بكابوزه بقلم / لولو محمد ( كامله )

الحلقه ٢٥

#lolo #لولو_محمد
(((((((((بكابوزه))))))))))))
الحلقه الخامسه و العشرون
بلسم / يا شيخه طب ايه مش جايه خلاص يعنى
بسمه / البعيده غبيه مقولتك مضروبه مش قادره اجى
بلسم / خلاص هعدى عليكى بعد الكليه
بلسم تقفل و فارس يدخل
تامر / خير
فارس / ازيكم
بلسم / الحمد لله ... بسمه تعبانه مش هتقدر تيجى
تامر و فارس فى نفس واحد / ليه خير
.........................
بلسم / عندها ظروف كدا و خلاص
تامر / كنتى بتقولى خناقه
بلسم / اه فى واد فى المنطقه صايع كان متقدملها و معتز ضربه فجاب رجاله يضربوا معتز فهى نزلت تحوش تقريبا انضرب هى كمان
فارس / ايه التخلف ده هاتى اسم الواد ده و انا هنسفه
بلسم / معرفش غير ان اسمه حنفى
تامر / طب مش المفروض نروح نطمن عليها
بلسم / لا مفتكرش ان دى فكره كويسه بسمه بيتهم صغير و مبيتحملش ضيوف بس متقلقوش انا هروحلها بعد الكليه و هوصلها سلامكوا
............
فى البيت معتز و بسمه بياكلوا موبايل بسمه يرن
بسمه تقوم تجيبه / دا فارس عاوز ايه ده
معتز / ردى شوفيه عاوز ايه جاهم القرف كلهم
بسمه / الو ..... الله يسلمك .....لا كتر خيرك ملوش لزوم .........مفيش داعى وفر جمايلك هو كدا كدا مقبوض عليه خلاص .....اه ......ان شاء الله هاجى بكره عادى .........سلام
معتز / خير
بسمه / عاوزنى اديله بيانات حنفى عشان يوصى عليه
معتز / طيب اوى الواد فارس ده يموت فى الخير
بسمه / انت هتقولى دا سبحان الله الخير بينط من عنيه كدا ههههههههههههههههه
معتز يكمل اكل و هو ساكت
.............
فى الدكان
حنان /المهم زى مقولتلك اول ممحود يجى من بورسعيد هنيجى نقرى الفاتحه علاطول
اخلاص / دانتوا تانسوا و تشرفوا بس انا ليا عندك طلب
حنان / اؤمرى
اخلاص / بصى لحد مالاستاذ محمود يجى بلاش كامل يفاتح بسمه فى اى حاجه انتى عارفها هتتكسف و تعمل مالحبه اوبه و يمكن متروحش الصيدليه تانى و هى صغيره و مبتعرفش تتصرف
حنان / احسن برده نخلى الموضوع ده سر بينا احنا التلاته انا و انتى و كامل لحسن الحاجات دى بتتنظر
اخلاص / خلاص على بركه الله الا هو كامل مفتحش النهرده ليه 
حنان / كامل نايم فى السرير مدغدغ
اخلاص / هههههههههه على رايك و لا سيد فتح و لا معتز نزل الشغل
حنان / انتى اصلك مشوفتيش اللى حصل انا مسكت الواد صبى المكوجى و قررته و قالى انه شاف حنفى و الزباله بتوعه و كان فى تلاته من بتوع الافلام دول اللى تلاقيهم معضلين من كل حته دول
اخلاص / و بنت الهبله بنتى نزلتلهم
حنان / طب تصدقى وتؤمنى بايه
اخلاص / لا اله الا الله
حنان / الواد كامل كان خايف يتقدم اكمنها صغيره يعنى و كدا بس بعد اللى عملته امبارح اول مروح قعد يبوس فاديا و رجليا لازم تخطبيهالى هى دى اللى ميتخافش عليها و هتصون بيتى هى دى يا ماما و اسكته و اقوله خلاص هخطبهالك اول مالنهار يشقشق هنزل اكلم امها ابدا دا كان هاين عليه انزل اخبط عليكوا من بدرى
اخلاص / ههههههههههه ربنا يديم المحبه
................
