بكابوزه بقلم / لولو محمد ( كامله )

الحلقه ٢٦

#lolo
((((((((((بكابوزه)))))))))))
الحلقه السادسه و العشرون
بعد صلاه الفجر معتز و نبيل يدخلوا البيت معتز يدخل المطبخ ياكل لقمتين عالواقف و يدخل اوضه ابوه و يشد الغطا و ينام
بسمه / هو معتز مش هياكل معانا
نبيل / تعبان من كتر الشغل طول اليوم سيبيه يرتاح
اخلاص / هو كلمك فى حاجه
.........................
نبيل / هو نطق كلمه من ساعه مشوفته فى الصلاه يلا خليه يرتاح و لما يصحى هيبقى كويس
اخلاص / ماشى ثوانى هحط الفطار
بعد الفطار
نبيل / هتنزلى معايا اوصلك
بسمه / لا انا لسه قدامى شويه انزل انت يا بابا متعطلش نفسك
اخلاص / انا نازله متصحيش اخوكى سيبيه يرتاح
بسمه / ربنا يسهل حاضر
اخلاص و نبيل ينزلوا و بسمه تجرى على اوضه معتز
بسمه / وربنا انت معندك دم
بسمه تنط عالسرير جنبه و تنزل فيه ضرب يقوم متنرفز
معتز / فى ايه يا بتاعه انتى فى حد يصحى حد كدا
بسمه / انت كمان ليك عين تزعق مش كفايه اللى انت عملته
معتز / و انا كنت عملت ايه بقى ان شاء الله زعلت الست الكونتيسه فى ايه
بسمه / ازاى تسيبنى امبارح
معتز / كنت بشتغل كنت بجيب فلوس و لا حضرتك فكرانى بابا و ماما بيدونى
بسمه / ياخى طظ فى الفلوس اللى تخليك تسيبنى فى يوم زى ده
معتز بصوت عالى / طظ فى الفلوس طظ فى انهى فلوس فالفلوس اللى عملتى بيها شعرك عشان تعجبى و لا فى الهدمه اللى انتى لابساها هى مش دى برده بالفلوس
بسمه تدمع / انا مش عايزاها
معتز يلين بس لسه عصبى / انا تعبان و عاوز انام ورايا شغل و مش فاضى
بسمه بصوت عالى / من امتى مش فاضى مانت طول عمرك فى الطاحونه دى و كنت بتفضالى من امتى معدتش بتفضى
معتز بصوت واطى / انا كدا بيتهالى اديت رسالتى كامل بقى يشيل
بسمه / رسالتك ؟؟؟تصدق انك عيل حيوان
بسمه تضير عشان تطلع بره
معتز يعيط / حيوان و فقير و غبى و حقير و فاشل و سواق ملوش اى قيمه ضيعت اربع سنين من عمرى بزاكر و فى الاخر ضيعت الباقى برده
بسمه تجرى على معتز و هى بتعيط و تحضنه
بسمه / انت بتعمل ايه متعيطش عشان خاطرى متعيطش انا مش عاوزه الفلوس والله معاوزه اروح لكوافير و لا عاوزه هدوم و لا عاوزه حاجه بس انت متعيطش انا غلطانه انى صحيتك انا اسفه انا عارفه انك تعبان عشان خاطرى متعيطش
معتز يبطل عياط / انتى بتعيطى ليه
بسمه / عشان انت بتعيط
معتز يمسح دموعها و يناولها علبه المناديل من على الكومودينو جنب السرير
معتز / متعيطيش خلاص
بسمه / انت راجل مينفعش تعيط
معتز / ليه مبحسش حجر مش من حقى انى اتعب و اضعف
بسمه / لا بس انا مسنوده عليك لو انت ضعفت هتسند على مين
معتز / ربنا يخليلك كامل
بسمه / انت بتتكلم جد
معتز / انا اسف نسيت اباركلك حلوه الدبله اوى مبروك حققتى كل اللى اتمنيتيه
بسمه تتنهد / المفروض كانوا يتفقوا بس و لو وافقوا على شروطنا نفكر بس
معتز / ووافقوا مهو كان لازم يوافقوا
بسمه / قالوا هيفرشوا الشقه تلت اوض و صاله و حمام و مطبخ
معتز / زى متمنيتى كويس
بسمه / و اتفقوا على شبكه ب30 الف و مؤخر زيهم و كل حاجه بابا بيقولها بيقولوا حاضر
معتز / مبروك
بسمه / بابا كان مبسوط و ماما المفروض كانوا يقولوا نفكر هما وعدونى بده و انت مكنتش موجود
معتز ساكت و باصص فى الارض
بسمه / كامل كان جايب الدبله و المحبس معاه و الكل كان فرحان قولتلهم نستناك بس
