الغرام يمَك غدا بقلبي مسموح

Part 17

اذن الفجر وقاموا البنات لموا الاغراض وطلعوا مُلاذ والاء كل وحده راحت البيت تلبس مريولها ويداومون
-
الاء كانت متوتره من الاختبار وهي عارفه انها مو مذاكره زينن لبست مريولها وتعطرت ولبست عبايتها وطلعت لقت مُلاذ قدامها
مُلاذ: لين تأخرت الساعه ٧ نبي نراجع هناك
الاء: يلعنم التوتر !
مُلاذ: بنمشي مع السواق؟
الاء: لا السواق تحتاجه عمتي حصه لزواج اخوك نواف
مُلاذ: اي صح
لين وهي طالعه من البيت: صباح يوم الاختبار الي بيجلدنا
مُلاذ: ساعه تتجهزين؟
التفتوا على البوابه الي انفتحت ودخل نايف بسيارته ووقف عندهم وضحك ونطق: م يهمني لو رسبتي انتي وياها اهمشي مُلاذي فل مارك انشاءالله
لين: ي السربوت راجع الصباح؟ والله اعلم ابوي
الاء: اتوقع كلنا راسبين
مُلاذ: لا يبنات انشاءالله ناجحين
نايف ضحك ورجع ناظرهم: شوفوا التفائل مع الصباح
لين: وصلنا المدرسه ولا والله اعلم ابوي؟
نايف: دزي بس مصدع انا بروح انام
لين: اوكيه بصحي ذياب وانت بعلم عليك ابوي
الاء لفت ل مُلاذ ونطقت: كلميه يودينا ي مُلاذ!! باقي ربع ساعه ويبدأ الاختبار!
مُلاذ ابتسمت ونطقت: نايف
نايف: لبيه
مُلاذ: ودنا
نايف ابتسم ونطق: عشان خاطرك بس
لين وهي تركب: اقول ودنا ولايكثر
ضحكوا الباقي وطلع نايف من البوابه
كانوا يمونون مع نايف لانه اصغر ولد ف العايله وعلى جوهم
-
دخلوا المدرسه وبدأت زنقه الكلاب مع البنات
توتر وخوف ومره يسولفون ومره يرجعون يذاكرون وعلى هذا الحال
______________
<بعد الاختبارات>
مررر اسبوع الاختبارات ولا فيه تجماعات ولاشي الكل منخمد ببيته الاء كل وقتها بغرفتها ولا طلعت والبنات مثل
ذياب تعافت يده و بدأ يداوم وحتى وهو بداومه كل تفكيره ب الاء الي مختفيه حتى عن الواتس
مر الاسبوع بحزنه وفرحه وحلطمته واخخخيرا ليله ويصبح زواج نواف!
ليله الاربعاء اكتض بيت الجد ب احفاده وعياله الكل تجمعوا هناك الي ينقشون والي يتصورون والي يسوون التوزيعات والي يتجهزون عشان يودون الاشياء الجاهزه للقاعه والبيتت زحمه والكل مشغول
_
الرجال بس اذن المغرب وانتشروا ف الارض الي راح يحلق والي راح يشتري ثوب جديد والي همه طلته وبشته كيف يكون والي ينقلون الشنط للقاعه والي بقوا مع الحريم عشان يودونهم للقاعه
-
الاء كانت لابسه قميص ورافعته على خصرها ولامه شعرها فوق وتسوي التوزيعات مع لين ومُلاذ بكل حب
لفت على مُلاذ ونطقت:قربنا باقي ٧٠ كيس!
لين زفرت بتعب: اخيرا !!
