وش فيك ياسعود عقبي تغيرت وش سوت بك الدنيا بغيابـي؟ ~ سعوديه ~

وش فيك ياسعود عقبي تغيرت وش سوت بك الدنيا بغيابي؟ 13

.
.
.

ركب سيارته وتنهد وطلع جواله من جيبه وهو يسمعه يدق ابتسم بخفيف عقب ماقرا الاسم ورد بسرعه : هلا والله بسام
بسام ( صديقه المقرب ) جلس بتنهيدة : وينك ماجيت فاتك فعاليات العيال قسم انهم همج الله يصلحهم
جبر ضحك بقوه : خف علينا يالعاقل مااخس منهم الا انت ، جاي جاي جهز لي الشطرنج عشان اهزمك
بسام كشّر : ياشينك واثق ، احب اقولك الفايز انا
جبر ابتسم وشغل السياره وسمع صراخ عند بسام : من ذا اللي يصارخ؟
بسام يناظر العيال بجنبه : حمد ماهو صاحي له ثلاث ايام مارقد والحين بدا يفصل علينا ، اخلص انت تعال
جبر عقد حواجبه : يالله يالله
بعد دقايق وصل الاستراحه ونزل ودخل عليهم وابتسم اول ماطاحت عينه على بسام اللي يناقر حمد
جبر : السلام عليكم
بسام ناظره وفز بإبتسامه : ارحححب
قاموا يسلمون عليه وجلسوا وكملوا سواليفهم وبسام صب لجبر قهوه ومد له فنجال قهوه واخذه جبر واخذ رشفه وكشّر بتكذيب : قهوتك ثلج
بسام رفع الترمس : علي الطلاق اني لا اشوتك بالترمس
جبر ضحك بخفيف : ماينمزح معك
بسام : ياخي توي اللي مسويها لك اول ماقفلت طرت اسوي لك ادري انك تموت على القهوه
جبر نزّل فنجاله وناظر حمد اللي يلعب بلوت مع الثانيين وهمس بعد مالف لبسام : ايه وش مسوي انت
بسام ارتشف من قهوته : على خبرك ، وانت وش صار معك
جبر اخذ نفس بضيق : الحمدلله على كل حال
بسام بلل شفايفه : متى تبينا نسافر ؟
جبر ضحك بخفه : وش الطاري
بسام ابتسم بسخريه : ادري انك ماراح تخاويني لو ايش
جبر مد فنجاله : اشوا داري
بسام ضحك وهو يصب له : الله يعين
جبر اخذ نفس : امين يارب ، الا وش نوع قهوتك ؟
بسام مارد عليه وناظر خالد اللي منسدح على جواله ويتبوسم ، رمى عليه الفنجال وبصوت شبه عالي : وش تسوي ياربانزل وش سبب الابتسامه؟
خالد تأفف : يوووه يابسام انقلع عني ماني رايق لك
بسام عض لسانه وبشطانه : الله يعين حصه عليك هي وش تبي فيك
خالد توسعت عيونه ومسك الفنجال اللي رماه بسام ورماه عليه ورفع اصبعه لخشمه : انطم
بسام ضحك وحك كتفه بألم من الرميه : اوح يهب
جبر ضحك : اتركه يارجال خلّه خلّه
.
.
.

عامر ..
جالس في مكتبه اللي جهزه له همام وعلمه اساسيات الشغل وبدا يستكشف المكتب بتوتر وهو جاهل كل شي ومايعرف للكمبيوتر ويحمد ربه همام قال له حاليا ماراح يعطيه اشغال بحيث يقدر يتعلم كيف يستخدم الكمبيوتر عشان يبدا شغله رسميا !
ابتسم وهو يدور على الكرسي ويضحك بعدم تصديق : يازييين الرياض وياشين الديييره
وقف وهو يدوخ عقب ماسمع صوت بابه يطق ويدخل شخص وبهدوء : عامر؟
عامر هز راسه بإبتسامه وهو يمثّل البرود : اي نعم
الشخص ابتسم : السيد همام قال لي اذا حاب تشوف الشركه وتعرفها اكثر !
قام بهدوء : ماعندي مانع
طلع معه ومشى وراه وهو يناظر كل مكان ومكتب يمر من عنده منبهر كثير من جمال الشركه ووسعها والوانها وديكورها الفخم الملكي .. !
.
.
.
~ الساعه ٥:٠٠ م ~
سعود ..
كان جالس بهدوء وساكت وسرحان وللاسف رافض يبوح لأي احد عن اللي بداخله ايا كان ! حاولت فيه وطن يقول لها وش يحس ؟ ليه ساكت مايتكلم من اول ماوصلوا البيت !
همام ماهو مرتاح ابدا ومتضايق ويحس بثقل بقلبه ومسؤوليه لازم يكون قدها ، مسك جواله ودق على دكتور سعود اللي بيجيهم اليوم .. ثواني ونطق بسرعه : السلام عليكم دكتور ، طمني عنك ، ابشرك بخير الحمدلله ، ايه موجود ولا عندي نيه اطلع من الرياض من غير شر ، يعني المغرب تقريبًا ؟ ، خلاص اتفقنا ، الله يسعدك
قفل واخذ نفس وجلس جنب سعود وهمس : مستعد تقابل الدكتور؟
سعود بهدوء : وش بيسوي فيني؟
همام : ماراح يسوي شي وانا اصلا موجود ماراح اتركك
سعود هز راسه بعدم اهتمام : طيب
همام استغرب حالته وبلع ريقه : سعود وش جرى لك؟
سعود سكت مارد ولا تحرك وهمام مسك كتفه ولفّه له وكمل كلامه وعيونه بعيون سعود : وش يوجعك؟
سعود سرح ثواني ونطق بهمس وعيونه تدمع : اشتقت لسعد ..
تجمد همام وتوسعت عيونه انصدم من اجابته اللي اوجعت قلبه وحيل ، وبدون ماينطق بحرف واحد ضمه على صدره يسمح على ظهره بحنّيه وهو يحاول يكتم دموعه اللي تحارب صبره عشان تتحرر !
سعود ابتعد عنه ومسح دموعه بكفوفه وضحك بحزن بدون شعور : اكيد سعد يكرهني لانه مات بسببي
همام عقد حواجبه بعدم فهم : ليه بسببك؟
سعود ودموعه احرقت خدّه وهو يتألم : ماسوى شي ولا انا سويت بس هم قالوا انه سعد اللي ذبحه
همام مصدوم لكن لازم يعرف الحقيقه ومسك يد سعود : انت تدري من اللي ذبحه؟
.
.