مر اول اسبوع وفهد ياخذ ولده ويوديه لامه لين العصر العصر ياخذه ويرجع البيت وثلاث مرات رفض ابو ريفال الا انه يعشي فهد معه لدرجه صدق خجل فهد من جمايل ابو ريفال له واخر تعديلات لبيته و اثاثه بتكون الشهر ذا اما ولده فجهز له غرفة جنب مكتبه وبتجهز هي بعد اسبوع كمان كثير كان فيه حوسات وتنظيمات له غير الشغاله اللي من داخله مايبغها يعني مو حلوه يختلي بالشغاله ابدا فقرر تجي اخته مره كل اسبوع مع خدامه ويخلصون الشغل كله كذا اريح له حالياً وعدا الشهر الاول .
بالنسبه لندى تاقلمت خلاص والناس كمان تاقلمت وعاشت ندى حياتها نفس قبل وصدق كمية راحه بحياتها ماحستها وطبعا صلت استخاره عشان طلاقها من فهد وارتااحت حرفياً لاول مره تحس براحه كذا فكملت حياتها بدون تانيب ضمير كبير بس تبغى تقابل ولدها وبس .
اكثر شخص متاثر من الحال ام فيصل صدق متقطع قلبها على نايف وتحسهم فارقوها من طفل لها .
نبدا بعد مرور الشهر:
قام فهد الصباح على صوت ولده يلعب قريب منه ناظر في ولده وابتسم كان نايف جالس على سرير ابوه ويلعب بسيارتين له اصفر واحمر وكان فرحان فيهم وكانهم جائزه عظيمه له جلس يتامله فهد ثواني وبعدين باس خده وناظر بالساعه كان متاخر فقام بسرعه وراح اخذله شور سريع وسوا فطور لولده واضطر مايوديه لامه وياخذه معاه الشركه وبعد ماوصل الشركه اتصل على امه وقال:
"السلام عليكم يمه وصباح الخير كيفك؟"
"وعليكم السلام صباح السرور الحمدلله تمام وانت كيفك وكيف نايف ؟"
"الحمدلله بخير ياغاليه وترى نايف اليوم معي بالشركه لازم نعلمه الاشغال بدري"
"ههههههههه انت اعطيه بس سيارته الحمراء ويديرها لك غير كذا ماعنده"
"هههههههه افا يالوالده طايح ولدي من عينك انتي اصبريله بس الصبر وتشوفين كيف يولع الشركه اكثر حتى من ابوه"
" مابها شك دام ابوه فهد"
"تسلمين يالغاليه بقفل انا تبغين اي خدمه"
"لا ياحبيبي سلامتك بس"
قفل فهد من امه وبدا يشتغل مع مراقبته المستمره لنايف اللي بين غرفة مكتبه وغرفة نايف باب فاصل توه سواه عشان يراقب نايف باسمرار وسهولة روحته له ابتسم وكمل شغل .
في جامعة :
ريفال بعد مانتهت من محاظرتها الاخيره الساعه ١١ راحت تتصل على السواق عشان يجي وبطريقها لكراسي قريب منها جتها بنت بويه معها بالكلاس ودايم نظارت البنت ماتطمنها ولا شكلها فتقدمت البنت بطريقة مستفزه من ريفال وناظرت بريفال نظرات طويله لكامل وجهها وجسمها وبعدين ركزت بعيون ريفال وابتسمت قربت من ريفال ولاكن ريفال كانت لها بلمرصاد ورجعت خطوتين ورفعت راسها بغرور تناظر بالبنت ذي قالت البنت لها بابتسامه ابسط مايقال عنها مستفزه .
" شفيك خفتي ياحلوه او خليني اقول ريفالي افضل ولا؟ عموما هاتي رقمك وسنابك واكلمك انا "
رفعت ريفال حواجبها بانكار وبدات تضحك .