معتز / و تستنونى ليه هى الدنيا هتقف عشان معتز كبرى مخك المهم ان بسبوستى الصغيره كبرت و بقت عروسه
بسمه / بس انت كسرت فرحتى معرفتش افرح عشان انت مكنتش موجود انت مينفعش متكونش موجود
معتز / معلش هى كل حاجه بتبقى صعبه فى اولها
بسمه / اوعدنى انك هتكون موجود اوعدنى انك عمرك مهتسيبنى عشان كلامك السخيف ده
معتز / بكره كامل هياخدك من هنا على بيته و كدا كدا دورى فى حياتك مسيره يوم و ينتهى
بسمه / يبقى مش عاوزه كامل و مش عاوزه اتجوز
تليفون بسمه يرن
معتز / روحى شوفى مين
بسمه / اوعدنى الاول انك مش هتعمل كدا تانى
معتز / هتلاقيه كامل
بسمه / بقولك اوعدنى
معتز يقوم يجيب موبايل بسمه فى الصاله و بسمه وراه
معتز/  شوفتى مش قولتلك كامل خدى ردى عليه
بسمه / اوعدنى الاول
معتز يفتح الخط و يديها الموبايل بسمه مترداش تاخده معتز يفتح الاسبيكر 
كامل / الو .... الو
بسمه / الو
كامل / اخيرا رديتى فينك يا بنتى
بسمه / موجوده خير
كامل / مالك صوتك ماله
بسمه / مفيش كنت نايمه
كامل / طب ايه رايك اوصلك الكليه النهرده
بسمه / ملوش لزوم متتعبش نفسك
كامل / لا انا مصر بصى انا هستناكى اللبسى و انا تحت ماشى
بسمه / ماشى
كامل / اه على فكره وحشتينى
معتز يبتسم
بسمه / شكرا
بسمه تشد التليفون من ايد معتز و تقفل الخط
معتز / شوفتى
بسمه / شوفت ايه
معتز / المهم اللبسى يلا عشان متتاخريش
معتز يسيبها و يتحرك للاوضه
بسمه / على فكره ماما قالتلى انت زعلان ليه
معتز يقف / قالتلك ؟؟؟؟؟
بسمه / اه قالتلى انك زعلان عشان الدراسه بس متخفش انا مش هسمح لاى حاجه تعطلنى
معتز يبتسم / كويس برافو عليكى
بسمه تمسك ايد معتز/ اوعدنى بقى يا معتز
معتز / اوعدك بايه
بسمه / انك عمرك مهتسيبنى تانى وقت محتاجلك
معتز / اوعدك انك وقت متحتاجينى بجد هكون موجود
بسمه / خش نام بقى
معتز بابتسامه / و انتى اللحقى اللبسى كامل مستنيكى تحت
بسمه تسيب ايد معتز وهو عينه على ايدها و تدخل تلبس
...........
فى العربيه عند كامل
كامل / ازيك
بسمه / الحمد لله تمام ازيك انت
كامل / بقيت كويس لما شوفتك مالك عنيكى حمره ليه
بسمه / منمتش كويس
كامل / ولا انا اتصلت بيكى امبارح مردتيش ليه
بسمه / انت هتقضيها رغى كدا هتاخر
كامل / انا اسف يلا
كامل يدور و يسوق
كامل / تحبى نروح السينما النهرده و لا تحبى تتفسحى فين
بسمه / معلش اجلها عشان ورايا مزاكره
كامل / انتى كويسه
بسمه / اه كويسه شكرا
كامل / على ايه
بسمه / عشان سالت
كامل / انتى اتخانقتى مع معتز
بسمه تبصله / عرفت ازاى
كامل / يعنى شئ متوقع بعد اللى عمله امبارح انا نفسى زعلان منه شويه
بسمه / معتز خايف على دراستى و شايف ان ده مش وقته
كامل / بس انا مش هعطلك دراستك هى رقم واحد
بسمه / كويس اننا متفقين
كامل / بصى يا بسمه انا مش هكدب عليكى و اقولك انى حبيتك من اول نظره و لا هغنى عليكى كلام الحب بتاع الافلام ده بس هطلب منك طلب
بسمه / اطلب
كامل / ادينى فرصه انا مش عارف هتصدقينى و لا لا انى اقولك انى مكنتش بتاع بنات و انى واد دحيح من يومى انتى عارفه اشمعن انت اللى قررت ارتبط بيها
بسمه / ليه
كامل / عشان بت بميه راجل المواقف اللى حصلت فى الفتره اللى فاتت خلتك تكبرى فعينى اوى بجد
بسمه / احنا وصلنا
كامل / بالسرعه دى
بسمه / تتعوض
كامل / تحبى اعدى عليكى اخدك
بسمه / هروح مع صحابى
كامل / طب لو عوزتى حاجه كلمينى
بسمه / اوك سلام
......
