*تسريع الاحداث*
<احد ليالي رمضان تحديداً بيوت آل زايد>
ضحكت العمه حصه ونطقت: كليوم السمره عند امي شرايكم مره عندي ومره عند ابو فيصل ومره ابو ذياب وعاد ام الاء معذوره هم مسافرين
ام ذياب: ايوالله صادقه حصيص
لين: طيب نبي نطلع المول قرب الععيد واحنا م شرينا شي
ضحكت ندى ونطقت: بنخليها على دفعات زي اليوم بناخذ اشياء بسطيه
حصه: ي عزتي للعيال هم الي بيكدون من مول ل مول
مُلاذ: نروح مع السواق
ام فيصل: السواق اجازته تبدأ من بكره
ريم: خلاص ذياب ونواف ونايف وفيصل يتناوبون كل يوم يودينا واحد منهم
ندى: طيب الحين نبي نروح المول مين يودينا !
لين: ذياب وفيصل طالعين مالنا الا نايف ونواف
ريتاج: نص مع نايف ونص مع نواف
ساره: تمام يالله نتجهز
قاموا ولبسوا وطلعوا وانقسموا
ريتاج وساره وندى مع نواف ،، ولين ومُلاذ وريم مع نايف
شغلوا سيارتهم وطلعوا من بوابات آل زايد متوجهين للمول ..
__
كانوا جالسين بالطعوس ومسوين شاهي ويفضفضون ل بعض .. فيصل سند ظهره وناظر ذياب ونطق: صدقني فتره وتعدي
ذياب بيأس: ابي اعرف سبب الرفض بس !
فيصل ب هدوء: بخاطرك زعلت عليها !
ابتسم ذياب من تذكر ابيات سمعها مره ونطق . .
"وسَسط حايل ساكنٍ خخلّه!
لو ذبحني ياعوض عععادي
من يحاسب ياعوض خلّه ؟
ياعوض هو غايه مرادي !"
ابتسم فيصل ونطق: صادق من يحاسب ياعوض خلّه !
ذياب سند ظهره على باب السياره ونطق: حاس انها رفضت عشان دراستها !
فيصل تنهد وناظر ذياب بدون م يرد
ابتسم ذياب ونطق: شفيك تناظرني ! انطق
فيصل بتوتر: ذياب شف انا ودي ب اختك لين !
ذياب ناظره ونطق: اععقب !
فيصل تغيرت ملامح وجهه ونطق: ليه؟
ذياب: كذا م تناسبون بعض !
فيصل سكت بضيق ونطق: تمام
عم الهدوء بينهم لأكثر من 5 دقايق والتفت ذياب يناظر فيصل وضحك بعلو صوته ، ناظره فيصل ب استغراب ونطق: وشفيك؟
ذياب: صدقتني يالسربوت !! بالله وين بلاقي ل لين اطلق منك !
ابتسم فيصل ومسك على قلبه وناظر ذياب وقام رفسه وضحك ونطق: حسيت ان قلبي طاح
ذياب: عاشق من ورانا !
فيصل بأبتسامه: الحب غغلاب !
ذياب: وانا خلوني بضيقتي
فيصل: افا ! انا معك والايام قدامنا وبنشوف سبب رفضها
ذياب: قرب موعد لقانا
فيصل: قلبك ملهوففف لها يالسربوت
ذياب: اسكت لا احلف م تاخذ لين
ضحك فيصل ونطق: تحرم على غيري
ذياب ابتسم ومد يده يصب شاهي وكملوا سوالف وفضفضه . .
_
نايف لف عليهم ونطق: هذا المول قدامكم لكم ساعه بس !
لين: انزل معنا بدال م تجلس بالسياره
مُلاذ: صح
نايف: تم لعيونها مو لعيونك ي لين !
لين: تراب بعينك انتي وهي
ضحكت مُلاذ ونطق نايف: يالله يالله
نزلوا وتقدموا الا نايف كان يمشي على هونه وصار يم مُلاذ
ناظرته مُلاذ وكان يناظرها ، ضحكت ونطقت : الطريق قدام
نايف: كل الطرق توصلني لك !
