كانو واقفين فالسبيطار عندهم كتر على خمس سوايع يسناو فالعملية تخلص عادل واقف قدام الباب تاع العمليات و فاطمة و سيف قاعدين في كراسا قراب من لاصال.
وقف سيف و بعد عليهم بلا ما يقول حتى كلمة و عينين فاطمة يتبعو فيه بفضول حتى لقات طبيب وقف قدامها طلعت راسها و غير شافتو وقفت و هي تتبسم: " وسيم؟! واش تدير هنا؟!"
وسيم: " نتي لي واش تديري هنا سمعت بلي داوك عايلتك ولا حاجة كيما هك ؟! "
فاطمة: " ماما حتدير عملية هنا علاهاديك جيت، بصح غبت سمانة خليتك طالب نجي نلقاك طبيب؟! ههه"
وسيم بضحك: " السمانة لي غبتيها عدات عليا خمس سنين la preuve راني وليت طبيب "
فاطمة: " ههه تافه نحكي مني صح "
وسيم بإبتسامة: " يا بنتي راني سطاج "
وقبل ما تجاوبو فطيمة لقات سيف واقف قدامها و عينو على وسيم لي راحتلو البسمة من وجهو بسبة نظرات سيف.
سيف بجمود:"خلصت العملية؟! "
وسيم بإبتسامة : " لالا انا مانيش الطبيب تاع خالتي سامية انا جارهم و كي شفت فاطمة حبيت نحكي معاها و نتا شكون "دور شاف في فاطمة و هدر" ما عرفتيناش!!! "
فاطمة: " هدا سيف ولد عمي و هدا وسيم كان يقرا معايا و درك راهو سطاج هنا "
توتر وسيم من نظرات سيف و دار موجه هدرتو لفاطمة: " بعتلك و ما وصلوكش ليميساج حتى زينب عيطتلك طيليفونك مقفول كيفاه نتواصلو معاك "
فاطمة بإبتسامة: " طيليفوني كان هنا بصح درك ديتو معايا نقدرو نحكيو عادي "
حكمها سيف من ذراعها و زير عليها و قعدها و هدر من بين سينيه: " اقعدي رجلك توجعك "
وسيم بإحراج: " المهم الطيليفون او بيناتنا فاطمة "
هزت فاطمة راسها برك و ما جاوبتوش بسبة الألم لي تحس بيه في ذراعها و غير بعد عليهم وسيم حطت يدها على يدو و هدرت بغصة: " سيف بعد يدك قاعد توجع فيا "
زير عليها كتر و هدر بهمس: " انا نقلك بعدي على عادل نجي نلقاك واقفة مع واحد و تضحكي؟! "
فاطمة: " ما عندك ما دخلك فيا نحي يدك سينو نعيط و نلم عليك الناس "
تبسم سيف تبسيمة تاع مختلين و هبط لوذنها و هدر: " ماشي انا لي نتهدد يا بنتي عمي و غير نروحو لدارنا نتفاهمو على بزااااف حوايج "
و نحا يدو منها و قعد قدامها و هي شافت فالبلاصة لي كان حاط يدو فيها و خلات طراس و هدرت و هي تشوف في عينيه: " مريض "
دور وجهو عليها و هو يخمم في هدرة منار "زعما هادا هو لي جات على جالو، هيه باينة كانت واقفة معاه و تضحك و زيد قاتلو الطيليفون بيناتنا، واش كاين بيناتهم و مدامها تحكي معاه معناها كاين بزاف عباد خلاف"
وقف و هدر بحدة: " نوضي!! "
فاطمة بإستغراب: " وين نوض؟! "
سيف بعياط: " قتلك نوضي!! "
بداو الناس يشوفو فيهم و عادل وقف قدامهم بعد ما وقفت فاطمة و هدر: " وشبيكم علاه تعيط عليها؟! "
قرب عندو سيف حتى ولا ما يفصل بيناتهم والو وهدر: " ما عندك ما دخلك "
عادل: " كيفاه ما عندي ما دخلني هادي لي راك تعيط عليها راهي ختي "
سيف بسخرية: " واش تكذبو الكذبة و تصدقوها!! "
وقفت فاطمة و بعدت بيناتهم: " هبلتو؟! رانا في سبيطار " و دورت عند عادل و كملت " ماكان والو درك نروح نشوف واش يحتاج و نجي "
و هزت ليبيكيل تعها و دورت تشوف في سيف: " هيا "
مشا و حكمها من ذراعها و هي نفضتها و هدرت بين سنيها: " ما تقيسنيش "
وصلو للحديقة تاع السبيطار و سيف باقي يشوف في عينيها و ساكت حتى هدرت هي : " خرجتني باش تبقا تشوف في وجهي؟! "
سيف بجمود: " واش بيناتكم؟! "
فاطمة بإستغراب: " شكون حنا؟! "
سيف: " نتي و هداك لي كان واقف معاك"
فاطمة بسخرية : " ههههه واش رايك لوكان نستغلو فرصة انو رانا فالسبيطار و نديوك لطبيب نفسي يمدلك كاش دواء علاخاطر حالتك راهي تدهور "
سيف ببرود: " جاوبي "
فاطمة بعياط: " مهبول نتا؟! انا راني نسنا في ماما تخرج من العملية و نتا تقولي واش بيناتكم؟! "
سيف بحدة: " نقصي في صوتك و جاوبي "
بقات تشوف فيه بأنفاس لاهثة من انفعالها و قربت لوجهو و هدرت: " مانيش حنقلك واش بيناتنا و ابقا هكا كول بعضاك "
و دارت باش تروح بصح هو حبسها و هدر بإنفعال: " جيتي على جالو، على جالو لي درتي هداك الفيلم كامل؟! باش تجي و تتلاقايه!! "
فاطمة بحدة: " وين نتلاقاه نتا لي جبتنا لهاد لكلينيك ماشي انا، روح تداوي سيف روح بعدني "
و مشات و خلاتو و هو دخل يدو في شعرو تخمامو راح يقتلو ما علابالوش واش الصح و واش الغالط.
#################
علابالي قصييييير بصح و الله كتبتو علاخاطر وعدتك Achjgfgh و نشاله نلتزم بمواعيد و نرجع نكتب
أنت تقرأ
كرونيك عشق مخيف 🇩🇿💔❤️
Romanceكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
