اسكريبتات روان أحمد ♥️

اسكريبت 28

ـ عندك برڤيوم عفاف .

ـ لا يا آنسه مفيش  النوع دا .

ـ لا قصدى انك تكتب الاسم دا على ازازه البرڤيوم.

=......؟؟!

ـ مالك ساكت ليه مش انتوا عاملين اعلان على النت انكوا بتكتبوا اى اسم على اى نوع برڤيوم كنوع هديه جديد وعليه خصم 15٪....

= اها حضرتك جايه بخصوص العرض دا .
ـ مظبوط يا حضرت .
ـ حضرتك عايزه تكتبى اسم إيه على الازازه وحابه نوع البرڤيوم إيه ...؟

=عايزه نوع البرڤيوم'''''''' واسمى .
=ايوا يعنى حضرتك اسمك أيه ...؟
ـ ما قولت عفاف ولا لحقت نسيت .
ـ تمام يا فندم هروح اصمملك حالا بس تحبى يكون نوع الاسم مزغرف وبالعربى ولا الانجليزيه...؟

حطيت إيدى على دماغى افكر بتركيز وقولت : امممم  اكتبه بالانجليزي واكتب تحت الاسم Love yourself وحط قلبين تمام .
ـ تمام يا فندم حابه تضيفى حاجه تانيه .
ـ لا شكرا .
ـ دخل غاب لمده ربع ساعه كدا وبعدها خرج بالازازه .

ـ جاى يديهالى غمضت عينى وقفته بسرعه وقولتله ممكن تلفها بقا فى لفه هدايا شكلها حلو كدا علشان عايزه اتفاجأ لما افتحها واشوف تصميم البرڤيوم اوكى .

ـ لقيته ابتسم ودخل وجيه بهديه شيك دخلت السعاده فى قلبى والله .

ـ أخدتها منه وسألت بابتسامه: بكام بقا ..؟؟
ـ بابتسامه : بـ 300 جنيه يا فندم .
ـ اول لما سمعت السعر ابتسامتى اختفت وقولت بصوت عالى :ليييه يعنى بـ 300 جنيه برڤيوم للاميره يعنى واومال خصم إيه 15٪ اومال منغير خصم بكام..؟؟

ـ اتكلم بهدوء احسده عليه والله وقال : يا آنسه عفاف ممكن تهدى شويه قبل الخصم بـ 450 ليه علشان النحت ليزر وغير كدا انتى ضيفتى كتابه تانيه وفى لفه هدايا ونوع البرڤيوم اللى انتى طالباه غالى اصلا .

ـ طب سلاموا عليكوا بقا .
ـ  ضحك وقال :طب والهديه يا آنسه عفاف .
= بص اصل انا معيش غير 100 جنيه وقولت اكيد فى خصم ممكن اخرها تبقى بـ 70 بس للاسف بقا مليش نصيب فيها بقا .
ـ بص انت خليها عندك واول لما احوش فلوس هجيلك واخدها .
ـ بابتسامه :طب هاتى على الاقل عنوان بيتك ورقم تليفونك وادفعى عربون حجز على الاقل .
ـ خلاص خد الميه دى وطلعت ورقه وقلم وكتبتله عنوانى ورقمى وسيبته ومشيت .

"بعد اسبوعين "
ـ روحت عنده وكنت حوشت ميه كمان فروحت ادهاله .

ـ آنسه عفاف عاش من شافك .
ـ بابتسامه :اخبارك ايه يا ...
ـ فارس اسمى فارس .
ـ طب اتفضل ادى ميه كمان واتبقى كدا ميه اول لما احوشهم هاجى علطول اسددهم واخد الهديه .
ـ تمام لكنى هفتقد مجيئك والله .
ـ ماتقلقش هبقى احوش فلوس واجى اشترى برڤيوم من عندك .
ـ تنورى فى اى وقت.

بعد فتره بسيطه روحت سددت بقيت المبلغ واخدت البرڤيوم اللى تقريبا رشيت منه رشتين وكانوا فى فرح بنت عمى اصله غالى يجماعه لازم نحافظ عليه .

{بعد شهر }
ـ لقيت الجرس رن روحت فتحت الباب لقيته فارس .
ـ باستغراب : استاذ فارس عامل ايه.
ـ الحمد لله يا عفاف انتى اخبارك ايه.
ـ الحمد لله بخير هو إيه اللى جابك ..؟
ـ نعم .؟؟
ـ اقصد يعنى فى حاجه .
ـ طب هفضل واقف على الباب كدا .
ـ لا طبعا اتفضل .
ـ اقعد هنا فى الصالون .
ـ دخلت ناديت بابا علشان يقعد معاه وبعد شويه طلعت بالعصير وقعدت .
اتكلمت: خير يا استاذ فارس فى حاجه .
ـ بابا قال : استاذ فارس جاى يطلب إيدك منى .
=..؟؟؟؟!!
ـ ها اى رأيك فيا يا آنسه عفاف .
ـ الرأى رأى بابا .
ـ بابا ضحك : هو انا اللى هتجوزه يعنى .
ـ بصيت فى الارض بخجل وسكتت .
ـ بابا قال بجديه : خلاص مش موافق .
ـ رفعت رأسى ليه بسرعه وعلامات الحزن على وشى وفارس زعل فبابا قال بنكشك بس انا موافق أستاذ فارس باين عليه محترم وابن أصول.
ـ ضحكت فبابا قام وسابنا شويه لوحدنا ..
ـ ابتسم وقال : اتفضلى دى بمناسبه فرحتنا .
ـ ضحكت وأخدتها فتحتها لقيت مكتوب عليها فارس وعفاف وتحت الإسمين مكتوب بالانجليزي
Love Me .

" أنت أجمل شئ حبه قلبى ورضى فيه 💞."
لـ روان احمد.
ـ تـمـت 🤎.
ـ رأيكم يا لُطاف 💝.