مُلاذ: امي تقول بننام انا وهي وريم هناك بالقاعه عشان نصحى من بدري ونجهز الطاولات
لين: تكفينن بروح معكم
تقدمت الجده لهم وابتسمت برضا: كلكم تروحون يبقى بس انا و ام ذياب وام فيصل وام الاء احنا لاحقين عليكم الساعه ١٠ الصباح
الاء: اوفف حماس
العمه حصه: بتنامون بدري لاتخططون تسهرون لان وراكم كرف الصباح
مُلاذ: يمه معليك ازهلي ، وبعدين متى يجون القهوجيات والمضيفات؟
حصه: على الظهر كذا
الجده: حلو انهم يجون من بدري
وكملوا سوالف وهم يسوون التوزيعات وكانت ليله ايجابيه لهم بشكل خصوصاً انهم توهم مخلصين اختبارات واستقبلهم زواج نواف الي غغغير من نفسيه الاختبارات 180 درجهه!
__
بعد ساعات وصلوا الرجال وبدأ يحملون الاغراض عشان ينقلونها للقاعه
وقفت الاء على رجولها وهي مو حاسه فيها من كثر م كانت جالسه تسوي التوزيعات
قامت والقميص لازال مرفوع على خصرها، زفرت بتعب واخذت كرتون مليان اغراض وشالته طالعه فيه للباب
على طلعتها دخل ذياب وابتسم من شافها معقده حواجبها ورافعه القميص وهو راسم خصرها رسم
صد عنها ونطق: ي هلا ب الحامل والمحمول!
فزت الاء من صوته ورفعت راسها زفرت براحه لانه كان صاد ونطقت: بحط الكرتون وانت خذه
نزلت الكرتون ورجعت ل ورا بشويش ودخلت المطبخ
،
كملوا على ذا الحال وجهزوا البنات وتقسموا على السيارات
فيصل معاه اخواته وتوزيعات الاكل حطوها معه لان مامعه الا ساره وندى ،
نايف معاه الشناط الي فيها ملابسهم وفساتيهم وكل شي فيه قزاز ،
نواف معه مُلاذ وريم وامه وشويه اغراض ،
واخر شي ذياب معاه لين والاء وبقيه الاغراض
...
شغلوا سيارتهم وطلعوا متوجهين للقاعه
<في سياره ذياب>
لين: فيني حماس بشكل!
ذياب ضحك ونطق: كلنا والله
لين: بتنامون معنا ف القاعه؟؟
ذياب: ايه
لين:انلقعوا نبي لحالنا
ذياب: واذا طب عليكم احد ؟
لين التفتت على الاء ونطقت: لولوي شفيك مصنمه سولفي
الاء وهي تناظر ذياب الي كان يناظرها: ماعندي شي اقوله
لين شافتهم ونطقت : ترى راععي الهوى مفضوح!!
ذياب ضحك ونطق: تبون قهوه
لين: اسكت ترا عارفين ان كل ذا مو عشاني عشان الاء
ذياب ضحك ونطق: اسكتي اقول، المهم تبون شي
الاء: ايه ابي قهوه وبرضوا مر السوبر نبي اغراض للسهره
ذياب ابتسم ونطق: ابشري
لين توسعت عيونها وجلست تناظرهم ونطقت: شرايك تنزلني بالشارع احسن؟
ذياب ب استغراب: ليه؟
لين: مكاني ووقتي اغلط انا اقول وقف وخل انزل وانتوا كملوا
ضحكت الاء ونطقت: المشكله م استغني عنك!
