؟؟
بسمه / شبعت
معتز يشيلها
معتز / اللهم جنبنا الشيطان و جنب الشيطان ما رزقتنا
يدخلوا اوضتهم و يقفلوا الباب و الاغنيه لسه شغاله
مش عايز غيرك بالحياة اوعى تسبيني من غير متكلم انتي بتسمعيني عشانك اطول السما لو حبتيني انا حاسس ان الكون وياك بشوفو بشكل جديد الدنيا بتضحك وانت معايا تكشر وانت بعيد انا شايف فيك اولدنا ومستقبلنا ودنيا أمان مهما هنكبر ونعجز هفضل احبك زي زماااااااااان تتجوزيني
البدايه
أنت تقرأ
بكابوزه بقلم / لولو محمد ( كامله )
Romanceمعاناه بنت مراهقه مع السمنه و البحث عن الحب رومانسي كوميدى