فى البيت بعد فتره لما محمود يرجع كلهم قاعدين يفطروا
اخلاص / عندى ليكوا خبر حلو
معتز / خير
نبيل / بسمه جيلها عريس كويس
معتز يشرق / افندم
اخلاص / كامل
بسمه تسيب الاكل و تقوم
معتز / كامل مين
اخلاص / كامل صاحبك امه كلمتنى انهم عاوزين يجوا يتقدموا لبسمه و ابوك وافق
معتز / و ازاى محدش قالى
اخلاص / الله ماحنا بنقولكوا اهو
نبيل / انا لازم امشى هتيجى يا بسمه اوديكى الكليه
بسمه / ايوه هاجى يلا سلام
معتز  ساكت
اخلاص / بسمه متتاخريش عشان نلحق نروح الكوافير قبل ميجوا معادهم الساعه 8
بسمه و نبيل يمشوا و اخلاص تشيل الاكل و معتز لسه ساكت و مبيتحركش و فجاه يقوم و يروح لاخلاص
معتز / ماما هى بسمه وافقت على كامل
اخلاص / الحوار دار قدامك لا رفضت و لا وافقت و لما الناس يجوا و يتكلموا و نتفق نبقى نشوف رايها
معتز / مش فاهم يعنى ايه
اخلاص / يعنى بسمه مش بنت اى كلام احنا لازم نقعد و نتشرط و نشوف لو وافقوا على شروطنا نبقى نقولهم سيبونا نفكر احنا بقى
معتز / طب بسمه لسه صغيره ليه تستعجلى عليها دراستها و كدا
اخلاص / متقلقش احنا هنخطبها بس لكن جوزها لسه بدرى على ميوضب شقته و نجيب الجهاز كل ده بياخد وقت
معتز / بس بسمه مينفعش تتجوز كامل
اخلاص / ليه يعيبه ايه كامل
معتز / ماما انا بحب بسمه مينفعش تجوزيها كامل
اخلاص / مش فهماك يا معتز
معتز / انا بحب بسمه يا ماما انا عاوز اتجوزها
اخلاص / انت بتتكلم جد يا معتز
معتز / ايوه انا مرديتش اتكلم طول الفتره اللى فاتت عشان كنت فاكر انها صغيره و عشان احنا عايشين فبيت واحد فخفت بس لازم اتكلم و اقول لان مينفعش اقف اتفرج و انتوا بتخدوها منى
اخلاص / انا مصدومه ماللى بسمعه انا عمرى مكنت اتصور ان انت تبص لبسمه
معتز / و مبصش ليه ناقصنى ايه
اخلاص  /يا معتز انت زى ابنى و اتمنالك كل خير بس لازم ادور على مصلحه بنتى الاول
معتز / و مصلحه بسمه مش معايا مع كامل
اخلاص / يابنى هتصرف عليها ازاى
معتز / هصرف عليها ازاى ؟؟؟؟ من شغلى زى مبصرف عليها دلوقت
اخلاص / انا ان كنت خدت منك مليم فانا خته عشان كنت فكراك اخوها لكن لو كنت اعرف انك هتعايرنى و تطالبنى بيهم
معتز / لا لا انا مش عاوز فلوس و مش بعايرك والله انا بس ....
