كانو ماشين بالطونوبيل السكات بيناتهم حتى صونا طيليفون سيف لي كونيكطي مع الطونوبيل شاف اسم خوه هز عليه
كريم :"سيف لقيتها؟؟"
دور شاف في فاطمة و تبسم و هدر:" لقيتها ."
سمع صوت جدو لي قاعد يقولو يسقسيه على بلاصتهم و جاوبو قبل ما يسقسي:" رانا في طريق بجاية مروحين واحد الساعة و نص ساعتين نكونو لتم".
جاه صوت جدو الملهوف:" سيف عندك كاشما تكون درتلها ما نسمحلكش "
تبسم و قالو:" ما تخافش جدي ما درتلها والو (سكت شوية ودار شاف فيها و كمل بوعيد ) حتى لدرك "
الجد:" سيف خلي حتى توصلو و دير واش تحب كي تكون تحت عيني أما بعيدة عليا ما تقيسهاش "
سيف :" جدي راني نسوق كي نوصل نحكيو "
و كوبا عليه قبل ما يسمع جوابو
فاطمة لي سمعت واش تحكا كامل حست بمشاعر مخلطة من جيهة ضميرها يأنبها على جدها لي خايف عليها و من جيهة الرعب لي حكمها كي فهمت بلي مصيرها هاد المرة في يد سيف لي باين عليه كان يستنا غير في فرصة .
سيف بهدوء ما قبل العاصفة :" علاه هربتي ؟!"
دورت شافت فيه و من بعد زادت دارت جيهة الكارو مسمطتو
سيف بصوت هادئ:" جاوبي ما تعمرينيش عليك كتر ما تخليش حسابك يزيد ونتي ماشي ناقصك "
فاطمة :" ما جاوبتكش علاخاطر قاعد تتمهبل بيا وحدة بين ليلة و نهار لقات رحها في دار جديدة مع عباد جدد و كون على الأقل ناس طبيعيين ناس مراض ، حابيني نتقبلكم و نعيش معاكم عادي !! كي شغل هادي هي حياتي العادية ؟! أنا مانشبهلكمش مانيش كيفكم و ما نقدرش نعيش معاكم افهموها صعيبة هادي ؟! "
سيف بلا مبالاة :" نتي لازم تفهمي بلي بلاصتك هي هديك الدار لي هربتي منها و حنا هوما عايلتك "
سكتت و ما جاوبتوش ولاحت يدها للباب و حلتو و رمات روحها ، فرينا و هبط يجري ليها لقاها ناضت و بدات تجري برجل و رجل تجر فيها ، وصل ليها حكمها من يدها و هي بدات تعيط :" اطلقني ما نحملكمش نكرهك نكرهكم كامل اطلقني ."
بقا سيف يجر فيها و هو ساكت و وجهو حمر و عروقو بانو ماهوش حاب يتنارفا و يغلط معاها وهي باقية تعيط و تضرب فيه حتى حبس و ظربها بظهر يدو على وجها جمدت في بلاصتها بقاو غير دموعها يهبطو و هو جبدها من مرفقها و لسقها فيه و هدر في وذنها و أنفاسو يضربو في وجها :" نزيد نسمع صوتك ولا تتحركي بلا ما نقول ننسا بلي بنت عمي و نعاود نربيك هنا"
جبدها من يدها باش تمشي و لاح عينو شاف رجلها بلي تجرحت هبط هزها و هي كي الميت بين يديه ما تحركتش وصلها للطونوبيل قعدها في بلاصتها بصح رجليها مازال دايرين للباب حل لقجر لي قدامو و جبد منو علبة الإسعافات الأولية و بدا يعقملها فالجرح تاع رجلها بعد ما طلعلها السروال حتى للجرحة و هي باقية غير تبكي بالسكات كي كمل من رجلها هز قطن و حط فيه لالكول و قربو جيهة فمها يمسحلها الدم لي ساح كي ضربها ، حط لقطن جيهة الجرحة وهو يتكا على الفك تاعو ماكانش حاب يمد يدو عليها طلع عينيه يشوف مع عينيها لي معمرين دموع و سها فيهم قلبو بدا يضرب حس بلي أنفاسو تقال عليه أول مرة يتشد الطفلة كيما هكا ، فاق مع روحو كي فاطمة دورت وجها و عدلت رحها فالطونوبيل بقا واقف في بلاصتو يتكا على يدو ما حملش الشعور لي حسو بعدا معاها و راح ركب جيهتو و بدا يسوق وهو ساكت .