ريم: الحب المخنز
نايف: غيرانه
ريم: توكل بس قال غيرانه
لين: خلاص فشلتونا
نواف وقف سيارته عند المول ونزلوا وشافوا نايف والبنات قدام باب المول، مشوا تقدموا لهم ونطق نواف: انسحب علييي
نايف: يالله خلهم يتسوقون واحنا نروح نتقهوى بالكوفي الي هنا
نواف هز راسه ومشى هو ونايف ودخلوا البنات للمول
زفرت لين ونطقت: وحشتني الاء
مُلاذ: كلنا والله
لين: هانت قرب موعد لقانا
ريتاج: بنات شوفو المحل ذا حلو
مشوا البنات داخلين للمحل ..
__
فتحت الاء عيونها ب تعب وقامت اخذت شاور ونزلت تحت ل امها ، جلست وهي كلها هواجيس، لفت على صوت امها من نطقت: الاء
الاء بهدوء: لبيه
ام الاء: من جينا هنا وانتي مضيمه ، فيك شي ؟
الاء بحزن: بس اشتقت للبنات
ام الاء: متاكده؟
الاء: ايه
ام الاء: يالله تعالي نصلي التراويح
قاموا وبدأ يصلون . .
__
كانوا البنات يتسوقون ومستمتعين ، لفت ريم على ندى ونطقت:شوفي الكعب ذا رهيب على فستانك الموف
ندى: يجنن بعتمده
ريتاج: خذي كعب اطول لأنك قصيره
مُلاذ: شرايكم في ذا
ساره نزلت عيونها ل جوالها وشافت فيه رساله من ماهر ، ارتبكت ولفت للبنات ونطقت:بشوف المحل الي يمنا
طلعت من المحل ونزلت عيونها لجوالها تشوف رساله ماهر، عضت شفايفها من قرأت رسالته
وكان محتوى الرساله"رضيتي ب قربي؟"
قربت الجوال لها وكتبت" اعطني وقت"، قفلت جوالها ومشت متوجهه للمحل الثاني
__
نايف طلب له هو ونواف قهوه ورجع جلس يم نواف
نايف تنهد ونطق: شغل الشركه مره ماش م ناسبني
نواف: ايوالله بس انا تعودت عليه
نايف: لو ان مكاتبنا يم بعض كان ي سلامم
نواف: لايشيخ عشان اكمل انا المعاملات عنك وانت نايم !
نايف:والله عمي ابو فيصل كل شوي يشيك يشوف انا نمت ولا لا
نواف ضحك ونطق: من يلومهم
نايف ضحك ورفع جواله يرد على اتصال لين
لين: نبي مول ثاني
نايف: فرحت فكرتكم خلصتوا
لين: باقي في اغراض م لقيناها هنا
نايف: طيب ، قفل منها ولف على نواف ونطق: يبون مول ثاني
نواف وقف واخذ جواله ومفاتيحه واغراضه
ونطق: سرى الليل واحنا م سرينا
ضحك نايف وقاموا متوجهين للبنات .
__
تنهد ذياب ووقف على رجوله يشيل الاغراض
فيصل: الحين اذا رجعنا جدي بياخذنا رايح جاي
ذياب: معليك اذا قال شي نقول كنا معزومين عند ناصر
فيصل وهو يركب الاغراض: الحل الوحيد
ركبوا الاغراض وركبوا ومشوا متوجهين للبيت ...
..___________..
مرت الساعات وحتى الايام وجا اليوم المنتظر اخر يوم ف رمضان وكانوا متجمعين كلهم ، انتهى رمضان ب خيره وشره على آل زايد ..
ذياب مرت ايامه بدون اي حدت مهم قضى رمضان وهو كل تفكيره في رفض الاء . .
نواف بششر الكل بحمل ريتاج وكان جدا فرحان وحريص . .
ساره قبلت ب حُب ماهر وصار بينهم تواصل ف الجوال . .
صارت فيه عزايم كثير ببيت الجد وفكل مره كانت ندى تصادف الوليد الي بدأت ترتاح له كثير ويفز قلبها ل اسمه . .
اما الاء عاشت بكوابيس ،، تقبلت الوضع لكن لازال الموضوع بخاطرها لا زالت تحب ذياب وتهيم فيه بعد ، كانت تنتظر يخلص شغل ابوها بأسرع وقت عشان يرجعون وتشوف ذياب والبنات
_____
تجمعوا كل عيال آل زايد واحفاده وافطروا اخر يوم رمضان عند الجد وبعدها راحوا العيال يصلون والبنات بدأوا يعتنون ويرتبون وهم كلهم حماسس للعيد و ل الاء ..