"اولاً شيلي ياء التملك لانها مستفزه وثانياً ماعطي سنابي ولا رقمي لاحد "
وبعدين تجاهلت ريفال البنت وكملت تلبس عبايتها رجعت البنت توقف قريب منها ولاكن تجاهل ريفال كان واضح خلصت لبس وطلعت لسواق وهي متقرفه بما تعنية الكلمة.
ومو اول ولا اخر بنت تجيها كذا واكثر من مره تضاربة وتمشكلت مع بنات لنفس السبب وتستغرب كيف هم ضايعين وبعيدين عن الله لدرجة ضيعهم الله وقتلوا الفطره اللي هي للبشر ف ادم كان لحواء كان ومازال فكرهم واعتقاداتهم ومحوهم لدين يصدمها وبشده .
وصلت للبيت ومرت معها السوبر ماركت اخذت طلبات حلى لاهلها العصر ولان خالاتها جايين وهي متشققه فرح طلعت غرفتها بعد مالقت البيت فاضي وبصراحه ريفال تتضايق وجدا ان ماعندها اخوان وماتقدر تملى فراغها بشي غير طيورها فرحانه فيهم بس تتمنى لو عندها اخت او اخ يملي حياتها.
بدلت ملابسها ونزلت المطبخ وبدات شغلتها المحببه اغراق نفسها بالشغل بدات بطبق حلى وبعدين السلطات وسوت معمول امها المفضل مع القهوه والشاهي وكذا صار الوقت ٣ ونص العصر .
طلعت واخذت شور وتوضت وصلت وبعدين تجهزت لان خالاتها اكيد بيصلون ٥ العصر كعادتهم نزلت ولقت اخيرا امها جالسه وابوها مستعد يطلع سلمت عليهم وسالت .
"اشوفك يبه هام بتروح وين رايح ؟"
"بروح لفهد اتصل عليه وقال لي اجيه ورافقه عند ابوه وذي فرصه ماتتعوض اشوف اهله تبغون شي وانا راجع"
"لا يبه سلامتك لو بغيت بتصل "
"اجل في امان الله "
طلع ابوها واهي تراقبه ومستغربه من انجذاب ابوها الكبيير لفهد وكيف ان ابوها معتبره ولد له وهي مو كارهه الامر الا فرحانه لان ابوها لقاله جار بعد جارهم اللي توفى من سنه وكان صديق لابوها .
"سبحان اللي زرع حب فهد بقلب ابوك "
"تصدقين يمه توني افكر بذا كيف بغضون شهر بس فهد سيطر على ابوي متصوره كل يوم بعد العشاء ابوي معاه وصغنون فهد معنا احس فرحانه فيه وكانه اخوي"
"ايوالله وخصيصا نايف ياني احسه ولد لي من حبي له الله يحفضه "
"امين يارب دايم اتسائل وين امه مستحيل مافي ام ماتحارب عشان عيالها انا لو عندي ولد والله ماياخذه ابوه مني لو يموت"
"ماندري بضروفهم يابنتي اكيد لها اسبابها "
"صح الله يعوضه خير من امه "
لفت ريفال تبي تروح المطبخ بس سمعت صوت الجرس توقعت خالاتها وابتسمت لين مابانت غمازاتها وطلعت تفتح الباب بحماس ناظرت لشخص اللي واقف قدامها مو خلاتها ولا عيالهم ولا ابوها مين ذا !
خافت بس تجمد كل جسمها ماعرفت كيف تتصرف ترجع ورى ولا تسمر بوجهه تتخبى ولا تسأله مين انت ؟!
وتجاهلت كل ردود الفعل ذي وتأملته دقيقه تقريباً وفرقزت تسكر الباب بوجهه !
وقالت بعدين " مين انت؟"
اما عن بطلنا اللي ضاعت علومه بكمال البنت اللي فتحت له الباب جمال وجهها وجسمها وشعرها كاملة والكامل اللي ابدع بحسنها رد عليها .
