وش فيك ياسعود عقبي تغيرت وش سوت بك الدنيا بغيابـي؟ ~ سعوديه ~

وش فيك ياسعود عقبي تغيرت وش سوت بك الدنيا بغيابـي؟ 1

.
.

يامجنون وخرّ عنا لا اضربك بالحصاه اللي معي على راسك .. انقلع عنا مانبيك محد يبيك .. الله ياخذك يامقرف ياابو ريحه ..
كانت هذي الكلمات تجرحه وتطعن قلبه بكل سهوله رغم انه مايفهمها نوعًا ما لكن قلبه يتألم كثير وعيونه تغرق بدون مقدمات وتشوش عليه النظر .. ترك الكوره اللي بيده وابتعد عنهم تدريجيًا يركض بخفيف وتعرج ويديـنه على راسه ..
جلس عند عتبـة باب بيتهم يأخذ نفس بصعوبه ويمسـح دموعه اللي تسيل ولا وقفت .. ابعد شعره عن وجهه ورفع راسـه للسماء يناظر الغيوم .. ودقايق من سرحانه بعد ماوقفت عيونه دمـوع .. وبدت الغيوم تمطر بدالها ولحظتها ضَحـك بفرح ووقف يلعب تحت المطر بشعور جميل اجتاح قلبه .. عكس الناس يركضون لبيوتهم خايفين يتبللون .. بس سعود تبلل وخلص ولازال يضحك وينقز ويستشعر قطرات المطر اللي تتساقط على وجهه وشعره .. لـف على صوت باب بيتهم ينفتح وصوت اخته تناديه بقلق وخوف : سعود .. ادخل عشان ماتمرض .. ادخل واشرب حليب سويت لك ..
هزّ رأسه برفض تام ورفع يدينه يضحك بطريقة غريبه وصدره يعلو ويهبط .. ضحكت اخته بخفه عليه وهمست بينها وبين نفسها : لازلت تحب المطر ياسعود .. لازال يحييك !
تغطت وناظرت المكان ماشافت احد وركضت له ومسكته ونطقّت بحنّيه : يلا حبيبي ندخل بيتنا شوف مافيه احد كلهم راحوا بيتهم ..
حس بتعب وهزّ راسه بالموافقه وهو يرجف : حـ حـليـ..ـب
ضحكت ولازالت ماسكته وهم يدخلون : احلى حليب لعيونك اخوي عيوني بس خندخل المجلس تدفى وانا بجيب لك لبس ..
انفـعل سعود وعصّب وبتلعثم نطق وهو ينقز بخفيف : لا لا ماابي لبس لا لا ثوبي حلو حلو ماابي لبس
اخته بإرتباك تذكرت انها زلّت لسانها : خلاص خلاص ثوبك حلو بس ادخل المجلس لا تنصفق .
دخلوا المجلس وعلى طول ركض سعود جنب النار يدفى ويرجف واخته وطن ركضّـت لغرفته تجيب له منشفه ..
بعد دقايق كانوا جالسين جنب النار ويشربون حليب .. كان سعود يتلذذ بالحليب ويغمض عيونه بحُـب ويضحك بعد مارفـع انظاره لوطن اللي تتأمله وينطّق بتلعثم : وطن انتِ تـ تحـ..ـبين الحليب زيي ؟
توترت وطن وحاولت تكتـم دموعها وهزّت رأسها بإيجاب ورفعت كاستها: اييييه واموت فيه شوفني شربـت اربع كاسات وهذي الخامسه.
سكت وكمّل يشرب بهدوء وعيونه تناظر فـراغ عكس وطن اللي لا زالت تتأمله وتبكّي بصمت عشان ماينتبه عليها ويستغرب وينقلّب مزاجه ..
.
.
سعود : ٢٢ سنه
وطن : ١٨ سنه
.
.
بعد ساعات ~
في مكان ماهو بعيد .. في نفس القريـه تحديدا بقالة ابو عامر .. متجمعين بعض رجال القريـه عند الدكه اللي قرب البقاله ..
طلع عمر من البقاله يتأفف بتعب بالكاد تحمّله.. طاحت انظاره عليهم ووقـف وتكـتّف... هز رأسه بأسى يناظر اخوه عامر يسولف عندهم .. وبينه وبين نفسه قال بسُخريه : خذ راحتك يا عامر ابد خلّ كل الشغل فوق راسي وانت تقهوى مع الرياجيل واضحك عليهم بسواليفك ، الحمدلله والشكر ..
لفّ للعامل اللي ضحك وهو توه جاي من شغله اللي انهاها الآن .. عمر بادله الضحك وتنـهد : وانت ماتباعده وانا اخوك مير ابوي يبيك يقاله حنا مامنا فايده ياعيالـه .. اللي مامنه فايده عامر ماهو انا .. يالله ماعليه اجر ان شاء الله رغم اني نقطه وانفجر لكن الصبر زين ..
ابو عامر بصوت عالي ينادي عمر ويده تأشر له يجي : عمر تعال جدد القهوه وغسل الفناجيل ..
ابتسم عمر بصبر واخذ نفس وبصوت عالي يرد على ابوه وهو متجهه لهم : ابشر طال عمرك ..
قام عامر واخذ الفناجيل يغسلها عقّب ماخزّه عمـر بنطرات خوفته وخلته يضحك بدون شعور وهو يعدل شماغه لا إرادياً : خلّه خلّه هو ماجلس يكرف من اليوم ، تعال اجلس عمر ارتاح .. الباقي علي ..
ابتسم عمر برضى وجلس بمكان عامر يوزع ابتسامات ويسمع لسوالفهم اللي بالنسبه له ملل شديد ويتساءل كيف عامر يجلس معهم ؟
.
.
عامر ..
متكتف قدام القهوه اللي تطبخ وسرحان جدًا بخيالاتـه اللي يعيش تفاصيل ايامه كلها عشانها وعشان يجي يوم ويعيشها بكل ثـقه .. ولجل عمر يدري يحاول يداريه عشان مايفضحه رغم انه مو دايم يداريه .. هزّ راسها بتنهيـده عميقه وبهمس : لازم استعجل .. لازم يجي اليوم هذا قبل اموت .. انا مااستحق الحياه هذي انا استحق افضل .. استحق سياره افخم من الددسن اللي ابوي جابها لي بعد عناء .. استحق جوال اخر اصدار مو السته اللي معي جاني صدقـه .. استحق اضحك من كل قلبي مو تمثيل .. تعبت .. انا مُختلف عنهم ولأني مُختلف ماراح اسكت .. راح اسعى لو كلهم ضدي ..
عمر يصفق وراه وبتعجب رافع حواجبه : واو ! رغم انك قاهرني بس اصرارك عاجبني .. واحب اقولك لا تحاول جرب شغفك بشي ثاني .. هذي حقيقتك لا تحاول تغيرها .. الديره ديرتك لا تحاول تهجرها والسياره سيارتك لا تحاول تبدلها ..
عامر انتهى من القهوه ومسك الدلـه وبدون مايناظر عمر نطق بهدوء : كلامك مايعني لي شي .. ابعد
وخـر عنه عمر وطلع عامر تحت نظـرات عمر المتعجبه .. همس بينه وبين نفسه : الله يهديك ..
.
.
عطوني رايكم في البدايه .. 🥹♥️