عداو ليامات فاطمة مازالت فالحجز تعها بقالها يومين، كرهت حياتها نهارها كامل قدام طاقتها ما تشوف حتى واحد غير زينة حتى سيف من هداك النهار ما شافتوش، و حالة سيف ما كانتش خير من حالتها كل يوم يخرج الصباح بكري و ما يرجعش للدار غير بعد الطناش يلهي في روحو بالخدمة باش ما يخممش فيها بصح كل ليلة يروح يشوفها و أخبارها كامل توصلو من زينة، و كريم و هديل عايشين أجمل أيام علاقتهم بلا مشاكل و بلا زعاف، أما سلمى و عايلتها فكانت كل جهودهم محطوطة فالتخمام في كيفاه حيطيحو فاطمة في شباكهم.
.............................................
نهار جديد بدات فيه نفسية فاطمة تتحسن شوية علاخاطر بقالها غير اليوم و غدوة و تكمل العقاب هدا، كي العادة كل صباح تدخل عندها زينة و تعاونها في لبستها و تخرج و قبل ما تخرج سقساتها فاطمة "زينة شكون كاين لتحت؟!"
زينة: " كامل ليوم جمعة ما يخدموش "
فاطمة بحماس: "حتى سيف؟! "
زينة بإبتسامة استغراب: " هيه حتى موسيو سيف "
فاطمة بملل: " بالسيف كل ما نسقسي عليه ما نلقاهش، المهم عيطيلو قوليلو نحتاجو "
زينة بصدمة: " نعيطلو؟! "
فاطمة: " هيه زينة عيطيلو وشبيك مستغربة قوليلو نحتاجو "
زينة بإيمائة و هي خارجة: " حاضر "
...................................
لتحت كانت العايلة كامل مجمعا كل واحد واش يدير، دخلت زينة للصالة و هدرت بصوت واطي: " موسيو سيف، مادموازال فاطمة تحتاجك "
شرقت منار لي كانت تشرب فالقهوة، دور سيف تنخزر فيها و دور عند زينة و هدر ببرود: " اوك تقدري تروحي "
وقف باش يطلع عندها بصح حبسو صوت حنان: " سيف ماشي بزاف؟! خليها تخرج الطفلة من نهار جبناها و نتا قافل عليها "
سيف بجمود: " مّا انا قلت هدرتي مدامها تحت مسؤوليتي لازم تتعلم بلي كل هدرة لازمها تتنفذ "
خرج من الصالة و هدر محمد: " نشاله ما تندمش بابا لي خليت مسؤوليتها في يد سيف "
تنهد الجد و هدر: " فالحالتين كان حيتعامل بنفس الطريقة "
هدرت منار مع مها لي كانت قدامها بصوت واطي: " شفتيها تتأمر و تعيطلو عندها للبيت تاني وهو طلع يجري عندها "
سلمى بنفس النبرة: "ما تخافيش نعاود نربيهالك"
تبسمت منار براحة و هزت طيليفونها كملت واش كانت قاعدة تدير
.........................................
عند سيف وصل لبيت فاطمة وقف يشوف فالباب تنفس بعمق بلاك دقات قلبو يهداو شوية، حط يدو على قلبو وهدر: "سيف ماشي هي، ماشي بنت عمك الصغيرة"
طبطب و سمع صوتها يسمحلو باش يدخل دخل لقاها قاعدة فالكرسي لي قدام طاقتها وقف قدامها و قبل ما يهدر هدرت هي: " قلقت"
هز حاجبو و جاوبها: " اهيه واش نديرلك؟! "
فاطمة برجاء: " خليني نخرج ولا خلي هديل تجي عندي "
سيف بجمود: " هدرت هدرة و ما نزيدش نعاودها قلت سمانة معناها سمانة "
فاطمة و الدموع في عينيها: " بصح قلقت"
سيف: " باش المرة الجاية قبل ما تديري اي حاجة تخممي "
و خرج و خلاها، طاحو دموعها و ضربت الفاز لي قدامها طيحتو و هي تعيط: " نكرهك نكرهكم كامل "
...............................
هبط سيف فالدروج قابلتو العايلة لي باينين سمعو صوت التكسار و صوت عياطها، الجد بصوت ملهوف: " واش درتلها سيف؟! "
بقا سيف يشوف في جدو و ما جاوبوش، محمد بصوت عالي: " جدك هدر معاك واش درت للطفلة مسكينة من نهار جات و نتا مهبلها "
تجاهلهم سيف و عيط بصوت عالي لزينة لي جات تجري وقفت قدامو و كمل بأمر: " اطلعي لمي واش كسرت فاطمة "
طلعت زينة و حنان حكمت يد سيف لي كان خارج و هدرت: " سيف واش صرا؟! "
باس سيف راس مّو و هدر: " ما تخافيش مّا ما صرا والو هي طلبت حاجة و أنا ما قبلتش هادي هي لحكاية و نتمنى واحد ما يطلع عندها بقاو يومين تكملهم "
............................................
طلعت زينة لبيت فاطمة لقاتها تبكي ما عرفتش كيفاه تواسيها و بدات تلم فالسجاج لمكسر كملت وجات خارجة حتى نطقت فاطمة بصوت مبحوح من لبكا: "زينة نقدر نطلب منك حاجة؟!"