اخلاص / هتعيشها فين يا معتز هتنام معاها فى البلكونه و لا هنا فى الصاله و لا هطلع انا و ابوك بعد العمر دا كلو ننام فى الصاله و نسيبلك الاوضه
معتز / هاجر شقه بره مش مشكله
اخلاص / و هتجيب ايجارها منين فوق مصاريفكم و لو ربنا كرمكم بعيل هتجيب مصاريف له منين
معتز / هشتغل هشتغل ليل نهار مش هرتاح و لا هنام
اخلاص / هتدخله مدرسه ازاى هتجيب لكل ده منين بلاش كل ده بسمه هتبقى دكتوره يرضيك زمايلها يالسوا عليها و يعايروها انها اتجوزت سواق تاكس
معتز / للدرجادى انا حقير فنظرك
اخلاص / يابنى
معتز / متقوليش ابنى لانى مش ابنك عمرى مكونت و لا عمرى هكون
اخلاص / يا معتز انت بتحب بسمه و تتمنالها الخير كامل عنده شقه تلت اوض و صاله و حمام و مطبخ و بلكونه و صيدلى زيها و عنده عربيه و هيجبلها شبكه كبيره دا غير شقه اسكندريه
معتز / كامل معاه فلوس لكن انا لا فلازم كامل يشيل فهمت
اخلاص / متقولش لبسمه حاجه عن الكلام اللى دار بينا خليها تقرر بنفسها اوعدنى انك مش هتقف فى طريقها اوعدنى لو بتحبها بجد ابعد عنها
معتز / اوعدك
معتز يمشى و ينزل وهو بيعيط سيد يشوفه
سيد / انت يابنى انت يا بتاع مالك استنى
معتز يمشى و سيد ميحصلوش
.......
فى التاكس
نبيل / ايه هتفضلى الطريق كله ساكته احنا قربنا نوصل مش هتقولى رايك ايه
بسمه / هو حد كان سالنى عن رايى و انا مردتش
نبيل / و مين قالك اننا مكناش هنسالك امك بس رايها اننا نشوف الاول كامل هيوافق على شروطنا و لا لا
بسمه / ماشى
نبيل / الراى فى الاول و الاخر ليكى انتى محدش هيغصبك على حاجه ابدا
بسمه / اوعدنى ان محدش هيغصبنى
نبيل / اوعدك
بسمه / ماشى
.............
فى الكليه بسمه تمسك الموبايل تتصل بمعتز يكنسل عليها تتصل تانى تلاقى التليفون مقفول
بلسم / مالك
بسمه / مفيش متاخديش فى بالك
.....
فى البيت بالليل
بسمه / هو معتز فين
اخلاص / فى الشغل هيكون فين يعنى خشى انتى اللبسى الناس زمانهم جايين
بسمه / ماشى
شويه و الباب يخبط و كامل و باباه و مامته يدخلوا نبيل و اخلاص يستقبلوهم و بسمه قاعده فى الاوضه
محمود / السلام عليكم
نبيل / و عليكم السلام نورتونا
حنان / ايمان كانت عاوزه تيجى بس قولنا نخليها للمره الجايه
اخلاص / والله كنتى جبتيها هى و العيال
محمود / بص يا حج نبيل انا مش هلف و ادور انت عارف احنا جايين ليه و بصراحه احنا لو لفينا الدنيا كلها مش هنلاقى زى الدكتوره بسمه
نبيل / الله يعزك و احنا منلاقيش زى الدكتور كامل
محمود / كامل ابنى عنده شقته اللى فوقينا نص تشطيب الدكتوره بس تختار السيراميك و البياض من بكره و كل اللى تؤمر بيه هيكون عندها الشبكه دى هديه العريس لعروسته انا مش هساعده فيها هو بقى يتفق معاكوا على امكانياته بس العفش انا معاك هنفرش الشقه كلها زى متختار العروسه
اخلاص / الله ينور عليك والله مفى كلام احسن من ده
