كرونيك عشق مخيف 🇩🇿💔❤️

Chapter14

عدا نهار جديد على عايلة الصياد، هديل لي قررت تعيش حياتها ليها ماشي لعباد خلاف على حسابها و سلمى و عايلتها لي تخمامهم كامل فالدراهم لي حتديهم فاطمة كي تبدل نقمتها و تولي قانونيا من عايلة الصياد، أما فاطمة فنهار كامل و هي تخمم في هدرة سيف و نفسيتها تدهورت كتر كيفاه تقدر تتقبل بلي عايلتها لي حسنو معاملتها و ما بخلو عليها بوالو هوما نفسهم لي تسببو في انها تعيش الأزمة لي راهي عايشتها درك.
........................................
في شركة الصياد
كان سيف مترأس طاولة الإجتماع على يمينو خوه و على يسارو ياسين صاحب عمرو و حداه ياسر ولد عمتو في اجتماع مع شركة اجنبية
ياسين بصوت خافت باش يسمعو سيف لي تشتت تركيزو : " ركز وينك؟! "
تنهد سيف و هدر: " We will never make any changes at the contract level "
(لن نقوم بأي تغييرات على مستوى العقد )
المدير التنفيدي للشركة لخرى: "But the executive condition is my incapacitation"
(لكن الشرط التنفيدي تعجيزي لنا )
سيف بجمود: " this is Our decisions "
(هذا هو قرارنا)
دار صمت كبير و أعضاء المجلس تاع الشركة يشوفو في بعضاهم، من جهة الشرط تعجيزي بالنسبة للشركة تعهم يعني ما يقدروش يتراجعو على العقد هذا و اذا تراجعو خسارتهم حتكون كبيرة و من جهة خلاف عقد مع شركة سيف حيخرجهم من الغرقة يعني مام اذا كان الربح لي حيديه سيف من هاد العقد أكبر من الربح تعهم لكن مجرد انو يدخل في صفقة معاهم هدا ربح كبير.
هز راسو و وقع على العقد لي كان قدامو و خرج هو و الأعضاء لي معاه.
خرج ياسر بسكات أما سيف تنهد و رجع راسو لور،
نطق ياسين بصدمة: "أول مرة سيف الصياد يكون ماهوش مركز في إجتماع واش صرالك؟!" و زاد شاف في كريم و هدر: " قداه من مرة نقولولك ما تخليش مشاكلك العاطفية تأثر على خدمتك "
شاف فيه كريم ببرود و هدر: " تعرف تسكتنا؟! "
شاف سيف في كريم و هدر بجدية: "واش صرا تاني بينك و بين هديل"
تبسم كريم و هدر: " علاه انا جيت سقسيتك واش صرا بينك و بين فاطمة "
طلع سيف حاجبو و قبل ما يهدر سبقو صوت ياسين المصدوم: "بلعقل بلعقل شكون هادي فاطمة و واش علاقتها بسيف؟! "
زير سيف على يدو و وفق راح جيهة الطاقة لي مالية الحيط و بدا يتكيف و هو ساكت.
كريم بإبتسامة سخرية: " بنت عمنا لي كان سيف يحوس عليها لقيناها و سيف ما قادرش ما يخممش فيها ليل نهار و هي في مخو "
ياسين: " هههه سيف؟! و طفلة؟! "
دار سيف يشوف معاهم و هو حاط يدو في جيبو و هاز الڨارو في يدو لخرا يتكيف فيه و هدر: "بدلو الsujet"
تبسم ياسين و وقف: "يعني ما قلتش ما كانش منها"
خرج سيف الدخان من فمو و هدر و هو يشوف من الطاقة: "ياسين اقفل الموضوع"
ضحك ياسين و دور عند كريم لي رجع ظهرو على الكرسي هو يتبسم بإستمتاع: " اهيه احكيلي على فطوم هادي كي... "
قاطعو سيف بعياط: " يااااسين "
ضحك ياسين و هدر: " ااااا لالا و نغيرو "
سكت و دور عندو بفجأة: "و منار؟!"
هز سيف راسو بمعنى واش و خرج الدخان من فمو و هدر: " واش بيها؟! "
ياسين: " كيفاه واش بيها يخي خاطبها "
مشا سيف للطابلة طفا دخانو و هز حوايجو و جاوبو: " أنا ما لبستها خاتم ما قتلها بلي نحبها ما خطبتها من عند باباها ما معنيتلها"
ياسين بجدية: "بصح نتا ما قلتش لالا كي جدك قالك اخطبها كنت تماطل برك سيف و الطفلة علقت آمالها فيك"
سيف وهو خارج من البيرو: "في هداك الوقت ما كانتش تفرق معايا لي نزوجها منار و لا أي وحدة"
ياسين بصوت عالي باش يسمعو سيف لي حل الباب و خارج: " يعني درك تفرق معاك "
خرج سيف و قفل الباب و لحقو ياسين و كريم لي كانو يتغيمزو عليه.
......................................