صلوا العيال العشاء ووقفوا قدام المسجد كلهم
ناظرهم الجد ونطق: واحد منكم يروح ياخذ ابو الاء وعياله من المطار ، ابتسموا العيال وكلهم ناظروا ذياب الي ساكت
ونطقوا : ذياب
ذياب ناظرهم وعرف نيتهم، رجع يناظر الجد
الجد: ذياب روح
ذياب : ابشر ي جد
مشا ذياب وشغل سيارته وطلع متوجه للمطار
ضحكوا العيال وبعدها مشوا كلهم العيال وابائهم، مشوا يروحون يحلقون ويتجهزون لطقوس العيد . .
__
البنات رتبوا كلشي وبعدها تجهزوا وجلسوا وبدأوا سوالف
لين: بروح اجيب القهوه والاكل
ساره: وانا معك
ريم: جيبوا لي شاهي معاكم
ساره: توكلي بس
ضحكت لين ومشت هي وساره دخلوا المطبخ وبدأوا يحطون الاكل ب السله ،
ساره ناظرت لين شوي ونطقت: لين
لين وهي تحط الفناجيل: سمي
ساره قفلت الباب ووقفت قدام لين ونطقت: ودي اقول لك ب شي بس م ودي تزعلين !
لين ارتبكت خافت ان ساره عرفت امرها هي وفيصل، رجعت تناظر ساره ونطقت: قولي
ساره: بالصراحه انا الي خليت الاء ترفض ذياب
لين توسعت عيونها ونطقت بصدمه: ايشش !! وش سويتي؟؟
ساره: صورتها هي وذياب ب الاسطبل وخليت الصوره عندي ويوم سمعت انه خطبها وريتها الصوره وقلت لو توافق بوري عمي عبدالله وعمي خالد وبرضوا جدي وهي م كانت تبي يصير ل ذياب مشكله ف رفضت
لين حطيت يدها على فمها ونطقت: تستهبلين ! انتي دمرتي حلم اثنين يحبون بععض !!
ساره: وربي ي لين ندمت وادركت ف وقت متأخر اني مابي ذياب وعرفت انه مو حولي حتى
لين: طيب الحين ليه تقولين لي !
ساره: حسيت ب تأنيب الضمير
لين تنهدت بضيق وهي تتذكر حال ذياب في فراق الاء كيف كان انسان بلا روح وكل يومه هواجيس، ناظرت ساره ونطقت: طيب خلاص بتنحل
ساره: مابي البنات يعرفون تكفين !
لين: تمام خلاص حصل خير
دخلت مُلاذ المطبخ ونطقت: ساعهه !
ساره ابتسمت ونطقت: كنا نسولف
تقدمت مُلاذ واخذت باقي الاغراض وطلعوا . .
__
بعد ساعه وصل ذياب المطار ودخل صالات الاستقبال للقادمين ، جلس يناظر بين الناس وفز قلبه من شافها تمشي يم ابوها وتسحب شنطتها يمها ، نزل عيونه من قربوا وتقدم لهم
ونطق: نورت الرياض !
ضحك ابو الاء وتقدم ذياب يحضنه وبعدها لف على ام الاء وسلم عليها ، ابتسم ابو الاء ونطق: يالله مشينا
ذياب مد يده ياخذ شنطه ام الاء وبعدها ناظر الاء واخذ شنطتها ونطق؛ توكلنا على الله
ناظرته الاء بهدوء وهو يمشي قدامهم وبيده اليمين شنطتها ويده اليسار شنطه امها ، ابتسمت بحزن وناظرت البوابات الخارجيه وهم طالعين ، وصلوا ل سياره ذياب وركب ذياب شناطهم وركبت الاء ورا ذياب وكانت تناظره بكل هدوء وهي مبتسمه لانها سمعت صوته وشافته قبالها بعد العنا والصبر والحزن !