" فهد فهد بن سالم جاركم نادي لي ابوك "
ردت عليه برجفت صوت واضحه "ابوي راح توه عندك لك اقصد هو قدامك ببيتك "
ابتسم فهد ورد عليها " تمام ومعلش اختي ماكنت قاصد اتمنى المعذرة "
"هههه لا عادي " ومسكت فمها بيدينها بسرعه وشلون استخفت كذا ونسيىت قوانينها وتضحك مع رجال غريب وشلون نست خوفها من الرجال وشلون ؟
"ااا اقصد تمام روح ماعليه "
ودخلت البيت بسرعه وكملت شغلها بالمطبخ وهي تسولف مع شغالتهم كمحاولة لنسيان موقفها البايخ .
بعد ربع ساعه وصلوا خالات ريفال لطيفة ومزنه اول خلاتها عيالها٢بنات وخالتها الثانيه ٣ مع ولدين .
فتحت الباب و دخلت اولا خالتها لطيفة استقبلتها بكل حب خالتها الكبيره اللي تعتبرها وحده من بناتها طيبه كثير بس شديده بحكم انها اكبر اخت .
بعدها استقبلت خالتها الثانيه مزنه تحب عيالها وزوجها واولادها نقطه ثانيه مع اول بنت واخر بنت .
نتعرف على عيالهم :
بنت لطيفه الاولى طيف عمرها ٢٣ تخرجت من علوم الحاسب وموضفه بشركه مخطوبه من ولد جيرانهم وزواجها بعد شهر .
رنيم ثاني بنت وعمرها ٢٠ تخصصها صيدلة واكبر اعتزازاتها تخصصها طاقتها الايجابيه توصل للكل تحب شخص بس ماتجرأت تعترف له او حتى تكلمه ويكون ولد خالتها .
اول عيال مزنه :
جود عمرها ٢٣ وتخرجت مع طيف من علوم الحاسب ماتداني طاري العيال واهم ماعليها نفسها ابوها وامها معطينها راحتها بكل شي ويثقون فيها كثير.
ثامر ٢٢ نرجسي وكثيييراكبر همومه سيارته واصحابه اهله معاملينه ان شخصيته ضعيفه ويلبون له كل شي يحب اخته شدن ويكره جود داخل عسكريه.
وهنا نوصل لاحد الشخصيات اللي بنهتم جدا بقصتها بنت مزنه الوسطانيه وتعالوا نتعرف عليها شوي ومع الاحداث بتوضح لنا اكثر .
شدن وعمرها ١٩ سنه نفس ريم تكره اهلها بس تحبهم تحب شخص من الجوال بس ياذيها كثير غير عن تاذيت اهلها لها ومعاملتهم لها لذلك تتمنى دايم تتزوج وتفتك تخصصها اداره اعمال .
رامي ١٦ مراهق عايش مراهقته طول عرض ويعاند اهله بكل شي بس طيب حيل مع اخواته .
ميس ٩ سنوات روح العائله وحبوبتهم وتحب شدن مره بس تتجنبها من كلام اهلها عن شدن .
"شوهت اغلب شخصياتهم بس بالاحداث بتصدقوني انهم يقهرون "
تحمسوا وكثير لمقابلة ابو فهد وابو ريفال
وتحمسوا لقصة شدن بتكسر خاطركم واجد
وقصة حب ريفال وفهد بتكون حلووه
وماننسى اكيد ريم ومشعلل
انتهيت 🤍
أنت تقرأ
من جيتيني و اقداري متهادنه معاي
Romanceروايتي الاولى - احداث الرواية تتمهد وبكل بارت بنشرح لكم شخصية وعائلة وحدث بالرواية ،تحتاجون صبر لين نوصل لمرحلة حياتهم . لمرحلة تغيراتهم وكيف بدأت تتكون حياتهم فعلياً . بنبحر سوا ببحر مليئ بالمد والجزر . الكاتبة | شجن حساب الانستا | Shajan_w 21 قر...