فالفيلا كانت هديل واقفة قدام مراتها تعدل في شعرها و هزت ساكها و هبطت لقات حنان قاعدة فالصالة مع جدها لي هدر: " وين رايحة هديل؟! "
وقفت فالباب و جاوبتو بإبتسامة: " خارجة مع صحباتي "
هز راسو و هي خرجت لقات الشيفور يسنا فيها قدام الباب تاع الطونوبيل وقفت قدامو هو حللها الباب باش تركب
هديل: " اعطيني المفتاح حنسوڨ أنا "
جبد المفتاح و مدهولها و حللها الباب لي من ڨدام ركبت و خرجت من الفيلا علابالها بلي كريم حيقلق و حيدير مشكل مي قررت منا ورايح تخليه هو لي يخمم في طريقة معاملتو ليها ماشي العكس.
.......................
عند المغرب رجع سيف و كريم من الخدمة دخلو للصالة قعدو مع جدهم يحكيو على الخدمة حتى دخلت منار قعدت قدام جدها محظنتلو يدو و هدرت مع كريم: " كيفاه حتى خليتها تروح؟! "
هز كريم حاجبو بإستغراب و هدر: " خليت شكون؟! "
منار: " هديل شكون زعما؟! "
عدل كريم روحو و هدر بجدية: " وين خليتها تروح؟! "
منار بخبث: " مع هدوك لي يقراو معاها لي دارت لانيفارسير تعها السمانة لي فاتت و لبروف تعهم هداك لي ما تحبوش نتا؟! "
وقف كريم و هدر بغضب: " وين راحت معاهم؟! "
هدر جدو بهدوء: " خرجت قبيل في بالي قاتلك "
هز راسو و هدر بين سنيه: " نتفاهمو هديل نتفاهمو "
جبد طيليفونو عيطلها ما حبتش تهز بعد طيليفون على ودنو و حك لحيتو يعني خارجة بلا ما تشاور و زيد ما تهزش عيط للشيفور تعها سناه هز و هدر: " وينكم؟! "
الشيفور: " مادموازال هديل خرجت وحدها ما دي...... "
كوبا عليه قبل ما يكمل و عاود عيطلها نفس النتيجة.
منار: " تبانلي ما سمعتوش علاخاطر كانو يضحكو و يهدرو "
خزر فيها سيف و هي هزت كتافها و سكتت، هوما هكاك حتى دخلت هديل هازة في يدها ساكها طلعها كريم و هبطها بعينيه و هدر بهدوء: " وين كنتي؟! "
جاوبتو هديل ببرود و هي طالعة لبيتها: " كنت مع صحاباتي "
تبسم كريم بإستغراب و دار باش يلحقها حتى حبسو صوت سيف: " كريم ما تنساش بلي هادي راهي ردة فعل على واش نتا كنت تدير "
هز كريم راسو و هدر: " درك تشوف ردات الفعل تاع الصح كيفاه يكونو"
هز سيف راسو بيأس من خوه و خرج طلع لبيروه عاود عيط لياسين لي حرڨ عليه الطيليفون .
ياسين: " علاه ما تريبونديش "
سيف ببرود و هو يقعد في كرسيه: " ماكنتش قاعدلك واش تحتاج؟ "
ياسين: " ما نحتاج والو بصح نتا تحتاج شوية لباقة "
سيف: "ما عندكش حاجة مهمة حتقولها؟!"
ياسين: " كنت حنقولك بلي المزاد السمانة الجاية "
عدل سيف قعدتو و هدر بجدية: " ياسين علابالك قداه تهمني الشركة هادي نحب الأسهم نديوهم حنا "
ياسين: " اتهنا عندي هادي "
كملو هدرو على الخدمة و من بعد كوبا عليه و خرج رايح لبيتو عدا على بيت فاطمة وقف قدامها يخمم اذا يدخل عندها ولا لالا، حسم أمرو و طبطب دخل لڨاها ڨاعدة في سريرها و هادية تحطلها في عشاها قدامها.
فاطمة بحقد: " علاه جيت نسيت حاجة ما قلتهاليش البارح؟! "
تجاهلها و دار عند هادية و هدر بتساؤل: " علاه جيتي نتي وين راهي زينة "
هادية بحرج: " مريضة علاهاديك جيت أنا "
هزلها راسو و هي خرجت قرب عند فاطمة وقف قدامها و قبل ما يهدر سبقتو هي: " توضحتلي الصورة كنت في بالي تحقد عليا ظهرت تتعامل مع الناس كامل بطريقة همجية "
هز راسو و هدر: " الحمد لله لي فهمتي "
فاطمة بملل: " علاه جيت؟! "
سيف بجمود: "عندك خمس دقايق تحكي فيهم مع لي تسميهم عايلتك ما نزيدكش ثانية فوق الخمس دقايق"
شافت فيه فاطمة بعدم تصديق و هدرت: " منك صح؟! "
مدلها طيليفونو و هدر ببرود: " بداو الخمس دقايق تاعك "
###########################
علابالي طووووووولت بصح و الله كنت فليكونطرول و نعوضكم نشاله