محمود / و القايمه كل اللى اتجاب يتكتب و زى متعمل مع بنتى هعمل معاكم
نبيل / بس انت عارف الظروف
حنان / ياخويا اللى تقدروا عليه هاتوه و لا يكلف الله نفسا الا وسعها و اللى متقدروش عليه ربنا يسهل و نقدر احنا نجيبه و بعدين ماحنا برده بنعمل لولادنا
اخلاص / و المؤخر
حنان / ياختى ربنا ميحوجنا ليه
اخلاص / مقولتش حاجه بس اطمن بس
محمود / انا كاتب لايمان 30 الف و الحق يتقال انا دفعت الماذون عشان العريس كان عاوزهم 10 بس فانا دفعت الفرق انا يا سيدى معاك لحد 30 الف
اخلاص / حلوين ياخويا
نبيل / والله انت بتحرجنى يا استاذ محمود
كامل / لا احراج و لا حاجه بسمه والله تستاهل اكتر من كدا بكتير
اخلاص / و احنا يهمنا الحاجات دى برده احنا بنشترى راجل
كامل / بص يا عمى انا حاليا محوش حاجه و خمسين الف هجيب شبكه بتلاتين و الباقى هبدا بيه التوضيب
نبيل / و احنا منقدرش نطلب منك اكتر من كدا
اخلاص / طب خلاص نقرا الفاتحه
حنان / نقرى الفاتحه
نبيل / طب مش ننادى العروسه نفرحها الاول طيب و لا ايه
كامل / اه طبعا و معلش يعنى انا مقدرتش اصبر لما تنزلوا تنقوا الشبكه فانا نزلت جبت دبلتين و محبس على زوقى كدا
كامل يطلع علبه صغيره من جيبه
حنان / شايفين الواد متلهوج ازاى هههههههه
اخلاص / ورينى كدا الله حلوين اوى يا بسمه ... بت يا قصدى يا دكتوره بسمه تعالى سلمى عالناس
بسمه تطلع مالاوضه و شكلها مش مبسوط و تروح تسلم عالناس
حنان / تعالى اقعدى جنبى هنا يا حبيبتى
بسمه تقعد جنب حنان
اخلاص/ شوفتى يا بسمه ايه رايك
بسمه تمسك العلبه و تبتسم ثوانى
كامل / لو مش عجباكى نروح فاى وقت نغيرها و لا يهمك
اخلاص / مش عجباها ايه بس دى تهبل تسلم ايدك هى بس مكسوفه شويه انت عارف البنات
حنان / طب بيتهيالى اتفقنا على كل حاجه تقرا الفاتحه بقى و نلبس الدبل و باقى الشبكه تبقى تلبسها فى الخطوبه
نبيل / والله يا ست حنان احنا طبعا كان نفسنا نعمل خطوبه كبيره لبسمه
محمود / يا سيدى و لا يهمك احنا نلبسها فى الصاغه و نروح عندنا فى البيت نتعشى و نسهر للصبح و لا قاعه و لا مصاريف و نخلى الفرحه الكبيره فى الفرح باذن الله
اخلاص / و احنا موافقين والله عين العقل يلا بقى يا عريس لبس لعروستك الدبله و نقرى الفاتحه عشان ازرغط
يروح يقعد مكان مامته و يجى يلبس بسمه الشبكه
بسمه تشد ايدها / مش هنستنى معتز
اخلاص / معتز زمانه فى الشغل زمانه جاى يلا بقى متاخريش الفرحه
كامل يمسك ايدها تانى و يلبسها الدبله
بسمه تقوم و تجرى على اوضتها
حنان / طب استنى لبسى عريسك انتى كمان
اخلاص / هههههه البت اتكسفت معلش يا عريس انت عارف بقى
كامل يبتسم / مش مشكله اللبسها انا
محمود / طب ايه هنلبس الشبكه منغير الفاتحه طب منقراها بقى
الكل يقروا الفاتحه و بسمه جوه بتبص مالشباك على معتز
..............