ذياب لاحظ نظارتها وصد وهو كله عتاب، ناظره عمه
ونطق: كل رجال العايله يحلقون ويتجهزون
ضحك ابو الاء ونطق: يالله عشان نلحق عليهم
ابتسمت ام الاء ونطقت: اشتقت للبنات ول عمتي
ذياب: الكل بأنتظاركم على احر من الجمر
ناظر الاء نظرات مليانه عتاب وحزن وحتى حسره
الاء تحس انه عاتبها بالنظر بس كيف لو باقي الكلام !
صدت وناظرت جوالها ورفعته تصور للبنات
___
ماهر ناظر ناصر ونطق: نويصر
ناصر: ها شفيك
ماهر بهدوء: بتزوج
ناصر ابتسم ونطق: مين تعيسه الحظ !
ماهر: م يخصك
ناصر ضحك ونطق: اجل ليش تقولي ؟
ماهر: ابي تدور لي وظيفه عشان اذا جيت اخطب م يردوني
ناصر:تبي اكلم خويي ذياب يكلم ابوه يدخلك ب الشركه حقتهم؟
ماهر تنهد ونطق: ياليت
ناصر: ولايهمك
ماهر: قربت ملكتك انت وغدي
ناصر ابتسم ونطق: ايه و الزواج بعد الملكه بفتره قصيره
ماهر: الحب بلوى
لفوا على صوت ام ناصر من نطقت: شكل ماهر طاح بالحب ؟
ماهر ضحك ونطق: تقدرين تقولين
ام ناصر ب رضا: قولي مين هي وابشر
ماهر: ساره بنت ابو فيصل
ام ناصر عقد حاجبينها ونطقت: بنت فارس؟
ماهر بهدوء: ايه
ابتسمت ام ناصر ونطقت: تم
ضحك ناصر بخفه ونطق: طاح على وجهه
ام ناصر: من يلومه ب حُب ساره !
_______
جت ريم تركض للبنات وهي تضحك ، لفت لين ونطقت: شفيك؟
ريم: جت الاء !
ابتسمت لين ومُلاذ وقاموا كل البنات الا ساره الي توترت ودخلت المطبخ ..
طلعت لين تركض وضمت الاء قدام ذياب وام الاء وابوها
ابتسم ذياب على جنب وصد ينزل الشناط
لين ابعدت عن الاء ونطقت: انا اول من رحب فيك !
مُلاذ من ورا الباب: مستغله الوضع يوم ان الرجال مو موجودين ومافيه الا اخوك ذياب ! اوريك
ضحكت الاء ودخلت ضمت مُلاذ وكملت تسلم على باقي البنات بكل شُوق وحب وحنين ..
_
ذياب اخذ نفس طويل وكمل ينزل شنطه ابو الاء
ابتسم ابو الاء ونطق: خلاص خلهم انا بوديهم البيت
ذياب: وانا بروح ابدل عشان نطلع ونلحق العيال عند الحلاق
ابو الاء: يالله شوي واجيك
صد ذياب وراح للبيت وهو فيه شعور سعاده برجعه الاء وشعور حزين من رفضها له ، تنهد ودخل المطبخ يشرب مويه ...
لين شافته لما دخل البيت ولفت على الاء
ونطقت: لولوي شوي واجي !
الاء: تم
طلعت لين وكملت الاء سوالف مع البنات
دخلت المطبخ وشافته يشرب مويه ونطقت: ذياب
ذياب لف عليها ونطق: سمي ي لين
لين: تعال اجلس بكلمك بموضوع
ذياب استغرب ونزل كوب المويه ومشى معها وجلس على
الكنبه ونطق: قولي
لين: اعرف ليه الاء رفضتك !
ذياب بهدوء: رفضتني لانها م تبيني !
لين ضربت راسه بخفه ونطقت: لا ي بقره !
ذياب استغرب ونطق: اجل وش ؟
لين: كم تدففع واقولك !
ذياب: ي الليل الليل
لين: خلاص اجل مافيه
ذياب تنهد ونطق: 200؟
لين ابتسمت بخبث ونطقت: 250
ذياب: تم بسس قولي !!
لين: رفضتك لانها كانت مجبوره
ذياب ناظرها ونطق: مينن جببرها !!
لين: ساره هددتها بصوره لك وانت والاء بألاسطبل
ذياب بعصبيه: وليهه م قالت لي !!
