الغرام يمَك غدا بقلبي مسموح

Part 22

ظهر اول ايام رمضان يوم مختلف تمام عند الكل، كان فطور اول يوم ببيت الجد كالعاده قاموا الكل وتجوهوا لبيت الجد وبدأوا يسوون الفطور ، اما العيال استقعد لهم الجد زايد وخلا كل واحد يمسك مصحف ويقرا ،، ذياب قد راح دوامه الصباح رجع الظهر على اساس ينام لكن م حالفه الحظ و جلس مع العيال وبدأ يقرون وكانوا جالسين بالمجلس والهدوء سيد الموقف
-
ضحكت لين بعلوا صوتها ونطقت: م تعرفين تلفين سمبوسه !
ريم: اعرف للعجينه اكثر
الاء: معليش بس افضل الرقايق
مُلاذ: ريم احمدي ربك انحط عليك لف السمبوسه انا الشوربه
ندى: وانا غسيل كل المواعين !
ريتاج: ولايهمك ي ندو انا معك
ساره وهي داخله المطبخ : اخيرا خلصت تنظيف البيت
ريم: جدي عازم صح؟
الاء: م اتوقع لان جدي دايم يعزم من ثاني يوم
العمه حصه: بنات خلصوا عشان تروحون تتروشون وتتكشخون
لين: ايوالله صادقه باقي ساعتين
رجعوا البنات كملوا شغلهم وكانوا امهاتهم يشرفون عليهم كل شوي وكانت اصواتهم تعلوا بالضحك والسوالف وهم كلهم طاقه ايجابيه...
______
اذن المغرب وبدأوا يفطرون ومستانسين جميعا عكس الاء وذياب الي مظهرين للكل سعادتهم لكن بداخلهم شويه حزن وف نفس الوقت ذياب مستانس لانه بيخطب الاء ،،،
خلصوا الفطور وقاموا الكبار وبقي العيال بس، انسدح نايف يم السفره ونطق: ذهب الضماء وابتلت العروق وثبت الاجر انشاءالله ، ناظره نواف بحده ونطق: قوم لا اتمردغك
دخل الجد المقلط يبي ياخذ سبحته لكن وقف من شاف نايف منسدح وفيصل وذياب يأكلون بعض ونواف يهاوش نايف ، ناظرهم بحده ونطق: وجعع انت وياه !!
فز نايف واعتدل بجلسته وفيصل وذياب تركوا الاكل من يدين بعض ولفوا عليه ، ابتسم فيصل بخوف ونطق: سم ي جد
الجد بحده: حركات وراعين !
ذياب: اسفين
الجد: عناد فيكم عليكم تغسيل كل المواعين !
نايف فتح فمه بصدمه وناظر نواف الي يقول: حتى حقت الحريم؟
الجد: ايه كلشي عليكم عناد فيكم ! ولا تتأخرون على صلاه التروايح عشان م اخلي غسيل الحوش عليكم !!
نواف: ابشر
طلع الجد ولف ذياب على نايف ونطق: انت السبب !
نايف توسعت عيونه ونطق: نععم ! لاتجحد بس ناسي نفسك انت والشيخ فيصل جالسين تأكلون بعض كأنكم متزوجين جدد !! وعايشين قصه حب وغغرام !
ضحك نواف على رد نايف ونطق: اخذكم رايح جاي
فيصل: ترانا عزابيين رفقاً بنا !
نواف: يشيخ اسكت بس شدخل العزوبيه
ذياب : الجفاف العاطفي اكلنا لكن انت لاوالله م قرب صوبك
ضحكوا نايف وفيصل بعلو صوتهم
ونطق نايف: في رمضان !! في رمضان !
دخلت العمه حصه ونطقت: ابوي متواعد فيكم ! للحين م سويتوا شي !
فز نواف ونطق: هذولي ابعديهم عني يمه اكلهم الجفاف العاطفي !!