تحت قدام البيت معتز يرجع
سيد / انت كويس يابنى
معتز / طبعا كويس هيكون فيا ايه يعنى
سيد / انا مكنتش اعرف انه هيتقدم غير قبل المعاد بكام ساعه بالصدفه هو كان مكلمنى و انا قولتله يشيل الفكره دى من دماغه
معتز / حصل خير كل واحد بياخد نصيبه
سيد / تحب نروح فى حته
معتز / معنديش وقت ورايا شغل
سيد / يعنى انت مش زعلان ان كامل اتقدم لبسمه
معتز / ازعل ليه هو اولى مش هو معاه يشيل خلاص حلال عليه و انا  بقى ربنا يرزقنى باللى ترضى بفقرى
سيد / بسمه اللى قالتلك كدا
معتز /اسكت يا سيد ابوس ايدك هما هيباتوا فوق و لا ايه
كامل و ابوه و امه و نبيل نازلين من فوق و كامل لابس دبلته
كامل / كنت فين يا واطى كدا تتاخر فيوم زى ده
معتز يبص عالدبله فى ايد كامل / معلش انت عارف انى لازم اشتغل
كامل / مالك انت كويس
معتز / اه كويس المهم انت عامل ايه مبسوط
كامل / بصراحه هموت مالفرحه
معتز / الف مبروك
كامل / عقبالك
معتز / ربنا يسهل عن اذنك عشان لازم اخد التاكس و امشى
كامل / ايه يابنى هو كله شغل شغل فكك النهرده و تعال نروح نحتفل فاى حته
معتز / معلش مش هينفع سلام
معتز يمشى
كامل / ماله ده
سيد / تلاقيه مرهق مالشغل و لا حاجه
كامل / و انت مش هتباركلى و لا ايه
سيد / الف مبروك
كامل / طب ايه مش هتيجى تصيع معايا شويه
سيد/ على عينى والله فايدى شغل صاحبه مستعجل عليه و لازم اخلصه مره تانيه
كامل / ايه الصحاب السكه دول انتوا الخسرانين
.................
فى اوضه بسمه
اخلاص / الف مبروك يا حبيبتى
بسمه / انتى ازاى تعملى كدا
اخلاص / عملت ايه
بسمه / انتى كروتينى مسالتنيش حتى ان كنت موافقه و لا لا
اخلاص / ماشى و انتى موافقه و لا لا
بسمه / معرفش
اخلاص / انا بقى عارفه كامل ابن حلال و مرتاح و هينقلك فى عيشه تانيه و هيعليكى هيسعدك و مش هيخلى فى نفسك حاجه
بسمه / افرضى انا محبتوش
اخلاص / يا بنتى الحب بيجى بعد الجواز و على فكره الفقر بيموت الحب يابت بطلى رومانسيتك الخايبه دى انا امك و عارفه مصلحتك
بسمه / انا اصلا مش فاهمه ازاى معتز ميجيش لا و كمان ياخد التاكس من بابا من بره بره و يمشى و تليفونه مقفول
اخلاص / بصراحه معتز زعلان
....................

بسمه / انا كنت متاكده انه مش موافق
اخلاص / هو بس شايفك صغيره لسه و خايف كامل يعطلك بس كامل وعدنى قدامك انه مش هيعطلك ابدا عن المذاكره و ان شهادتك هى اهم حاجه فى الوقت ده
بسمه / مش عارفه حاسه بقبضه فى صدرى كدا
اخلاص / تلاقيكى اتحسدتى تلاقى الناس عرفوا فحسدوكى عليه دا كل بنات المنطقه يتمنوا ربع اللى انتى فيه دلوقت
بسمه / ياريت يكون زى مبتقولى
.............
بعد صلاه الفجر معتز و نبيل يدخلوا البيت معتز يدخل المطبخ ياكل لقمتين عالواقف و يدخل اوضه ابوه و يشد الغطا و ينام
بسمه / هو معتز مش هياكل معانا
نبيل / تعبان من كتر الشغل طول اليوم سيبيه يرتاح
اخلاص / هو كلمك فى حاجه