وش فيك ياسعود عقبي تغيرت وش سوت بك الدنيا بغيابـي؟ ~ سعوديه ~

وش فيك ياسعود عقبي تغيرت وش سوت بك الدنيا بغيابي؟ 23

.
.
توقعاتكم؟
.
.
سدن جلست جنب وطن اللي تعدل شعرها بتوتر وتبتسم : الله يسلمكم
سدن قامت تصب لها قهوه بضحكه وهي مستحيه : والله ودي امون عليك بس بصبر شوي عيب كذا فجاه خلينا نتعرف اول شي
وطن عدلت شعرها بخجل وهي تحاول تكون هاديه : ياحلوك انتِ عادي خذي راحتك
ام جبر : وش اسمك يابنيتي
وطن : اسمي وطن
ام جبر ابتسمت : ياحلو اسمك متى سكنتي هنا
وطن بلعت ريقها : تو جينا عند همـ.. همام صديق اخوي
ام جبر عقدت حواجبها : صديق اخوك ؟
وطن توترت : ايه ويكون صديق العائله سابقًا
ام جبر : سابقًا ؟ ليه سابقًا
وطن وعيونها على فنجالها وبتردد : مابقى من عائلتي الا انا واخوي الله يشفيه ويحفظه لي
ام جبر كسرت خاطرها : كم عمره اخوك ؟
وطن تصنعت الابتسامه : ٢٢
سدن قاطعت امها قبل تبدا وبضحكه : خلاص يمه يكفي اسئله
وطن ابتسمت : لا عادي بالعكس عشان تعرفوني ، اخوي سعود اللي قبل شوي وسعد توفى الله يرحمه ظلم
عقدت حواجبها سدن ويدها على قلبها : عندك اخ اسمه سعد ؟ الله يرحمه ويغفرله
ام جبر اخذت نفس بضيق : كيف ظلم ؟
وطن وهي محتاجه احد يسمعها لكن خايفه : اتهموه بجريمة قتل ماسواها حسبي الله والنعم الوكيل ، وسعود من عقبها وهو ماهو سعود اللي اعرفه
ام جبر قامت وجلست جنب وطن ومسكت كتوفها وبحنيه : الله يرحمه ويغفر له وحسبي الله والنعم الوكيل ، ماعليك وانا امك ربي يدري لو الناس كلها مادرت
وطن دمّعت : الله يسلمك ، اسفه ضيقتكم بكلامي
سدن : لا تقولين كذا اعتبرينا عائلتك الثانيه وخذي راحتك
ام جبر مسحت على ظهر وطن : ولدي محامي اذا تبين يبرأ اخوك اذا يريحك
وطن لفت لها بسرعه وبنوع من الامل : ايه تكفين خاله ، ابي اوري اهل القريه ان اخوي بريء ومستحيل يكون قاتل وانه مات مظلوم !
.
.
سعود وهمام ..
مروا تشونغ واخذوه معهم وكان جدا متحمس وبحماس قال بعد ما وقف همام السياره عند الحديقه : شف سيارة اسكريم هناك
سعود توتر من الناس وكثرهم ولف لهمام وبهمس : مشينا البيت
همام بإصرار : انزل بتنبسط صدقني يالله وبنروح للي تبي بس اختار وين تبي نروح
هز راسه برفض وتمسك بالحزام وغمض عيونه مايبي يشوف الناس : ماني نازل ابي وطن رجعني لوطن بسرعه
همام اخذ نفس ومسك يد سعود : فتح عيونك شوف تشونغ مستانس وده يروح يلعب مع الورعان والناس جالسين ويمشون منبسطين ليش انت ماتنبسط ؟
رفع سعود راسه وناظر الناس بخوف ولف لهمام اللي ابتسم له بأمل وهز راسه يشجعه !
تشونغ بطفوليه وعيونه على سيارة الايسكريم : وفيه ايسكريم بعد
سعود ناظر سيارة الايسكريم لثواني ولف لهمام اللي ينتظره يوافق : ابي ايسكريم
همام اتسعت ابتسامته : لو تبي السياره شريتها لك يالله ننزل ؟
.