.......................................
فالفيلا كانو كامل قاعدين ساكتين حتى نطقت منار:" نبقاو نسناو فال la princesse تجي ؟! "
واحد ما جاوبها و هي كملت :" ما فهمتش أنا واش نديرو بيها وحدة sauvage ما تتعاشرش كون غير خليناها تروح منين جات ما نقدروش حتى نحملوها بيناتنا "
طلع كريم عينيه وشاف فيها :" عيب منار كيفاه زعما قدرنا نحملوك نتي كامل حتحيرلنا في فاطمة مسكينة ؟! "
سلمى:" كريم مدابيك تحتارم منار و تعرف كيفاه تهدر معاها "
كريم ببرود :" والله يا عمتي لعزيزة نهار بنتك تتعلم تحتارم رحها و تحتارم لعباد نوليو نحتارموها "
منار بغرور:" أصلا رايك و هدرتك ما يهمونيش و يجي نهار لي تولي عينيك ما تهزهمش فيا ..."
خبط الجد اللرض بالعصا تاعو و نطق:" هدا ما بقا تتقابدو و أنا قاعد ".
هبط كريم راسو و نطق:" سامحني جدي ماشي قصدي ".
نطقت منار تتمسكن:" سامحني جدي بصح شفتو كيفاه يهدر معايا "
الجد بنبرة حادة:" و شفتك كيفاه تهدري على بنت خالك تاني ."
سكتو غير ياسر لي قرب عند ختو و همسلها:" قتلك جات لي تديلك بلاصتك ما أمنتينيش شوفي جدي كيفاه يعاملك و خطيبك لعزيز أو يجري موراها "
...........................................
كان يسوق و عينيه على الطريق يخمم فالشعور لي حكامو حاس بلي صدرو شاعلة فيه النار كي ضربها جبد قارو شعلو و بدا يتكيف بيد و يسوق بيد بلاك الدخان يطفيلو نارو ، بدات فاطمة تسعل من الدخان لي ملا الطونوبيل حتى حل الطاقة لي قدامو و رماه بلا ما نطق حتى كلمة حتى سمع صوت الأنين تعها دور شاف في وجها لي ترسم الألم فيه سقساها و كمل يسوق :"وشبيك واش يوجعك فيك ؟!"
كي العادة سكتت و ما جاوبتوش وهو حبس و دار عندها و هدر بعياط:" ما تفهميش واش معناها كي نسقسيك تجاوبي ؟!"
شافت فيه و الدموع في عينيها و تعض على شاربها بسنانها ، سيف كي شافها هكا حس بقلبو يوجع فيه حل ceinture و قرب عندها و حط يدو على خدها :" وشبيك فاطمة ؟!"
حطت يدها على رجلها و عينيها يسيلو بالدموع و نطقت :" رجلي هئ هئ....."
بعد عليها و عاود نوض الطونوبيل و نطق :"معليش قربنا نوصلو " و هز طيليفونو عيط سنا الطرف الآخر يرد و نطق بصرامة:" نحتاجك بعد نص ساعة فالفيلا "
و كوبا و زاد فالفيطاس باش يوصل في أسرع وقت
............................................................
فالفيلا قاعدين على لجمر يسناو فيهم يجيو حتى نطقت منار :" جعت ما نتعشاوش ؟!"
نطق ياسر :" جعنا كامل راني نهار كامل و أنا خدام"
محمد بإستنكار:" كامل كنا نخدمو بصح حنا قلبنا ماشي ميت"
سلمى :" تبانلي ماكانش عشا اليوم نخرجو نتعشاو برة"
سمطوهم حتى سمعوا صوت الباب تاع الفيلا البراني تحل و صوت طونوبيل ناضت هديل تجري للطاقة شافت طاكسي دخلت و نزلت منها طفلة تبان فأواخر العشرينات دورت عند مرت عمها لي كانت تشوف فيها بإستفسار هزت راسها بلالا و قالت بحيرة:" وحدة ما نعرفهاش "
سمعو الباب و الخدامة راحت حلت و دخلت للصالة و هديك الطفلة موراها .