ضحكت حصه ولفت على ذياب وفيصل ونايف ونطقت: يالله الشغل ينتظركم
قاموا العيال بقله حيله وبدأوا يرفعون السفره وساعدتهم حصه...
_
البنات كانوا جالسين بالصاله ومستانسين انهم هالمره معفيين من غسل المواعين، زفرت مُلاذ براحه
ونطقت: يستاهلون
ندى: كفو جدي
لين: تتوقعون ليش عاقبهم؟
ريم: ماما قالت لي قبل شوي تخيلوا عاقبهم عشان فيصل وذياب كأنوا يأكلون بعض تقولون عشاق !
ضحكوا البنات بعلوا صوتهم ونطقت الاء: احسن
لين: عرف لهم جدي
ساره بضحكه: خل يكرفون شوي
_
ذياب وفيصل كانوا رافعين اثوابهم ورابطينها خصورهم ويغسلون المواعين نايف يسولف ويتحلطم ونواف ينشف المواعين، لف نايف على ذياب وفيصل الي يسوون قلوب بالصابون، ناظرهم ونطق: ترى منتوا متزوجين خلاص !
فيصل: ياخي انقلع خلنا
ذياب سكر المويه ولف للعيال ونطق: ي عيال
لف له العيال ونطق نواف: وجهه م يبشر بالخير
ذياب بهدوء: قررت اتزوج
نايف ضحك بعلوا صوته ونطق: شكل الجفاف اكلك صدق !
ذياب: لاوالله بس انا صدق ناوي وزياده ذي الليله بخطب
نواف بهدوء: الاء؟
فيصل: ايه مافيه غيرها قلبت موازين ذياب
ذياب: تتوقعون عمي عبدالله بيوافق؟
نايف: م اتوقع
نواف ضرب نايف بخفه ونطق: اسكت انت
لف على ذياب وكمل: احس بيوافق لانه وين بيلاقي انسب منك ل بنته؟، سكتوا العيال ودخلت حصه المطبخ ونطقت: شفيكم
نايف وهو يغمز: ذياب بيتزوج !
ضحكت حصه ونطقت: اخييراً بتقر عيوننا بشوفتك عريس
فيصل: خلصنا المواعين
حصه: روحوا تجهزوا للصاله وانا بكمل تنشيف المواعين
نايف سوا حبتين وهو طالع من الباب ونطق: العمه البطله
ضحكت حصه ورجعت كملت شغلها،،
طلعوا تجهزوا العيال للصلاه ومشوا بسياره ذياب ...
__
بعد الصلاه رجعوا وتجمعوا بالمجلس واعتلت اصوات سوالفهم وضحكاتهم ، تسارعت نبضات قلب ذياب وقام جلس يم ابوه ونطق: يبه
ابو ذياب: سم
ذياب: ابي اتزوج
ابو ذياب ابتسم ونطق: م بغيت ! مين هي وتبشر بها
ذياب بهدوء: بنت عمي عبدالله
ابتسم ابو ذياب ونطق: ونعم الاختيار ي ولدي
ذياب: ابي تكلم عمي الحين
ابو ذياب اشر على خشمه ونطق: ععلى خشمي
ابتسم ذياب وناظر العيال ورجع ناظر ابوه الي وقف ونطق: مالي بطوليه ودمانا مجتمعين بقول الي عندي وانشاءالله يسركم جميعا
اعتلى صوت اخوانه وابوه بالمجلس وهم يقولون: اسلم
ابو ذياب: انا طالب يد بنت عبدالله ل ولدي ذياب على سنه الله ورسوله !!
ابتسم ابو الاء ونطق: وهذي الساعه المباركه وين بلقى ل بنتي احسن منه ذياب ونعم الرجال وانا بالنسبه لي موافق بس بنأخذ رأي البنت
ابتسم ذياب ونطق: ابد خذ راحتك
مشى ذياب وجلس مع العيال وهم يقرصونه ويعززون له، ضحك بتألم ونطق: شفيكم علي !