زينة: " لاكان نقدر علاه لالا؟ "
فاطمة: "تقدر تمديلي طيليفونك نعيط؟!"
زينة بخوف: " سامحيني فاطمة ما نقدرش كون يعرف موسيو سيف يمحيني و الله فوق طاقتي سامحيني "
فاطمة: "فهمتك، زينة ما تجيبيليش من بعد الماكلة حابة نرقد"
زينة: "بصح موسيو سيف قال...."
قاطعتها فاطمة: " ما يهمنيش فيه واش قال مانيش حناكل "
خرجت زينة و مازادت حتى كلمة و قعدت تخدم في خدمتها، مورا صلاة الجمعة تغداو و كل واحد راح يدير شغالاتو.
..................................
كان كريم في بيتو يهدر في طيليفونو حتى تحل عليه الباب بدون سابق انذار و دخلت هديل، قربت عندو و بقات ساكتة كي لقاتو يهدر، أما كريم بدا يلعبلها بشعرها و كمل يهدر
كريم بجدية: " كيما تفاهمنا مادموازال غدوة الإجتماع و نحكيو فالتفاصيل كتر "
الطرف الثاني: ".......
كريم:"اوك غدوة نشاله"
قفل طيليفونو و رماه على السرير و حاوط هديل من خصرها بيديه في زوج و هدر: "وشبيها عينيا تبان زعفانة"
نحات هديل يديه من عليها و بعدت عليه و هدرت: " شكون هادي لي حتتلاقاها غدوة؟! "
عوج كريم راسو و عاود جبدها ليه و رجع يديه وين كانو و هدر بجمود: " قداه من مرة نقلك كي تعودي بين يديا ما تبعديش "
هديل بزعاف: " كريم سقسيتك سؤال جاوبني "
باسها من راسها و بعد عليها و هدر ببرود: " خدمة "
ربعت هديل يديها و هدرت بسخرية: " حلال عليكم حرام علينا"
كريم: " واش قصدك "
هديل بإنفعال خفيف: " قصدي نتا تحكي عادي مع نسا و كي نسقسيك خدمة بصح أنا...... "
هز كرين صبعو في وجها و قاطعها بتحذير: " تكمليها تتحاسبي عليها "
ضحكت هديل بسخرية: "ههه نتا باش نقول برك نهدر مع رجال ما حملتهاش و انا تهدر مع نسا قدامي"
حكمها من دراعها و جبدها عندو حتى لسقت فيه: " علاه تحبيني في كل مرة نفكرك بلي راكي ملكي وحدي و ما عندكش الحق تجيبي سيرة أي راجل فالدنيا هادي "
تعمرو عينيها بالدموع و حطت يدها على يدو لي تتكا على دراعها و هدرت بغصة: " مام نتا ما عندكش الحق تحكي مع النسا"
طلقها و هدر بعياط: " قتلك خدمة علاه ما تفهميش "
هديل بنفس نبرتو و هي تمسح في دموعها: " و علاه نتا ما تفهمش كي نقلك قراية؟!"
كريم ببرود: "مرتي و ما تهدري مع حتى واحد، عجبك اللهم بارك ما عجبكش تنفذي بالسيف عليك"
طاحو دموعها بخيبة في كل مرة يوصللها فكرة انو هي حاجة يملكها و ما عندهاش حق تناقش، دورت باش تخرج بصح هو حبسها : " مازلت ما كملتش هدرتي "
هديل: " مازال كاين كاش إهانة ما قلتهاش؟! "
كريم: " غدوة كنا خارحين annulé عندي خدمة "
شافت فيه بعتاب و خرجت، و هو ضرب الفوطاي قدامو و قعد.
.....................................
دخلت زينة للبيرو في يدها قهوة تاع سيف حطتها فوق البيرو و هدرت: " تحتاج حاجة خلاف موسيو سيف؟! "
هز سيف راسو من لورق لي قدامو و هدر: " فاطمة تغدات؟! "
هزت زينة راسها بلالا و هدرت: " لالا موسيو سيف ما حبتش "
ضرب سيف البيرو تاعو و هدر: " علاه ما جيتيش و قلتيلي "
زينة بخوف: " هي قاتلي بلي ماحاباش تاكل و...... "
سيف بترقب: " و واش؟! "
بلعت زينة ريقها و كملت: " قالت ما يهمنيش فيه "
هز سيف حاجبو و هدر: " في شكون فيا؟! "
هزت زينة راسها بهيه و سكتت، حط سيف يديه على البيرو و هدر: " و واش صرا تاني زينة اهدري "
زينة بإرتباك: " موسيو سيف ما تقولهاش بلي قتلك بصح طلبت مني نمدلها طيليفوني باش تعيط "
سيف: " ولمن حتعيط؟! "
زينة: " ما علاباليش"
سيف بصرامة: " روحي درك زينة و نحب كلش يصرا يوصلني كل كبيرة و صغيرة "
زينة: "حاضر"
########################
علابالي كترت بالروطار ديزولي بصح كانو عندي ليزانطيرو و قراية نشاىه يعجبكم البارت
أنت تقرأ
كرونيك عشق مخيف 🇩🇿💔❤️
Romanceكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