لين: ذياب تستهبل ! على طول سافروا اليوم الثاني كيف تبي تقولك ! وبعدين اقولك البنت مهدده يعني لو بتقول لك بتفضحكم ساره وانت وقتها تعرف وش بيسوي جدي وابوي وعمي عبدالله !
ذياب مسح وجهه بعصبيه ونطق: اوريها ساره
لين مسكت يده ونطقت: لا ي ذياب خلاص البنت ندمانه اساساً فكنا، لو بتسوي لها مشكله قامت وورتهم الصوره !!
ذياب: صح صادقهه بس قهرتني ي لين ! وش حدها !!
لين: مدري
ذياب تنهد وقام ونطق: بروح ابدل وانزل ل عمي عبدالله
لين: تمام وانا راجعه للبنات . .
-
الاء ناظرت ساره الي واضح التوتر بوجهها ، ابتسمت الاء وقربت ل ساره ونطقت:" وميعادنا ي مفرق اثنين بعدين !!"
ساره ناظرت ابتسامه الاء ولفت تناظر لين الي دخلت
لين ابتسمت للبنات ونطقت: يالله نبات نروح نكمل التجهيز للعيديات؟
ريتاج: والله حماسس
ندى: هيا
مشوا البنات يكملون باقي التجهيزات بكل حُب
_
بعد ساعات انفتحت بوابات آل زايد ودخلوا اولاد واحفاد زايد ووقفوا سياراتهم ونزلوا
الجد ضحك ونطق: سرا الليل
نايف ابتسم ونطق: الحلاق رجعك 20 سنه ورا
الجد ابتسم ونطق: مو مشكله
ابو فيصل بضحكه: الحلاقه ل ام العيال مو للعيد
فيصل ضحك ونطق: يحظ جدتي
الجد: خلاص تقلعوا
مشوا العيال لسياراتهم يسولفون عندها وباقي الرجال دخلوا المجلس ..
تنهد ذياب ونطق: بروح اشوف الخيول واجي
نواف: تمام وترانا ب انتظارك
ذياب هز راسه وطلع متوجهه للاسطبل ...
-
ندى تنهدت ونطقت: اخيرا
مُلاذ: عيدياتي احلى
الاء ضحكت ونطقت: عيدياتي جايبتها من حايل
لين: انتي اكثر وحده م تعبتي
ريتاج ضحكت ونطقت: احسن شي انها سوت العيديات من بدري ، ابتسمت الاء وهي تناظر البنات
ونطقت: بروح اشوف الفهد وحشششني مرهه
ابتسمت لين ونطقت: ي حظ الفهد !
ابتسمت الاء وناظرت ساره وطلعت متوجهه للاسطبل . .
دخلت الاسطبل وتوجهت لمقصوره الفهد وشافتها مفتوحه
تقدمت اكثر تشوف مين الي عند الفهد لكن وقفت من شافت ذياب منسدح وساند راسه على ظهر الفهد ،،
شافها ذياب وفز يوقف على رجوله ونطق: الاء !
الاء رجعت خطواتها ل ورا وصدت
ذياب صد بوجهه ونطق: اذا انتي للحين تحبيني ف تعالي بكره صباح العيد، تعالي هنا بالاسطبل اكون ب انتظارك ! ان كانك م جيتيني وقتها اقدر اقول هذا رفض نهائي وان جيتي ف ابشري ي بنت عبدالله ب مبتغاك !
تنهدت الاء ومشت طلعت من الاسطبل ورجعت للبنات الي كانوا يجهزون ومافيه اسعد منهم ! ليله ويصبح العيد والاحفاد متجمعين وصوت ضحكاتهم وسوالفهم كفيله انها تزرع فيهم شعور الامان والحُب ........
(عارفه اني تأخرت عليكم بس شسوي نفسيتي مرههه ماهي نفسيه كتابه🥹! اخذت راحه اسبوع ورجعت لكم ببارت حلو ولذيذ، تبون نكمل ؟ ابي تفاعل كومنت ونجمه، و اذا فيه خطاء سوو سكب لاني اكتب ب عين ونايمه بعين🫣🤨، قراءه مُمتعه واعطوها حقها🥹🫶🏻❤️)
أنت تقرأ
الغرام يمَك غدا بقلبي مسموح
General Fictionتعلقت بك ولا ودي بيوم تروح لقيتك بك الزين وجميع امالي.