فى الكليه
بلسم / يا واطيه يا حيوانه و انا لما اسالك تقولى مفيش متاخديش فبالك يا سلام
بسمه / والله يا بنتى انا نفسى لسه مش مستوعبه احنا كنا فاكرينها تعارف يعنى بنحط النقط عالحروف و بعد كدا هنشوف بس كل حاجه جت ورا بعض و فجاه لقيته بيلبسنى الدبله
بلسم / و المفروض انى اصدق
بسمه / تصدقى متصدقيش هى دى الحقيقه مع انى انا نفسى لسه مش مصدقه
بلسم / يابنت الايه يا قروبه الف الف مبروك بصى انا مش هعدى اللى حصل ده منغير عزومه جامده
بسمه / وماله متغلاش عليكى
بلسم / على فكره ناس كتير هتنتحر بعد الخبر ده
بسمه / يولعوا
.......
فى البيت
بسمه / السلام عليكم
نبيل / و عليكم عروستنا عامله ايه
بسمه / ازيك يا بابا هو معتز فين
اخلاص / فى الشغل يلا تعالى كلى بقى عشان انا اتفقت مع الست حنان اننا ننزل نشترى الشبكه النهرده بالليل
بسمه / ايه الكروته دى مانا كنت مع كامل الصبح مقاليش ليه
اخلاص / مكنش يعرف انا و هى اتفقنا العصر و انتى كنتى فى الكليه
بسمه / انا ورايا مزاكره
اخلاص تزعق/ عندك امتحان بكره يعنى
نبيل / اهدى يا اخلاص اتصلى بالست حنان و اجلى المعاد البت وراها مزاكره كان المفروض تساليها الاول
اخلاص / انت شايف كدا يعنى الو ايوه يا حنان معلش ارمى الجاتوه اللى اشترتوه فى الزباله هو و الاكل اللى تعبتى انتى و ايمان فى عمايله طول النهار عشان بسمه جت مالكليه ملهاش مزاج غير للمزاكره يا سلام
بسمه / اعملوا اللى انتوا عوزينه انا داخله انام
نبيل / طب مش هتاكلى
بسمه / شكرا يا بابا مش جعانه
اخلاص / عنك تلاقيها واكله فى الكليه و بتدلع
بسمه تدخل البلكونه و تقفل عليها و تتصل بمعتز
معتز / الو
بسمه / انت فين
معتز / فى الشغل خير
بسمه / ماما عوزانى انزل اجيب الشبكه النهرده
معتز / الف مبروك
بسمه / ممكن تيجى معانا
معتز / اجى معاكم اعمل ايه بس
بسمه / تقف جنبى مبقاش لوحدى يا اخى
معتز / بابا و ماما معاكى هتعوزينى فى ايه
بسمه / مش هعوزك ربنا ميحوجنى ليك و لا لحد و منغير سلام
بسمه تقفل السكه و تحدف الموبايل على اخر دراعها و تعيط نبيل يدخل الاوضه
نبيل / بتعيطى ليه
بسمه / مخنوقه شويه يا بابا مفيش حاجه
نبيل / انتى مش موافقه عالجوازه دى نعتزر للناس
بسمه / يا بابا مش عارفه انا خايفه كامل شاب كويس و محترم بس انا مبحبوش و ماما بتقول الحب بيجى بعد الجواز مش عارفه اعمل ايه الدنيا ملخبطه معايا
نبيل / انتى عارفه ليه عملوا فتره الخطوبه
بسمه / عشان نتعرف على بعض
نبيل / مانتى شاطره اهو بصى يا بسمه انا عارف ان كل حاجه جت بسرعه بس الفرح مش بكره قدامك وقت خدى وقتك كلو ادى لكامل فرصه كلميه و قربى منه شوفى طباعه و بعدين قررى براحتك من هنا لحد منحدد معاد الفرح حبيتيه كملى محبتيهوش خلاص
بسمه / بالبساطه دى
نبيل / اقولك حاجه معرفش هتصدقينى و لا لا انا عمرى مطيقت امك بالعكس انا كنت رافض نهائى انها تتجوز ابوكى بس لما ابوكى مات كان فى ورايا مسؤليه نحيتها مراتى كانت متوفيه و انا و معتز عايشين لوحدنا و متبهدلين لا لبسه نضيفه و لا لقمه عدله و لا حتى بيت مروق اتجوزتها على عينى اوعى تقوليلها الكلام ده لتسود عيشتى