ابتسمت لين ونطقت: اوهه لولوي
ذياب ابتسم من جمال صداقتهم ووقف عند المحطه ونطق:يالله خذوا الي تبون
نزلوا البنات وشويات ولحقهم ذياب وكملوا وحاسب هو ورجعوا ركبوا ومشوا متوجهين للقاعه
-
وقفت كل السيارات عند القاعه ماعدا سياره نايف
نزلوا الكل وبدأ العيال ينزلون الاغراض
لف ذياب على جواله الي يدق وكان المتصل نايف رد ووصله صوت نايف وهو يقول: ذياب؟
ذياب: يولد شفيك تأخرت؟
نايف: بتعشى مع واحد من اخوياي وبعدين بجي
ذياب: ورع ترا قد تعشيت؟
نايف: بس الحين فيني جوع
ذياب: طيب والاغراض الي معك؟
نايف:تجلس بالسياره م تطير ساعتين بالكثير وانا موجود
ذياب: طيب يالله تقلع
لف على نواف ونطق: باقي ينقصك شي ي العريس؟
نواف: ايوالله البشت طلع شوي وسيع بغيره وبرضوا بحلق
فيصل: اجل خلاص بما اننا نزلنا الاغراض هيا نمشي نكمل الاشغال الناقصه ونفرفر ونرجع اذا رجع نايف عشان نساعده الاغراض الي معه كثير
ذياب: يالله
طلعوا العيال بسياره ذياب ومشوا
_
دخلوا القاعه وانتشروا فيها
كانوا الثُلاثي يطلعون الاغراض من الكراتين
لفوا على صياح ريم وهي جايتهم مسرعه
العمه حصه: يبنت! وشفيه
ريم وهي تاخذ نفس: تخيلوا السماعات موجوده هياا نشغلها ونرقص
ندى: امانهه؟
ساره: بنات هيا
لين: خلونا نكمل شغل بعدين نروح نشغلها
ساره: تمام اوكيه انا وريم وندى نرتب الطاولات
مُلاذ: واحنا وماما نكمل التوزيعات ونرتبها
انتشروا ف اشغالهم كل وحده مسكت زوايه وبدأت تكمل شغله
____
ذياب لف على فيصل الي كان راكب ورا ونطق: ي رجال شفيك م تسولف لنا عن الجامعه
فيصل:ياخي سماجه وطفش
نواف: سهالات
ذياب: وش شعورك وانت متزوج عن حب
نواف: شعور حلو
فيصل: نسيت اسمها يولد
نواف ضحك ونطق: يولد محارمنا !
ذياب ابتسم بخبث ونطق بسرعه: اسمها ريتاج
شويات وجاه كف طاير من نواف
ضحك بألم ولف على نواف الي يقول: تستاهل
فيصل: الرجل الغيور
ذياب ضحك ووقفوا عند الحلاق ونزلوا
____
<الساعه 1>
كانوا العيال راجعين للقاعه بعد م جاهم اتصال من نايف وقال انه راجع
والبنات كملوا اشغالهم ودخلوا وشغلوا السماعات وبدأ يرقصون ويسوون بروفات
_
وقف ذياب قدام القاعه ووقف بعده نايف
نواف:محد قالك تتاخر يالله نزل الاغراض لحالك
نايف: ادععس ي البجاحه ترا زواجك ي كلب نزلها انت
فيصل ضحك وفتح السياره وتقدم ذياب وبدأو ينزلون
نواف راح يكلم ونايف كان على جواله
لف فيصل على ذياب ونطق: اخيرا اخر كرتون
ذياب: ازهله انا باخذه عنك انت ونايف روحوا ضبطوا قسم الرجال عشان نجلس هناك ونسمر
فيصل: تمام
اخذ ذياب الكرتون ودخل يوديه لطبخ القاعه لانه عارف ان البنات داخل على السماعات
___
لفت ندى ل ريم ونطقت بصوت عالي لان السماعات كانت شغاله: بروح اكلم  واجي
ريم: تمام
طلعت ندى وفتحت الباب الكبير وخلته وراها مفتوح وطلعت تكلم
وبقوا البنات وكانت الانوار متسلطه على الاء الي كانت رافعه القميص على خصرها وواصل حد فخوذها وكانت ترقص وتتمايل ورافعه يدينها
لف ذياب يطلع من المطبخ وانصدم من شافها تتمايل وشعرها يداعب ظهرها والبنات يعززون لها وكان القميص راسم جسمها وخصرها
كانت ترقص بكل قوتها وتلف شعرها الي كان ناعمم وحرير
كان مصدوم من المنظر ويقول بنفسه: يالله وش كثر هي جميله!
جلس يتأمل دقيقه ودقيقتين وثلاث لحد م انطفت الاغنيه ونزلت الاء ودخلت ندى وقفلت الباب وراها
طلع من هناك وهو مو بوعيه رقص الاء وتمايلها قلب موازين ذياب!