نايف: فيصل الي يقرص
نواف: واضح مايبيك تتزوج بيفقد الي يأكله كل يوم
فيصل: شدعوه
ذياب ضحك ونطق: شفف الغيره !!
ضحكوا العيال وكملوا سوالف
__
كانت ساره على جوالها بالحوش وسمعت لما ابو ذياب خطب الاء ، تنهدت بخبث ووقفت على رجولها دخلت البيت ولفت على البنات الي جالسين يرقصون
ونطقت: الاء
الاء بأستغراب: هلا
ساره: تعالي
الاء ناظرت لين ومُلاذ ونطقت: برجع لكم
طلعت مع ساره الي اخذتها لورا الحوش
استغربت الاء ونطقت: ساره شسالفه؟
ساره بخبث: ذياب قبل شوي خطبك !
الاء كانت عارفه انه بيخطبها، تنهدت ونطقت: طيب؟
ساره: م استغربتي صح؟ اكيد لانه قايل لك ب الاسطبل !
الاء: ططيب؟
ساره ابتسمت بخبث وطلعت جوالها وفتحت الاستديوا وفتحت على صوره ومدت الجوال ل الاء
الاء توسعت عيونها وانصدمت من وقاحه ساره !
كانت الصوره صوره ذياب والاء بألاسطبل صورتهم ساره وقت ما ذياب باس الاء على خدها ..
الاء بعصبيه: وصلت فيك البجاحه ل ذي الدرجه !
ساره بخبث: شوفي قسم بالله ان وافقتي على ذياب قسم ي الاء ي الصوره ذي م توصل الا ل عمي عبدالله وعمي خالد ! شوفيني حذرتك وانتي بكيفك عاد عمي عبدالله ابوك وتعرفينه لو شاف الصوره بينجن جنونه ! وبيرفض لان ذياب تعدا حدوده معك ! وانتي عاد يمكن يحرمك من كل شي !!
الاء انصدمت وتغورقت الدموع بعيونها ونطقت : ليش ناشبه كذا شتبين فينا ابعددي عنا !!
ساره رجعت خطواتها ل ورا ونطقت: بكيفك انا حذرتك وبكيفك عاد ! ، ومشت ساره وتركت الاء وراها الي داهمتها ضيقه بصدرها حست انها تتآكل من داخل !
تنهدت الاء وهي كل ضيقه وحزن الدنيا بصدرها لانه عارفه انها لو خالفت كلام ساره بتصير مشاكل لها ول ذياب !
مسحت دموعها ودخلت دوره المياه غسلت وجهها وجلست يم الغساله وم قدرت تمسك نفسها وانفجرت تبكي ! الكل مستمتع اول يوم رمضان يوم مختلف على الجميع الا الاء الي كان تقريبا اسوء يوم بحياتها ! يوم مشاعره مختلفه وبعيده عن السعاده ،، كملت تبكي وهي ضامه رجولها ل صدرها..
___
بعد ساعتين دخل ابو الاء قسم الحريم ونطق: الاء
الاء كانت جالسه بالصاله بعد م صرفت البنات وقالت انها تعبانه من بطنها، فزت من سمعت صوت ابوها وقامت دخلت للمقلط ودخلت بعدها امها ونطقت الاء : سم يبه
ابو الاء ابتسم ونطق: يبنتي ذياب ولد عمك خطبك على سنه الله ورسوله وانا والله اشوف انه الانسب لك وانا قلت باخذ رأيك وارد لهم خبر
ام الاء بأبتسامه: مشاءالله ونعم ب ذياب
ابو الاء وهو يمسح على راس الاء: ها وش قلتي يبنتي؟
الاء بضيق: ماني موافقه
ابو الاء عقد حاجبينه ونطق: افا ليه؟ جاك شي من ذياب !
ام الاء وهي مستغربه: قولي يبنتي لاتخافين !