بسمه / هههههههههههه
نبيل / بس تعرفى لما عيشت معاها و عشرتها و قربت منها نظرتى ليها اتغيرت شوفت طباعها الحلوه و حنيتها و حبيتها و حبتنى و ادينا اهو بقالنا كام سنه مع بعض يعنى منكرش ان الحب ممكن يجى بعد الجواز بس لو انتى مش عاوزه تاخدى المخاطره دى محدش هيجبرك و لو فى حد تانى
بسمه / لا يا بابا مفيش انا بس حاسه ان الموضوع بيمشى بسرعه كبيره اوى
نبيل / بصى استمتعى بالرحله و شوفى هتوصلك لفين ووقت متزهقى انزلى
بسمه / ماشى يا بابا
نبيل / قومى بقى كليلك لقمه
بسمه / بجد مش جعانه
باب الشقه يتفتح و معتز يدخل على البلكونه وش
اخلاص / معتز انت ايه اللى جابك
معتز يفتح البلكونه
معتز / هتنزلوا امتى
بسمه تبتسم / معرفش
نبيل / انت ايه اللى رجعك مش قولت ....
معتز / مينفعش اسيب بسمه فلحظه مهمه زى دى دا النهرده خطوبتها
نبيل / عيال مجانين اوعى كدا انا هروح اكمل اكلى بلا هم
نبيل يمشى و معتز يقعد جنب بسمه
بسمه / لو مكنتش جيت مكنتش هكلمك تانى ابدا
معتز / حقك بصى انا فكرت و قررت انى مش هسيبك لحد موصلك لبيت عريسك و هجيبلك احسن جهاز و هرفع راسك و اشرفك و مش هخليكى ناقصك اى حاجه
بسمه تبتسم / و انا اوعدك ان مفيش اى حاجه هتاثر على دراستى او مزاكرتى و انك هتبقى فخور بيا
معتز / انا فخور منغير حاجه اتغديتى
بسمه / مكنش ليا نفس بس دلوقت بقى ليا
معتز / طب يلا قومى انا كمان جعان اوى
معتز و بسمه يقعدوا عالطبليه و اخلاص تحط وشها فى الطبق و تسكت
..........
بالليل قدام البيت
كامل / هتتقسموا ازاى
نبيل / انتوا فى عربيتكوا و احنا فى التاكس و هنمشى وراكوا
حنان / لا انا بقول العروسه تركب معانا جنب عريسها احسن
اخلاص / انا بقول كدا برده
سيد يمسك ايد معتز / انت كويس
معتز يبتسم / مش لسه واقف على رجلى ابقى كويس
سيد / مانت لازم تيجى و تتكلم معايا و تفهمنى اللى بيحصل
معتز / افهمك ايه بسمه اتخطبت لكامل خلاص معدش فيها كلام يلا بقى سلام
الكل يركب و يتحركوا للصاغه
حنان / المحل ده بتعامل معاه من ايام خطوبتى و ان شاء الله بسومتى هتلاقى فيه اللى يعجبها كلو
الكل يدخل
محمود / ازيك يا حج رمزى احنا جايين ننقى شبكه الدكتور عاوزينك بقى تطلع للدكتوره احلى حاجه عندك
رمزى / من عيونى اتفضلو روح يابنى هات ساقع
معتز يروح يقعد هو و محمود و نبيل و البنات و كامل واقفين بيتفرجوا عالكونتر
اخلاص / الله الطقم ده يهبل عامل كام
ايمان / طب شوفى ده كدا يا طنط بيتهيالى الاسوره بتاعته ارق
حنان / و لا الكوليه ده يهبل بجد تحفه ايه رايك يا اخلاص
اخلاص / معاكى حق بسم الله ما شاء الله انا بقول ناخد الكوليه و نطقم عليه
كامل / طب ايه مش هتاخدوا راى العروسه يا جماعه و لا ايه ؟؟؟ ايه يا بسمه مفيش حاجه عجباكى
بسمه تبتسم / كلهم حلوين اوى
كامل / طب ممكن يا ماما تقعدوا و انا و بسمه ننقى و لو حاجه عجبتنا نبقى ناخد رايكم ممكن