يحلف بداخله ان المشهد يتكرر قدامه مره ومرتين ولا يطفش ويتمنى لو ان الاغنيه م طفت
_
طفوا البنات السماعات وتوجهوا للغرفه ينامون
والعيال كملوا سمره للساعه 3 بعدها قاموا
ودخل ذياب تمدد وهو كل تفكيره ف الاء وبس
غمض عيونه محاوله النوم وماهي الا دقايق ونام
وانتهت ليلتهم الحلوه
____________
صباح يوم الخميسس الساعه 10
اليوم المنتظر يوم زواج نواف اول حفيد ل آل زايد وبكر الاحفاد اليوم الي الكل ينتظره بفارغ الصببر!
وصلوا الجد والجده والباقي ووصلوا القهوجيات والمضيفين والمكيب ارتست وبدأو يجهزون كلشي عشان يبدأون يلبسون ويحطون ميكب
كانت ريحه القاعه ععود وقهوه عربيه والي تسوي ميكب والي لازالت مكروفه والي تتروش والي تتصور والي يسولفون والخخ.........
_____
الرجال صلوا الظهر وانتشروا الي رايحين يودون الذبايح والي حطهم الجد ينظفون ويرتبون والي باقي نايم والي توه صحى والخ......
________
بعد صلاه العصر بساعه بدأت القاعه تكتض بالضيوف وكان ف الاستقبال ام نواف حصه والجده وام ذياب وام فيصل وام الاء
ومُلاذ وريم جهزوا من بدري بحكم انهم اخوات المعرس وراحوا مع امهم
خلصوا البنات وطلعوا ل ريم ومُلاذ وصاروا يمدحون بعض ويصورون
--
مُلاذ- كانت لابسه فستان كساه اللون الرمادي وكان راسم جسمها من فوق لعند خصرها وبعدها فيه نفشه بسيطه ويوصل لحد ركبتها وكان يكشف ظهرها بالكامل وسوت شعرها ويفي وكان نصه مرفوع ونصه منسدل على ظهرها المكشوف ولبست كعب اسود له خيوط على طول ساقها  ،
ريم- كانت لابسه فستان منفوش كساه اللون الموف الفاتح وكان يجي صدري يكشف اكتافها ورفعت شعرها وخلت خصلتين نازله تداعب خدها وكعب ابيض ،
الاء-كانت لابسه فستان مخصر عليها كساه اللون الاحمر وكان فيه كسره من قدام ل وسط فخذها وكسرت اللون الاحمر بكعبها الابيض وخلت ميكبها هادي وحلو يزيدها جمال وسوت شعرها ويفي ورفعت منه خصلتين وتركت الباقي منسدل على ظهرها
لين- كانت لابسه فستان كساه اللون الاسود فيه نفشه من تحت ويكشف ظهرها واكتافها وكانت رافعه شعرها لفوق بتسريحه زادتها جمال ،
ساره- كانت لابسه فستان كساه اللون البُني وخلت شعرها استريت ومنسدل على ظهرها،
ندى-لبست فستان كساه اللون الاخظر الغامق وكان يكشف اكتافها ويدينها
__________
ذياب التفت على نواف ونطق: ولد وين البشت؟
نواف: داخل جبه بسرعه!
نايف: انت تصلح تكون قهوجي مو عريس
نواف: امانه انطم
فيصل: نواف جو اخوياك
نواف وهو يلف وياخذ البشت من ذياب: يالله الحين
لف عليهم وبدأ يسلم وكان جنبه جهه اليمين جده سنده وحسبة ابوه وجهة اليسار ابو ذياب وبعدين العيال
تقدموا اخوياء نواف وبدأو يسلمون يباركون
تقدم مطلق صديقق الطفوله ل نواف واعز اخوياه
تقدم له وحضنه بكل حب ونطق: اعذرني ي نواف المفروض اكون موجود من الظهر واعين واعوان معكم
نواف بأبتسامه : لا ابد عيال عمي معي جعلني فداهم
نايف من وراه: اول مره يمدحنا
ضحكوا الموجودين وتقدم مطلق يجلس يم نواف ويعطون اخبار بعض
--
<بعد المغرب عن الحريم>
لفت مُلاذ وشاف المضيفات واقفين للأستقبال ابتسمت بكل حُب وهي تشوف القزازه الكبيره الي
انطبع عليها" أفراح آل زايد"
تقدمت الاء ونطقت: الله يديم افراحنا
مُلاذ: امممين
الاء: وصلوا اهل العروس ولين للحين تتصور هناك
مُلاذ: يويلي بتجلطني ذي البنت
الاء ضحكت وطلعوا متوجهين لعند لين
دخلت مُلاذ وزفرت بتعب ونطقت: يبنت اهل العروس برا وانتي للحين تتصورين يالله اطلعي!!