الخدامة:" موسيو عيسى المادموزال قالت بلي موسيو سيف لي قالها تجي "
عيسى:" معليش بنتي تقدري تروحي تكملي خدمتك و شاف في هديك الطفلة تفضلي"
وقفت الطفلة بثقة وسط الصالة و نطقت:" أنا سيرين طبيبة جينيراليسط بعتلي موسيو سيف قالي بلي يحتاجني فالفيلا ."
هديل عينيها تعمرو بالدموع و شافت في كريم:" كاشما دارلها علاهاديك عيط للطبيبة"
جبدها كريم ليه و حط يدو على كتفها و همسلها:" ما تخافيش "
دخلت سيرين و قعدت بعد ما أشار ليها عيسى باش تقعد أما محمد فهز طيليفونو يعيط لولدو يحب يفهم علاه عيط للطبيبة .
................................................
كان سيف و فاطمة قربو يوصلو و سيف متجاهل طيليفونو لي قاعد يوصوني و مرة على مرة يرمي عينو يشوف فيها و هي حاكمة دموعها خشمها حمار و شواربها تنفخو بالبكاء
وصلو و نزل و راح جيهتها حل الباب و هزها و هي دورت يديها على عنقو بلا ما يهدرو حتى كلمة وصل للباب لقا هديل و مو فالباب
نطقت مو بالخلعة :" واش بيها فاطمة علاه هازها ؟! "
و خرجت سلمى و بنتها لي عينيها خرجو وهي تشوف في سيف هازها و محظنتوا تجاهلهم كامل و طلع لبيتها و شاف في هديل لي واقفة تشوف معاه و نطق بعياط :" حلي الباب !"
حلتلو الباب و هو دخل و حطها فالفراش و دار موجه كلامو لسيرين ببرود:" رجلها طاحت عليها "
هزت راسها و نطقت:" تقدرو تخرجو تخليوني نخدم خدمتي ؟!"
بداو يخرجو و هديل نطقت :" نقدر نقعد معاها ؟!"
هزلتها راسها بهيه و بدات تخدم في خدمتها
أما لتحت فبدات فقرة الأسئلة المتواصلة على سيف لي قعد فالفوطاي و يدو متكيا على الحرف و مرجع راسو متكي بيه للور دليل على انو عيا بزاف ليوم تنهد و عدل قعدتو و شاف في جدو لي باقي يعاود في نفس الهدرة " واش بيها حفيدتي واش درتلها"
سيف ببرود :" ما درتلها والو هي حلت الباب تاع الطونوبيل و رمات رحها و أنا ماشي و ....."
سكت و ما لقاش واش يقول يقولهم ضربتها ؟! زير على يدو كي نطق ياسر:" و واش؟! "
شاف في جدو و نطق :" ضربتها كف "
بقاو كامل يوشوف فيه حتى نطق محمد :" كيفاه هادي ضربتها ؟!"
وقف سيف و نطق:" هي باقية تزيد فالهدرة و تعيط و نرفزتني"
الجد:" قتلك ما تقيسهاش "
سيف ببرود :" و أنا قتلك من قبل بلي عقليتك هادي ما عندها وين توصل معاها وشوف وين رانا درك " و هو يأشر لبيت فاطمة لي كانو يسمعو صوت بكاها.
سكتو كي شافو الطبيبة هابطة قرب عندها سيف و هي نطقت بعملية:" المادموزال عندها كسر في رجلها اليمنى و تبان ما كلاتش عندها ضعف نتمنا تتهلاو في ماكلتها و تداومولها على الدواء و مام نفسيتها عندها دور في حالة الإعياء لي فيها نتمنا تبعدوها على كلش يقلقها "
هز راسو سيف و دا من عندها ال ordonnance و بعتها مع ليڨارد باش يشريو الدواء بعد ما وصل نسرين للباب
................................................
نتمنا تعجبكم و نشاله ما نكونش طولت عليكم
أنت تقرأ
كرونيك عشق مخيف 🇩🇿💔❤️
Roman d'amourكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