الاء رجعت شعرها ورا اذنها ونطقت: لا م جاني منه الا كل خير بس انا من داخلي مو مرتاحه وابي اكمل دراستي ولا افكر بالزواج ابدا !
ابو الاء م حب يضغط على بنته، رجع خطواته ل ورا ونطق: خلاص هذا قرارك النهائي ؟
الاء: ايه
ام الاء حضنت بنتها وناظرت ابو الاء ونطقت: قولهم نفس كلامها
تنهد ابو الاء بضيق وطلع متوجهه لمجلس الرجال
__
جلست ام الاء وشويات والكل صار يعرف، تنهدت لين بقهر وطلعت تدور على الاء ،دورتها ولا لقتها عرفت انها بألاسطبل، مشت وهي تسارع خطواتها ولفت من شافت مقصوره الفهد مفتوحه ومن الواضح ان فيه احد عنده ، دخلت ووقفت مكانها من شافت الاء جالسه ومنزله راسها على ظهر الفهد
تقدمت ونطقت: الاء ؟
الاء بضيق : عيوني
لين جلست يمها ونطقت: ليه رفضتي ؟
الاء: ماني مرتاحه
لين بأستغراب: ذياب سوا لك شي !
الاء: لا
لين: اجل !
الاء: تكفين ليني لاتزيدين الضيقه ضيقه ! خلوني بحالي !
لين استغربت كثير من الاء بس سكتت وتقدمت وهي تحضن الاء الي انفجرت تبكي بعد م حضنتها ..
___
دخل ابو الاء المجلس وجلس يم ذياب ونطق: ذياب
ذياب: لبيه ي ععم
ابو الاء: والله البنت كلمتها ورفضت تبي تخلص دراستها وانا والله تضايقت لاني م بلقى افضل منك ل بنتي لكن النصيب !
ذياب ارتخى من الخبر الي جاه مثل السهام بوسط قلبه ! كان يظن ويظن لكن خابت كل ظنونه بلحظه ! كان ساكت ولا نطق بحرف يحس انسرق منه الامان والحب والغرام الي رغم انه كان مستصعبنه الا انه سمح لها يمَمه وفي وريد وشريانه !،رمش عيونه بضيقه ونطق: يمكن خيره
قام وطلع من المجلس تحت نظرات الكل وصدمتهم من رفض الاء ل ذياب ! ،، طلعوا العيال ولحقوا ذياب الي طلع وجلس بالحوش، تقدم فيصل ومسك كتف ذياب ونطق: انا يمك !
ذياب مسح وجهه بضيق ونطق: ابي لحالي شوي افكر
فيصل: تم ولايهمك
قام فيصل وراح ومشوا معه نايف ونواف تاركين حرب الحزن ف صدر ذياب ! كل تفكيره هو ليش رفضته؟ معقوله م حبته وافكار كثير تدور براسه لكن حربها جوا صدره ! ..
-
وقفت لين ومدت يدها ل الاء ونطقت : تعالي ندخل
الاء وهي تسمح على ظهر الفهد: شوي واجيك
تنهدت لين بضيق ونطقت: تمام لاتتاخرين
طلعت لين وجلست الاء عند الفهد لأكثر من ٥ دقايق وبعدها قفلت مقصوره الفهد وطلعت وهي منزله راسها ووصلت لباب بيت الجد وكانت داخله من ورا البيت، فزت من حست بيد مسكت رسغها ، تسارعت نبضات قلبها من عرفت انه ذياب وكانت منزله راسها ولا رفعته م سمحت له يشوف عيونها الي ذبلت من كثر البكي ، قرب ذياب لها شوي ونطق بصوته الرخيم:
" لو اني ادري وش ورا الغيم مقسوم
م كان حبيتك ولا خاب ظني .."
فك يدها ومشى تاركها بعد م رمى الابيات الي كانت جمر ف قلب الاء ، نزلت دموعها بحرقه لانها خيبت كل آماله ! وكل ظنونه كسرت غروره وثقته فيها ! وكل هذا سوته لانها مجبوره !