لين: اما
الاء تقدمت وسحبتها وطلعوا من الغرفه ودخلوا الثُلاثي وتوسطوا القاعه وبدأو يرقصون كان الكل يتكلم ف جمالهم وحياهم وحلاوتهم وصداقتهم وكلشي يخص الثُلاثي الحلو ،
شويات وتقدموا الباقي وبدأ يرقصون سوا
____
ابو ذياب لف ل نواف الي كان يسولف مع مطلق ونطق: ولد
نواف: سم ي خال
ابو ذياب: قم رحب فيه ضيوف جايين
نواف: ابشر
لف ل مطلق وكمل: اصبر سوالفنا م انتهت
ضحك مطلق ونطق: موجود موجود
تقدم نواف وكمل يرحب بالضيوف ويستقبل المعونات والهدايا
_
<ف الحوش عند العيال>
فيصل: نايف قسم بالله لو اقوم عليك
نايف: يولد الساعه ٩ والشاحنه الي فيها صحون العشا للحين م جت وانت تقول تقوم عليا ترا ابوي بيصفقنا
ذياب: معليكم شويات وتجي
فيصل: بدق عليه وخله م يرد
ضحك ذياب ونزل عيونه ل جواله
فيصل طلع جواله ودق على صاحب الشاحنه ونطق: وينك فيه؟
صاحب الشاحنه: عند لفه القاعه
فيصل: اعجل يخوي
قفل منه ولف للعيال ونطق : وصل
ذياب: م قلت لك
نايف: ايه خله م غير فاصل عليا
فيصل: خلاص اسفين
تقدمت شاحنه الي فيها الصحون ووقفت بالحوش وطلع كل الضيوف ينزلون وبدأ يوزعون الصحون ويدخلون الباقي للحريم
دخل مطلق قسم الحريم ومعه صحن واستوقفه حكي البنات وهم واقفين على المرايه
ندى:تعب
ريم: اقول اسكتي م جربتي تكونين اخت المعرس والكرف عليك
ندى وهي ترجع خطوتها ل ورا: لاتبالغين ي ريم
ريم: روحي نادي الباقي عشان نشيل الصحون
ندى طلعت تنادي البنات ولفت ريم وشهقت من شافت مطلق الي كان واقف من البدايه يسمع حكيهم بدون علمهم
رجعت ل ورا تبي تطلع بس من سوء حظها كان الباب بعيد عنها
سرعت خطواتها لحد م وصلت واختفت من انظار مطلق
نزل الصحن وطلع وهو مبتسم ونطق: ريمم ي ريمم
مسح وجهه وهو يتذكر حكيها وشكلها وجمالها
زفر براحه وابتسم وهو الحين يدري انها اخت نواف بحكم انه سمع حكيهم
__
دخلوا المضيفات والبنات واخذوا الصحون وحضروا العشا وقام الكل يتعشوا ب استثناء الثلاثي الي كانوا يسولفون وفاتحين استديوا تحليل ل اشكال الضيوف بنص المطبخ
لين وهي تاكل سلطه: يبنات شفتوا ذيك الي لابسه ابيض حسستني انها العروس
الاء : خليها حرام عليك
مُلاذ: باقي حلا هيا ناكله
الاء: جيبيه بس
___
بععد العشا بساعه بعد م نظفوا ورفعوا كلشي
وقت زفه ريتاج وتصير حُرم ل نواف بن سعيد
انطفت الانوار وانفتحت الابواب وكانت الاضاءه متسلطه على ريتاج الي كانت متوتره وف نفس الوقت فرحانه انها بتتزوج نواف
انزفت ريتاج ورجعت ل غرفتها ودخلوا عندها حصه ومُلاذ وريم
تقدمت مُلاذ وسلمت عليها ونطقت: بيدخل المعرس
ريتاج شدت يدينها على مُلاذ ونطقت : مُلاذ منزمان عنك! اخر مره شفتك بعزا عمي سعيد، "كانت تقصد ابو مُلاذ"
مُلاذ: بتصيرين منا وفينا الحين
ريتاج: نواف بيدخل الحين
حصه: ايه يالله يبنات
طلعوا وبقت ريتاج بتوترها وربكتها وانفتح الباب ولفت ل نواف الي ابتسم برضا ونطق: ي هلا ب ريتاجي!