.
هاني ، وسن ..
وسن تنهدت بملل ولفت لهاني اللي على جواله وبصوت شبه عالي عشان ينتبه لها : الله يعين يالطفش ، الجو يجنن اخخخ بس لو نطلع نتمشى ونغير جو
رفع راسه وناظرها وبابتسامه جانبيه : بالله عليك ؟
وسن تأففت : ياخي طفش ضيقه وش اسوي ؟ يرضيك ؟
هاني حط جواله بجيبه وضحك بخفه وهو يقوم : لا حول ولا قوة الا بالله ، قومي ادري بترفعين ضغطي اذا ماطلّعتك ، ترا كلها نص ساعه قبل تقوم امي !
وسن فزت : ايه ماراح نتاخر
راحت تلبس عباتها بحماس وطلعت وراه باستعجال قبل يهون وركبت قدام وهي مبسوطه : ابي ايسكريم يسرسح
هاني شغل السياره وهز راسه : ووش بعد؟
وسن بتفكير : ووجبه من ماك وبعد نمر البقاله اخذ لي اغراض براسي اقش حلويات وشبسات
بلل شفايفه وبهدوء : اممم ، وشيء ثاني ؟
وسن : مدري احس خلاص لليوم وبعدين نص ساعه مايمدي
هاني ضحك وعيونه على الطريق : حدك لفتين وارجعك البيت قال ماك قال عطيتك وجه انا
وسن كشرت : والله اني داريه
هاني وقف عند سيارة اسكريم جنب الطريق ولف لها : وش تبين نكهه؟
وسن : بالله تسال ؟ اكيد شوكولاته
شافت بسه تمشي بتعرج عند سيارة الاسكريم وعقدت حواجبها بتساؤل : ياعمري وش فيها تمشي كذا ؟
نزلت بدون ماتقول لهاني اللي سمع صوت الباب ولف لها وقال بسرعه وحاول يمسكها : لا تنـ..
ماامداه يكمل كلامه او يمسكها وسكرت الباب وراها وبلحظة جدا سريعه على صرخه هاني اللي نزل وهو متوجه لها : وسن
طاحت بالارض نتيجة السياره المسرعه اللي صدمتها  ادت الى سقوطها بالارض مغمي عليها والدم اللي انتشر بلحظه !
ركض لها هاني مصدوم مو مستوعب اللي صار بثانيه وهز راسه بعدم تصديق .. توسعت عيونه من منظرها ..شالها وتلطخ ثوبه بالدم وبصعوبه قدرت رجوله تخطي خطواته .. ركض للسياره وهو يحاول يستوعب وعيونه عليها !
هاني بصوت مخنوق وعيونه غرقت دموع : وسن تكفين لا
ركب قدام ومشى بسرعة جنونيه متجه للمستشفى وهو ينقل انظاره بينها وبين الطريق !
.
.
جبر واللي كان جالس عند سعد ويقرا كتاب بتركيز لاحظ الباب ينفتح ولف شاف الممرضه ثريا اللي شهقت بخفه يوم شافته جالس وهمست: بسم الله
جبر ببرود : وش عندك
ماردت عليه ووقفت قدام سعد تتحقق من كل شيء وبلعت ريقها يوم استوعبت انه يحرك اصابعه ابتسمت بخفه : يالله
جبر عقد حواجبه وفز : وش فيه
ثريا تناظر سعد ثواني بغصه وتهور قالت بتركيز وحذر : سعد تسمعني ؟ اذا تسمعني حرك اصابعك مرتين
جبر على طول ناظر يد سعد بأمل وهو يتمنى انه يستجيب لهم وفعلا تحركت يده مرتين واتسعت ابتسامة جبر وهو يمسح على وجهه : الحمدلله
ثريا ابتسمت بهدوء : الله يقومك بالسلامه
.
.