تنهدت بضيق ومسحت دموعها ودخلت البيت وناظرت ساره بحده وجلست على الصحن تتعشا وهي م تحس حتى بطعم الاكل الي تاكله من كثر الي فيها !
-
ذياب طلع ل دوامه وهو كل ضيقه وحزن ومليان خيبات !
تنهد بضيق ووقف سيارته بالمواقف ونزل دخل مكتبه وجلس وبدأ يشوف اخر المعاملات والملفات، رفع راسه من دخل ناصر ونطق: ذياب
ذياب بضيقه واضحه ف صوته: سم
ناصر استغرب من حالته وتقدم جلس ونطق: دقيقه شفيك ؟
ذياب بهدوء: ابد ولاشي
ناصر: ذياب انا خويك واعرفك تكلم وشفيك !
ذياب والعبره خانقته: على عهدي كنت اخبرها تحبني بس يوم خطبتها رفضتني ! امداها تكرهني بيوم وليله !
ناصر: منهي ؟
ذياب: بنت عمي
ناصر: تحبها ؟
ذياب ابتسم ابتسامه جانبيه ونطق: اهيم فيها !
ناصر: يمكن انجبرت ولا من ذا الحكي
ذياب مسك راسه ونطق: مادري مادري ي ناصر !
ناصر وقف ونطق: بخليك تفكر براحتك
طلع ناصر وخلى وراه ذياب الي الضيقه تآكلت صدره !!
__
<في بيوت آل زايد>
انتهت ليلتهم وصلوا الفجر وناموا الا الاء واهلها الي كانوا يجهزون اغراضهم مسافرين، وقتها كان باقي على رحلتهم ساعتين ، كانت الاء تجهز اغراضهم وتحط كل الاشياء الي بتحتاجها ولمحت بين اغراضها الكتاب الي عطاها ذياب قبل لايروح مهمته فالحد، تنهدت بضيق ونزلت دمعتها من عرفت انها دخلت ب طريق ماعد لها رجعه منه! ضمت الكتاب لصدرها وبكت بحرقه، جلست تبكي وفزت على صوت الباب ودخله امها للغرفه، استغربت ام الاء من حاله بنتها ونطقت: لولوي شفيك؟
الاء مسحت دموعها ونطقت بكذب: بشتاق للبنات
هي كانت صادقه في انها بتشتاق للبنات لكن سبب بُكائها الحين هو رفضها ل ذياب !
ابتسمت ام الاء ونطقت: محنا مطولين هناك راجعين انشاءالله
هزت راسها الاء وطلعت امها من الغرفه ، تنهدت الاء بضيق وحطت الكتاب الي عطاها ذياب داخل الشنطه بين ملابسها وبعدها قفلت شنطتها ولبست عبايتها وشوزها وطفت انوار غرفتها وطلعت من البيت لكن وقفت من شافت ذياب جالس يكلم ابوها، تنهدت بضيق وتقدمت ووقفت ورا ابوها
ذياب: لا ي عم انا بوصلك انت شاحن سيارتك كيف بتروح المطار ؟
ابو الاء بهدوء: بطلب سياره انت تعبان توك جاي من الدوام روح ارتاح
ذياب : لا ابد ي عم مابه تعب
ابتسم ابو الاء ب رضا ونطق: تم يالله ودنا
ابتسم ذياب بضيق وتقدم شال شنطه ابو الاء وام الاء وبعدها تقدم مد يده ل شنطه الاء وركبها بالسياره حتى بدون م يناظرها، الاء كانت العبره خانقتها وشدت على قبضه يدها وركبت وطلعوا من بوابات آل زايد متوجهين للمطار ........

(البارت حزين وحتنى حزينه معكم😔،عطوها حقها وتعالوا انستا هذا حسابي
0_l1x
انتظركم هناك وترا دايم افتح بثوث🫣)