ريتاج تقدمت وباس راسها ونطق: ي جعله عرس الهنا لنا يارب
ريتاج : امين
نواف تقدم وحضنها وبادلته الحضن وبعدها دخلت المصوره وصورتهم وطلع نواف ودخلوا اخوات ريتاج يجهزون اغراضها وماهي الا دقايق وطلعت وركبت مع نواف وطلع من البوابه تحت طقطقه العيال والرمي ب الاسلحه ف الهوا
____
مُلاذ ب دموع: ابكي وانا عارفه انه بيسكن معنا بس احس لا
الاء: كلنا اجتاحتنا مشاعر الحزن
لين: عقبالنا
ريم: وراكم مستعجلين
لين: مصيرك تلاقين احد وتطيحين بالحب
الاء: شف شف من يتكلم؟ تكلمي من طحتي بحبه
مُلاذ وهي تمسح دموعها: شاكه انا بس م بقول مين
الاء: بدأو يروحون الضيوف تعالوا ناكل
_____
<الساعه 12>
مطلق : والله سحب علينا نواف وانكرفنا
نايف: هذي عقوبه انك تكون صديقه
مطلق: كملنا خلاص
ذياب: انا بنادي امي وانت ي نايف شيل اغراضهم بسيارتك
نايف: اخلص طيب
دخل ذياب ونزل بعض الاغراض ورفع راسه وارتطمت الاء بصدره وهي كانت هاربه من البنات لايرشون عليها مويه
فزت من شافت ثوب رجال ورجعت ورا وشافت ذياب
ذياب وهو يبعد ورا وشاف كشختها من راسها ل ساسها
للحين م تخطى رقصها البارح والحين تطلع قدامه ب فستانها الي يكشف كثير من جسمها كذاا كثير عليه !
ابتسم وصد ونطق: نادي لي امي ولين
رجعت الاء بسرعه ودخلت ونادت لين و ام ذياب
_
كان ذياب ينتظر ف السياره ويسولف مع فيصل من الدريشه
لف فيصل بعيونه على لين الي كانت طالعه وبيدها شناط واكياس وهب الهوى وانفتحت عبايتها
نزلت الاغراض ورجعت تقفل عبايتها
ورجعت اخذت الاكياس ومرت من جنبه وداهمه ريحة عطرها
رجع خطواته ل ورا وابتسم وودع ذياب واتصل على امه تطلع
____
وماهي الا ساعه وتقفلت القاعه وراح الكل بيته وانتهت اجمل ليله ف قاموس آل زايد
انتهت والكل سععيد وفرحان ل نواف وريتاج
انطفت انوار بيوت آل زايد معلنين انتهاء ليلتهم الجميله.

(هاي كيفكم؟ وحشششتوني🫣، رجعععت لكم ببارت حلو ولذيذذ وخليته طويل، اتمنى يعجبكم ولاتحرموني من كومنتاتكم الححلوه وعدلوا الدعم عشان م نتهابد وعطوها حقها🫶🏻💘)